GURUY NI 39
Rogon e Racha’ u Wan’ Got
Rib ga’ fan e racha’, ya ra dariy ma dariy bagadad nrayog ni nge par nib fos. Bochan ni Got e Ke Sunmiydad, ma ir e bay mat’awun ni nge yog rogon nrayog ni ngan fanay e racha’. Mang e ke yog u murung’agen e racha’? Rayog ni ngan kay ara ni pi’ ngak be’ fa dabiyog? Ma uw rogon nrayog ni ngam dugliy e n’en nib fel’ ni ngam rin’ ko re n’ey?
1. Uw rogon e racha’ u wan’ Jehovah?
I yog Jehovah ngak e pi tapigpig rok kakrom ni gaar: “Yafos ko gubin ban’en nib fos e bay u fithik’ e racha’.” (Levitikus 17:14, BT) Ere racha’ u wan’ Jehovah e be yip’ fan e yafos. Bochan ni yafos e aram reb e tow’ath ni ke yib rok Got nib thothup, ma aram fan ni kub thothup e racha’.
2. Mang boch ban’en ni yima rin’ ko racha’ nde m’agan’ Got ngay?
I tay Jehovah chilen ngak e pi tapigpig rok kakrom ndab ra ked e racha’. (Mu beeg e Genesis 9:4 nge Levitikus 17:10.) I sul u daken e re motochiyel ney u nap’an ni yog fare ulung ni ma pow’iyey ngak e pi Kristiano ndab ra “ked e racha’ [“ni ngar paloggad ko racha’,” NW].”—Mu beeg e Acts 15:28, 29.
Mang e be yip’ fan ni ngan palog ko racha’? Faanra ke yog e togta ngom ni ngam palog ko alkul, ma aram e thingar dab mu unum. Machane ga ra kay e ggan ni bay e alkul riy ara ni kuruf e alkul ko nguchey u dowam, fa? Ba mudugil ni danga’. Ere fare motochiyel rok Got ni be yog ni ngan palog ko racha’ e ku be yip’ fan nsusun e dab da unumed e racha’, ara da ked e ufin ni ka bay e racha’ riy, ara da ked e ggan ni kan athukuy e racha’ ngay.
Uw rogon e racha’ ni yima fanay ko tafalay? Bay boch ban’en ni yima rin’ ko racha’ nib tamilang nib togopuluw ko motochiyel rok Got. Pi n’ey e ba muun ngay ni ngan pi’ e racha’ ngak be’ nib polo’ ara reb ko fa aningeg i n’em ni bay u fithik’ e racha’ ni ka nog e red cell, white cell, platelet, ara plasma ngay. Bay yugu boch e tafalay nrayog nde tamilang ko ba togopuluw ko motochiyel rok Got fa danga’. Bod ni bay boch e tafalay ni yima fanay riy nochi ban’en ni kan fek u reb fa aningeg i n’em ni bay u fithik’ e racha’. Ku bay boch e tafalay nrayog ni nge un be’ ngay ni yibe fanay e racha’ rok. Ra be’ ma ir rok e nge dugliy e n’en nge rin’ u nap’an ni be mel’eg e re miti tafalay ni nge un ngay.a—Galatia 6:5.
KUM FIL BOCH BAN’EN U MURUNG’AGEN
Mu fil rogon ni ngam dugliy e re miti tafalay ni ngam un ngay.
3. Mu dugliy boch ban’en ni bay rogon ko tafalay nra m’agan’ Jehovah ngay
Uw rogon nrayog ni ngam dugliy boch ban’en ni bay rogon ko tafalay nib puluw nga rogon e racha’ u wan’ Got? Mu yaliyew e re VIDEO ney, mi gimew weliy feni ga’ fan ni ngan rin’ e pi n’en ni baaray.
Mu yibilay e gonop.—James 1:5.
Mu gay murung’agen boch i kenggin e motochiyel u Bible nge rogon nib l’ag ko n’en ni ngam dugliy.—Proverbs 13:16.
Mu guy ko tin ngan e tafalay e rayog ni ngam un ngay ko gin ga ma par riy.
Mu guy ko tin ngan e tafalay e dabiyog ni ngam un ngay.
Mu guy rogon ni ngam dugliy ban’en ndabi magawonnag e nangan’ rom.—Acts 24:16.b
Ngam nang ndariy be’ nsusun e nge yog ngom e n’en ngam dugliy ni fan nga boch ban’en ni bay rogon ko nangan’ rodad nib muun ngay e en mabgol rom, ara reb e piilal, ara en ma fil e Bible ngom. —Roma 14:12.
Mu yoloy nga babyor e n’en kam dugliy.
4. Pi Mich Rok Jehovah e yad ma guy rogon ni ngar uned ko tin th’abi fel’ e tafalay
Rayog ni ngad uned ko tin th’abi fel’ e tafalay ndanir fanay e racha’ riy ma ka gad be fol ko motochiyel rok Got u murung’agen e racha’. Mu yaliyew e re VIDEO ney.
Mu beegew e Titus 3:2, mi gimew weliy e fulweg ko re deer ni baaray:
Mang fan nsusun e ngaud ted fan e pi togta mu ud nonad ngorad u fithik’ e sumunguy?
Dabin fanay |
Ra reb e Kristiano ma nge dugliy |
|---|---|
A. Plasma |
Nochi ban’en u fithik’ e plasma |
B. White cell |
Nochi ban’en u fithik’ e white cell |
C. Platelet |
Nochi ban’en u fithik’ e platelet |
D. Red cell |
Nochi ban’en u fithik’ e red cell |
5. Nochi ban’en u fithik’ e racha’
Aningeg ban’en ni bay u fithik’ e racha’, ni aram e red cell, white cell, platelet, nge plasma. Ku bay nochi ban’en u fithik’ e re aningeg i n’ey ni ka nog nochi ban’en u fithik’ e racha’ ngay.c Bay boch e falay ni kan ngongliy ni bay e pi n’ey u fithik’ ni nge taleg ba mit e m’ar ara nge taleg e racha’ ni be map’ ni kaygi yoor.
Ra reb e Kristiano ma ir rok e nge dugliy ko nge fanay e nochi n’em ni bay u fithik’ e racha’ fa danga’ nrogon ni be yog e nangan’ rok ngak ni kan skulnag ko thin nu Bible. Bay boch e Kristiano ni kar dugliyed ndab ra uned nga boch e tafalay ni yibe fanay nochi ban’en riy ni kan fek u fithik’ e re aningeg i n’ey. Ma boch e be pagrad e nangan’ rorad ni ngar fanayed nochi ban’en ni kan fek u fithik’ fa aningeg i n’em ni bay ko racha’.
U m’on ni ngam dugliy e n’en ngam rin’, mag lemnag e re deer ni baaray:
Uw rogon ni nggu weliy ko togta fan ni kug siyeg ara ke m’agan’ug ngay ni nggu fanay reb ara boch ko fa nochi n’em ni kan fek u fithik’ fa aningeg i n’em ni bay ko racha’?
RAYOG NI NGE GAAR BE’: “Mang e ba kireb riy ni nge fanay be’ e racha’?”
Uw rogon e re n’ey u wan’um?
N’EN KAN FIL
Baadag Jehovah ni ngad ted e racha’ ni ban’en nib thothup.
Ngan Sul u Daken
Mang fan nib thothup e racha’ u wan’ Jehovah?
Uw rogon ni kad nanged ni fare motochiyel ni pi’ Got ni be yog ni ngan palog ko racha’ e ku bay rogon ko racha’ ni ngan pi’ ngak be’?
Uw rogon ni ngam dugliy e n’en nib fel’ ni ngam rin’ ni bay rogon ko racha’ ni yima fanay ko tafalay?
MU GAY MURUNG’AGEN
Mang e susun ni ngam lemnag u m’on ni ngam dugliy ko ga ra un nga ba mit e tafalay ni yira fanay e racha’ rom riy fa danga’?
Mang e susun ni ngam lemnag u nap’an ni ga be dugliy ko ga ra fanay fa nochi n’em ni bay u fithik’ e racha’ fa danga’?
Mang e k’aring reb e togta ni nge mich u wan’ nib puluw rogon e lem rok Jehovah u murung’agen e racha’?
Mu guy rogon ni ma ayuweg e pi piilal ni yad bang ko fare Hospital Liaison Committee pi walagrad.
a Mu guy e Guruy ni 35 ni kenggin e “Rogon ni Ngan Dugliy Ban’en nib Fel’ Rogon.”
b Mu guy e bin 5 ni kenggin e “Nochi Ban’en u Fithik’ e Racha’,” nge Yugu Boch e Thin 3 ni kenggin e “Boch e Tafalay ni Yima Fanay e Racha’ Ngay.”
c Bay boch e togta ni yad ma yog nre aningeg i n’ey ni bay ko racha’ e taareb rogon nga nochi ban’en u fithik’ e racha’. Ere sana ra t’uf ni ngam weliy ko togta rom ni kam dugliy ndab mu fanay e racha’ nib polo’ ara fa aningeg i n’em u fithik’ e racha’ ni ka nog e red cell, white cell, platelet, nge plasma ngay.