Gimed E Kristiano​—⁠mu Ufgad Ni Bochan E Gimed E Kristiano!

“En ni ba adag ni nge weliy murung’agen ni ir e sorok e thingari weliy murung’agen e n’en ni ke ngongliy Somol, me mang ir e uf ngay.”​—1 KORINTH 1:31.

1. Uw rogon e pi yurba’ i teliw u wan’ boor e girdi’?

“DARIY FAN ban’en u wan’uy.” Be’ ni ma weliy e pi n’en ni be rin’ e pi yurba’ i teliw e ke yog e re thin nem u nap’an ni weliy rogon raba’ i teliw rorad u wan’ boor e girdi’. Be gaar: “Bay ban’en ni baga’ fan ni ke buch u fithik’ e pi yurba’ i teliw e ngiyal’ ney​—gathi ke sum barba’ i teliw—​ya ke sum ba lem ni ke dariy fan ban’en u wan’uy.” Ke weliy morngaagen e re lem nem ni aram e “dariy fan raba’ e teliw rok be’ u wan’.” Be gaar: “Boor e girdi’ e mich Got u wan’rad . . . machane dariy fan Got u wan’rad.”

2. (a) Mang fan ni dab da gin gad ngay ni ke dariy fan e machib u wan’ boor e girdi’? (b) Mang riya’ nrayog ni nge aw e pi Kristiano ngay ni bochan e dariy fan ban’en u wan’ boor e girdi’?

² Manang e piin ni ma fil e Bible ni ra yodor. (Luke 18:8) Ma gad manang ni ra dariy fan e pi yurba’ i teliw u wan’ e girdi’. Ya ke bannag e pi yurba’ i teliw e girdi’ ni ba n’uw nap’an ma dar ayuweged e girdi’ nrogon. (Revelation 17:15, 16) Machane nge ayuw e tin riyul’ e Kristiano ni bochan ni arrogon e lem rok e girdi’ nu fayleng. Dabi aw ni nge dariy fan e michan’ rodad ara machib nu Bible u wan’dad ma nge war e pasigan’ rodad ni gad be pigpig ku Got. Ke ginang Jesus e tin somm’on e Kristiano ni kar pared u Laodicea ni gaar: “Machane bochan e gab mathilin ni gathi ri gab gowel, ma ku da mu garbeb. . . Ya ke lukngum u lanin’um.”​—Revelation 3:15-18.

Nge Tamilang U Wan’dad ko Gad Mini’

3. Mang e rayog ni nge uf e pi Kristiano ni bochan?

³ Faan gad ra togopuluw ko lem ko fayleng ma thingari tamilang u wan’ e pi Kristiano ko yad mini’, ma thingar ra ufgad nga rarogorad ni yad ba lingagil u fithik’ yugu girdi’. Gad e pi tapigpig rok Jehovah ma gad pi gachalpen Kristus e be weliy e Bible ko gad mini’. Gad e “pi mich” rok Jehovah, ma gad “ma maruwel Got u taabang” u nap’an ni gad be wereg “fare thin nib fel’” nge rung’ag yugu boch e girdi’. (Isaiah 43:10; 1 Korinth 3:9; Matthew 24:14) Ma gad ba ulung ni “nge bagadad ma ba t’uf bagadad rok.” (John 13:34) Tin riyul’ e Kristiano e “kar filed rogon ni ngar nanged e tin nib fel’ ko tin nib kireb.” (Hebrews 5:14) Ma “be gal ramaedad u fithik’ e girdi’ nu fayleng.” (Filippi 2:15) Gad be guy rogon ni “ngada pared u fithik’ e piin ndar nanged Got nib fel’ pangidad.”​—1 Peter 2:12; 2 Peter 3:11, 14.

4. Ra diin me nang be’ ni ma meybil ngak Jehovah ko mang e gathi bang ko rarogon e Kristiano?

⁴ Ma piin ni yad ma liyor ngak Jehovah nrogon e ku yad manang ko mang e gathi bang ko rarogorad. “Gathi yad e girdi’ nu roy u fayleng” ni bod rogon e Pilung rorad ni Jesus Kristus ni gathi ir bang ko fayleng. (John 17:16) Yad ma par ni yad ba dar ko “pi nam” ni “ma par lanin’rad u fithik’ e lumor ma dawori yog ngorad e bin ni ma pi’ Got e wok.” (Efesus 4:17, 18) Aram fan ni pi gachalpen Jesus e “kar paged e ngongol nde m’agan’ Got ngay nge chogowen urngin ban’en u fayleng nde mat’aw u owchen Got ma yad par ni yad be t’ar lanin’rad ko tin nde fel’ ma yad ba yal’uw ma yad be rin’ e tin nib m’agan’ Got ngay u roy u fayleng.”​—Titus 2:12.

5. Mang fan fare thin ni “ngada ufgad ni bochan Jehovah”?

⁵ Ba tamilang u wan’dad ko gad mini’ ma ba fel’ thildad e Ani Th’abi Pilung ere gad “ma uf” ni bochan Jehovah. (1 Korinth 1:31) Uw rogon e re uf ney? Gad e tin riyul’ e Kristiano e gad ba uf ni bochan ni Jehovah e ir e Got rodad. Gad ma fol ko fare thin ni gaar: “Faanra ba adag be’ ni nge uf ma nge uf ngog ni bochan e manangeg, ma manang ni gag Somol e gub gol ma gu ma rinˈ e tin nib yal’uw nge tin nib mat’aw u fayleng.” (Jeremiah 9:24) Gad ma “uf” ni bochan e gad ba taw’ath ni gad manang Got ma gad be maruwel rok ni ngada ayuweged yugu boch e girdi’.

Fare Magawon

6. Mang fan ni ke magawon boch e girdi’ ni nge tamilang u wan’rad ni yad e Kristiano?

⁶ De mom ni ngari tamilang rarogodad u wan’dad ni gad e Kristiano ni gad ba lingagil. Reb e pagal ni kan chuguliy nrogon e Kristiano e be weliy rogon ni ke meewar e michan’ rok ni boch ngiyal’. Be gaar: “Yu ngiyal’ ma da gu nang fan ni gag reb e Mich Rok Jehovah. Nap’an ni gub madway ma gu bay u fithik’ e machib nriyul’. Yu ngiyal’ ma kug lemnag ni dariy ban’en nib thil riy ko pi yurba’ i teliw.” Ma yugu boch e girdi’ e kar paged ni girdien e kachido ara girdi’ ni ma tang ara kar paged e pi shimbung ara television ara kar paged e lem nu fayleng ni nge gagiyegnag rarogorad. (Efesus 2:2, 3) Yu ngiyal’ ma ma maruwaran’ boch e Kristiano ni yad be fl’eg i lemnag rarogorad nge tin ni yad be nameg.

7. (a) Mang skeng e ba fel’ ni nge skengnag e tapigpig rok Got ir? (b) Mang riya’ ni bay?

⁷ Ba kireb ni nge skengnag be’ rarogon, fa? De kireb. Sana ka ga manang e thin rok apostal Paul ngak e pi Kristiano ni ngar skengnaged yad: “Mu changargad ngomed ko gimed be par ni gimed be ngongol u fithik’ e michan’ romed ngak Kristus fa danga’.” (2 Korinth 13:5) Be yog fare apostal ni ngada yaliyed gadad ya ngada guyed ko bay bang ko michan’ rodad ni ke meewar, ma ngada yal’uweged e pi n’en ni ke meewar. Be’ ni Kristiano ni be skengnag e michan’ rok e be turguy ko bpuluw e thin rok nge ngongol rok ko pi n’en ni ke michan’ ngay. Machane faan gad ra sap nga wuru’ e thin rok Jehovah ara u wuru’ e ulung ni Kristiano ma ra yan i aw nib m’ay fan e re skeng nem ni gad be yaliy rarogodad maku bay e riya’ riy.a Dubdad ni “ke kireb rogon e mich Kristus u wan’dad”!​—1 Timothy 1:19.

Ka Ma Yib E Magawon Ngodad

8, 9. (a) Mang e thin rok Moses ni ke maruwaran’? (b) Mang e rin’ Jehovah ni bochan e ke maruwaran’ Moses? (c) Uw rogon u wan’um ni bochan e thin ni ke micheg Jehovah ngak Moses?

⁸ Faanra maruwaran’ be’ ni Kristiano yu ngiyal’ ma kari mul e michan’ rok, fa? Ri danga’! Gathi fin chiney ni ke maruwaran’ e girdi’. Immoy boch e mich rok Jehovah ni yad ba yul’yul’ ni ke maruwaran’rad. Susun, Moses e ir be’ ni rib gel e michan’ rok ma ir ba yul’yul’ ma ma liyor ngak Got. Machane nap’an ni kan pi’ reb e maruwel nib gel ngak, me fith Moses: “I gag mini’?” (Exodus 3:11) Gowa be yog Moses, “Gathi gu ba gilbuguwan!” ara “Da gu salap!” Ga ra lemnag rarogon Moses ma ra tamilang ko mang fan ni ke lemnag ni de bung rogon: Ir be’ ko ba nam i sib. Mus ko piyu Israel ma kar pied keru’rad ngak. Gathi ba salap ko welthin. (Exodus 1:13, 14; 2:11-14; 4:10) Ir be’ ni tachugol saf, ma ma sonogor piyu Egypt ko re maruwel nem. (Genesis 46:34) Aram fan ni lemnag Moses ni de bung rogon ni nge ayuweg e girdi’ rok Got ni yad e sib!

⁹ Machane ke gelnag Jehovah laniyan’ Moses ni ke micheg l’agruw ban’en ngak: “Bay gu un ngom, ma baara’ e mich riy ni bayi m’ug ni gag e kug l’ogem, nap’an ni ga ra fek piyu Israel nga wuru’ yu Egypt, ma bay mub mu yibil ngog u daken e re burey ney.” (Exodus 3:12) Ke magawon Moses ere ke yog Got ngak e tapigpig rok ni gubin ngiyal’ ma bay rok. Miki micheg ngak ni dabi siy ni ra ayuweg e girdi’ rok. U lan bokum miriay e duw e ke pi’ Got e ayuw ni aram rogon. I non Got ngak piyu Israel u daken Moses u nap’an ni yad be n’en ni nga ranod nga lan Fare Binaw ni ke micheg ngorad ni gaar: “Mpired ni gimed ba gel ma damur rusgad. Dab mu tamdaggad ngorad. Ya Got romed ni aram Somol e bayi un ngomed: dabi pagmed ngam wargad ara n’agmed.” (Deuteronomy 31:6) Ki micheg Jehovah ngak Joshua ni gaar: “Dariy be’ nrayog rok ni nge gel ngom u n’umngin nap’an e yafos rom. Bay gu un ngom ni bod rogon ni ug un ngak Moses. Ma ri dab gu pagem.” (Joshua 1:5) Miki micheg ngak e pi Kristiano ni gaar: “Ri dab gu pagem; ma ri dab gu n’igem.” (Hebrews 13:5) Susun ni ngada ufgad ni gad e Kristiano ni bochan e bay e re ayuw nem rodad!

10, 11. Uw rogon ni kan ayuweg Asaph ni be’ nu Levi ya nge yal’uw e pigpig ni be tay ngak Jehovah u wan’?

¹⁰ Gonapan lal miriay e duw nga tomren Moses ma immoy be’ nib yul’yul’ ko ganong rok Levi ni Asaph fithngan ni ke yoloy nga but’ e pi n’en ni ke maruwaran’ ngay ni ke maruwaran’ ko bay angin e ngongol nib mat’aw fa. Ke gafgow Asaph ni be pigpig ku Got u fithik’ e skeng nge magawon, machane be guy e piin ni yad ma togopuluw ku Got ni gowa ke fel’ rogorad. Uw rogon u wan’ Asaph? Be gaar: “Machane i chugur ni nggu dol’; rifrif rog e chugur ni nge sirgig ni bochan e awan’ug ngak e piin ni yad ba uf, ya gguy ni piin nib kireb e boor ban’en rorad.” Ke tabab ni nge maruwaran’ me lemnag ni dariy angin ni ke meybil ngak Jehovah. Ba aray rogon u wan’ Asaph: “Gur, mm’ay fan ni kug tiyeg ni gub machalbog, ma gu be ayuw gu be par ndagur ngongliy e denen? Got, kam tiyeg gu be gafgow ni kakadbul nge mada’ ko nep’; gubin e kadbul ni ga be gechigniggeg!”​—Psalm 73:2, 3, 13, 14.

¹¹ Mang e rin’ Asaph ni bochan e ke wagey laniyan’? Ke tay ni yugu dariy? Danga’. Ke meybil ku Got me weliy rogon ni ke wagey laniyan’ ma bay e thin rok u Psalm guruy ni 73. Ke thil laniyan’ Asaph u nap’an ni yan nga tempel. U rom u lan e tempel e ke tamilangan’ ni pigpig ni be tay ku Got e aram e bin th’abi fel’ e kanawo’. Ki gel e michan’ rok biyay me nang fan ni ma fanenikay Jehovah e kireb ma ra taw ko ngiyal’ nra m’ag ngay ma ra gechignag Got e piin nib kireb. (Psalm 73:17-19) Ki tamilang u wan’ Asaph ko ir mini’ ni ir reb e tapigpig rok Jehovah ni kari taw’ath. Be gaar ngak Got: “Machane gubin ngiyal’ ni gu ba’ rom, ni ga be kol paag. Ga be pow’iyeg ko fonow ni ga be tay ngog, ma tomur e bay mu fekeg nga fithik’ e flaab ni aram e kam ta’ fag.” (Psalm 73:23, 24) Ma aram e ke uf Asaph ni bochan e Got rok biyay.​—Psalm 34:2.

Piin Ni Ri Yad Manang Ko Yad Mini’

12, 13. Mu weliy morngaagen boch e girdi’ u lan e Bible ni kar ufgad ni bochan e bay e thin u thilrad Got.

¹² Reb e kanawo’ nrayog ni ngari tamilang u wan’dad ko gad mini’ e ngada yaliyed e michan’ rok e piin ni yad ba yul’yul’ ma ngada folwokgad rok e piin ni kar ufgad ni yad e girdi’ rok Got ni yugu aram rogon ni kan gafgownagrad. Amu lemnag Joseph ni fak Jacob. Nap’an ni kab pagal ma kan pi’ nchuway’ nge mang ba sib min fek nga Egypt ni bokum miriay e mayel palngin ko chitamangin nge tabinaw rok. Nap’an ni immoy u Egypt ma dariy reb e girdi’ nra fonownag nrogon e llowan’ rok Got ma boor e magawon ni yib ngak ni ke skengnag e yalen nge pagan’ ni be tay ngak Got. Machane kari athamgil ni ngii tamilang u wan’ ni ir reb e tapigpig rok Got ma nge par nib yul’yul’ ko tin ni manang nib mat’aw. Ke uf ni bochan e ir reb e girdi’ rok Jehovah ni yugu aram rogon ni yibe togopuluw ngak ma de tamra’ ni nge weliy rogon laniyan’.​—Genesis 39:7-10.

¹³ Meruk miriay e duw nga tomren ma kan kol reb e buliyal nu Israel ke mang reb e sib rok ba salthaw nib ga’ nu Syria ni Naaman fithngan. Ma re buliyal nem e de pag talin ko ir mini’ ni ir reb e girdi’ rok Jehovah. Nap’an ni ke m’ag ngay ma ke weliy morngaagen Jehovah me yog ni Elisha e ir e profet rok e bin riyul’ e Got. (2 Kings 5:1-19) In e duw nga tomren ma Josiah ni ir be’ nib pagal e ke mang pilung. Yugu aram rogon ni i par u fithik’ e kireb ma ke fulweg e liyor ngak Jehovah nga rogon, me fl’eg e tempel rok Got me ayuweg e nam ni nge sul ngak Jehovah. Ke uf ni bochan e michan’ rok nge raba’ i teliw rok. (2 Chronicles, guruy ni 34, 35) Daniel nge fa dalip i pagal ni yad kalbus u Babylon e dar paged talin ni yad e pi tapigpig rok Jehovah ma yugu aram rogon ni kan towasariyrad ma kan wawliyrad ma kar yul’yul’gad. Ba tamilang ni kar ufgad ni bochan e yad e pi tapigpig rok Jehovah.​—Daniel 1:8-20.

Mu Uf Ni Bochan e Gab Kristiano

14, 15. Mang boch ban’en ni gad ra rin’ ni bochan e gad be uf ni bochan e gad e Kristiano?

¹⁴ Pi tapigpig rok Got ney e kar flaabgad ni bochan e kar ufgad ni yad e girdi’ rok Got. Ma uw rogodad e chiney? Uw rogon ni ngada ufgad ni bochan e gad e Kristiano?

¹⁵ Somm’on ma gad ba uf ni bochan e ri gad ba falfalan’ ni bay fithngan Jehovah u dakendad, ma ma falan’ ngodad ma ma flaabnagdad. Ri manang Got ko mini’ pi fak. I par apostal Paul u fithik’ e wagey ko pi yurba’ i teliw machane ke yol ni gaar: “I Somol e manang e piin ni yad girdien.” (2 Timothy 2:19; Numbers 16:5) Ba t’uf rok Jehovah e piin ni “yad girdien.” Be gaar: “Ani be gad ngom e be math nga tiren owcheg.” (Zechariah 2:8) Ba tamilang ni gad ba t’uf rok Jehovah. Ma ba fel’ thildad Jehovah ya ba t’uf Got rodad. Be gaar Paul: “Machane en nib t’uf Got rok e manang Got faanem.”​—1 Korinth 8:3.

16, 17. Mang fan nrayog ni nge uf e pi Kristiano ni yad ba fel’ yangaren ara yad pilibthir ni bochan e tirok Got ban’en ni bay rorad?

¹⁶ Ba fel’ ni nge yaliy e piin nib fel’ yangaren ni kan chuguliyrad nrogon e Pi Mich Rok Jehovah ko yad e Kristiano ni bochan e ba fel’ thilrad Got. Dabiyog ni ngar ted ni ba fel’ thilrad Got ni bochan e michan’ rok e gallabthir rorad. I weliy Paul u morngaagen e pi tapigpig rok Got ni gaar: “Ya masta rok e ir e bayi turguy ko yog rok fa de yog rok e tin ni nge rin’.” Ke ul’ul Paul ngay ni gaar: “Ma gadad gubin ni aram e ra bagadad ma nge weliy ngak Got e n’en ni i rin’.” (Roma 14:4, 12) Ere ba tamilang ni dabiyog ni ngii par e thin u thildad Jehovah ni ke mus ni bochan e ba n’uw nap’an ni ke un girdien e tabinaw rodad ko machib.

¹⁷ Ka nap’an e girdi’ ma immoy e piin ni mich rok Jehovah. Ke tabab rok Abel ni be’ nib yul’yul’​—ni ke 60 miriay e duw e chiney—​ma ke taw ko fare “ulung ni baga’” ko Pi Mich Rok Jehovah e chiney ma ra yan i un bokum e girdi’ nra meybil ngak Jehovah ni manemus. (Revelation 7:9; Hebrews 11:4) Ke n’uw nap’an ma kari yoor e piin ni kar liyorgad ngak Jehovah ma gadad bang ko pi girdi’ nem. Ri gad ba taw’ath ni bochan e gad bang ko pi girdi’ nem!

18. Uw rogon ni gad ba thil ko fayleng ni bochan rarogon e Kristiano nge pi motochiyel rodad?

¹⁸ Kub mu un nga rarogodad ni gad e Kristiano e pi machib nge pi felngin nge pi motochiyel rok e Kristiano. Ereram fare “Kanawo’” ara kanawoen e yafas ara kanawo’ ni ma falan’ Got ngay. (Acts 9:2; Efesus 4:22-24) Pi Kristiano e ma “skengnag urngin ban’en, mi yad fanay e tin nib fel’ riy!” (1 Thessalonika 5:21) Ba tamilang u wan’dad e thil u thilin e Kristiano nge re fayleng ney nib palog rok Got. Ya ma tamilangnag Jehovah e thil ko bin riyul’ e meybil nge bin ni yugu ban’en. I non Got u daken Malachi ni profet rok ni gaar: “Girdi’ rog e bay kur guyed biyay e n’en nib thil u thilin e piin ni yad mmat’aw nge piin ni yad be ngongliy e kireb, ngu thilin e en ni be pigpig ngog nge en nder pigpig ngog.”​—Malachi 3:18.

19. Mang e dabi rin’ e tin riyul’ e Kristiano?

¹⁹ Ri baga’ fan ni ngada ufgad ni bochan Jehovah ya kari balyangan’ e girdi’ nu fayleng, ere mang e ra ayuwegdad ni nguuda ufgad ni bochan Jehovah ma nge tamilang u wan’dad rarogodad ni gad e Kristiano? Bay boch e thin nra ayuwegdad ko bin migid e thin ko re babyor ney. Nap’an ni gad ra fil e re thin nem ma ba aray ban’en nib mudugil: Dabi aw ni “dariy fan ban’en” u wan’ e tin riyul’ e Kristiano.

[Footnote]

Ka Ga Manang?

• Uw rogon ni nge “uf e pi Kristiano ni bochan Jehovah”?

• Mang e kam fil ko n’en ni buch rok Moses nge Asaph?

• Mini’ boch e girdi’ u lan e Bible ni kar ufgad ni bochan e yad ma pigpig ku Got?

• Mang e gad ra rin’ ni bochan e gad ba uf ni bochan rarogodad ni gad e Kristiano?

[Picture on page 12]

I maruwaran’ Moses ni boch e ngiyal’

[Pictures on page 13]

Boor e pi tapigpig rok Jehovah kakrom ni ur ufgad ni bochan rarogorad