Be Fol e “Piin ni Ke Mel’egrad Got”

“Piin ni ke mel’egrad Got ni nge yog e yafos ndariy n’umngin nap’an ngorad e mich Jesus u wan’rad.”​—ACTS 13:48.

1, 2. Uw rogon ni fole tin nsom’on e Kristiano ko fare yiiy rok Jesus ni ngan machibnag fare thin nib fel’ u ga’ngin yange fayleng?

FARE babyor ko Bible ni Acts ebe weliy rogon ni i fole tin nsom’on e Kristiano ko fare yiiy rok Jesus ni ngan machibnag fare thin nib fel’ ni murung’agen Gil’ilungun Got u ga’ngin yange fayleng. (Matt. 24:14) Pi tamachib nib pasig, e yad be dage kanawo’ nib manigil ko piin ni yad be folwok rorad. Angin e machib u fithik’ e pasig ni i tay pi gachalpen Jesus u Jerusalem, e bokum biyu’ e girdi’, nib muun ngay “e pi prist,” ni pig lanin’rad ngar uned ko fare ulung ko bin nsom’on e chibog.​—Acts 2:41; 4:4; 6:7.

² Pi missionary ko bin som’on e chibog e ku boore girdi’ nra ayuweged ngar manged boche Kristiano. Bagayad ni Filip fithingan, e yan nga Samaria, ma boore girdi’ nra motoyilgad ngak u rom. (Acts 8:5-8) Ba n’uw yange gin ni i milekag Paul riy ni yad boche girdi’, nga i machibnag fare machib ko Kristiano ngak piyu Cyprus, nge yu yang u Asia Minor, Macedonia, Greece, nge Italy. Boor piyu Jew nge piyu Greece nra manged Kristiano u lane pi binaw ni i machib riy. (Acts 14:1; 16:5; 17:4) Titus e i machib u Krete. (Titus 1:5) Maku arrogon Peter ni kub gel e machib ni i tay u Babylon, ma nap’an ni yoloy e bin nsom’on e babyor rok, u ba ngiyal’ ko duw ni 62-64 C.E., ma machib ko piin Kristiano eke taw murung’agen nga Pontus, Galatia, Kappadocia, Asia, nge Bithynia. (1 Pet. 1:1; 5:13) Aram boche tayim nib fel’ ni immoy! Rib gel e pasig ko pi tamachib ni Kristiano ko bin nsom’on e chibog ni mus ko pi toogor rorad ma rogned ni kar “k’aringed e wagey u gubin yang.”​—Acts 17:6; 28:22.

3. Mang angin e machib nibe tay e pi tamachib ko Gil’ilungun e ngiyal’ ney, ma uw rogon u wan’um?

³ Mus ko ngiyal’ ney ma pi ulung ko Kristiano e kar guyed ni kube ga’ e ulung i yan. Nap’an ni gara guye report u rogone machib nibe taye Pi Mich Rok Jehovah u rebe duw ngu reb ma gathi ma yibe athamgil nga lanin’um? Gathi gara felfelan’ ni gara nang ni pi tamachib ko Gil’ilungun e kar filed e Bible ngak nel’ e milyon e girdi’ u lane duw ni 2007? Tin ni kub muun ngay e, urngin e girdi’ ni kar uned ko fare Madnom ko Yam’ ni Tay Jesus Kristus fa binem e duw ebe dag nib lich ko ragag e milyon e girdi’ ni gathi yad e Pi Mich Rok Jehovah era uned ko re madnom ney nrib ga’ fan. Be dag ere n’ey ni ka boore maruwel ni bay ni ngan rin’.

4. Mini’ e yad be motoyil ko fare thin nib fel’ u murung’agen fare Gil’ilungun?

⁴ Ngiyal’ ney e bod rogon e bin nsom’on e chibog, urngin e “piin ni [ke] mel’egrad Got ni nge yog e yafos ndariy n’umngin nap’an ngorad” e yad be motoyil ko fare thin nriyul’ mab fel’. (Acts 13:48) Jehovah ebe pow’iy e pi girdi’ ney ko ulung rok. (Mu beeg e Haggai 2:7.) Ere susune uw rogon ni nga i par pangidad nge yog nda uned i rin’ ere maruwel ney nib fel’ rogon?

Mu Machib Ntaareb Rogon e Girdi’ u Wan’um

5. Ba miti mang girdi’ e yadra fel’ u wan’ Jehovah?

⁵ Pi Kristiano ko bin nsom’on e chibog e yad manang ni “gubin e girdi’ ma taareb rogorad u wan’ Got. En ni ba’ madgun Got u wan’ ma be rin’ e tin nib mat’aw era i par nib fel’ u wan’ Got ndemtrug ko be’ u kun nam.” (Acts 10:34, 35) Ra baadag be’ ni nge fel’ e tha’ u thilrow Jehovah ma thingari mich u wan’ fare biyul ni pi’ Jesus ni fan ngodad. (John 3:16, 36) Ma aray e n’en nib m’agan’ Jehovah ngay ni aram e nge “urngin e girdi’ ni ngar thapgad ngak ma ngar nanged e tin nib riyul’.”​—1 Tim. 2:3, 4.

6. Mange ri dabi rin’ e pi tamachib ko Gil’ilungun, ma mang fan?

⁶ De fel’ ni nge turguy e pi tamachib ko fare thin nib fel’ boch ban’en u rarogon e girdi’ ni bochan raen dowrad, nge rarogon e par rorad, yaarad, teliw rorad, ara yugu boch ban’en u murung’agrad nge rarogorad. Mu lemnag: Gathi gab felfelan’ ngay ni en ni weliy ngom murung’agen e thin nu Bible ko som’on e be’ nde laniyan’? Ere thingar dab da paged i weliy fare thin nib fel’ ko en nra motoyil ngay!​—Mu beeg e Matthew 7:12.

7. Mang fan nri dab da dugliyed rarogon e girdi’ ni gad be machibnag u wan’dad?

⁷ Jehovah eke dugliy Jesus ni nge mang Ta Pufthin; ere, dariy mat’awdad ni ngad pufthinniged be’. Ba puluw ere n’em, ya​—bathil ngak Jesus—​gadad ma dugliy rogon e girdi’ u wan’dad nibe yan u rogon “[usun] faanem” ara ‘tin ni kad rung’aged ni murung’agen,’ ma Jesus e manang e n’en nibe lemnag be’ nge n’en ni bayu gum’irchaen be’.​—Isa. 11:1-5; 2 Tim. 4:1.

8, 9. (a) Ba miti mang girdi’ Saul u m’on ni nge mang rebe Kristiano? (b) Mange rra fil ngodad e n’en ni buch ku Paul?

⁸ Gubin mite girdi’ ni kar manged pi tapigpig rok Jehovah. Be’ nrayog i taarebnag ko re n’ey e Saul nu Tarsus, ni ire yib i mang apostal Paul. Saul ni ir rebe Farise, e be’ nib tatogopuluw ngak e pi Kristiano nib gel. N’en ni i dugliy u wan’ e pi girdi’ nem e gathi yad e tapigpig rok Jehovah me k’aring nge gafgownag e ulung ko Kristiano. (Gal. 1:13) Rogon nra sap e girdi’ ngay e ir be’ nsana rib mo’maw’ ni nge mang rebe Kristiano. Machane, guy Jesus ban’en nib fel’ u gum’irchaen Saul ma aram me mel’eg ni nge rin’ rebe maruwel ni yugu ba thil. Angin ni yib, e mang Saul rebi girdien e ulung ko Kristiano ko bin nsom’on e chibog nib pasig mab elmerin ko machib.

⁹ Mange gad be fil ko n’en ni buch ku Paul? Sana bay yu ulung e girdi’ nri dubrad fare thin nib fel’ ni gad be wereg ko gin gad ma machib riy. Thingar dab da talgad i gay rogon i machibnagrad, ni yugu aram rogon ni dada nanged ko yad ra mang boche Kristiano fa danga’. Yu ngiyal’ ma mus ko piin nda da lemnaged nra motoyil ko machib rodad e kar motoyilgad ngay ma yad baadag. Maruwel rodad e ngad ululgad i machibnag urngin e girdi’ u ‘gubin e rran.’​—Mu beeg e Acts 5:42.

Baye Tow’ath ko Piin Nima Machib ni ‘Urngin e Rran’

10. Mang fan ndab da paged i machibnag e girdi’ ni gad ma rus ngak? Mu weliy rebe experience.

¹⁰ Yaan be’ e rayog ni nge k’aringdad ngad turguyed boch ban’en nde fel’ u murung’agen facha’. Bod ni Ignacio,a e tabab ni ngar filed e Pi Mich rok Jehovah e Bible u taabang u nap’an ni bayu kalbus u rebe nam u Yimuch u Meriken. Ma rus e girdi’ ngak ni bochan e ir be’ nib ta cham. Bochan ere n’em, ma piin ni yad bay u kalbus e ur fanayed Ignacio ni nga i kunuy e malfith rorad ni immoy rok boche girdi’. Machane, nap’an ni mon’og Ignacio ko tirok Got ban’en me fol ko pi n’en ni fil, ma aram me thil nge mang be’ nib gol. Daki fanay fapi cha’ e cha’ney ni nga i kunuy e malfith rorad ko girdi’, make mudugil u wan’ ni thin nriyul’ u lane Bible nge gelngin Got e ire ke ayuweg ni nge thilyeg pangin. Makub felfelan’ ni piin nra filed e Bible ngak e gathi yad ba laniyan’.

11. Mang fan ni yig gad ma sul ko girdi’?

¹¹ Rebi fan ni gad ma sul ko girdi’ ni kad weliyed murung’agen fare thin nib fel’ ngorad u bayay ngu bayay e bochan nrayog ni nge thil rarogorad nge pangirad. Tomuren e yay ni tomur ni ka darod da guyed yad, ma sana bochi yade ke yib bmit e m’ar nib ubchiya’ ngak, ara ke digeye maruwel rok, ara ke yim’ be’ nib t’uf rok. (Mu beeg e Eklesiastes 9:11.) Magawon u fayleng e rayog ni nge k’aring e girdi’ ni ngar lemnaged murung’agen e gabul nge langlath. Pi n’ey e rayog ni nge k’aring be’ ndabun​—ara immoy ni ma togopuluw—​ko machib kafram ni nge motoyil. Ere, thingar dab da paged i wereg e machib ngak boche girdi’ ni yugu demtrug rogon.

12. Susun nge uw rogone girdi’ u wan’dad u nap’an ni gad be yan ko machib, ma mang fan?

¹² Ngan taareb rogonnag e girdi’ u wan’uy e ban’en ni ka yima rin’. Machane, Jehovah e ma sap ko girdi’ ni be’ nge be’. Ma guy fel’ngidad ni be’ nge be’. (Mu beeg e 1 Samuel 16:7.) Ere ku thingar da rin’ed ere n’ey u nap’an ni gad be machib. Boor ban’en nike buch rok boore girdi’ nib fel’ ni angin ni gadad be sap ngay ni urngin e girdi’ ma ra motoyil ko machib rodad.

13, 14. (a) Mang ni achig fan u wan’ rebe pioneer rebe ppin ni mada’nag u nap’an e machib? (b) Mange rayog ni ngad filed ko re n’ey?

¹³ Sandra nreb e pioneer, e i un ko machib u mite tabinaw u rebe donguch u Carribean u nap’an ni mada’nag Ruth, nibe’ nri baadag nima un ko madnom ko carnival. L’agruw yay ni gel Ruth kore carnival ney. I dag nriyul’ ni baadag e n’en ni weliy Sandra ngak, ere tabab i fil e Bible. I gaar Sandra: “Nap’an ni gura yib u langan e mab rok nga naun, ma n’en nsom’on ni guma guy e ba ngi sasing ni gathi fel’ ba achig ni yaan e anemi Ruth nib chuw nga madan rebe pi carnival nem, mu kug guy boore trophies ni bay u naun rok niki winnag ko pi carnival nem. Mug lemnag nibe’ ni aram rogon nri boore girdi’ ni manang ma riku baadage carnival e dabi n’uw nap’an nra adag e tin nriyul’. Ere da kug wan gguy.”

¹⁴ Ba ngiyal’ nga tomren, ma aram me yib faanem i Ruth nga Kingdom Hall, ma nap’an ni m’ay e muulung, me gaar ku Sandra, “Mang fan ni kam tal nda ku mur yib mu fil e Bible ngog?” Me wenig Sandra ngak ma aram mu kur tayew e tayim ni ngkur filew e Bible bayay. I mon’og Ruth, me munmun me chuweg fapi sasing ko carnival u naun rok, ma aram me tabab ni nge un nga boch ban’en u lane ulung, me ognag e yafas rok ku Jehovah. Arrogon, yibi nang Sandra nde fel’ e n’en ni rin’ ko som’on.

15, 16. (a) Mang angin ni yib ni bochan e machib ni tay rebe tamachib ngak rebe girdi’ rok? (b) Mang fan ndab da talgad i machibnag be’ nibchane n’en nii buch rok kakrom?

¹⁵ Boor angin nib fel’ nike yib ngak e piin ni kar machibniged boche girdi’ u tabinaw rorad ni dubrad e machib, ni mus ko ngiyal’ ni dubrad ni ngar motoyilgad. Mu lemnag e n’en ni buch ku Joyce, nreb e walag ni ppin u Meriken. Rebe girdi’ rok nibe’ nib pumoon e yigi yima yin’ nga kalbus ni ka nap’an nib fel’ yangaren. I gaar Joyce, “Ma yoge girdi’ ndariy ban’en nib fel’ ngay ya bochan nima feke falay ni kireb, mab moro’ro’, ma boor bogi ban’en nib kireb nima rin’. Ma yugu aram rogon, ma yugu ma yoge tin nriyul’ nu Bible ngak ni ke gaman 37 e duw.” Gelngin e gum’an’ rok ni nge ayuweg be’ rok e rini tow’athnag nib gel u nap’an nra tababgad e Pi Mich Rok Jehovah i fil e Bible me thilyeg e yafas rok nrib gel. Dawori n’uw nap’an, nike gaman 50 e duw rok facha’ ni pibe’ rok Joyce min taufenag u rebe district convention u California, U.S.A. I yog Joyce ni gaar: “Ug yornag e felfelan’. Kar gu felfelan’ ndag tal i ayuweg!”

¹⁶ Sana gara magawon ni ngam non ngak boche girdi’ rom nibchane rarogorad ko som’on. Machane, dariy rebe pi n’ey ni taleg Joyce ni nge dabi machibnag fare pumoon ni pibe’ rok. Ya uw rogon me nang be’ e n’en ni bay u gum’irchaen be’? Rayog nriyul’ nibe gay facha’ e tin nriyul’ ko teliw rok. Ere, dab mu tal i ayuweg nge pirieg e tin nriyul’.​—Mu beeg e Proverbs 3:27.

Rebe Talin e Maruwel nib Ga’ Angin ko Fol Bible

17, 18. (a) Mange be dage report ko pi nam u fayleng u rogon angin fare babyor ni What Does the Bible Really Teach? (b) Mange kam pirieg nib fel’ u nap’an nim fanaye re babyor ney?

¹⁷ Report ko pi nam u fayleng ebe dag ni piin nib fel’ gum’ircharad e kar daged ni yad baadag fare babyor ni yibe fanay ko fol Bible ni What Does the Bible Really Teach? (Mang e Ri Be Fil e Bible?) Penni nreb e pioneer u Meriken e tababnag in e study nibe fanay ere babyor ney. L’agruw i yade yow ba piilal boch ma riyow ba m’ing ko teliw rorow. De mudugil u wan’ Penni ko ra uw rogon u wan’row fapi thin ko Bible ni bay ko fare Bible Teach. Ere yoloy ni gaar, “Bochan feni tamilang nge feni mom rogon ni kan yoloy fapi thin u lan fare babyor, ma aram me mich u wan’row ni n’en ni yow be fil e aram e tin nriyul’, ndar togopluwgow ngay.”

¹⁸ Pat nreb e publisher u Britian, e tabab i fil e Bible ngak be’ ni ppin nike mil ko nam rok u Asia. Ke lemnag ni nge chuw u rom nibchane ke feke salthaw e pumoon rok nge ba pagal ni fakrow ndabkur mada’gad bayay. Ke pare yafas rok u thatharen e riya’, ma kan urfiy e naun rok, maki immoy ba ulung i pumoon nra towasariyed ngar koled u fithik’ e yargel. Gubin e pi n’ey e k’aring nge lemnag ndakuriy fan ni nge par, ma boor yay ni gay rogon ni nge li’ ir ngem’. Machane, fare fol Bible nra tiyew Pat e ire pi’ e athap ngak. I yoloy Pat ni gaar, “Fapi thin nib mom nge ku pi fanathin nib mom ko fare ke babyor ni Bible Teach e ayuweg.” I mon’og nib papey, me munmun me mang rebe publisher ndawori taufe, me dag nriyul’ ni baadag ni nge un ko taufe. Rib gel e felfelan’ riy ni ngan ayuweg e girdi’ nib yul’yul’ ngar nanged fan mar adaged fare athap nibe pi’ e Bible!

“Dabi Chalbadad i Ngongliy e Ngongol nib Fel’”

19. Mang fan nri yibe gur i rin’ fare maruwel ko machib?

¹⁹ Gubin e rran nibe yan mabe gel boche gur ko fare maruwel ni gad be rin’ ni machib nge ngan pingeg e girdi’ ngar manged bochi gachalpen Jesus. Gubin e duw ma bokum biyu’ e girdi’ ni yad baadag ni ngar filed murung’agen Got e yad be adag e machib rodad. ‘Fare rran rok Jehovah nib ga’ e ke chugur,’ mabe yip’ fan ni piin ni yad be darifannag e thin rok Got e ‘yad be dol’dol’ i yan ko gin ni ngan li’rad riy ngar m’ad.’​—Zef. 1:14; Prov. 24:11.

20. Mange thingar dugliyed ni ngad rin’ed?

²⁰ Ku rayog ni ngad ayuweged e girdi’. Machane, rogon meyog ni ngad rin’ed ni aram rogon e ngad folwokgad ko Kristiano ko bin nsom’on e chibog, “urngin e rran nra ul’ulgad ngay nguur filed ngak e girdi’ ma yad be machibnag ngak e girdi’ fare Thin Nib Fel’ ni murung’agen Jesus.” (Acts 5:42) Mu folwok rorad ni aram e ngam athamgil u fithik’ e pi magawon rom, mag tiyan’um nga rogon fen mu ‘salap i fil ban’en’ ku be’, ma nap’an ni gabe machib ma nga i taareb rogon e girdi’ u wan’um! “Ere dabi chalbadad i ngongliy e ngongol nib fel’,” ya faan gadra athamgil, ma gadra t’ar wom’engin ni boor.​—2 Tim. 4:2; mu beeg e Galatia 6:9.

[Footnote]

Uw Rogon ni Gara Fulweg?

• Mini’ e piin nibe motoyil ko fare thin nib fel’?

• Mang fan nthingar dab ud dugliyed rogon be’ u wan’dad u nap’an ni gad be machib?

• Mang boch angin ni keb ko fare babyor ni What Does The Bible Really Teach? (Mang e Ri Be Fil e Bible?)

[Picture on page 15]

Bokum biyu’ e piin nib fel’ gum’ircharad ni yad be dag ni yad baadag e machib

[Picture on page 17]

Mange rayog ni ngad filed u rogon ni thil apostal Paul?

[Picture on page 18]

Pi tamachib ko Gil’ilungun e dab ur dugliyed u wan’rad rarogon be’