Noah nge fare Ran ni Tharey e Fayleng Ba Riyul’, Gathi Ba Yat
GA BAADAG ni ngam par u lan reb e fayleng nib fel’—ba fayleng ni girdi’ riy e yad be par u fithik’ e gapas? ndariy e mahl, nge cham, nge gafgow riy? Ra arrogon, ma rayog ni nge yib e athamgil nga lanin’um u reb e chep ni sana ri ga manang nrib fel’ rogon. Aram fare chep ni murung’agen Noah, ni be’ nib moon nib fel’ ni ngongliy ba arke ni ayuwegrad e tabinaw rok u nap’an nni tharey e fayleng ko ran nge math owchen e girdi’ nib kireb.
Boor e girdi’ nib lich e chep ni yad manang. Fare chep u murung’agen Noah e bay u reb e babyor ko Bible ni Genesis, guruy ni 6 nge ni mada’ ko 9, ma kan weliy bayay u lan fare Koran ngu lan e chep ni boor e girdi’ ni ma weliy u fayleng. Gur, riyul’ ni yib e Ran nge Tharey e fayleng kakrom, fa kemus nib yat ni yima weliy ni nge pi’ e athamgil nga laniyan’ e girdi’ ngar rin’ed e tin nib fel’? Boch e girdi’ ni ma fil e machib ko Bible nge pi scientist e ke yoor e chibog ni yad be maluagthin u murung’agen e re deer ney. Machane, Bible, ni Thin rok Got, e rib tamilang ni be dag nriyul’ fare chep ma gathi ba yat. Am lemnag:
Fare thin u Genesis e be yog ngodad e duw, nge pul, nge rorran nib ere Ran nem riy, nge ngiyal’ nge gin ni yan i par e re arke nem ngay, nge rorran ni melik e but’ u fayleng. Rib tamilang rogon ni kan weliy murung’agen ere arke nem—rogon yaan, nge rogon ni kan foleg, nge n’en nni ngongliy ngay. Yat e ba thil yab ga’ ni gathi ri yima tamilangnag rarogon ban’en riy.
L’agruw e chep nu Bible u murung’agen e tabinaw ni be dag e mich riy nriyul’ ni immoy Noah. (1 Kronicles 1:4; Luke 3:36) Ezra nge Luke ni yow era weliyew murung’agen ere tabinaw ney e l’agruw ni’ nib fel’ rogon ni yow ma fal’eg i gay murung’agen ban’en. Luke e weliy rogon lik’egal’ rok Jesus Kristus i yan nge taw ngak Noah.
Isaiah nge Ezekiel ni yow l’agruw e profet nge apostal Paul nge Peter ni yow e Kristiano e goo ur weliyed murung’agen Noah nge fare Ran ni Tharey e Fayleng.—Isaiah 54:9; Ezekiel 14:14, 20; Hebrews 11:7; 1 Peter 3:19, 20; 2 Peter 2:5.
I weliy Jesus Kristus murung’agen fare Ran ni Tharey e Fayleng ni gaar: “Re ngiyal’ i n’en ni baaram nnap’an Noah e ra aram rogon ko pi rran rok e en ni Fak e Girdi’. Un par ni yibe abich ma yibe garbod, ma be mabgol e pumoon nge ppin nge yan i mada’ ko re rran ni baaram ni yan Noah riy nga lan fare ark me yib e ran i tharey e binaw nge li’rad ni yad gubin.” (Luke 17:26, 27) Faan gomanga de yib fare Ran nge Tharey e Fayleng, ma ra yan i aw nib m’ay fan e n’en ni weliy Jesus u murung’agen e “pi rran rok e en ni Fak e Girdi’.”
I weliy apostal Peter u m’on riy nra yib i m’ug boch e girdi’ ni “bay ur moninggad” ngaur darifannaged e n’en nibe yog e Bible. “Ma tin ni yad be yim’ ni bochan” e yoloy Peter ni, “daburad ni ngar tafinayniged e re bugithin ni baaray nib riyul’ . . . ni fare ran ni yib nge tharey e nam e ir e kirebnag e bin kakrom e fayleng.” Ere, gur ngad feked owchedad ko re bugithin “nem nib riyul’”? Ri danga’! Miki ulul Peter ngay nge gaar: “Lan e lang nge re fayleng ney ni ba’ e chiney e ka re bugithin nem rok Got e ir e ke tay ndabi kireb nge yan i mada’ ko ngiyal’ ni nge yib e nifiy i kirebnag. Ke tay Got ndabi kireb ni fan ko chirofen ni bay ni pufthinnag e girdi’ nib kireb nge mu’ min kirebnagrad.”—2 Peter 3:3-7.
Ere ku bayay, bayi thang Got e piin nib kireb, maku bayay ni ku bay e piin ni yad ra magey nib fas. Faan gad ra folwok ku Noah, ma rayog ni ngad uned ko piin nib mat’aw ngan chuwegdad u fithik’ e gafgow ma darod nga lan reb e fayleng ni kab fel’ ko biney.