Mang Rogon Fare Babyor ni Revelation Ngom e Ngiyal’ Ney?

1-2. Mang reb i fan nsusun e ngad adaged ni ngad nanged e n’en bay u lan fare babyor ni Revelation?

BAY ba ngiyal’ ni ke yog be’ ngom ni ngam yaliy bogi sasing ni fen, fa? Nap’an ni ga be sap u fithik’ fapi sasing ma boor e girdi’ nim guy riy ndam nangrad. Machane bay reb riy nri mit owchem ngay. Mang fan? Ya bay yaam riy. Nap’an ni ga be fal’eg i yaliy fagi sasing, ma aram mag guy rogon ni nge yib ngan’um e rofen nni fek nge gin nni fek riy. Kum guy rogon ni ngam poy e tin ka bay e girdi’ ni bay yaarad u lan fagi sasing. Rib ga’ fan e gi sasing nem u wan’um.

² Fare babyor ni Revelation e bod fagi sasing. Mang fan? L’agruw fan ni bay. Bin som’on e ni yoloy e re babyor ko Bible ney ni fan ngodad. Be gaar e bin som’on e verse riy: “U lan e re ke babyor ney e kan yoloy fapi n’em ngay ni fini dag Jesus Kristus nga ni guy. Pi n’ey e pi’ Got ngak . . . ni nge dag ngak e pi tapigpig rok Got e n’en nthingari m’ug ndab ki n’uw nap’an.” (Rev. 1:1) Ere n’en nni yoloy nga lan e re ke babyor ney e gathi fan ko girdi’ ni gubin, ya fan ngodad e pi tapigpig rok Got. Bochan ni gadad e girdi’ rok Got, ma susun e dab da gingad ngay u nap’an ni gad ra nang ni gad be un i lebguy e pi yiiy ni bay u lan e re ke babyor ney. Ere rayog ni nga nog ni bay yaadad u lan e “giney e sasing.”

3-4. Mingiyal’ e be yog fare babyor ni Revelation nra lebug e pi yiiy ni kan weliy murung’agen riy, ma mang e susun nra k’aringdad e re n’ey ni ngad adaged ni ngad rin’ed?

³ Bin l’agruw i fan e bay rogon ko ngiyal’ nra lebug e pi yiiy ney. I tamilangnag apostal John e ngiyal’ nra lebug e pi yiiy ney u nap’an ni gaar: “Chirofen ni rran rok Somol me yib fare Kan ni Thothup i ying ngog.” (Rev. 1:10) Nap’an ni yoloy John e pi thin ney u bang ko duw ni 96 C.E., ma dawori chugur ni nge taw ko “chirofen ni rran rok Somol.” (Matt. 25:14, 19; Luke 19:12) Machane rogon ni be yog e yiiy u Bible e tabab e re rran nem u nap’an ni mang Jesus e Pilung u tharmiy ko duw ni 1914. Ka aram nap’an i yib ni tabab fapi yiiy u Revelation ni bay rogon ko girdi’ rok Got ni nge lebug. Arrogon, gad be par ko “chirofen ni rran rok Somol”!

⁴ Bochan ni gad be par ko re ngiyal’ i n’em, ma aram fan ni gadad e piin nib t’uf ni ngad tedan’dad ko fare fonow ni bay ko Revelation 1:3 ni be gaar: “Nge felan’ e en nra beeg e re ke babyor ney, ma nge felan’ e piin ni yad ra motoyil ko pi thin ney ni yib rok Got ni be weliy e tin ni bayi m’ug mi yad fol ko pi n’en ni kan yoloy nga lan e re ke babyor ney! Ya ngiyal’ ni bayi m’ug e pi n’ey ni urngin e ke chugur.” Arrogon, ba t’uf ni ngad ‘beeged,’ ma gad “motoyil ko pi thin ney ni yib rok Got ni be weliy e tin ni bayi m’ug,” ngemu’ ma gad “fol” riy. Mang boch e pi thin ney nib t’uf ni ngad folgad riy?

MU GUY ROGON NI NGE M’AGAN’ JEHOVAH KO LIYOR ROM

5. Uw rogon ni be tamilangnag fare babyor ni Revelation feni ga’ fan ni ngad guyed rogon ni nge m’agan’ Jehovah ko liyor rodad?

⁵ Ka aram ko bin som’on e guruy ko fare babyor ni Revelation, ma gad fil nrib tamilangan’ Jesus ko n’en be buch u lan e ulung ko girdi’ rok. (Rev. 1:12-16, 20; 2:1) I tamilangnag Jesus e re n’ey ko fapi thin ni pi’ nge yan ko fa medlip i ulung ni bay u Asia Minor. Bay boch e fonow ni pi’ ko pi thin nem nra ayuweg e pi Kristiano ko bin som’on e chibog ni ngar guyed rogon ni nge m’agan’ Jehovah ko liyor rorad. Ma n’en ni yog ko pi thin nem e bay rogon ngak urngin e girdi’ rok Got e ngiyal’ ney. Mang e gad be fil ko re n’ey? Kristus Jesus ni ir e En Be Yog e Thin rodad e ri manang ko ba fel’ e tha’ u thildad Jehovah fa danga’. Ir e be pow’iydad ma be yororiydad, ma gubin ban’en ni be guy. Manang e n’en nib t’uf ni ngad rin’ed ya nge yag ni ngaud pared ni gad ba fel’ u wan’ Jehovah. Ere mang e fonow ni pi’ nib t’uf ni ngad folgad riy e ngiyal’ ney?

6. (a) Mang e magawon ko fare ulung nu Efesus nrogon ni yog Jesus ko Revelation 2:3, 4? (b) Mang e gad be fil ko re n’ey?

⁶ Mu beeg e Revelation 2:3, 4. Thingar dabi war e t’ufeg ni immoy rodad ngak Jehovah aram ko som’on. Ba tamilang ko thin ni yog Jesus ko fare ulung nu Efesus ni ka ur athamgilgad ma yad be ulul ko pigpig ni yad be tay ngak Jehovah ni yugu aram rogon ni ur mada’naged boch e magawon. Machane, dakuriy fare t’ufeg rorad ni immoy aram ko som’on. Ere ba t’uf ni ngki gel bayay e re t’ufeg nem ni bay rorad, ya faanra danga’ ma dabi m’agan’ Jehovah ko liyor rorad. Ku arrogodad e ngiyal’ ney ni gathi kemus nib t’uf ni ngad athamgilgad, ya kub t’uf ni nge puluw fan e athamgil ni gad be tay. Got rodad e gathi kemus nib ga’ fan u wan’ e n’en gad ma rin’, ya kub ga’ fan u wan’ fan ni gad ma rin’ e pi n’em. Ba ga’ fan u wan’ fan ni gad ma rin’ ban’en ya baadag ni ngad liyorgad ngak ni bochan e rib t’uf rodad mab ga’ fan u wan’dad.​—Prov. 16:2; Mark 12:29, 30.

7. (a) Mang e magawon ko fare ulung nu Sardis nrogon ni kan tamilangnag ko Revelation 3:1-3? (b) Mang e ba t’uf ni ngad rin’ed?

⁷ Mu beeg e Revelation 3:1-3. Thingar da ululgad ngad pared ni gad ba od. Girdien fare ulung nu Sardis e ba thil e magawon rorad. Yugu aram rogon ni ur pigpiggad ngak Jehovah kafram, machane gathi aram e n’en yad be rin’ e chiney. Aram fan ni yog Jesus ngorad ni ngar ‘odgad.’ Mang e gad be fil ko re n’ey? Riyul’ ndabi pag Jehovah talin e maruwel ni kad rin’ed. (Heb. 6:10) Machane dab da lemnaged ndaki t’uf ni ngad pigpiggad ngak Jehovah e chiney ni bochan e aram e n’en ud rin’ed kafram. Yugu aram rogon nsana bay boch ban’en ndabkiyog ni ngad rin’ed ni bod kafram, machane ba t’uf ni ngad ululgad i maruweliy e ‘maruwel rodad ni fan ngak Somol’ ma gad par ni gad ba od nge mada’ ko tomur.​—1 Kor. 15:58; Matt. 24:13; Mark 13:33.

8. Mang e gad be fil ko fapi thin ni pi’ Jesus nge yan ngak e pi walag nu Laodicea ni bay ko Revelation 3:15-17?

⁸ Mu beeg e Revelation 3:15-17. Thingar da pasiggad ko liyor ni gad be tay ma gad rin’ u polo’ i gum’ircha’dad. Ku bay reb e magawon ni tamilangnag Jesus ko fapi thin ni pi’ nge yan ngak yu Laodicea. Liyor rorad e ba par u ‘mathilin ni gathi rib gowel, ma ku de garbeb.’ Bochan nda kur pasiggad ko pigpig ni yad be tay, ma aram fan ni yog Jesus ni ‘kar ra gafgowgad.’ Ere ba t’uf ni ngar pasiggad ko liyor ni yad be tay ngak Jehovah. (Rev. 3:19) Mang e gad be fil ko re n’ey? Faanra gathi ri ka gad ba pasig ko pigpig ni gad be tay, mab t’uf ni ngad guyed rogon ni nge ga’ fan u wan’dad urngin ban’en nib manigil ni be pi’ Jehovah nge ulung rok ngodad. (Rev. 3:18) Susun e dab da guyed rogon ni nge fel’ rogon e par rodad e chiney ma dabki m’on u wan’dad e liyor rodad ngak Jehovah.

9. Mang e ba t’uf ni ngad siyeged nrogon ni tamilangnag Jesus ko thin ni pi’ nge yan ngak e pi Kristiano u Pergamum nge Thyatira?

⁹ Thingar da siyeged e machib ko piin kar digeyed e bin riyul’ e liyor ma kar chelgad yad be togopuluw ngay. I ginang Jesus boch e walag u Pergamum ni bochan e yad be yurba’nag e pi walag u lan e ulung. (Rev. 2:14-16) I yog nib fel’ e n’en be rin’ e pi walag u Thyatira ni bochan e kar siyeged e “tirok Satan ban’en nrib mith,” miki tay ir ngorad ni ngar ‘chichiiyed pa’rad’ ko tin riyul’. (Rev. 2:24-26) Pi Kristiano u rom ni ke war e michan’ rorad ma kar tababgad ni ngar folgad ko machib nde riyul’ e ba t’uf ni ngar kalgadngan’rad. Ma uw rogodad e ngiyal’ ney? Thingar da siyeged urngin e machib nib togopuluw nga rogon ni ma lem Jehovah. Piin kar digeyed e tin riyul’ ma kar chelgad yad be togopuluw ngay e rayog ni yad be “dake yad be liyor ngak Got,” machane bin riyul’ riy e kar “pied keru’rad nga gelngin.” (2 Tim. 3:5) Ere ba mom ni ngad nanged e pi machib ni yima weliy nde riyul’ ma gad siyeg ni faanra gad ma tedan’dad ngaud filed e Thin rok Got.​—2 Tim. 3:14-17; Jude 3, 4.

10. Mang e ku rayog ni ngad filed ko n’en ni yog Jesus ko fa gal ulung nu Pergamum nge Thyatira?

¹⁰ Dariy ba mit e ngongol nib kireb ni ngad uned ngay ara m’agan’dad ngay. Ku bay reb e magawon ko pi walag nem u Pergamum nge Thyatira. I yog Jesus nib kireb e n’en be rin’ boch e walag ko gal ulung ney ni bochan e darur siyeged e ngongol nde yalen. (Rev. 2:14, 20) Mang e gad be fil ko re n’ey? Dabiyog ni ngad lemnaged nra m’agan’ Jehovah ko ngongol nib kireb ni gad be rin’ ni yugu aram rogon ni ke yoor e duw ni kad pigpiggad ngak ma boor e maruwel ni gad be rin’ u lan e ulung rok. (1 Sam. 15:22; 1 Pet. 2:16) Demtrug e dodow ni be yan i taw gelngin e kireb ni be rin’ e girdi’ nu fayleng ngay, ma baadag ni ngad ngongolgad u rogon nib m’agan’ ngay.​—Efe. 6:11-13.

11. Mang e kad filed ko pi n’ey? (Kum guy fare kahol ni “N’en Gad Be Fil Riy e Ngiyal’ Ney.”)

¹¹ Ere mang e kad filed ko pi n’ey? Kad filed nib t’uf ni ngad guyed rogon ni nge m’agan’ Jehovah ko liyor rodad. Faanra gad be rin’ ban’en nrayog ni nge kirebnag e liyor rodad u wan’ Got, mab t’uf ni ngad rin’ed ban’en ngay ni ka chingiyal’ ney ya nge yag nda fel’gad u wan’. (Rev. 2:5, 16; 3:3, 16) Machane, ku bay ban’en ni tamilangnag Jesus ko fapi thin ni pi’ nge yan ko fapi ulung. Mang e re n’em?

NGE M’AGAN’UM NGAY NI NGAM ATHAMGIL U FITHIK’ E GAFGOW NI YIRA TAY NGOM

12. Mang e rayog ni ngad filed ko n’en ni yog Jesus ko pi walag u Smyrna nge Philadelphia? (Revelation 2:10)

¹² Chiney e ngad weliyed e thin ni pi’ Jesus nge yan ko ulung nu Smyrna nge Philadelphia. I yog ko pi Kristiano u rom ndab rrusgad ko gafgow ni yibe tay ngorad ya yira tow’athnagrad ko yul’yul’ ni yad be tay. (Mu beeg e Revelation 2:10; 3:10) Mang e gad be fil riy e ngiyal’ ney? Thingar da nanged ni yira gafgownagdad ma nge m’agan’dad ngay ni ngad athamgilgad u fithik’. (Matt. 24:9, 13; 2 Kor. 12:10) Mang nib ga’ fan ndab da paged talin e re n’ey?

13-14. Mang e ke buch ko girdi’ rok Got ni bochan e n’en be weliy e Revelation ko guruy ni 12?

¹³ Be yog fare babyor ni Revelation ngodad ni yira gafgownag e girdi’ rok Got ko “chirofen ni rran rok Somol” ni aram e ngiyal’ ni gad bay riy e chiney. Be yog e Revelation ko guruy ni 12 nde n’uw nap’an nga tomuren ni mang Jesus e Pilung u Gil’ilungun Got, ma aram min mahl u tharmiy. Mikael ni aram Jesus Kristus u tomuren ni sul nga tharmiy nge pi engel rok e ra chamgad ngak Satan nge pi moonyan’. (Rev. 12:7, 8) Ma aram mar gelgad ko pi toogor rok Got nem ma ron’ed yad nga fayleng ni aram e gin yad be k’aring e gafgow ko girdi’ riy. (Rev. 12:9, 12) Machane mang e ke buch ko girdi’ rok Got ni bochan e re n’ey?

¹⁴ Be weliy e Revelation e n’en ni migid ni rin’ Satan. Bochan ndabkiyog ni nge sul nga tharmiy, ma aram fan ni be cham ko pi tapigpig rok Got ni kan dugliyrad, ni aram e piin owchen Gil’ilungun Got u fayleng ni “yad be machibnag murung’agen Jesus.” (Rev. 12:17, NW; 2 Kor. 5:20; Efe. 6:19, 20) Uw rogon ni ke lebug e re yiiy ney?

15. Mini’ e be yip’ fan ‘fa gali cha’’ ni kan weliy murung’agrow ko Revelation ko guruy ni 11, ma mang e buch rorow?

¹⁵ I k’aring Satan e pi toogor rok Got ni ngar gafgownaged e pi walag ni kan dugliyrad ni yad ma yarmiy rogon ni yibe rin’ fare maruwel ni machib. Pi pumoon ney e be yip’ fan ‘fa gali cha’’ ni kan weliy murung’agrow ko fare babyor ni Revelation ni faan ni li’row ngar m’ow.b (Rev. 11:3, 7-11) Nap’an e duw ni 1918, ma aram min t’ar e thin nga daken meruk e walag ni pumoon ni yad be yog e thin ko ulung rodad, mi nog nib kireb e rorad ma nga nin’rad nga kalbus nib n’uw nap’an. I lemnag yooren e girdi’ ni aram e ke tal e maruwel ni be rin’ e piin kan dugliyrad.

16. Mang reb e ban’en ni buch ko duw ni 1919 nni ngat ngay, machane mang e ka be ulul Satan ni nge rin’ ni ka aram nap’an i yib?

¹⁶ Ku be yog fare yiiy u Revelation ko guruy ni 11 ndabi n’uw nap’an nga tomuren ma yira faseg e ‘gali cha’’ nem. De gaman reb e duw nga tomuren nni kalbusnag e pi walag ni pumoon nem, ma aram me lebug e re yiiy ney u reb e kanawo’ ni yira ngat ngay. U tabolngin e duw ni 1919, ma aram min pag e pi walag nem u kalbus me boch nga tomuren min chuweg u dakenrad fa yu pa’ i oloboch ni kan togopuluwnag ngorad. Ka chingiyal’ nem mar tababgad bayay ko machib. Machane ku de tal Satan i gafgownag e girdi’ rok Got. Ka aram nap’an i yib ni be k’aring e gafgow ni nge yib nga puluwon urngin e girdi’ rok Got ni bod rogon “ba lul’.” (Rev. 12:15) Ere, gad gubin nib t’uf ni ngad ‘k’adedan’dad me pagan’dad’ ara nge michan’dad.​—Rev. 13:10.

MU RIN’ FARE MARUWEL NI KE PI’ JEHOVAH NGODAD U ROGON NRAYOG ROM

17. Yugu aram rogon ni be cham Satan ko girdi’ rok Got, machane mang ayuw e kan pi’ ngorad ndan lemnag ni yira pi’?

¹⁷ Ki tamilangnag e Revelation ko guruy ni 12 nra yib e ayuw ko girdi’ rok Got u bang ndan lemnag nra yib riy. Ere ra bod ni ke ful’ e “but’” “fapi ran” ni be yip’ fan e gafgow ni yibe tay ngorad. (Rev. 12:16) Ma ireram e n’en ke buch. Yu ngiyal’ e bay boch ban’en ko re fayleng rok Satan ney ni bod boch e tagil’ e puf oloboch nib puluw rogon ni yad ma dugliy boch ban’en ni kar chelgad kar ayuweged e girdi’ rok Got. Boor yay ni ke gelnag e pi tapigpig rok Jehovah boch e case ni kan fek nga tagil’ e puf oloboch ma ke yag ni nge puf rogorad ni ngar rin’ed e maruwel rorad. Uw rogon ni kar maruwelgad ko re puf rogon ney ni kan pi’ ngorad? Kar fanayed e re tayim ney nib fel’ rogon ni ngar rin’ed e maruwel ni ke pi’ Jehovah ngorad. (1 Kor. 16:9) Mang e ba muun ko re maruwel ney?

18. Mang e maruwel nib ga’ fan ni gad be rin’ e ngiyal’ ney ko tin tomuren e rran?

¹⁸ I yiiynag Jesus nra machibnag e girdi’ rok fare ‘Thin Nib Fel’ ni murung’agen e gagiyeg rok Got’ u ga’ngin yang e fayleng u m’on ni nge yib e tomur. (Matt. 24:14) Nap’an ni yad ra machib, ma bay ba engel ara ba ulung i engel ni ma ayuwegrad ni be yog e Bible ni bay rorad e ‘thin ndabi math biid, ni Thin Nib Fel’ ni ngan weliy ngak e girdi’ nu fayleng, ni urngin e pi nam, nge ganong nge thin nge gubin mit e girdi’.’​—Rev. 14:6.

19. Ku mang e ba t’uf ni nge machibnag e piin nib t’uf Jehovah rorad?

¹⁹ Gathi kemus ni fare thin nib fel’ ni murung’agen Gil’ilungun Got e ba t’uf ni nge machibnag e girdi’ rok Got. Kub t’uf ni ngar pied e ayuw ko fare maruwel ni be rin’ e pi engel ni kan weliy murung’agen u Revelation ko guruy ni 8 nge mada’ ko 10. Pi engel ney e yad be weliy murung’agen bogi gafgow nra yib ngak e piin dubrad Gil’ilungun Got. Ere kab kafram i yib ni be machibnag e Pi Mich Rok Jehovah ba thin ni kan taarebrogonnag ko “ayis ni ke el nge nifiy” ni be weliy murung’agen e pufthin nra tay Got nga boch ban’en ni bay ko re fayleng rok Satan ney nib kireb. (Rev. 8:7, 13) Ba t’uf ni nge nang e girdi’ ni ke chugur e tomur ya nge yag nra thilyeged e n’en nib t’uf ni ngar thilyeged u rarogorad ya nge yag nra mageygad ni yad ba fos u nap’an e rran ko damumuw rok Jehovah. (Zef. 2:2, 3) Machane gathi gubin e girdi’ ni yad baadag ni ngar rung’aged e re thin ney. Ere ba t’uf ndab da rusgad ni ngad weliyed e re thin ney. Ra taw ko fare gafgow nib ga’, ma bin tomur e thin ni murung’agen e pufthin ni yira machibnag e ba gel boch e damumuw nra k’aring ko girdi’.​—Rev. 16:21.

MU FOL KO FAPI THIN NI KAN YIIYNAG

20. Mang e gad ra weliy ko gal ni migid e article?

²⁰ Rib t’uf ni ngad folgad ko “pi thin ney ni yib rok Got ni be weliy e tin ni bayi m’ug” ni bochan e gad ba muun nga rogon ni be lebug e n’en bay ko fare babyor ni Revelation. (Rev. 1:3) Machane uw rogon ni ngad athamgilyed e gafgow ni yibe tay ngodad u fithik’ e yul’yul’ ma gad ulul i machibnag e pi thin ney ndab da rusgad? Bay l’agruw ban’en nra pi’ gelngidad: bin som’on e n’en be yog fare babyor ni Revelation u murung’agen e pi toogor rok Got, ma bin migid e pi tow’ath nra yag ngodad boch nga m’on ni faan gad ra par ni gad ba yul’yul’. Ireray e n’en gad ra weliy ko gal ni migid e article.