Mu Fager Ngak Got Ni Manemus!

Yima athamgil ni nge yog e fager maku yima athamgil ni nge par e fager nib fel’ rogon. Ngongol rom e ra falan’nag Got me par nib fel’ thilmew.I yog Jesus ko piin ni ke michan’rad ngak ni gaar: “Tin riyul’ e ra chuwegmed ko sib.” (John 8:32) Mang fan e pi thin nem?

Rayog ni ngam falfalan’ e chiney ko puf rogon. Rayog ya kam chuw ko machib ni googsur nge pi ban rok Satan ni ke garer iyan. Rayog ni nge chuw u lanin’um fare lem ni ke sugnag laniyan’ bokum million e girdi’ ndakuriy e athap rorad ya dar nanged Jehovah. (Roma 8:22) Mus ni ngan “tamdag ko yam’” ma pi fager rok Got e kar chuwgad riy.​—Hebrews 2:14, 15.

Ra yog e falfalan’ ngom u lan e birok Got e fayleng nib biech. Ra gin owchem nga feni gel e falfalan’ ko puf rogoy ni bay yib nga m’on. U lan fare Paradis u fayleng e ke puf rogon e gubin, ke chuw e mahl, nge m’ar, nge cham’. Kan chuw ko gafgow ko ggan nge tin ba t’uf, nge bilig, nge puf rogon ndab kuun rus ko togopuluw nge tin nde mat’aw. Be yog e Bible ngak Got ni gaar: “Ga ra pithig paam ma ra fel’ rogon urngin ban’en nib fos.”​—Psalm 145:16.

Pi Fager ku Got e bay ra pired ni manemus. Yafos ni manemus e aram felngin fa bin th’abi ga’ e tow’ath ni bayi pi’ Got ngak urngin e piin ni yad be gay rogon ni ngar fagergad. (Roma 6:23) Aygum lemnag ko mang fan ngom fare yafos ni dabi mus!

Ra yoor e tayim rom ni ngam fl’eg boor ban’en. Sana ga ra adag ni ngam fil rogon i chubeg mmit e talin e musik. Ara ga ra adag ni ngam fil rogon i achay yaan ban’en fa mu mang reb e salap ko dimow naun. Ra yog ni mu adag ni ngam fil murung’agen e gamanman ara woldug. Ara ku rayog ni mu adag ni nguum milekag nga bang ngam guy boch e nam nge girdi’ nib thilthil rogon. Ra ngan fos ni manemus ma go’ ra m’ag e pi n’ey.

Ra yog ni mu gaweg boch e fager ya bay e tayim. Par ni manemus e ra yog ni mu nang boch e girdi’ ni kar manged pi tafager rok Got. Ga ra nang e pi salap rorad nge pi felngirad, maku yad ra mang boch e fager rom. Bay ra t’ufgad rom maku ga ra t’uf rorad. (1 Korinth 13:8) Ra ngan par ni manemus ma ra yib e tayim rom ni ngam m’ag fager ngak urngin e girdi’ ni bay u fayleng! Ma bin th’abi fel’ u gubin e pi n’en ney, e fager romew Jehovah nra i gel iyan ni bod rogon e pi chibog ni ke mudugil!