GURUY NI 58
Mu Par ni Gab Yul’yul’ Ngak Jehovah
Tin riyul’ e Kristiano e kar dugliyed u wan’rad ndab ra paged ban’en ara be’ ni nge magawonnag e liyor rorad ngak Jehovah. Dariy e maruwar riy ni aray rogon e lem rom. Ba ga’ fan e yul’yul’ rom u wan’ Jehovah. (Mu beeg e 1 Kronicles 28:9.) Ere mang boch ban’en nrayog ni nge skengnag rogon e yul’yul’ rom ngak, ma mang e rayog ni nge ayuwegem?
1. Uw rogon nrayog ni nge skengnag yugu boch e girdi’ e yul’yul’ rodad ngak Jehovah?
Bay boch e girdi’ ni yad ra guy rogon ni ngar taleged gadad ndab kud pigpiggad ngak Jehovah. Mini’ e pi cha’ney? Bay boch e girdi’ ni kar digeyed e tin riyul’ ni yad ma weliy boch ban’en nde riyul’ u murung’agen e ulung rok Got ya ngar warnaged e michan’ rodad. Pi girdi’ ney e yima yog ni yad e piin kar digeyed e tin riyul’ kar chelgad yad be togopuluw ngay. Ku bay boch e tayugang’ ko teliw ni yad ma wereg boch ban’en nde riyul’ u murung’agdad ya ngar k’aringed e piin ndarur kol ayuwgad ni ngar digeyed e tin riyul’. De fel’ ni ngaud luaged e pi tatogopuluw e thin, ara da beeged e pi babyor rorad ara pi n’en yad ma tay ko Internet, ara darod ko pi website rorad, ara ud yaliyed e pi video rorad. I weliy Jesus murung’agen e piin yad ma guy rogon ni ngar taleged yugu boch e girdi’ ndab kur pigpiggad ngak Jehovah ni gaar: “Mpaged yad! Ya yad be pow’iy e girdi’ ma yad mmalmit; ma faanra kol reb e malmit pa’ reb e malmit ngi i pow’iy i yan, ma yow l’agruw ni yow ra mul nga wuru’ e kanawo’ nga lan wol’ e ran.”—Matthew 15:14.
2. Mang boch ban’en ni gad ma dugliy nrayog ni nge skengnag e yul’yul’ rodad ngak Jehovah?
T’ufeg rodad ngak Jehovah e ra k’aringdad ndab da uned nga ban’en ni ma rin’ e pi yurba’ i teliw ni googsur. Maruwel ni gad ma un ngay, ara pi ulung ni gad bang riy, ara pi n’en gad ma rin’ e susun e dariy ban’en riy ni nge l’ag rogon ko teliw ni googsur. Ke ginangdad Jehovah ni ke gaar: “Mired pi girdieg ngam chuwgad rok [fare Babylon nib Gilbuguwan]!”—Revelation 18:2, 4.
KUM FIL BOCH BAN’EN U MURUNG’AGEN
Mu fil rogon ndab mu pag be’ ni nge warnag e yul’yul’ rom ngak Jehovah nge rogon ni ngam dag ni gab yul’yul’ ni aram e ngam chuw ko fare Babylon nib Gilbuguwan.
3. Mu kol ayuw ko pi tamachib ni googsur
Mang e susun ni ngad rin’ed ni faanra kad rung’aged boch ban’en nib kireb ni kan weliy u murung’agen e ulung rok Jehovah? Mu beegew e Proverbs 14:15, mi gimew weliy e fulweg ko re deer ni baaray:
Mang fan ni gad ma kol ayuw ndabi mich u wan’dad urngin ban’en ni gad be rung’ag?
Mu beegew e 2 John 9-11, mi gimew weliy e fulweg ko pi deer ni baaray:
Susun nge uw rogon e ngongol rodad ngak e piin kar digeyed e tin riyul’ ma kar chelgad yad be togopuluw ngay?
Uw rogon nrayog ni nge m’ug riy ni gad be motoyil ko pi girdi’ ney ni yugu aram rogon ndarud nonad ngorad?
Ga be lemnag ma uw rogon u wan’ Jehovah ni faanra ud motoyilgad nga boch ban’en nib kireb ni yibe weliy u murung’agen ara ulung rok?
4. Mu par ni gab yul’yul’ ngak Got u nap’an nra denen reb e walag
Mang e ba milfan ngodad u nap’an ni gad ra nang ni ke rin’ be’ u lan e ulung reb e denen nib ubchiya’? Am lemnag fare kenggin e motochiyel ni bay ko fare Motochiyel ni pi’ Got ngak piyu Israel. Mu beegew e Levitikus 5:1.
Be tamilangnag e re verse ney ni faanra kad nanged ni ke rin’ be’ reb e denen nib ubchiya’, ma susun e nga dogned ngak e piin piilal. Machane u m’on riy mab fel’ ni nga dogned ngak ni nge yan i guy e piin piilal nge weliy ngorad e kireb ni ke rin’. Faanra dabi rin’, ma yul’yul’ rodad ngak Jehovah e ra k’aringdad ni nga darod dogned e re n’ey ngak e piin piilal. Faan gad ra rin’ e re n’ey, ma uw rogon nra m’ug riy ni gad be dag e t’ufeg u fithik’ e yul’yul’ ngak . . .
Jehovah Got?
faen ke denen?
e tin ka bay e girdi’ u lan e ulung?
Faanra ke magawon reb e walag mag ayuweg!
5. Mu par u orel ko fare Babylon nib Gilbuguwan
Mu beegew e Luke 4:8 nge Revelation 18:4, 5, mi gimew weliy e fulweg ko pi deer ni baaray:
Ka bay fithingag u barba’ e teliw ni googsur, fa?
Gag bang u reb e ulung nib l’ag rogon nga barba’ e teliw, fa?
Bay bang ko maruwel rog ni bay rogon ko teliw ni googsur, fa?
Ka bay boch ban’en nug ma rin’ ni be m’ug riy nib t’uf ni nggu chuw ko teliw ni googsur, fa?
Faanra bay reb ko pi deer ney ni fulweg rog riy e arrogon, ma mang e susun ni nggu rin’?
Ere mu dugliy ban’en nra ayuwegem ni nge par nib beech e nangan’ rom me m’ug riy ni gab yul’yul’ ngak Jehovah.
Mang e ga ra rin’ ni faanra ka nog ngom ni ngam pi’ e salpiy ni ayuw ni fan nga ban’en ni bay rogon nga barba’ e teliw?
MA GAAR BOCH E GIRDI’: “Ba t’uf ni nggu nang e n’en be yog e piin kar digeyed e tin riyul’ ma kar chelgad yad be togopuluw ngay u murung’agen e Pi Mich Rok Jehovah ya nge yag ni nggu ayuweg e tin riyul’.”
Ba fel’ ni ngam rin’ e re n’ey fa danga’? Mang fan ni ka mog ni arrogon?
N’EN KAN FIL
Ra ngad pared ni gad ba yul’yul’ ngak Jehovah, mab t’uf ndab ud chaggad ngak e piin yad ma guy rogon ni ngar bannaged gadad.
Ngan Sul u Daken
Mang fan nsusun e dab ud motoyilgad ko pi machib rok e piin kar digeyed e tin riyul’ ma kar chelgad yad be togopuluw ngay?
Faanra kad nanged ni bay reb e walag ni ke rinʼ reb e denen nib ubchiyaʼ, ma mang e susun ni ngad rinʼed?
Uw rogon nrayog ni ngad folgad ko fare thin ni be yog ni ngad chuwgad ko teliw ni googsur?
MU GAY MURUNG’AGEN
Mu beeg murung’agen e n’en ngam rin’ u nap’an ni yibe wereg boch ban’en nde riyul’ u murung’agen e Pi Mich Rok Jehovah.
“Urngin Ban’en Riy ni Ga Manang, Fa?” (Fare Wulyang ko Damit, August 2018)
Uw rogon nrayog ni ngam nang boch e ulung ara boch ban’en ni yima rin’ ni bay rogon ko fare Babylon nib Gilbuguwan?
Mang e ke rin’ boch e tatogopuluw ya ngar warnaged e michan’ rodad?
Mu beeg murung’agen reb e tayugang’ ko teliw ni Shinto ni chuw ko teliw ni googsur.