Reference ko Fare Babyor ni Tin Gad Ma Rin’ nge Machib Rodad
© 2023 Watch Tower Bible and Tract Society of Pennsylvania
MARCH 4-10
TIN NIB GA’ FAN KO THIN ROK GOT | PSALMS 16-17
“Urngin e Pi N’en nib Fel’ ni Ba’ Rog e Gur e Yib Rom”
Piin Fel’ Yangaren, Rayog ni Nge Fel’ Rogon e Par Romed
NGE YAG E TIN RIYUL’ E FAGER NGOM
11 Mu beeg e Psalm 16:3. Manang David rogon ni nge pirieg e fager nib fel’. Ke mel’eg e piin nib t’uf Jehovah rorad ni ngar manged fager rok, ma re n’ey e ma yibnag e ‘felfelan’’ ngak nib gel. Ke weliy murung’agen e pi fager rok ni yad “ba thothup” ni bochan e yad ma gay rogon ni ngar folgad ko pi motochiyel rok Jehovah nib machalbog. Bay reb e psalmist ni ku aray rogon e lem rok u rogon ni mel’eg e pi fager rok. Ke yoloy ni gaar: “I gag e fager rok urngin e piin yad ma pigpig ngom [“piin bay madgum u wan’rad,” NW] ni gubin e piin yad ma fol ko pi motochiyel rom.” (Ps. 119:63, BT) Ma bod rogon ni kad weliyed ko fa binem e article nrayog ni ngam pirieg e tin nib fel’ e fager u fithik’ e piin nib t’uf Jehovah rorad ma yad ma fol rok. Ma piin ni ga ra mel’eg ni ngar manged fager rom e de t’uf ni nge taareb yangarmed.
w14 2/15 29 ¶4
“Me Felan’ug Nga Feni Fel’ Somol”
I tang David ni gaar: “Somol, i gur e gubin ban’en ngog, i gur e ga ra pi’ ngog urngin e tin ni nge yog ngog; ma pogofan rog e ba’ u lan paam. Rib manigil e pi n’en ni kam tow’athnigeg ngay.” (Ps. 16:5, 6) Ba felfelan’ David ni bochan e ba fel’ e tha’ u thilrow Jehovah ma be pigpig ngak. Rayog ni ngad mada’naged e magawon, machane boor e tow’ath ni bay rodad ni fan ko tirok Got ban’en ni bod David! Ere ngaud pared ni gad ba felfelan’ ko bin riyul’ e liyor, ma gad par ni gubin ngiyal’ “nib ga’ fan u wan’dad” fare tempel rok Jehovah nib fanathin.
Mu Lemnag Jehovah ni Gubin Ngiyal’
2 Gad gubin nrayog ni ngad filed ban’en ko chep ni murung’agen boch e girdi’ ni ba ga’ ni yimnang u lan e Bible—ni Abraham, Sarah, Moses, Ruth, David, Esther, apostal Paul, nge ku boch e girdi’. Machane, thin ni murung’agen boch e girdi’ ni gathi rib gilbuguwan e ku rayog ni nge yib angin ngodad. Gadra fal’eg i lemnag e pi chep ney ma rayog ni ayuwegdad ngad folgad ko fare thin ko psalmist ni gaar: “Ba’ Somol u lanin’ug ni gubin ngiyal’; ba’ nrib chugur ngog, ma dariy ban’en nrayog ni nge rurgeg.” (Ps. 16:8) Mange ra rin’ ma gad nang fan e pi thin ney?
3 Salthaw e ba ga’ nima fanay e sayden rok ko ba’ ni mat’aw i pa’, me digey e ba’nem i dow ndabiyog ni nge ayuweg fagi n’en ni yima mith nga fon nike kol nga baan gilay’. Machane, rayog ni nge dabi maad’ad ni faanra be cham e fager rok u ba’ ni mat’aw rok. Faanra ud lemnaged Jehovah ni gubin ngiyal’ ma gad rin’ e tin nib m’agan’ ngay, ma ra ayuwegdad. Ere ngad guyed rogon nra gel e michan’ rodad ni faanra ud lemnaged e pi thin ko Bible nge yog nda ‘ted Jehovah u [lanin’dad] ni gubin ngiyal’.’—Byington.
Ngan Fil Ban’en Riy
it-2 714
Tiren Marway
Yira fanay fare bugithin ni Hebrew ni ʼi·shohnʹ (De 32:10; Pr 7:2) nge ʽaʹyin (lan owchey) u taabang, ma be yip’ fan “bochi pumoon u lan owchey.” Ku arrogon fare bugithin ni bath (fakay nib pin) ni kan fanay u Lamentations 2:18 ni nge yip’ fan “fakay nib pin u lan owchey.” Gal thin ney e be yip’ fan tiren marway. Kan puthuy e gal bugithin ney ko Psalm 17:8 (ʼi·shohnʹ bath-ʽaʹyin) ni nge yip’ fan “bochi pumoon, fakay nib pin u lan owchey” (“tiren marway,” NW). Ba tamilang nre n’ey e be yip’ fan rogon nrayog ni nge guy be’ yaan ni be m’ug u tiren marwan yugu be’.
Lan owchey e aram e gin th’abi gel e thamtham riy mab mom ni ma amith. Yugu ra yan boch gaf i piy ara buchuuw i but’ nga lan owchey mab mom ni ngan nang. Thingar ni ayuweg fare thal i n’em nib tamilang (cornea) ni ke ing tiren marway, ya faanra maad’ad ara taath’ath ni bochan ba mit e m’ar ni ke yib ngay ma rayog ni nge kirebnag rogon e sap ara k’aringey ni ngan malmit. Be fanay e Bible fare thin ni “lan owchem” u nap’an ni be weliy murung’agen ban’en nthingar ni ayuweg nib fel’ rogon. Aram rogon nsusun e ngaud ted e motochiyel rok Got. (Pr 7:2) Nap’an ni be weliy e Deuteronomy 32:10 rogon ni i ayuweg Got fare nam nu Israel, me yog ni ma ayuwegrad ni bod rogon ni ma ayuweg “lan mit.” I meybil David ngak Got ni be yog ngak ni nge yororiy me ayuweg ni bod rogon ni ma ayuweg e ‘tir u marwan.’ (Ps 17:8) Baadag ni nge gur Jehovah nge ayuweg u nap’an ni ke cham e pi toogor rok ngak. (Mu taarebrogonnag ko Zek 2:8, NW; gin kan fanay fare bugithin ni Hebrew riy ni ba·vathʹ ʽaʹyin ni be yip’ fan “tiren marway.”)—Mu guy e EYE.
MARCH 11-17
TIN NIB GA’ FAN KO THIN ROK GOT | PSALM 18
“Jehovah e Ir . . . e Ma Ayuwegeg Ndabi Buch Ban’en Rog”
w09-E 5/1 14 ¶4-5
Felfelan’ Rok Jehovah e Gelngidad
Ku ma taarebrogonnag e Bible Jehovah nga boch ban’en ndariy e yafos riy. Be yog e Bible ni ir e “yoror rok piyu Israel,” nge ba “malang,” nge ba “yoror.” (2 Samuel 23:3; Psalm 18:2, NW; Deuteronomy 32:4) Mang e be yip’ fan e re n’ey? Be yip’ fan nrayog ni nge pagan’um ngak Jehovah Got ya bod bangi malang nib ga’ yang ndabi mithmith.
5 Boor e fanathin ko fare babyor ni Psalms ni be weliy boch ban’en u rarogon Jehovah. Bod ni be yog e Psalm 84:11 (NW) ni Jehovah e ir e “yal’ nge yoror rodad” ni bochan e Ir e Ke Yib e tamilang, nge yafos rok, ma ma pi’ gelngiy, ma ma yororiyey. Ma Psalm 121:5 (NW) e be yog ni “Jehovah e ir e tagalul’ ko ba’ ni mat’aw i paam.” Rayog ni nge yororiy Jehovah e piin yad ma pigpig ngak ko gafgow ni ma yib ngorad me yororiyrad u tan ‘pa’’ ara tan ‘pon’ ni bod rogon e tagalul’ ni ma ayuwegey u gowelngin e yal’.—Isaiah 51:16; Psalm 17:8; 36:7.
Rogon ni Ma Ayuwegdad Jehovah ni Ngad Pared ni Gad Ba Felfelan’ u Fithik’ e Magawon
5 Rayog ni nge fal’eg fapi thin lanin’dad ni be gaar: “Nap’an ni ga ra yornag e ayuw ngak ma ra ayuwegem.” (Isa. 30:19) Be micheg Isaiah ngodad nra fal’eg Jehovah e motoyil ngodad u nap’an ni gad ra yornag e ayuw ngak, ma ra fulweg taban e meybil rodad nib papey. Ki ulul ngay ni gaar: “Nap’an ni yug ra rung’ag e meybil rom me fulweg taban.” Be puguran e pi thin ney ngodad nri baadag e Chitamangidad ni bay u tharmiy ni nge ayuweg e piin yad be man ayuw ngak. Gad ra nang e re n’ey ma ra ayuwegdad ni ngad athamgilgad u fithik’ e pi magawon ni gad be mada’nag ndabi chuw e felfelan’ rodad.
Ngari Ga’ Fan e Meybil u Wan’um
1 BAY reb e tow’ath ni kan pi’ ngodad nrib manigil. Re tow’ath nem e aram e rayog ni ngaud nonad ngak e En Ke Sunmiy e tharmiy nge fayleng u daken e meybil. Am lemnag e re n’ey: Demtrug e ngiyal’ nge re thin nrayog ni ngad weliyed lanin’dad riy ngak Jehovah. Rayog ni ngad meybilgad ngak e Chitamangidad ni gad ba t’uf rok u nap’an ni ka nin’dad nga aspital ara kalbus, ya ba pagan’dad ngay nra motoyil ngodad. Ri gad be pining e magar ngak ko re tow’ath ney.
Rogon ni Ngam Athamgil u Fithik’ e Magafan’ Rom
2. Mu lem. Nap’an ni ga ra sul ngam lemnag e n’en ni i buch rom kafram, ma rayog ni nge yib ngan’um boch e magawon ni yag ni ngam athamgil u fithik’ ni bochan e ayuw rok Jehovah, fa? Nap’an ni gad ra lemnag rogon ni ke ayuwegdad Jehovah nge rogon ni i ayuweg e pi tapigpig rok kakrom, ma aram e ra gel boch e gapas u lanin’dad nge pagan’ rodad ngak. (Ps. 18:17-19) Bay reb e piilal ni ka nog Joshua ngak ni yog ni gaar: “Kug yoloy nga but’ urngin e meybil rog ni kan fulweg taban. Re n’ey e ke ayuwegeg ni nge yib ngan’ug yu ngiyal’ ni kug ning ban’en ngak Jehovah u lan e meybil rog me pi’ ngog e n’en nrib t’uf rog.” Arrogon, nap’an ni gad ra lemnag rogon ni ke ayuwegdad Jehovah kafram, ma ra yib gelngidad ni ngad gelgad ko magafan’.
Ngan Fil Ban’en Riy
it-1 432 ¶2
Kerubim
Pi kerubim ney e gathi bogi banen nib tatamdag yaan nib ga’ porad ni bod yaan boch e liyos ni ma meybil girdien yugu boch e nam ngay. Ya rogon ni be yog e pi babyor ni be weliy murung’agen e yalen rok e pi Jew (der yog e Bible ban’en u murung’agen e re n’ey) e pi kerubim ney e bod yaan e girdi’. Kan ngongliy nrib fel’ yaan ni be dag rarogon e pi engel u tharmiy nri yad ba gamog, ma kan ngongliy nri bod rogon ‘ni dag’ Jehovah ngak Moses. (Ex 25:9) I yog apostal Paul ni aram e kerubim ni ke upunguy “daken fa gin’en ni ir e yima n’ag fan e denen riy.” (Heb 9:5) Pi kerubim ney e bay rogon ko gin bay Jehovah riy. Be gaar e Bible: “Bay gu mada’nagmed u rom u daken upungen fare kahol, mu rom u thilin fa gali kerubim e bay gu pi’ riy ngomed urngin e motochiyel rog.” (Ex 25:22, BT; Nu 7:89) Ere be yog e Bible ni “bay [Jehovah] u tagil’ nga lang [ara thilin e] kerubim.” (1Sa 4:4; 2Sa 6:2; 2Ki 19:15; 1Kr 13:6; Ps 80:1; 99:1; Isa 37:16) Pi kerubim nem e ba fanathin ni be “dag yaan fare karrow ni ma girngiy e os” ni ke af Jehovah nga daken be yannag (1Kr 28:18, NW), ma porad e be yororiy e re karrow nem maku be n’igin ni nge milekag nib papey. Ere weliy David u lan e tang ni yon’ payngin ni yib Jehovah ni nge ayuweg ni bod be’ ni be “changeg u lang nga but’ ni bay u daken keru’ e kerubim” maku be milekag u “daken pon e nifeng.”—2Sa 22:11; Ps 18:10.
MARCH 18-24
TIN NIB GA’ FAN KO THIN ROK GOT | PSALMS 19-21
“Lan e Lang e Rib Gagiyel ni Be Gilnag Buguwan Got”
Nge Pining Urngin E Girdi’ E Sorok Ngak Jehovah
DAVID ni fak Jesse e ke ilal u bang nib chugur nga Bethlehem ni i gafaliy e saf. Boor yay ni i sap nga lan e lang me guy e pi t’uf riy nnep’ u nap’an ni i gafaliy e pi saf rok e chitamangin! Dabi siy ni ke yib ngan’ David e pi n’en ni ke guy u nap’an ni ke thagthagnag e kan ni thothup rok Got ni nge tunguy e tang ni bay ko Psalm ni guruy ni 19 ni gaar: “Lan e lang e rib gagiyel ni be gilnag buguwan Got! Rib gagiyel ni be dag e n’en ni ke sunumeg! Machane lamrad e be taw ngak urngin e nam, thin ni yad be weliy e be taw ko gin ni mus e fayleng riy.”—Psalm 19:1, 4.
2 Lan e lang ni ke sunumiy Jehovah e ma pining e sorok ngak ni gubin e rran nge gubin e nep’, machane dariy e thin, ara dariy yu bug, ara laman lan e lang. Dariy e tal ko pi n’en ni ke sunmiy Got ni be pining e sorok ngak, ma ri ma sobut’nag lanin’dad ni ngada lemnaged rogon ni be micheg e tin ni sum ban’en ngak “urngin e nam” feni sorok Got. Machane de gaman ni ke mus ni nge micheg e tin ni sum ban’en nib sorok Got ni de un e thin ngay. Ka nog ngak e pi girdi’ ni yad ba yul’yul’ ni ngar nonad ngar uned ko tin ni sum ban’en ngar pininged e sorok ngak Got. Be’ ni yoloy e psalm e ke non ngak e piin ni yad ma liyor ngak Got ni gaar: “Mpininged e sorok ngak Somol nga feni flaab nge feni gel gelngin! Mpininged e sorok nga fithngan Somol nga feni yul’yul’.” (Psalm 96:7, 8) Ma falfalan’ e piin nib fel’ thilrad Jehovah ni ngar folgad ko re thin nem ni ngar pininged e sorok ngak Got. Machane mang e kub muun ngay ni nga pining e sorok ngak Got?
Tin Kan Sunmiy E Be Pining E Sorok Ngak Got!
8 Bin migid ke weliy David murung’agen reb ni ke sunmiy Jehovah ni yira ngat ngay ni gaar: “Got e ke toy reb e tent ngorad [pi tharmiy] ni fan ko fare yal’, ma re n’ey e bod rogon reb e pumoon ni ke un ko mabgol ma nap’an ni yib nga wuru’ e singgil rok; mab felfelan’ ni bod ni ma rin’ be’ nib gel ni nge mil u ba pa’ e kanawo’. Ni sum ko gin ni mus e tharmiy riy, me liyeg nge taw nga barba’; ma dariy ban’en nrayog ni mith u gawelngin.”—Psalm 19:4-6, NW.
9 Ra ngan taareb rogonnag ga’ngin e yal’ ko boch e t’uf, ma gathi rib ga’ maku gathi rib achichig. Machane, ireray e t’uf ni yira ngat ngay, ni be m’ug ni boch e planet nib liyeg e kaygi achichig. Reb e tabolngin e be yog ni bay 2 e billion e billion e billion ton”—tomalngin ma 99.9 pasent ko solar system rodad! Bochan gelngin e yal’ ni ka nog e gravity ngay e be ayuweg e fayleng ni nge liyeg ni 93 million miles palgin ndabi sor nga bang ara nge chuchugur ko yal’. Ke mus ni bochi yang gelngin e yal’ nrib achichig e ma taw ko planet rodad, machane ba gaman ni nge ayuweg e yafas.
10 Fare psalmist e be weliy murung’agen fare yal’ ni be fanay e thin ni fanathin, ni be taareb rogonnag ko “reb e pumoon nib yargel” ni ma mil ni rran ni ma tabab ko reb e horizon nge yan nga reb ma ma toffan u lan “ba tento” ni nep’. Nap’an ni re t’uf nem nib gel gelngin e ke yan nga tanggin e horizon, ra ngan sapnag u fayleng, ma bod ni ke yan nga lan “ba tento,” ni gowa nge toffan. Nap’an nra kakadbul, ma gowa ra yib nib tomgin, ni be wereg e tamilang nib gel “ni bod be’ ni pumoon ni ke un ko mabgol ni be yib u singgil rok.” Bochan ni David e be’ ni tachugol saf, ma manang feni pag gelngin e garbeb ni nep’. (Genesis 31:40) Ke yib ngan’ ko uw rogon ma ramaen e yal’ e nge gawelnag nib papey nge boch ban’en u tooben. Ba tamilang, ni dawori magar ko “milekag” ni be tay ni tabab ko ngek nge mada’ ko ngal machane bod reb e “pumoon nib gel,” ni be n’en ni nge milekag biyay.
g95 11/8 7 ¶3
En Ke Ngongliy Yaan Ban’en e Ngiyal’ Ney Ndanir Lemnag
Gad ra guy rogon ni nge ga’ fan u wan’dad feni manigil e pi n’en kan sunmiy nib liyegdad, ma rayog ni nge ayuwegdad ni ngad nanged e En Ke Sunmiydad. Bay bayay ni yog Jesus ngak pi gachalpen ni ngar fal’eged i yaliy e pi floras u fithik’ e pan ni ma tugul u Galile. I yog ni gaar: “A mu guyed nga rogon ni be tugul e floras u fithik’ e pan: darir maruwelgad ara ur ngongliyed e mad ni fan ngorad. Machane nggog ngomed, ni mus ngak Solomon, ni aram feni yoor ban’en rok, ma da immoy e mad rok ni bod feni fel’ yaan reb e pi floras nem.” (Matthew 6:28, 29) Rogon feni fel’ yaan e floras u fithik’ e pan e be puguran ngodad rogon ni ma lemnag Got e tin nib t’uf ko girdi’.
Ngan Fil Ban’en Riy
Ra Lebug e N’en nib M’agan’ Jehovah Ngay!
5 Machane, bay e motochiyel ni ke tay Jehovah ni ma gagiyegnag e pi n’en ni ke sunmiy. Ke ngongliy e motochiyel ni ma gagiyegnag rogon e pi n’en ni ke sunmiy nge motochiyel ni ma gagiyegnag rogon ni ngaud ngongolgad ni bochan e nge yag ni i maruwel urngin ban’en ni ke sunmiy u taabang nib fel’ rogon ma yad ba taareb. (Ps. 19:7-9) Ere aram fan ni urngin ban’en u palpalth’ib ma bay e gin ni kan dugliy ni nge par riy nge n’en ni nga i rin’ nrogon nib puluw ko n’en nib m’agan’ Got ngay. Ke ngongliy Jehovah rogon e motochiyel ke tay u rogon ni nga i maruwel e pi n’en ni ke sunmiy u taabang. Ere, gravity ara ban’en ni bod e gamig e ir e ma tay fare thal i nifeng nib liyeg e fayleng u gil’ ndabi mithmith, maku ir e ma gagiyegnag rogon e yilu’ nge ey nge rogon ni ma mithmith e day, nge rogon boch ban’en ni bay u fayleng ni ir e ma tay urngin ban’en u fayleng nib fos. Urngin ban’en ni kan sunmiy nib muun e girdi’ ngay e yad ma maruwel ko pi motochiyel ney. Ere, ba tamilang ni rogon feni yaram e pi n’en ni kan sunmiy e be micheg ni bay ban’en nib m’agan’ Got ngay ni fan ko fayleng nge girdi’. Ere gur, rayog ni ngad weliyed ko girdi’ murung’agen e En ni ke ngongliy rogon e pi n’ey ke tay u nap’an e machib, fa?—Rev. 4:11.
MARCH 25-31
TIN NIB GA’ FAN KO THIN ROK GOT | PSALM 22
Boch Ban’en Nni Yiiynag u Rogon e Yam’ Nra Tay Jesus
Kar Pirieged fare Messiah!
16 Ra yan i bod ni ke n’ag Got fare Messiah. (Mu beeg e Psalm 22:1.) Rogon ni bay ko yiiy e “nap’an ni dalip e kolok me non Jesus nri ba ga’ laman ni be gaar, ‘Eloi, Eloi, lema sabachthani?’ ni fan e pi thin ney e be gaar, ‘Got rog, Got rog, mang fan ni kam n’igeg?’” (Mark 15:34) Dawori mul e michan’ rok Jesus ngak e Chitamangin ni bay u tharmiy. Ke digey Got Jesus ni be yip’ fan ni ke pag nga pa’ e pi toogor rok ya nge m’ug feni yul’yul’. Ma nap’an ni non nib ga’ laman me lebug fare thin ni bay ko Psalm 22:1.
Kar Pirieged fare Messiah!
13 I yiiynag David nra u nog e thin nib kireb ngak fare Messiah. (Mu beeg e Psalm 22:7, 8.) U nog e thin nib kireb ngak Jesus u nap’an ni bay u daken fare ley i gek’iy ni be gafgow ko amith, ya yog Matthew ni gaar: “Ma piin ni yad be yib nguu ranod ko gin’em e ur chichingeged lolugrad mu urogned e thin nib kireb ngak Jesus ni be lungurad, ‘I gur faram e mfiney ni ngam buthug e tempel ngam toy u lan dalip e rran nge m’ay! Faanra Fak Got gur, me ere mu guy rogon nge siy ku mum’! Ma ga luw nga but’ ko re [“ley i gek’iy,” NW] nir!’ Maku aram rogon e moning ni tay e pi tolang ko prist nge pi tamachib ko Motochiyel nge piin ni piilal ngak ni be lungurad, ‘Ke ayuweg e pogofan rok boch e girdi’, ma dabiyog ni nge ayuweg e birok e pogofan! Gathi ir fare pilung nu Israel? Faanra luw ko re [“ley i gek’iy,” NW] nem nga but’ e chiney, ma ra michan’dad ngak! Ya ba pagan’ ngak Got ma be yog ni ir Fak Got. Ere mu songad ngad guyed ko ra yib Got i ayuweg e chiney fa!’” (Matt. 27:39-43) Rib gel e gafgow ni tay Jesus, machane i par ni ke th’ab gulungan ndariy ban’en nib kireb ni yog. Kari dag e kanawo’ nib fel’ ni ngad folwokgad riy!
Kar Pirieged fare Messiah!
14 Nin’ bogi malang nga but’ ni bay e pow riy ya nge dugil e en ni nge fanay e mad rok fare Messiah. I yoloy fare psalmist ni gaar: “Mad rog e kar f’othed rorad, ma ka ron’ed nga but’ nochi malang ni bay e pow riy ni ir e nge dugliy e arorad ni nge fanay fare mad rog nib n’uw.” (Ps. 22:18) Ireram e n’en ni buch ya “richibiy [fapi salthaw nu Roma Jesus] ko fare [“ley i gek’iy,” NW], mi yad f’oth e mad rok rorad ni yad be yin’ nga but’ nochi ban’en ni bay e pow riy, ni ir e nge dugliy e bin ni nge fanay bagayad.”—Matt. 27:35; mu beeg e John 19:23, 24.
Ngan Fil Ban’en Riy
Nguud Daged E Ta’ Fan Ko Pi Muulung Rodad Nib Thothup
7 Ba’ boch e kanawo’ nrayog ni ngada daged ni gad be tay fan e pi muulung rodad. Reb e kanawo’ e nga ud moyed ko muulung u nap’an ni yibe tang. Boor e pi tang rodad e gowa ba meybil ni gad be pi’ ngak Got, ere thingar da tangniged u fithik’ e tay fan. I beeg apostal Paul fare thin u Psalm 22 faani weliy murung’agen Jesus ni gaar: “Got, bay gu weliy murung’agem ngak pi walageg, bay gu tangnigem ni gu be ta’ fam u lan e muulung rorad.” (Hebrews 2:12) Ere ngada athamgilgad ni ngad pared nga tagil’dad u m’on ni yira tang, ma nap’an ni gad be tang ma ngada tedan’dad ko thin ko tang. Ma rogon ni gad ra tang e bod rogon e en ni yoloy e psalm ni gaar: “Gu ra pining e sorok ngak Jehovah u polo’ i gum’irchaeg ko muulung rok e piin nib mat’aw.” (Psalms 111:1, NW) Arrogon, ngada bad ko muulung u m’on ni ra tabab ya ngada tanggad ni gad be pining e sorok ngak Jehovah, ma ku da uned ko tang u tungun e muulung.
Ngan Pining e Sorok Ngak Jehovah “u Lan e Muulung”
4 Ngiyal’ ney u ku bod kakrom nrayog ko piin nib yul’yul’ ni ngar tamilangnaged e michan’ rorad u “lan e ulung.” Reb e kanawo’ ni ngan rin’ ere n’ey riy e ngan pi’ e fulweg ko pi deer ni yima fith u nap’an e pi muulung. Dabin darifannag angin ere n’ey. Bod ni, pi fulweg ni be dag rogon ni ngan gel ko magawon e ma pi’ e athamgil nga laniyan’ e pi walag ni ngar folgad u kenggin e pi motochiyel nu Bible. Pi fulweg ni ma weliy e thin ko Bible ara ma tamilangnag ban’en ni kan fl’eg i gay murung’agen e rayog ni nge pi’ e athamgil nga laniyan’ e girdi’ nge fel’ rogon e fol babyor ni yad ma tay.
APRIL 1-7
TIN NIB GA’ FAN KO THIN ROK GOT | PSALMS 23-25
“Somol e Be Gafaliyeg”
w11 5/1 31 ¶3
“Somol e Be Gafaliyeg”
Ma pow’iy Jehovah e pi saf rok. Pi saf ndariy be’ ni ma gafaliyrad e ba ga’ ni yad ma malog. Ku arrogodad nib t’uf ni ngan ayuwegdad ni ngad pirieged e bin nib puluw e kanawo’. (Jeremiah 10:23) I yog David ni ma pow’iy Jehovah e girdi’ rok nga “daken e ted nib galunglung e pan riy” nge “yungi ran nib machalbog ma mmocha’ e ran u lan.” Ma pow’iyrad ko “bin nib mat’aw e kanawo’.” (Verse 2, 3) Pi n’ey ni kan weliy u roy e be micheg ngodad nrayog ni nge pagan’dad ngak Got. Faan gad ra fol u rogon ni be pow’iydad gelngin Got nib thothup nrogon ni be yog e Bible, ma aram e rayog ni ngad pared nib fel’ u wan’dad e tin bay rodad, mab baud lanin’dad, mab pagan’dad.
w11 5/1 31 ¶4
“Somol e Be Gafaliyeg”
Ma yororiy Jehovah e pi saf rok. Pi saf ndariy be’ ni ma gafaliyrad e yad ma rus ma dariy be’ nrayog ni nge ayuwegrad. Ma yog Jehovah ko girdi’ rok ndariy rogon ni ngar rusgad ngki mada’ ko ngiyal’ ni yad be yan u “fithik’ e rumug ni yam’” ara ngiyal’ nrib gel e magawon ni yad be mada’nag u lan e yafos rorad. (Verse 4) Ma yaliyrad Jehovah ma ke fal’eg rogon ni nge ayuwegrad. Rayog ni nge pi’ e gonop ko pi tapigpig rok miki pi’ gelngirad ya nge yag nra athamgilgad u fithik’ e pi magawon rorad.—Filippi 4:13; James 1:2-5.
w11 5/1 31 ¶5
“Somol e Be Gafaliyeg”
Ma pi’ Jehovah e tin nib t’uf ko pi saf rok. Pi saf e yad ma taga’ ko en ma gafaliyrad ni nge pi’ e ggan rorad. Gad gubin nib t’uf e tirok Got ban’en rodad, ma kemus nu daken e ayuw rok Got e rayog ni nge yag e re n’ey riy ngodad. (Matthew 5:3) Gad ba felfelan’ ya Jehovah e ir e En Ma Pi’ e tin nib t’uf rodad nib gol ngodad ni ke ngongliy ba tebel ni fan ko pi tapigpig rok nib sug e ggan u daken. (Verse 5) Bible nge pi babyor nib puluw e thin riy ko Bible ni bod e re ke babyor ney ni ga be beeg e aram e gin ma yag e ggan ngodad riy ni fan ko tirok Got ban’en nra ayuwegdad ni ngad nanged fan e yafos rodad nge n’en nib m’agan’ Got ngay ni fan ngodad.
Ngan Fil Ban’en Riy
Nge T’uf e Tin nib Mat’aw Rom u Polo’ i Gum’irchaem
MA FANAY Jehovah e Thin Rok nge gelngin nib thothup ni nge pow’iy e girdi’ rok ko “bin nib mat’aw e kanawo’.” (Ps. 23:3) Machane, bochan ndawor da flontgad, ma rayog ni ngad sorgad nga bang ko re kanawo’ nem. Faanra ngad sulod ngad rin’ed e tin nib mat’aw mab t’uf ni ngad athamgilgad. Ere, mang e ra ayuwegdad? Thingar da adaged ni ngad rin’ed e tin nib mat’aw ni bod Jesus.—Mu beeg e Psalm 45:7.
2 Mang e “bin nib mat’aw e kanawo’”? Rayog ni ngad nanged e re “kanawo’” nem ni faan gad ra nang ko mang e ba m’agan’ Jehovah ngay. Fare bugithin ni “mat’aw” ko thin ni Hebrew nge Greek e be yip’ fan ni ngan fol ko pi kenggin e motochiyel nib fel’ rogon. Bochan ni Jehovah e ir “tagil’ e tin nib mat’aw,” mab felfelan’ e pi tapigpig rok ni ngar sapgad ngak ni nge dag e bin nib mat’aw e kanawo’ ngorad ni ngar leked.—Jer. 50:7, NW.
3 Faan gad ra athamgil ngad folgad ko pi kenggin e motochiyel rok Got nib mat’aw ma aram e rayog ni ngad fel’gad u wan’. (Deut. 32:4) Machane, som’on e thingar da filed murung’agen Jehovah Got nib fel’ rogon u daken e Thin rok ni aram e Bible. Ra yoor ban’en ni gad ra fil u murung’agen, ma aram e rayog ni ngad chugurgad ngak, miki t’uf rodad e ngongol rok nib mat’aw. (Jas. 4:8) Nap’an nra t’uf ni ngad dugliyed ban’en, ma thingar da paged e Thin Rok ni ke thagthagnag nge pow’iydad.
APRIL 8-14
TIN NIB GA’ FAN KO THIN ROK GOT | PSALMS 26-28
Rogon ni I Par David nib Yul’yul’
Ngan Yan U Kanawoen E Lem Ni Rib Yul’yul’
8 I meybil David ni gaar: “O Jehovah mu yaliyeg, ma ngam skenageg; mmachalbognag e buoy rog nge gum’irchaeg.” (Psalm 26:2, NW) Fapi buoy e bay u fithik’ i dowey. Fapi buoy e be yip’ fan e lem rok be’ nib toar nge emotion. Ma fare gum’ircha’ e rarogon be’ nga fithik’—ni aram e pug laniyan’, nge lem rok, nge gelngin i nang fan ban’en. Nap’an ni ke ning David ngak Jehovah ni nge fal’eg i yaliy, e aram ke yibilay ni nge fal’eg i yaliy e lem rok nib toar.
9 I wenig David ni ngan machalbognag e buoy rok nge gum’irchaen. Uw rogon ni nge biechnag Jehovah lanin’dad? I tang David ni gaar: “Nggu pining e sorok ngak Jehovah, ni be fonownigeg. Riyul’, ni nnep’ ma pi buoy rog e be fonownigeg.” (Psalm 16:7, NW) Mang fan e re n’em? Be yip’ fan ni fonow rok Got e ke taw ko gin ni rib toar ko lem rok David me par u rom, ni be yal’uweg e lem rok nge emotion. Ere ku rayog ni nge par rodad nfaanra ngada fal’eged i lemnag e fonow ni keb ngodad u daken e Thin rok Got, nge ulung rok ma gad pag nge par u fithik’dad. Ngan meybil ngak Jehovah u gubin ngiyal’ ni nge biechnagdad u kanawo’ ni aram rogon e ra ayuwegdad ni nga darod u fithik’ e lem ni rib yul’yul’.
Ngan Yan U Kanawoen E Lem Ni Rib Yul’yul’
12 Be weliy murung’agen yugu reb e ban’en ni ke gelnag e lem rok ni rib yul’yul’, e yog David ni gaar: “Dagu par u fithik’ e piin yad ma lifith l’igin’rad; nge piin ni ma mithag ko yad ba diin ma dagur yan nga fithik’rad. Kug fanenikay e ulung ko girdi’ nib kireb e ngongol rorad, ma dagur chag ngak e girdi’ nib kireb.” (Psalm 26:4, 5, NW) De par David u fithik’ e girdi’ nib kireb. Kari fanenikay ni nge chag ngak e girdi’ nib kireb.
13 Ma uw rogon gadad? Darud chaggad ngak e girdi’ ni ma lifith l’igin’ u daken e tin ni yima dag ko television, nge videos, nge kachido, nge Internet sites, ara boch ban’en? Gad ma palog rok e piin ni ma mithag ko yad ba diin? Boch e girdi’ u skul ara tabon e maruwel ni be dake baadag ni ngar manged fager rodad ni be nameg ni ngar bannaged gadad. Gur riyul’ ni gad baadag ni nge mang fager rodad e piin ni dar ma yul’yul’ ku Got? Yugu aram rogon ni yad be yog ni yad ba yul’yul’, maku piin ni apostates e sana yad ra mithag e n’en ni yad be nameg ni ngar taleged gadad riy ko pigpig ku Jehovah. Ma uw rogon ni faanra bay boch e girdi’ u lan e ulung ko Kristiano ni l’agruw mit e par ni ma par riy? Maku yad be mithag ko yad ba diin. Jayson, ni chiney e ke mang reb e ministerial servant, ma immoy e fager rok ni aram rogon u nap’an ni kab pagel. Weliy murung’agrad, ni gaar: “Reb e rran me yog bagayad ngog ni gaar: ‘Dariy fan e n’en gad ra rin’ e chiney ya nap’an nra yib fare m’ag nib biech ma gadra yim’. Dabda nanged e tin ni de yog rodad ni ngad uned ngay.’ Re thin nem ni ke yog e bod ni ke pugeg. Dabug ni nggum’ u nap’an ni ra yib fare m’ag nib biech.” U fithik’ e gonop me tal Jayson i chag ngak e pi cha’nem. “Dab mpaged gimed nga ni bannagmed, i ginangey Paul ni apostal. “Nchag ngak e girdi’ nib kireb me kireb pangiy nib fel’.” (1 Korinth 15:33) Rib ga’ fan ni dabda chaggad ngak e girdi’ nib kireb!
Ngan Yan U Kanawoen E Lem Ni Rib Yul’yul’
17 Fare tabernacle, nge altar riy ni yima tay e maligach nga daken, e ir e gin ni yima liyor ngak Jehovah riy u Israel. I weliy murung’agen e felfelan’ rok ko re gin’en nem, ni meybil David ni gaar: “Jehovah, ba t’uf rog e naun rom ni gin yima par riy nge fare gin’en ni be galgal ramaem riy.”—Psalm 26:8, NW.
18 Gur gad baadag ni ngada muulunggad ko gin ni rayog ni ngada filed murung’agen Jehovah riy? Urngin e Kingdom Hall ni yima fil e tirok Got ban’en riy e aram e gin ni fan ko liyor nib riyul’ ni ma yan e girdi’ ngay. Maku, bay e pi convention rodad, nge circuit assembly, nge special assembly day. N’en ni ma “puguran” Jehovah ngodad e yima weliy ko pi muulung ni aram rogon. Faanra “kari t’uf rodad e pi muulung nem,” ma ri gad baadag ni nguuda uned ngay ma ri gad ma tiyan’dad ngay u nap’an ni gad bay u rom. (Psalm 119:167) Ri ma pi’ e athamgil nga lanin’dad ni ngad chaggad ngak e pi walagdad ni yad baadag ni ngar ayuweged gadad ma yad ma ayuwegdad ni nguuda pared u kanawoen e lem ni rib yul’yul’!—Hebrews 10:24, 25.
Ngan Fil Ban’en Riy
Ma Chuweg Jehovah E Piin Ni Ke Gafgow Ko Gafgow
15 I tang fare psalmist ni David ni gaar: “Ra chey ni digeyeg e chitamag nge chitinag, ma ra ayuwegeg Jehovah.” (Psalm 27:10, NW) Rib gel e pagan’ ni ngan nang ni t’ufeg rok Jehovah e kab gel ko t’ufeg ko gallabthir! Yugu aram rogon feni gel e amith riy, ni nge digeyem ara i gafgownigem reb e gallabthir ma dariy rogon nga rogon ni ma ayuwegem Jehovah. (Roma 8:38, 39) Dab mu pag talin ni Got e ma girngiy ngak e piin nib t’uf rok. (John 3:16; 6:44) Demtrug rogon e n’en be rin’ e girdi’ ngom, ma ga ba t’uf ko Chitamam nu tharmiy!
APRIL 15-21
TIN NIB GA’ FAN KO THIN ROK GOT | PSALMS 29-31
Yira Yal’uwegdad Ma Be M’ug Riy ni Gad Ba T’uf rok Got
it-1 802 ¶3
Owchey
Boor fan fare thin ni “mithag owchen,” ya be yan u rogon ni yibe fanay. Yira yog ni ke mithag Jehovah Got owchen, ma aram e be yip’ fan ndaki fel’ be’ u wan’ ara ke chuweg gelngin rok. Rayog ni nge buch e re n’ey ni bochan e de fol be’ ara boch e girdi’ rok ni bod e n’en ni buch ko fare nam nu Israel. (Job 34:29, BT; Ps 30:5-8; Isa 54:8; 59:2) Ma yu ngiyal’ e rayog ni be yip’ fan ni ke par Jehovah ndariy ban’en ni be rin’ ara be yog ya be sonnag e ngiyal’ ni ke dugliy. (Ps 13:1-3) Nap’an ni yog David ngak Got ni nge ‘fek owchen ko denen rok,’ ma aram e be wenig ngak ni nge n’ag fan rok.—Ps 51:9; mu taarebrogonnag ko Ps 10:11.
Mu Pag Jehovah ni Nge Fal’eg Lanin’um
18 Nge m’agan’um ko fonow ni kan pi’ ngom. Nap’an ni l’og Jehovah Nathan ni profet ni nge yan i weliy ngak David murung’agen e kireb ni ke rin’, ma de gay David e tawey rok, ara yog nde gel e kireb ko n’en ke rin’. Ya ka chingiyal’ nem me yog ni gathi kemus ni ke denen nib togopuluw ngak figirngin Bath-sheba, ya bin th’abi gel e kireb riy e ke denen nib togopuluw ngak Jehovah. I m’agan’ David ngay ni nge fol ko fonow ni ke pi’ Jehovah ngak, ma aram me n’ag Jehovah fan e kireb rok. (2 Sam. 12:10-14) Faanra kad rin’ed reb e denen nib ubchiya’, mab t’uf ni ngad nonad ngak e piin ke dugliyrad Jehovah ni ngar ayuweged e pi saf rok. (Jas. 5:14, 15) Thingar dab da guyed rogon ni ngad gayed e tawey rodad ko kireb ni kad rin’ed. Faan gad ra gur nge m’agan’dad ko fonow ni kan pi’ ngodad ma gad fol riy, ma ra papey ni nge gapas lanin’dad ma gad felfelan’ bayay.
Mang e Be Yip’ Fan ni Ngari Kal Be’ Ngan’?
18 Ra nge dag be’ ni kan tharbog nriyul’ ni ke kalngan’, ma aram e ra i un ko muulung ni gubin ngiyal’, ma be fol ko fonow rok e piin piilal ni nga i meybil ma be fil e Bible rok ni gubin ngiyal’. Ku ra athamgil ni nge siyeg e pi n’en nrayog ni nge waliy ni ngki denen bayay. Ra athamgil ni nge fal’eg e tha’ u thilrow Jehovah bayay ma rayog ni nge pagan’ ngay nra n’ag Jehovah fan e kireb rok, maku ra ayuweg e piin piilal ni ngki sul bayay ko ulung. Bin riyul’ riy e, ra be guy e piin piilal rogon ni ngar nanged ko ke kal be’ ngan’ fa dawor, ma yad manang nra be’ ma rogon e birok e oloboch. Ere ri yad ma fal’eg i gay murung’agen e kireb ni ke rin’ be’ nge be’ nib fel’ rogon, ma yad ma guy rogon ndab rrin’ed ban’en nra m’ug riy ndarur daged e runguy.
Ngan Fil Ban’en Riy
Meybil—“Mpaged Fan Urngin e Magafan’ Romed Ngak”
Ra ud nonad ngak Jehovah u daken e meybil, ma aram e rayog ni ngari pagan’dad ngay ni ma lemnagdad. Rayog ni nge taareb rogon e lem rodad e en ni yoloy e Psalm ni faani meybil ni gaar: “Ga be guy e gafgow rog; ga manang e oloboch rog [“pi n’en nri be k’aring e magafan’ ngog,” NW].” (Psalm 31:7, BT) Faanra gad manang ni ma guy Jehovah e pi magawon ni gad ma mada’nag, ma rayog ni nge ayuwegdad ni ngad athamgilgad u fithik’ e pi magawon nem. Machane gathi kemus ni be guy e pi gafgow ni be yib ngodad, ya manang e n’en gad be yan u fithik’ ma ma fanay e Bible ni nge fal’eg lanin’dad me pi’ e athamgil ngodad. Dariy be’ nrayog ni nge rin’ e re n’ey nib fel’ rogon ni bod ir.
APRIL 22-28
TIN NIB GA’ FAN KO THIN ROK GOT | PSALMS 32-33
Mang Fan ni Nga Mog e Denen Rom?
w93 3/15 9 ¶7
Runguy rok Jehovah e Ma Fal’eg Lanin’dad
7 Faanra kad rin’ed reb e denen nib ubchiya’ nib togopuluw ko motochiyel rok Got, ma rayog ni nge mo’maw’ ni nga dogned e denen rodad ngak be’ nib muun Jehovah ngay. Ere mang e rayog ni nge buch rodad? I yog David ko Psalm 32 ni gaar: “Ngiyal’ ni baaram ndawor gu weliy e denen rog ngak Somol e m’ay gelngig ni bochan e meyor ni gu tay ni kadbul nge mada’ ko nep’. Ya mu gechignigeg ni rran nge nep’, i gur Somol; mu gu par ni kari m’ay gelngig, ni bod rogon e waangachal ni gelngin e yal’ e melik’nag u ngal’an e gowel.” (Verse 3, 4) I m’ay gelngin David ni bochan e i guy rogon ni nge mithag e denen rok, maku be guy rogon ni nge dabki magawon e nangan’ rok. Ri m’ay gelngin nge par ni ke bod ba ke gek’iy u nap’an e yal’ ni ke m’ay e ran u fithik’. Bin riyul’ riy e rayog ni i magawon laniyan’ ma be m’ar. Daki yag ni nge par nib felfelan’. Ere mang e susun ni ngad rin’ed ni faanra ke buch ban’en rodad ni aray rogon?
cl 262 ¶8
Ba Got ni ‘Ma N’ag Fan u Wan’ e Kireb Rodad’
8 Nap’an ni kal David ngan’ me yog ni gaar: “Ma aram mu gu weliy e denen rog ngom; da gu mithag rom e tin nib kireb ni kug rin’. . . . Ma ga n’ag fan urngin e kireb rog.” (Psalm 32:5) Fare thin ni “n’ag fan” e kan fek u bbugithin ni Hebrew ni be yip’ fan ni “ngan chibiy nga lang” ara “ngan fek.” Rogon ni kan fanay u roy e be yip’ fan ni nge dabki “magawon lanin’uy ko kireb ni kan rin’ ara ngan chuweg e denen.” Ere bod ni ke chibiy Jehovah e denen rok David ke fek nga bang nib palog. Dariy e maruwar riy ni ayuweg e re n’ey David ni nge dabki magawon laniyan’ ko kireb ni ke rin’. (Psalm 32:3) Ku arrogodad nrayog ni ngari pagan’dad ko fare Got ni ma chuweg e denen rok e piin yad be wenig ngak ni nge n’ag fan e kireb rorad ni bochan e ke mich u wan’rad fare biyul ni maligach ni pi’ Jesus.—Matthew 20:28.
w01 6/1 30 ¶1
Yira Yog e Kireb ni Kan Rin’ Min Baud
Tomuren ni yog David e denen rok, ma daki lemnag ndariy fan. Thin ni yog u lan fapi tang ni yoloy ni murung’agen e denen ni nga nog e be dag rogon ni baud laniyan’, miki dugliy u wan’ ni nge pigpig bayay ngak Got u fithik’ e yul’yul’. Mu yaliy e Psalm 32. Verse 1 e be gaar: “Ba felan’ e cha’ ni ke n’ag Got fan e denen rok, ni kireb rok e ke thang Got.” Demtrug feni ubchiya’ e denen ni ke rin’ be’ ma faanra riyul’ ni ke kalngan’, ma aram e ra felfelan’. Reb e kanawo’ ni nge rin’ e re n’ey riy e aram e nge m’agan’ ngay ni ir e ba kireb e rok ko n’en ke buch ni bod e n’en ni rin’ David. (2 Samuel 12:13) De guy rogon ni nge gay e tawey rok ko n’en ni rin’ u p’eowchen Jehovah ara yon’ e kireb riy nga daken yugu boch e girdi’. Verse 5 e be gaar: “Ma aram mu gu weliy e denen rog ngom; da gu mithag rom e tin nib kireb ni kug rin’. Gu turguy u wun’ug ni nggu weliy e pi denen rog nem ngom Somol, ma ga n’ag fan urngin e kireb rog.” Faanra yog be’ e kireb rok, ma aram e ra baud laniyan’ ma dabki magawon e nangan’ rok ko kireb ni ke rin’.
Ngan Fil Ban’en Riy
Uw Rogon u Wan’um e T’ufeg ni Ma Dag Jehovah u Fithik’ e Yul’yul’?
14 T’ufeg ni ma dag Got u fithik’ e yul’yul’ e ma yororiydad u boch ban’en nra kirebnag e tha’ u thildad Jehovah. Nap’an ni meybil David ngak Jehovah me yog ni gaar: “I gur e gu ma mith nga fom; bay mu chuwegneg u fithik’ e oloboch. Gu be tangnag nib ga’ lamag rogon ni ga ma ayuwegney, ni bochan e gur e kam yororiyeg. . . . Piin nib pagan’rad ngak Somol e be yororiyrad ko t’ufeg rok ni dabi mus.” (Ps. 32:7, 10, BT) Yoror nib liyeg reb e mach kakrom e ir e ma ayuweg e girdi’ ko fare mach ko pi toogor rorad. Ere t’ufeg ni ma dag Jehovah u fithik’ e yul’yul’ e bod ba yoror ni be ayuwegdad u boch ban’en nra kirebnag e tha’ u thildad Jehovah. Ku aram e n’en ni ma chugurnagdad ngak.—Jer. 31:3.
APRIL 29–MAY 5
TIN NIB GA’ FAN KO THIN ROK GOT | PSALMS 34-35
Mu “Pining e Sorok” Ngak Jehovah ni Gubin Ngiyal’
Ngad Pininged e Sorok Nga Fithingan Jehovah u Taabang
11 “Gubin ngiyal’ ni bay ug pining e magar ngak Somol; ma bay ug pining e sorok ngak ndab gu tal.” (Psalm 34:1, NW) Bochan ndar par David ko gin ni bay e girdi’ riy, ma dabisiy ni bay e magafan’ rok ko tin nib t’uf rok ni bod rogon e chugum, machane rogon ni ke dag e pi thin ney e de pag e magafan’ rok ko chugum nge taleg e n’en ni ke dugliy ni ngi i rin’ ni gubin e rran ni nga i pining e sorok ku Jehovah. Ireray ban’en nrayog ni ngad folwokgad riy u nap’an ni kada pirieged boch ban’en nib mo’maw’! Demtrug ko gad bay u skul, ara u tabon e maruwel, ara nap’an ni gad be chag ko pi walagdad ni Kristiano, ara u nap’an ni gad be machib, ma n’en ni thingar ud m’ad ni bochan ni ngad rin’ed e ngad pininged e sorok ku Jehovah. Am lemnag urngin fan ni thingar uda rin’ed! Ni bod ni, dariy e gin nra mus riy e pi n’en nrayog ni ngad pirieged ma gad felfelan’ ngay ko maruwel ni ke rin’ Jehovah ko pi n’en ni ke sunumiy. A ku mu lemnag e n’en ni ke rin’ u daken e ulung rok u fayleng! Yugu aram rogon ndawora flontgad, ma be fanay Jehovah e piin nib yul’yul’ nib mus rogon e ngiyal’ ney. Uw rogon e maruwel ni ke rin’ Got ni faanra ngan taarebnag ko maruwel ni ke rin’ e girdi’ nib gilbuguwrad ko re fayleng ney? Gathi ba puluw u wan’um e n’en ni yog David ni faani gaar: “U fithik’ urngin e pi got ma dariy reb ni taareb rogon ngom, O Jehovah, mus ko maruwel ni rin’ ma dariy taareb ni bod rogon e tin ni kam rin’”?—Psalm 86:8, NW.
Ngad Pininged e Sorok Nga Fithingan Jehovah u Taabang
13 “Nggu uf ni bochan Jehovah; piin nib sumunguy e ra rung’ag me felfelan’.” (Psalm 34:2, NW) Gathi ke uf David ni bochan boch ban’en ni ke yognag. Ni bod ni, de ufanthin David ni bochan rogon ni bannag fare pilung nu Gath. Ke nang ni Jehovah ir e ke ayuweg u nap’an ni immoy u Gath ma Jehovah ir e ayuweg nge mil. (Proverbs 21:1) Ere, i uf David ni gathi fan ngak ya fan ku Jehovah. Bochan e re n’ey ma aram me chugur e piin nib sumunguy ku Jehovah. Taareb rogon ku Jesus ni ki tolangnag fithingan Jehovah, ma re n’ey e ir e chugurnag e piin nib sobut’an’ nge piin ni yad baadag e machib ngak. Ngiyal’ ney ma piin nib sumunguy e yad ma yib ko ulung ko pi Kristiano ni kan dugliyrad ni Jesus e ir lolugen u ga’ngin yang e fayleng. (Kolose 1:18) Ma mithmith gum’irchaen e pi girdi’ ney nib sumunguy u nap’an ni yad ra rung’ag fithingan Got ni be tolangnag e pi tapigpig rok nib sobut’an’ nge ku nap’an ni yad ra rung’ag e thin nu Bible, ni be ayuwegrad e kan ni thothup ni ngar nanged.—John 6:44; Acts 16:14.
Ngad Pininged e Sorok Nga Fithingan Jehovah u Taabang
15 “Gu meybil ngak Somol me fulweg taban e meybil rog; i chuweg urngin e marus rog.” (Psalm 34:4) Ba ga’ fan u wan’ David e re n’ey. Bochan e re n’ey, ma aram me gaar: “Piin ndabiyog ni ngar ayuweged yad e yad ra non ngak Somol, me fulweg taban e meybil rorad; me chuwegrad u fithik’ urngin e gafgow ni ke yib ngorad.” (Psalm 34:6) Nap’an ni gad be chag ngak e piin taareb e michan’ rodad, ma ma mab boor e kanawo’ ngodad ni ngad weliyed boch e ban’en nib mo’maw’ ni ke buch rodad ni ke ayuwegdad Jehovah riy. Re n’ey e ra gelnag e michan’ ko piin taareb e michan’ rodad, ni bod rogon David ni n’en ni yog e ki gelnag e michan’ ko piin ni ma ayuweg. Rogon David, ma piin ni yad be un ngak ni yibe gafgownagrad “e yad ra changar ngak [Jehovah] mi yad felan’; ya ri dabi m’ingan’rad.” (Psalm 34:5) Yugu aram rogon ni yad be mil rok Saul ni Pilung, ma darur tamra’gad. Ba pagan’rad ni be ayuweg Got David, ma be gal ramaen owcherad. Maku aram rogon e piin ni ka fin nra adaged e machib nge piin ni kar manged tin nriyul’ e Kristiano ni ke n’uw nap’an e yad ma sap ku Jehovah ni nge ayuwegrad. Bochan ni kar guyed ni ke ayuwegrad, ma owcherad ni ke felfelan’ e be dag ni ke mudugilan’rad ni ngar pared ni yad ba yul’yul’.
Ngan Fil Ban’en Riy
Kar Pirieged fare Messiah!
9 Yira t’ar e thin nga daken fare Messiah. I yog David ni fare psalmist ni gaar: “Be welthin e girdi’ ni kireb nib togopluw ngog, ma pi kireb ni yad be yog ni kug rin’ e da gu nang murung’agen.” (Ps. 35:11, BT) Rogon ni bay ko yiiy e “pi tolang ko prist nge urngin e girdi’ u lan fare ulung e girdi’ nrayog ni ngar tunguyed e thin ni nge mang mich rorad nib togopluw ngak Jesus, ni bochan e nge yog nli’ ngem’.” (Matt. 26:59) Bin riyul’ riy e, “boor e girdi’ ni yad e ngar micheged Jesus nra t’ared e thin nga daken Jesus, machane de taareb rogon e thin nrogned.” (Mark 14:56) Pi toogor rok Jesus e dariy fan u wan’rad ni yibe t’ar e thin nga daken, ya kemus ni yad baadag ni nge yim’.