GURUY NI 26

Mang Fan ni Bay e Kireb nge Gafgow?

Bin ni Kan Printnag

Nap’an nra buch ban’en nrib kireb, ma ka ban’en ni yima rin’ ni ngan fith ni nge lunguy: “Mang fan ni ke buch e re n’ey?” Ri gad ba felfelan’ ngay ni bay e fulweg ko re deer ney u Bible!

1. Uw rogon ni fek Satan e kireb nga fayleng?

I togopuluw Satan ni Moonyan’ ngak Got. Bochan ni baadag ni nge mang ir e gagiyeg, ma aram me k’aring e gal nsom’on e girdi’ ni aram Adam nge Efa ni ngar unew ngak ko togopuluw. Rogon ni rin’ e re n’ey e aram e bannag Efa. (Genesis 3:1-5) I k’aring ni nge lemnag ni bay ban’en nib fel’ nder pi’ Jehovah ngak. I m’ug ko thin rok nib gel e felfelan’ nra tay e girdi’ ni faanra dab ra folgad rok Got. Satan e yog e bin som’on e ban ni aram e yog ngak Efa ndabi yim’. Aram fan ni be yog e Bible ni Satan e “ir be’ ni ma lifith l’ugun me ir e chitamangin urngin e malulifith.”—John 8:44.

2. Mang e mel’eg Adam nge Efa ni ngar rin’ew?

Rib gol Jehovah ngak Adam nge Efa. I yog ngorow nrayog ni ngar kew wom’engin urngin ken e gek’iy ni bay u lan fare milay’ nu Eden, ma kemus ni taab ken e dab ra kew wom’engin. (Genesis 2:15-17) Yugu aram rogon mar dugliyew ni ngar kew wom’engin e re ke gek’iy nem. I t’ar Efa “boch i wom’engin nge kay.” Me boch nga tomuren “me ki kay” Adam boch i wom’engin. (Genesis 3:6) Ere yow l’agruw ndar folgow rok Got. Bochan nib flont Adam nge Efa, ma aram e ba mom ni ngar rin’ew e tin nib fel’. Machane lem rorow ndab ra folgow rok Got. Ma nap’an rin’ew e re n’ey, ma aram mar denengow mar togopuluwgow nga mat’awun ni nge yog ngorow e n’en ngar rin’ew nge n’en ndab rrin’ew. Rib gel e gafgow nra tew ni bochan e n’en nrin’ew.—Genesis 3:16-19.

3. Bochan e n’en ni dugliy Adam nge Efa ni ngar rin’ew, ma mang wenegan ni ke yib ngodad?

Nap’an ni denen Adam nge Efa, ma aram e dakur flontgow miki af e denen ngak pi fakrow. Be weliy e Bible murung’agen Adam ni be gaar: “Denen e yib nga fayleng u daken taabe’, ma denen ni ngongliy e fek e yam’ i yib. Wenegan ni yib e af e yam’ ngak urngin e girdi’ nu fayleng.”—Roma 5:12.

Boor fan ni gad ma gafgow. Yu ngiyal’ e gad ma gafgow ni bochan e ba kireb e n’en kad dugliyed. Ma yu ngiyal’ e bochan e ba kireb e n’en ke dugliy yugu boch e girdi’. Maku yu ngiyal’ e gad ma gafgow ni bochan e ba kireb e gin gad bay riy u nap’an ni ke buch ban’en.—Mu beeg e James 4:13, 14.

KUM FIL BOCH BAN’EN U MURUNG’AGEN

Mu fil fan ni gathi Got tapgin e kireb nge gafgow ni be buch u fayleng e ngiyal’ ney nge rogon laniyan’ u nap’an ni gad ra gafgow.

4. En ir tapgin e gafgow ni gad be tay

Boor e girdi’ ni yad ma lemnag ni Got e ir e be gagiyegnag e fayleng. Gur, riyul’ e re n’ey? Mu yaliyew e re VIDEO ney.

VIDEO: Mini’ e Be Gagiyegnag e Fayleng? (1:24)

Mu beegew e James 1:13 nge 1 John 5:19, mi gimew weliy e fulweg ko re deer ni baaray:

Got tapgin e gafgow nge kireb ni be buch, fa?

5. Mu lemnag wenegan e gagiyeg ni be tay Satan

Mu yaliyew e re VIDEO ney.

VIDEO: Why Does God Allow Suffering?—Excerpt (3:07)

Mu beegew e Genesis 3:1-6, mi gimew weliy e fulweg ko pi deer ni baaray:

Mang ban e yog Satan?—Mu guy e verse 4 nge 5.
Uw rogon ni m’ug ko thin rok Satan ni bay ban’en nib fel’ nder pi’ Jehovah ko girdi’?
Uw rogon ni m’ug ko thin rok Satan nde t’uf ni Nge Gagiyegnag Jehovah e girdi’ ya nge yag nra felfelan’gad?

Mu beegew e Eklesiastes 8:9, mi gimew weliy e fulweg ko re deer ni baaray:

Mang e ke buch ni bochan e gathi Jehovah e Ir e Be Gagiyegnag e re fayleng ney?

Bogi sasing ni bay u taabang: Bogi sasing ni be dag yaan rarogon e fayleng ni tabab ko ngiyal’ nni sunmiy nge mada’ ko ngiyal’ ni ke Paradis boch nga m’on. A. Yaan e fayleng nib paradis nib sug e woldug riy. B. Gagiyeg ni be tay e girdi’ e ke garereg e pi yurba’ i teliw ni googsur u fayleng, ma be yurba’nag e girdi’, ma be k’aring e mahl, maku be alitnag e nifeng. Boch ko pi am ney nib gel lungurad ni kan dag ko re sasing ney e aram yu Egypt, China, Greece, Roma, Ngalis, nge Meriken. C. Girdi’ ni yad be par u fayleng ni ke Paradis bayay.

Adam nge Efa e yow ba flont ma ur parew u Paradis. Machane mar motoyilgow ngak Satan mar togopuluwgow ngak Jehovah
Tomuren e re togopuluw nem, ma aram me sug e kireb, nge gafgow, nge yam’ u fayleng
Ra chuweg Jehovah e kireb, nge gafgow, nge yam’, miki sul e girdi’ ngkur flontgad bayay mar pared u Paradis

6. Ma lemnag Jehovah e gafgow ni gad ma tay

Ma lemnag Got e gafgow ni gad ma tay, fa? Mu lemnag e n’en ni yoloy David ni Pilung nge apostal Peter. Mu beegew e Psalm 31:7 nge 1 Peter 5:7, mi gimew weliy e fulweg ko re deer ni baaray:

Uw rogon u wan’um ni kam nang ni ma guy maku ma lemnag Jehovah e gafgow ni gad ma tay?

7. Ra taleg Got gubin e gafgow ni be tay e girdi’

Mu beegew e Isaiah 65:17 nge Revelation 21:3, 4, mi gimew weliy e fulweg ko re deer ni baaray:

Mang fan nra fel’ lanin’dad ni kad nanged nra chuweg Jehovah urngin ban’en ni be k’aring e gafgow ko girdi’?

Baaray murung’agen ban’en

Nap’an ni yog Satan e bin som’on e ban, ma aram me t’ar e thin nga daken Jehovah. Re n’ey e be yip’ fan ni k’aring e girdi’ ni ngar lemnaged ni Jehovah e ir reb e Pilung nib laniyan’ ma der ma dag e t’ufeg. Nap’an nra chuweg Jehovah e gafgow ni be tay e girdi’ boch nga m’on, ma aram e ra gagiyelnag nde riyul’ urngin e pi ban ni ka nog nib togopuluw ngak. Re n’ey e be yip’ fan nra micheg ni gagiyeg rok e aram e bin th’abi fel’. Rogon ni ngan thothupnag fithingan Jehovah e aram e n’en th’abi ga’ fan ni ngan rin’ u ga’ngin yang e palpalth’ib.—Matthew 6:9, 10.

MA GAAR BOCH E GIRDI’: “Ma k’aring Got e girdi’ ni ngar gafgowgad ya nge skengnagrad.”

Mang e ga ra yog?

N’EN KAN FIL

Satan ni Moonyan’ nge gal nsom’on e girdi’ e yad tapgin e kireb ni bay u fayleng. Ri ma lemnag Jehovah e gafgow ni gad ma tay, ma dabki n’uw nap’an ma bayi chuweg.