GURUY NI 59
Rayog ni Ngam Athamgil u Fithik’ e Gafgow ni Yibe Tay Ngom
Bay ba ngiyal’ nra taw ngay ma gubin e Kristiano ni yira togopuluw ngorad mu kun gafgownagrad. Ere gur, susun e ngad rusgad ko re n’ey, fa?
1. Mang fan ni gad manang ni yira gafgownagdad?
Be gaar e Bible: “Urngin e girdi’ ni yad ba adag ni ngar pired u reb e pangin nib m’agan’ Got ngay ma kar taab girdi’gad Kristus Jesus e bay ni gafgownagrad.” (2 Timothy 3:12) Ni gafgownag Jesus ni bochan e gathi ir bang ko fayleng rok Satan. Ku arrogodad ni gathi gad bang ko re fayleng ney. Ere dab da gingad u nap’an nra gafgownagdad e pi am ko re fayleng ney nge pi yurba’ i teliw.—John 15:18, 19.
2. Uw rogon nrayog ni ngad fal’eged rogodad ni fan ko gafgow ni yira tay ngodad?
Ba t’uf ni ngad gelnaged e pagan’ rodad ngak Jehovah e chiney. Um tay e tayim u gubin e rran ni ngam meybil ngak ma ga be beeg bang ko Thin rok. Um un ko muulung ni gubin ngiyal’. Pi n’ey e ra pi’ gelngim ni ngam par ndab mu rus u fithik’ e gafgow ni yibe tay ngom, ni mus ni faanra chon e tabinaw rom e yad be gafgownagem. Apostal Paul nib ga’ ni un gafgownag e yoloy ni gaar: “I Somol e ir e be ayuwegeg, ere dab gu tamdag!”—Hebrews 13:6.
Faanra ud machibgad ni gubin ngiyal’ maku ra ayuwegdad ndab da rusgad. Machib ni gad ma tay e ma fil ngodad rogon ni nge pagan’dad ngak Jehovah ma dab kud rusgad ko girdi’. (Proverbs 29:25) Faan ga ra guy rogon ni nge dab kum rus ni ngam machib e chiney, ma aram e ra bung rogom ni ngam ulul ko machib ngki mada’ ko ngiyal’ nra guy e am rogon ni nge talegem ko machib.—1 Thessalonika 2:2.
3. Faan gad ra athamgil u fithik’ e gafgow ni yibe tay ngodad, ma uw rogon nra yib angin ngodad?
Dubdad ni ngan gafgownagdad, machane faan gad ra athamgil u fithik’ e gafgow ni yibe tay ngodad ma ra gel boch e michan’ rodad. Ra chugur thildad Jehovah ni bochan e kad guyed ni ke ayuwegdad ko ngiyal’ ni gad be lemnag ndabkiyog ni ngad athamgilgad. (Mu beeg e James 1:2-4.) Ma kireban’ Jehovah u nap’an nra guy ni gad be gafgow, machane ma felfelan’ u nap’an nra guy ni gad be athamgil. Be gaar e Bible: “Faanra mu k’adedan’med ko gafgow ni mus ko ngiyal’ nib mat’aw e tin ni kam ngongliyed, ma ra fal’eg Got waathmed riy.” (1 Peter 2:20) Tow’ath nra pi’ Jehovah ngak urngin e piin yad ra athamgil u fithik’ e yul’yul’ e aram e yafos ni manemus u lan ba fayleng ndakuriy be’ riy nra togopuluw ko bin riyul’ e liyor.—Matthew 24:13.
KUM FIL BOCH BAN’EN U MURUNG’AGEN
Mu fil fan nrayog ni ngad pared ni gad ba yul’yul’ ngak Jehovah u nap’an ni yibe gafgownagdad nge rogon nra tow’athnagdad.
4. Rayog ni ngam athamgil ko togopuluw ni be yib ngom u lan e tabinaw
I yog Jesus nrayog ni bay boch e girdi’ u lan e tabinaw rodad ndubrad ni ngad pigpiggad ngak Jehovah. Mu beegew e Matthew 10:34-36, mi gimew weliy e fulweg ko re deer ni baaray:
Mang e rayog ni nge buch u nap’an nra dugliy be’ u lan reb e tabinaw ni nge pigpig ngak Jehovah?
Mu yaliyew e re VIDEO ney ni be weliy murung’agen ba wu’ e mabgol ni buch e re n’ey rorow, mi gimew weliy e fulweg ko re deer ni baaray.
Mang e ga ra rin’ ni faanra guy reb e girdi’ rom ara fager rom rogon ni nge talegem ndab kum pigpig ngak Jehovah?
Mu beegew e Psalm 27:10 nge Mark 10:29, 30. Tomuren ni kam beegew reb ko gal thin nu Bible ney, mi gimew weliy e fulweg ko re deer ni baaray:
Faanra togopuluw chon e tabinaw ara pi fager rom ngom, ma uw rogon nra ayuwegem e re thin ney?
5. Mu ulul ko liyor ni ga be tay ni yugu aram rogon ni yibe gafgownagem
Nap’an nra guy e girdi’ rogon ni ngar taleged gadad ndab kud pigpiggad ngak Jehovah, mab t’uf ni ngad pared ndab da rusgad. Mu yaliyew e re VIDEO ney, mi gimew weliy e fulweg ko re deer ni baaray.
Uw rogon ni be ayuwegem e n’en ni rin’ e pi cha’ney ni nge dab mu rus?
Mu beegew e Acts 5:27-29 nge Hebrews 10:24, 25. Tomuren ni kam beegew reb ko gal thin nu Bible ney, mi gimew weliy e fulweg ko re deer ni baaray:
Mang nrib ga’ fan ni ngad ululgad ko liyor ni gad be tay ngak Jehovah ni yugu aram rogon ni ke taleg e am e machib ara muulung rodad?
6. Ra ayuwegem Jehovah ni ngam athamgil
Boor e Pi Mich Rok Jehovah nib thilthil yangarrad nge rarogon e gin kar bad riy ni kar ululgad ko pigpig ni yad be tay ngak Jehovah u fithik’ e yul’yul’ ngki mada’ ko ngiyal’ ni yibe gafgownagrad. Mu yaliyew e re VIDEO ney ni be weliy e n’en ni ayuwegrad. Tomuren mi gimew weliy e fulweg ko re deer ni baaray.
Mang e ayuweg e pi walag ney ni kan dag yaarad ko re video ney ni ngar athamgilgad?
Mu beegew e Roma 8:35, 37-39 nge 2 Korinth 4:7. Tomuren ni kam beegew reb ko gal thin nu Bible ney, mi gimew weliy e fulweg ko re deer ni baaray:
Uw rogon ni be micheg e re thin ney ngom ndemtrug e skeng nra yib ngom ma rayog ni ngam athamgil u fithik’?
Mu beegew e Matthew 5:10-12, mi gimew weliy e fulweg ko re deer ni baaray:
Mang fan nrayog ni ngam felfelan’ ni yugu aram rogon ni yibe gafgownagem?
Bokum milyon e tapigpig rok Jehovah ni ke yag ni ngar athamgilgad u fithik’ e togopuluw ni yibe tay ngorad. Ere ku rayog rom!
MA GAAR BOCH E GIRDI’: “Dabiyog ni nggu athamgil u fithik’ e gafgow ni yira tay ngog.”
Mang boch e thin nu Bible nrayog ni nge ayuwegrad ni nge pagan’rad?
N’EN KAN FIL
Ba ga’ fan u wan’ Jehovah e athamgil ni gad ma tay ni ngad pigpiggad ngak ni yugu aram rogon ni yibe gafgownagdad. Rayog ni nge ayuwegdad ni ngad athamgilgad!
Ngan Sul u Daken
Mang fan ni manang e piin Kristiano ni yira gafgownagrad?
Uw rogon nrayog ni ngam fal’eg rogom e chiney ni fan ko gafgow ni yira tay ngom?
Mang e rayog ni nge ayuwegem ni nge pagan’um nrayog ni ngam pigpig ngak Jehovah ni yugu aram rogon ni ga be mada’nag e skeng?
MU GAY MURUNG’AGEN
Mu yaliy yaan reb e walag ni kab pagel ni be weliy rogon ni ayuweg Jehovah ni nge athamgil u nap’an nni kalbusnag ni bochan e be par u mathilin ngongolen e am.
Mu guy e n’en ni ayuweg ba wu’ e mabgol ni ngar pigpiggow ngak Jehovah u fithik’ e yul’yul’ u lan boor e duw ni yugu aram rogon ni un togopuluw ngorow.
Mu beeg murung’agen rogon ni ngam par ndab mu rus u nap’an ni yibe gafgownagem.
“Mu Fal’eg Rogom e Chiney ni Fan ko Togopuluw ni Bay Yib” (Fare Wulyang ko Damit, July 2019)
Susun nge uw rogon u wan’dad e togopuluw ni ma yib ngodad u lan e tabinaw, ma uw rogon nrayog ni ngad athamgilgad u fithik’?