“Mmarod . . . Ngam Pingeged Yad Ngar Manged Pi Gachalpeg”

1-6. Mu weliy rogon ni ke machib boch e Pi Mich u boch e kanawo’ nib thilthil.

REBECCA nreb e Pi Mich Rok Jehovah ni kab fel’ yangaren ni ma par u Ghana e ma tay ni skul rok e aram bang nrayog ni nga i machib riy. Gubin ngiyal’ ni bay boch e babyor nib puluw e thin riy ko Bible u lan e kabang rok. Ra dan moy u class ma ma gay boch e kanawo’ ni nge machibnag e piin yad nga skul. Ere yag ni nge tabab i fil e Bible ngak in e bitir ni yad nga class.

² Bay l’agruw e pioneer ni yow ma par ko fare donguch nu Madagascar ni gubin ngiyal’ ni yow ma yan u but’ u taramaen e yal’ nsogonap’an 15 e mayel nga ranow ra tawgow nga reb e binaw nib palog ko gin ma par yooren e girdi’ riy. Boor e girdi’ u rom ni yad baadag e machib ni yow ma fil e Bible ngorad.

³ Pi Mich u Paraguay e ra uned ngak boch e walag ni kar bad u 15 e nam ngar ngongliyed bbowoch ya nge yag ni un yan riy ni ngan mada’nag e girdi’ ni ma par u marichlen fa gal lul’ ni Paraguay nge Paraná. Re bowoch nem e ba ga’ nrayog ni nge taw 12 e girdi’ ngay. I yag ni nge fanay e pi walag e re bowoch nem ni ngar machibnaged fare thin nib fel’ ko yungin nib mo’maw’ ni ngan milekag ngay.

⁴ Pi Mich u Alaska e ur machibgad u lan e pi pul nib gel e gowel riy ni aram e ngiyal’ ni ma milekag e girdi’ ngaram ko sebal. Ra taw ko pi pul nem ma boor e girdi’ u boch e nam nib thilthil ni yad ma milekag nga Alaska ni yad be yan u bogi barkow ni m’ar e girdi’ ni be sebal. Ere ma yan e Pi Mich u rom nga gampek ngar ted e cart ngaram ni bay e pi babyor rodad riy ni kan pilyeg nga boor mit e thin. Ku bay boch e walag u rom nra milekaggad u skoki nga boch e binaw nib palog ni ma par e girdi’ riy ni ka nog e Aleut, nge Athabascan, nge Tsimshian, nge Tlingit ngorad.

⁵ Larry ni ma par u Texas u Meriken e ma machibnag e piin yad ma par u reb e naun ni ma par e pilibthir riy ni ku ma par riy. Yugu aram rogon ni bay u wheelchair machane ma gay e kanawo’ ni nge machib riy. Ma weliy murung’agen Gil’ilungun Got ko girdi’ maku ma weliy ngorad nib mich u wan’ nnap’an nra yib e bin nib beech e fayleng ma ra un bayay ko yan.​—Isa. 35:5, 6.

⁶ Bay ba ulung e Pi Mich u Mandalay nra milekaggad u bowoch u lan dalip e rran ni nga ranod ra uned ngab assembly nni tay u lel’uch u Myanmar. Ra feked yu ken e babyor nib puluw e thin riy ko Bible ni ngar pied ko yug girdi’ ni kur uned ko re bowoch nem ni bochan e ri yad baadag ni ngar machibnaged fare thin nib fel’. Nap’an nra tal e re bowoch nem u reb e binaw mar oggad nga but’ nga ranod u lan fare binaw nib papey ni yad be wereg e babyor ko girdi’. Nap’an ni yad be machib ma bay boch e girdi’ ni ma yib ni ngkur uned ko re bowoch nem. Ere nap’an ni yad ra sul, ma aram e ku bay boch e girdi’ nib beech nrayog ni ngar machibnaged.

7. Mang boch e kanawo’ ni ma machibnag e pi tapigpig rok Jehovah murung’agen Gil’ilungun riy? Mang e yad be nameg?

⁷ Pi tapigpig rok Jehovah u ga’ngin yang e fayleng e yad be machibnag “murung’agen e gagiyeg rok Got” nib fel’ rogon ni bod fapi walag ni kan weliy murung’agrad. (Acts 28:23) Yad ma machibnag e girdi’ u mit e tabinaw, ngu kanawo’, maku yad ma yoloy e babyor ngar pied ko girdi’, maku yad ma machib u telefon. Ku yad ma guy rogon ni ngar weliyed murung’agen Gil’ilungun Got u nap’an ni yad be yan u bus, ngu nap’an ni yad bay u park, ngu nap’an ni yad be toffan u tabon e maruwel rorad. Demtrug ko mang e gad be rin’, ma n’en gad be nameg e aram e ngad machibnaged fare thin nib fel’ ko gin nrayog ni ngad pirieged e girdi’ riy.​—Matt. 10:11.

8, 9. (a) Mang fan ni ga ra yog nrogon ni be mon’og fare maruwel ni machib ni yibe rin’ e ngiyal’ ney e bod ba maang’ang? (b) Mang deer e ke sum, ma mang e ba t’uf ni ngad rin’ed ya nge yag nda nanged e fulweg riy?

⁸ Gur bagayad e piin be machibnag murung’agen Gil’ilungun Got u boor ko 235 e nam e chiney, fa? Faanra gur bagayad, ma rayog ni ngam felfelan’ ni bochan e ga be guy rogon ni nge yoor e girdi’ u fayleng ni nge taw fare thin nib fel’ ngorad! N’en be rin’ e girdi’ rok Jehovah e bod ba maang’ang. Pi Mich Rok Jehovah e yad be machibnag murung’agen Gil’ilungun Got ko girdi’ u gubin e nam nib fel’ rogon ni yugu aram rogon ni boor e magawon nib ga’ ni yad be mada’nag ni kub muun ngay e am ni be taleg e maruwel rorad nge gafgow ni yibe tay ngorad.

⁹ Am lemnag e re n’ey. Mang fan ni ka be yag ni nge ulul fare maruwel ni machib ni yugu aram rogon ni boor e magawon ni gad be mada’nag maku be guy Satan rogon ni nge talegdad? Ra ngad nanged e fulweg ko re deer ney, mab t’uf ni ngad filed murung’agen e n’en ni i buch u nap’an e bin som’on e chibog C.E. Ya bin riyul’ riy e Pi Mich Rok Jehovah e ngiyal’ ney e ku yad be ulul i rin’ fare maruwel ni machib nni tababnag e ngiyal’ nem.

Ba Maruwel Nrib Ga’ Fan

10. Mang maruwel e th’abi ga’ fan u wan’ Jesus? Mang e manang u murung’agen e re maruwel ney?

¹⁰ Jesus Kristus ni Ir e Sunmiy e ulung ni Kristiano e i fanay e tayim rok ni nge machibnag fare thin nib fel’ ni murung’agen Gil’ilungun Got. Aram e re maruwel nth’abi ga’ fan ni i rin’ u lan e yafos rok. Bay bayay ni gaar: “Dabi siy ni ngku gu machibnag u boch e binaw i yan fare Thin Nib Fel’ ni murung’agen e gagiyeg rok Got, ya ke l’ugeg Got ku gub ni ereray e n’en ni nggu rin’.” (Luke 4:43) Manang Jesus ni ke tababnag ba maruwel ndabiyog ni nge mu’nag ni yigoo ir. De n’uw nap’an u m’on ni nge yim’ me yiiynag ni yira machibnag murung’agen Gil’ilungun Got u “urngin e nam.” (Mark 13:10) Machane uw rogon ni yira rin’ e re maruwel ney, ma mini’ e ra rin’?

11. Mang maruwel e pi’ Jesus ngak pi gachalpen ni ngar rin’ed nib ga’ fan? Mang ayuw e yira pi’ ngorad?

¹¹ Tomuren ni yim’ Jesus min faseg ko yam’, ma aram me m’ug ngak pi gachalpen me pi’ ba maruwel ngorad ni ngar rin’ed nib ga’ fan. I gaar: “Ere mmarod ngak girdien e pi nam u gubin yang ngam pingeged yad ngar manged pi gachalpeg, mi gimed taufenagrad nga fithingan e Chitamangiy nge Fak nge fare Kan ni Thothup, mi gimed fil ngorad rogon ni nguur folgad u gubin e tin ni ku gog ngomed ni nguum rin’ed. Ma dab mpaged talin ni gubin ngiyal’ ma gu ba’ romed, nge yan i mada’ nga tomren e fayleng [“ko ngiyal’ ni ke chugur nga tungun e re m’ag ney,” NW].” (Matt. 28:19, 20) Fapi thin ni “gu ba’ romed” e be dag nra ayuweg Jesus pi gachalpen u nap’an ni yad be machib ngu nap’an ni yad be fil ban’en ko girdi’. Mab t’uf e re ayuw ney rorad ya yog u m’on riy ni ‘urngin e girdi’ ni bay ra fanenikayed yad.’ (Matt. 24:9) Machane ku bay ban’en nrayog ni nge taga’ pi gachalpen ngay ni nge ayuwegrad. U m’on ni nge sul Jesus nga tharmiy me yog ngorad nra pi’ gelngin Got nib thothup gelngirad ni ngar weliyed murung’agen “nge yan i mada’ ko yungi n’en ni yan i mus e fayleng ngay.”​—Acts 1:8.

12. Mang boch e deer ni ke sum nib ga’ fan? Mang nib ga’ fan ni ngad nanged e fulweg riy?

¹² Machane bay boch e deer ni ke sum nib ga’ fan ni aram e: Gur, ri i tiyan’ e pi apostal rok Jesus nge tin ka bay i gachalpen ko bin som’on e chibog ko maruwel ni kan pag fan ngorad, fa? Gur, i yag ni nge weliy e chi ulung i Kristiano ney murung’agen Gil’ilungun Got nib fel’ rogon ni yugu aram rogon nib gel e gafgow ni un tay ngorad, fa? I ayuwegrad Jehovah nge gelngin nib thothup u nap’an ni yad be guy rogon ni ngar ayuweged yugu boch e girdi’ ni ngar manged pi gachalpen Jesus, fa? Yira pi’ e fulweg ko pi deer ney nge yugu boch e deer u lan fare babyor ko Bible ni Acts. Ba ga’ fan ni ngad nanged e fulweg ko pi deer ney. Mang fan? Ya micheg Jesus nra ulul fare maruwel ni tay chilen ni ngan rin’ nge mada’ “ko ngiyal’ ni ke chugur nga tungun e re m’ag ney.” Ere urngin e tin riyul’ e Kristiano, ni gad ba muun e piin gad be par ko tin tomuren e rran ngay nib t’uf ni ngad folgad ko re thin ney ni tay Jesus chilen. Aram fan ni gad baadag ni ngad filed chepin e tin som’on e Kristiano ni bay ko fare babyor ni Acts.

N’en Bay ko Fare Babyor ni Acts

13, 14. (a) Mini’ e yoloy fare babyor ni Acts, ma uw rogon ni nang murung’agen e pi n’ey? (b) Mang e be weliy fare babyor ni Acts murung’agen?

¹³ Mini’ e yoloy fare babyor ni Acts? Re ke babyor ney e dariy fithingan e en ni yoloy riy, machane tin som’on e thin riy e be tamilangnag ni en ni yoloy e ku ir e yoloy e Gospel rok Luke. (Luke 1:1-4; Acts 1:1, 2) Ere kab kafram i yib ni yima yog ni Luke ni ir reb e “togta” maku ir be’ ni ma fal’eg i fil chepin e girdi’ e ir e yoloy fare babyor ni Acts. (Kol. 4:14) Re ke babyor ney e be weliy e n’en ni buch u lan sogonap’an 28 e duw ni tabab ko ngiyal’ ni sul Jesus nga tharmiy ko duw ni 33 C.E., nge yan i mada’ ko ngiyal’ nni kalbusnag apostal Paul u Roma u bang ko duw ni 61 C.E. Boor ban’en ni i yoloy Luke murung’agen ni immoy u nap’an ni be buch. Kad nanged e re n’ey ni bochan e i fanay fare bugithin ni “gamad” u nap’an ni be weliy murung’agen e pi n’em. (Acts 16:8-10; 20:5; 27:1) Luke e ir be’ ni ma fal’eg i gay murung’agen ban’en, ere dariy e maruwar riy ni i fith boch ban’en ngak Paul, nge Barnabas, nge Filip, nge yugu boch e girdi’ ni bay murung’agrad ko Acts.

¹⁴ Mang e be weliy fare babyor ni Acts murung’agen? U m’on riy me yoloy Luke nga lan e Gospel rok e pi n’en ni i yog Jesus nge pi n’en ni i rin’. Machane u lan fare babyor ni Acts e weliy riy murung’agen e pi n’en ni i yog pi gachalpen Jesus nge pi n’en ni ur rin’ed. Ere fare babyor ni Acts e murung’agen boch e girdi’ ni ur rin’ed boch e maruwel ni yira ngat ngay ni yugu aram rogon ni i lemnag e girdi’ ‘ndariy e sukul rorad.’ (Acts 4:13) Re ke babyor ney ni ayuweg gelngin Got nib thothup Luke ni nge yoloy e be weliy rogon ni sum e ulung ni Kristiano nge rogon ni ga’. Ku be weliy rogon e machib ni i tay e pi Kristiano ko bin som’on e chibog nge rogon e lem rorad u murung’agen e re maruwel ney. (Acts 4:31; 5:42) Ku be weliy rogon ni i ayuwegrad gelngin Got nib thothup ni ngar wereged fare thin nib fel’. (Acts 8:29, 39, 40; 13:1-3; 16:6; 18:24, 25) Fare babyor ni Acts e bod e tin ka bay e babyor ko Bible ya be tamilangnag rogon nra tay Gil’ilungun Kristus fan e ngachal rok Got ni aram kenggin e machib u lan e Bible, maku be dag rogon ni yag ni nge machibnag pi gachalpen Jesus fare thin nib fel’ ni murung’agen Gil’ilungun Got ni yugu aram rogon ni boor e girdi’ ni i togopuluw ngorad.​—Acts 8:12; 19:8; 28:30, 31.

15. Mang boch i angin nra yib ngodad ni faan gad ra fil e n’en bay ko fare babyor ni Acts?

¹⁵ Arrogon, ri gad ba felfelan’ ni ngad filed e n’en bay ko fare babyor ni Acts maku ra gelnag e michan’ rodad! Faan gad ra fal’eg i lemnag rogon nda i rus e tin som’on i gachalpen Kristus nge farad pasig, ma ra ga’ fan u wan’dad e n’en ni ur rin’ed. Ku ra k’aringdad ni ngad folwokgad ko michan’ rorad, ma gad lebguy e maruwel ni kan pi’ ngodad ni aram e ngad pingeged e girdi’ ‘ngar manged pi gachalpen’ Jesus. Re ke babyor ney ni ga be beeg e chiney e kan ngongliy ni nge ayuwegem ni ngam fal’eg i fil fare babyor ni Acts.

Ba Ke Babyor ni Nge Ayuwegdad

16. Mang dalip i fan ni kan ngongliy e re ke babyor ney?

¹⁶ Mang fan ni kan ngongliy e re ke babyor ney? Dalip fan ni kan ngongliy ni aram e (1) nge ayuwegdad ni ngari mich u wan’dad ni be fanay Jehovah gelngin nib thothup ni nge ayuweg fare maruwel ni machib nge rogon ni yibe ayuweg e girdi’ ni ngar manged boch i gachalpen Jesus, (2) ngad filed murung’agen e n’en ni i rin’ pi gachalpen Kristus ko bin som’on e chibog ya nge yag nda pasiggad ko machib, ma (3) ngari ga’ fan e ulung rok Jehovah u wan’dad nge piin yad be yarmiy fare maruwel ni machib ma yad be yog e thin ko pi ulung rodad.

17, 18. Uw rogon ni kan ngongliy e re ke babyor ney? Mang boch ban’en ni bay ko re ke babyor ney nra ayuwegdad ko fol Bible ni gad ma tay ni yigoo gadad?

¹⁷ Uw rogon ni kan ngongliy e re ke babyor ney? Ga ra guy ni pi guruy ni bay riy e kan kieg u but’ ke par ni meruk u gubin nra reb ma be weliy murung’agen bang ko fare babyor ni Acts. Pi guruy ni bay nga tomuren e biney e gathi kan ngongliy ni nge weliy murung’agen e pi verse ni bay ko Acts nreb nge reb, ya be weliy e n’en nrayog ni ngan fil ko pi n’en ni i buch ni bay murung’agen riy miki ayuwegdad ni ngad folgad riy. Bay boch e thin u tabolngin reb e guruy nge reb ni be weliy e n’en nib ga’ fan ni yira fil ko re guruy nem nge thin nu Bible ni be dag e re gin’en ni yira weliy murung’agen u lan fare babyor ni Acts.

¹⁸ Ku bay boch ban’en ko re ke babyor ney nrayog ni nge ayuwegdad ko fol Bible ni gad ma tay ni yigoo gadad. Pi sasing ni bay riy e ra ayuwegem ni ngam susunnag u lanin’um e n’en kan yoloy nga lan fare babyor ni Acts. Boor e guruy riy ni ku bay boch e kahol riy ni be weliy murung’agen yugu boch ban’en. Bay boch e pi kahol nem ni be weliy murung’agen be’ u Bible ni bay rogon ni ngan folwok ko michan’ rok. Ku bay boch riy ni be weliy murung’agen boch e binaw, ara boch ban’en ni i buch, ara boch e yalen, ara yugu boch e girdi’ ni bay murung’agrad ko Acts.

19. Mang e susun ni nge ba ngiyal’ ma gad fal’eg i lemnag?

¹⁹ Rayog ni nge ayuwegem e re ke babyor ney ni ngam fal’eg i yaliy rarogom. Demtrug n’umngin nap’an ni kam un ko machib, mab fel’ ni nge ba ngiyal’ mag tal ngam fal’eg i lemnag e pi n’en ga be m’oneg u lan e yafos rom nge rogon e machib u wan’um. (2 Kor. 13:5) Mu fithem ni nge lungum: ‘Kab ga’ fan e machib u wan’ug e chiney ni bod aram ko som’on nug un ko taufe, fa? (1 Kor. 7:29-31) Gu be machibnag fare thin nib fel’ u fithik’ e michan’ nge pasig, fa? (1 Thess. 1:5, 6) Gu be un i rin’ fare maruwel ni machib ma gu be ayuweg e girdi’ ni ngar manged boch i gachalpen Jesus u rogon nrayog rog, fa?’​—Kol. 3:23.

20, 21. Mang fan ni gad be gurnag e re maruwel ney ni kan pi’ ngodad? Mang e susun ni ngad dugliyed u wan’dad ni ngad rin’ed?

²⁰ Dab da paged talin ni bay reb e maruwel nib ga’ fan ni kan pi’ ngodad ni aram e ngad machibgad ma gad ayuweg e girdi’ ni ngar manged boch i gachalpen Jesus. Dabki n’uw nap’an ma bay ni thang e re m’ag ney. Ma gubin e rran ni gad be chugur i yan ko re rran nem. Ere chiney e aram e ngiyal’ nib t’uf ni nge nang e girdi’ e n’en nthingar rin’ed ya nge yag nra mageygad ni yad ba fos. Dad nanged urngin e girdi’ nib munguy lanin’rad ni bay kur motoyilgad ko thin ni gad be machibnag. (Acts 13:48) Machane ba milfan ngodad ni ngad ayuweged e pi girdi’ ney u m’on ni nge sagaal.​—1 Tim. 4:16.

²¹ Ere rib ga’ fan ni ngad folwokgad ko pi tamachib ko bin som’on e chibog ni yad ba pasig. Nap’an ni ga be fil e re ke babyor ney mag lemnag rogon nrayog ni nge gel e pasig rom ko machib ma dab kum rus. Ma manga yugum dugliy u wan’um ni ngam ulul i machibnag “murung’agen e gagiyeg rok Got” nib fel’ rogon.​—Acts 28:23.