Ngan Pithig e Magawon ni Bay Rogon ko Siyobay

U 1 Korinth 6:1-8 e weliy apostal Paul riy murung’agen boch e walag u lan e ulung ni Kristiano ni ur feked boch e magawon ni yugu dariy rogon nga tafen e puf oloboch. I yog ni boch e Kristiano u Korinth e yad ma fek e magawon u thilrad “ngak e piin ntapuf oloboch ndawor ra nanged Got.” (Verse 1) I yog Paul fan nsusun e dabi fek e piin Kristiano e magawon u thilrad nga tafen e puf oloboch, ya ngar guyed rogon ni ngar pithiged nrogon nib puluw ko yaram u lan e ulung. Ngad weliyed boch i fan nni pi’ e re fonow ney, nge ku boch ban’en nrayog ni nge buch nde puluw ko re fonow ney.

Faanra ke sum e magawon u thildad reb e walag ni bay rogon ko siyobay, ma som’on e ngad guyed rogon ngad pithiged e re magawon nem nrogon nib m’agan’ Jehovah ngay ma gathi rogon ni gad baadag. (Proverbs 14:12) Rogon ni yog Jesus e dab ni tay e magawon nge ga’ mfin nni pithig. (Matthew 5:23-26) Machane bay boch e Kristiano ni kar ted e magawon rorad ke ga’, ke sum e maluagthin riy, ma kar feked nga tafen e puf oloboch. I gaar Paul: “Re n’en ni beer ni gimed be maluagthin u fithik’med ma gimed be yan nga tafen e pufthin e be dag ni kam mulgad u rarogon girdien Kristus.” Mang fan? Reb i fan e bochan nrayog ni nge kirebnag thin e ulung nge fare Got ni gad be liyor ngak. Ere, ba fel’ ni ngad lemnaged fare deer ni fith Paul ni gaar: “Gathi kab fel’ ni yira ngongliy e kireb ngomed?”​—Verse 7.

Ki yog Paul ni bay e yaram ni ke tay Got u lan e ulung u rogon ni ngan pithig e magawon. Piin piilal ni Kristiano e yad ba gonop ni bochan e ba tamilangan’rad ko tin riyul’ u Bible, ma aram fan ni yog Paul nrayog ni ngar ‘pithiged e maluagthin rok e piin ni walagey ni girdien Kristus’ u boch ban’en ni ma buch ko “biney e tamilang.” (Verse 3-5) I yog Jesus ni boch e kireb ni bod rogon ni kan t’ar e thin nga daken be’ ara kan sasalap u boch ban’en, e dalip e kanawo’ nrayog ni ngan pithig riy: som’on e nge guy fagali cha’ rogon ni ngar pithigew fare magawon u thilrow ni goo yow; ma faanra de yag, ma ngar fekew taabe’ fa l’agruw ni’ ni ngar mangew mich riy; ma faanra ku dawori puf fare magawon, ma ngan fek ko piin piilal u lan e ulung.​—Matthew 18:15-17.

Riyul’ ni piin piilal u lan e ulung e gathi yad e tapuf oloboch ara girdien e siyobay, maku de t’uf ni ngar pied e fonow u murung’agen e pi n’ey. Maku darur ted e motochiyel u rogon ni ngan pithig e magawon ni ke sum u thilin e pi walag ni bay rogon ko siyobay rorad. Ya ngar gayed rogon ni ngar ayuweged yad ngar folgad ko fonow u Bible me m’agan’rad nga ban’en nrayog ni nge yibnag e gapas. Bay boch e magawon nib mo’maw’ i pithig nrayog ni ngan ning e ayuw ko en ni ma lekag e ulung ara branch ofis ko Pi Mich Rok Jehovah. Machane, bay boch ban’en ni ma buch nde puluw ko re fonow rok Paul ney. Mang boch e pi n’em?

Yu ngiyal’ e ba’ t’uf ni ngan fek boch e magawon nga tafen e puf oloboch ya nge yag ni ngan pithig nib fel’ rogon mab gapas. Bod ni bay yu ngiyal’ ni kemus ntafen e puf oloboch e rayog ni ngan ngongliy riy babyoren ba wu’ e mabgol ni nge dar, ara ngan dugliy ko mini’ e bay mat’awun ni nge ayuweg reb e bitir, ara urngin nge rogon e salpiy ni nge pi’ be’ ko tabinaw rok, ara salpiy ko insurance nsusun e ngan pi’ ngak be’, ara be’ ni bay e salpiy nsusun e nge sulweg be’ ngak, ara ngan micheg e thin u bang e babyor ni ke yoloy be’ ni be yog e n’en ni ngan rin’ ko salpiy nge chugum rok u tomuren ni ke yim’. Maku bay yu ngiyal’ nrayog ni ngam fek be’ nga tafen e puf oloboch ya nge sulweg e salpiy ni kam pi’ u nap’an ni ke fekem nga tafen e puf oloboch ni bochan ban’en ni gathi gur e kam rin’.a

Faan yira rin’ e pi n’ey ndariy e tagenging riy, ma aram e dabi togopuluw ko fare fonow ni pi’ Paul.b Machane n’en nsusun e nge m’on u wan’ reb e Kristiano e aram e nge tayfan fithingan Jehovah nib thothup me par e ulung ni bay e gapas nge taareban’ riy. T’ufeg e aram e pow ko tin riyul’ i gachalpen Kristus, ma be’ ni bay e t’ufeg rok e gathi “ke mus ni ir e ma lemnag ir.”​—1 Korinth 13:4, 5; John 13:34, 35.