Uw Rarogon e Chitamangidad nu Tharmiy?

BOOR e girdi’ nib mit ngorad fare meybil ni Chitamangimad ara Meybil rok Somol, ni faani fil Jesus ngak pi gachalpen. (Matthew 6:9-13) Gubin yay ni yad ra yog e re meybil nem, ma yad ma pining Got ni “Chitamangimad.” Machane, uw urngin e girdi’ nrayog ni nga rogned nri yad manang Got nib fel’ rogon?

Me gur, ga manang Got nib fel’ rogon, fa? Ba fel’ e tha’ u thilmew, ma ga ma non ngak ma kag ma yog ngak e tin ni ma felfelan’um ngay nge tin ni ma kireban’um ngay, fa? Ra ngan nang Got nib fel’ rogon ma mang e be yip’ fan?

“Fithingan e Jehovah”

N’en ni manang bbitir u murung’agen e chitamangin e ir e Papa’ rok. Machane, nap’an ni be ilal i yan, ma ra nang fithingan e chitamangin nge rogon thin nib fel’ yima weliy ma dabisiy nra felfelan’ ngak. Ma uw rogon e En ni Ke Pi’ e Yafas ngodad? Ga manang ko mini’ fithingan nge fan e ngochol rok?

Yugu aram rogon ni boor e girdi’ ni ma sul u daken fare thin ni “Ngan tay fan fithingam nib thothup” u nap’an ni yad be yog fare Meybil rok Somol, ma dabiyog ni ngar pied e fulweg u nap’an ni yira fith ngorad ko, “Mang e re ngochol nem?” Lan e lang nib sug e t’uf riy nge pi burey nib fel’ yaan nge lugoch nu maday ni boor ramaen e gubin ni be dag nriyul’ ni bay Got. Machane, pi n’ey e dar yog ngodad fithingan Got. Ra ngad nanged e re ngochol nem, mab t’uf ni ngad yaliyed u Bible. Rib tamilang ni be yog ni: “Fithingan e Jehovah.”​—Exodus 15:3, New World Translation.

Baadag Got ni ngad nanged fithingan ni aram e Jehovah. Mang fan? Ya bochan ni be m’ug rarogon riy. Fan e re ngochol nem e “Ke K’aring ni Nge Buch.” Fan e re n’ey e rayog ni nge mang e n’en nib t’uf ni nge mang ni fan e nge lebguy e n’en nib m’agan’ ngay. Mu lemnag ni aray rogon: Faanra nge ayuweg reb e matam e tabinaw rok, ma thingari yognag e salpiy nga tabinaw, me mang ba ta fonow nge en ni ma pufthinnigey nge en ni yima yog e thin ngak nge en ni ma ayuwegey nge sensey, ni be yan u rogon e tin nib t’uf ko fare tabinaw nge rarogorad. Taareb rogon ko fare ngochol ni Jehovah ni be dag ngodad nrayog rok Got ni nge rin’ e tin nib m’agan’ ngay ni fan ngak e piin ni yad ma pigpig ngak ndemtrug e n’en nra buch.

Chiney e ngad weliyed e pi maruwel nib thilthil ni ma rin’ e Got rodad ni gad ba t’uf rok nrogon nib puluw nga fithingan. Ra ayuwegem nge yog ni fel’ u wan’um Jehovah nge rarogon, mu kum nang e n’en nthingar mu rin’ me fel’ e tha’ u thilmew.

“Got ko T’ufeg nge Gapas”

I pining apostal Paul e en ni ngongliydad ni “fare Got ko t’ufeg nge gapas.” (2 Korinth 13:11, NW) Mang fan? Ya yog Jesus boch nga m’on riy ni gaar: “Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.” (John 3:16) Bochan nrib t’uf e girdi’ rok Got ma aram me pi’ Fak nrib t’uf rok ni nge mang biyul ni fan e nge yog e yafas ni manemus ndakuriy e amith nge gafgow. Ku aram fan ni gaar Paul: “Denen e ma pi’ puluwoy ni yam’; machane tow’ath rok Got ngodad ndariy puluwon e yafos ndariy n’umngin nap’an nra pi’ u daken e taab girdi’ ni kad tiyed e Somol rodad i Jesus Kristus.” (Roma 6:23) Re n’ey e ra k’aringdad ni nge t’uf Got rodad me fel’ e tha’ u thildad.

Gathi ke mus ni ma dag Got e t’ufeg rok ngak e girdi’ ni gubin ya ku ma dag ngak e piin nib yul’yul’ ni be’ nge be’. I yog Moses ngak piyu Israel kakrom ni boor yay nda ur folgad ni gaar: ‘Mog, arrogon ngongolmed ngak Somol, gimed e pi balyang nir ni dariy e gonop romed? Ir e chitamangimed, me ir e sunumiymed, me ir e gagiyegnagmed kam manged ba nam.’ (Deuteronomy 32:6) Kam nang feni ga’ fan e re thin ney? Yugu aram rogon ni i oloboch e girdi’ rok Jehovah ma i lemnagrad ni bod rogon ba matam nib t’uf pi fak rok. Miki pi’ urngin e tin nib t’uf rorad ni bod e chugum nge tin nib t’uf nga lanin’rad nge pi n’en nra ayuwegrad nge yog ni par nib fel’ e tha’ u thilrad Got.

Boor ban’en ni ma thilthil ko yafas rodad ni ma gafgownag lanin’dad maku ma yibnag e magafan’ ngodad. Ba t’uf be’ ni nge ayuwegdad nge yog nda sapgad ko magawon rodad nib fel’ rogon. Mini’ e rayog ni nge rin’ e re n’ey? Ke micheg Jehovah ngodad u daken e Thin rok u Bible ni ir e Tafonow nge En ni Ma Ayuwegdad ni gad ba t’uf rok. Re ke babyor nib thothup nem e be weliy fan ni gad ma mada’nag boor e magawon nge gafgow nge rogon ni nga darod u fithik’. Ma dag Jehovah e t’ufeg nib gel ngodad u daken e ayuw ni ma pi’ ngodad ni bod rogon ba matam ni ke ayuweg bochi pagal ni fak ni ke dol’ ke maadad. Riyul’ nrayog rok Jehovah maku baadag ni nge ayuweg e piin ni yad ma maruweliy e michan’ rorad ngak.​—Isaiah 59:1.

Ku ma m’ug ni gad ba t’uf rok Got ni bochan e ma ‘Motoyil ko Meybil’ rodad. (Psalm 65:2) Uw rogon? I yog apostal Paul ni gaar: “Dariy ban’en ni nge magafan’med ngay, machane faan gimed ra meybil ngak Got mi gimed ning ngak e tin ni nge yog ngomed, ma gubin ngiyal’ ni nguum ninged ngak ni gimed be pining e magar ngak u lanin’med. Ma gapas rok Got ndabi chuchugur ni nge nang e girdi’ fan e ra yororiy gum’irchamed nge tafinay romed ngi i par rok Kristus Jesus.” (Filippi 4:6, 7) Ra um meybil ngak Got u fithik’ e yul’yul’ mag fol ko pi n’en ni be yog ko Thin rok, maku rayog ni ngeb e “gapas rok Got ndabi chuchugur ni nge nang e girdi’ fan” ngom.

“Ba Got ni Manang Urngin Ban’en”

Ka nog u Bible ni Jehovah e ba Got ko “tamilangan’.” Bochan ni ir “ba Got ni manang urngin ban’en,” ma kemus ni yigoo ir e manang fan rarogon e girdi’ nge tin nib t’uf rorad nib fel’ rogon. (Job 36:4; 1 Samuel 2:3) I yog u daken Moses ntapigpig rok ni “gathi goo ggan e ma tay e girdi’ nib fos, ya girdi’ e dabisiy ni nge yog ngorad urngin bugithin ni Somol e yib rok.” (Deuteronomy 8:3; Matthew 4:4) Be yip’ e re n’ey fan ni gathi kemus ni yigoo chugum e ba t’uf rodad.

En Ke Sunmiydad e ma pow’iydad maku ma fonownagdad u daken e Thin rok u Bible. Nap’an ni gad ra fil e Bible ma gad fanay e fonow riy nga lan e yafas rodad, ma ra fel’ rogodad u “urngin bugithin ni Somol e yib rok.” Bod e n’en ni yog Zuzanna nreb e ppin nib Kristiano u murung’agen e tabinaw rok ni gaar: “Ke gel e tha’ u thilmow e en mabgol rog ni bochan e gamow ma beeg e Bible u taabang, maku gamow ma un ko muulung ko Kristiano u taabang, maku gamow ma weliy ngak e girdi’ e tin kug filew. Bochan ni be fonownagmow Got ma aram fan ni ke yog ni nggu namegew taab ban’en miki felfelan’mow ko tha’ nib fel’ u thilmad Got.”

Uw rogon ni nge fel’ rogom ko fonow ni yib rok Got? Faanra um fil e Bible ni gubin e rran ma ga be fol ko fonow riy, ma rayog ni nge yibnag boor e flaab ngom.​—Hebrews 12:9.

Fare “Got ni Ma Ayuwegey”

Fayleng e ngiyal’ ney e ke sug ko cham. Dariy be’ ni manang e n’en nra buch ko gabul nge langlath. Faanra ga be par u reb e nam ni yigi be mahl riy, ma dabisiy ni ga be athapeg ba ngiyal’ ni ngeb e gapas. Boor yang u fayleng ni ma par e girdi’ riy u fithik’ e marus ni bochan e cham nge bugel, nge magawon ko salpiy, nge terrorist. Mini’ e ra ayuwegdad ko pi n’ey? Chiney e rib t’uf e ayuw ko girdi’ maku ba t’uf ni ngan chuwegrad u fithik’ e gafgow.

Be gaar e Bible: “Fithingan Jehovah e ba wulyang ni tafen e damit nib gel. Ra yan e piin nib mat’aw ngay ma yira ayuwegrad.” (Proverbs 18:10, NW) Gad ra nang fithingan Got ma ra k’aringdad ni ngad lemnaged e tin ni ke rin’ nge tin ra rin’ ni fan e nge chuweg e piin ni yad be maruweliy e michan’ rorad ngak u fithik’ e gafgow. Kari micheg Jehovah Got nrayog ni nge chuweg e girdi’ rok u fithik’ e gafgow. Bod ni ayuweg piyu Israel nge gothey e pi karrow ni ma giringiy e os rok Farao nge pi salthaw rok. Ke micheg Jehovah ni ir reb e Got nib yul’yul’ ma ma lemnag e piin ni kar gafgowgad ma baadag ni nge chuwegrad u fithik’ e gafgow.​—Exodus 15:1-4.

Rarogodad ko gabul nge langlath e be yan u rogon ni gad ra maruweliy e michan’ rodad ngak Jehovah Got ni ir e ma Ayuwegdad. David ni Pilung u Israel nthingari k’adan’ u fithik’ boor e magawon e dag e re miti michan’ ney u nap’an ni yoloy murung’agen Jehovah ni gaar: “Gur e Got rog, ni ga ma ayuwegeg.” (Psalm 25:5) Ki non apostal Peter u fithik’ e pagan’ ni gaar: “Somol e manang rogon ni nge ayuweg e piin ni yad ma fol rok ko gafgow ni ma yib ngorad.”​—2 Peter 2:9.

Ke micheg Got e re n’ey ngak e en nra sap ngak ni nge ayuweg ni gaar: “Bay gu . . . yoror rok e piin ni yad manangeg.” (Psalm 91:14) Pi tapigpig rok Got e ngiyal’ ney e kar guyed feni riyul’ e re n’em ni kan micheg. Henryk nu Poland e ke pigpig ngak Jehovah u fithik’ e yul’yul’ u lan 70 e duw, ni yugu aram rogon nib gel e magawon nge togopuluw ni keb ngak. Nap’an ni ke gaman 16 e duw rok, min pi’ e chitamangin nge yan ko fare Auschwitz concentration camp. Ma aram mi nin’ Henryk nge ba pagel ni walagen ngab kalbus ni fan ko piin ni kab fel’ yangarrad. Tomren e re n’em, ma aram mu un pi’ u reb e concentration camp nga reb. I weliy Henryk murung’agen e pi n’en ni i buch rok ni gaar: “N’umngin nap’an ni i yib e skeng ngog ma de digeyeg Jehovah. Gubin ngiyal’ ni ayuwegeg ni yugu aram rogon ni boor yay ni chugur ni nggum’.” Arrogon, ma pi’ Jehovah gelngin e pi tapigpig rok maku ma ayuwegrad ngar pired nib gel e michan’ rorad nge yog nra k’adedan’rad u fithik’ e gafgow.

Dabki n’uw nap’an me chuweg Got e piin ni yad ma maruweliy e michan’ rorad ngak ko gafgow. Ke gaar: “Ke mus ni gag e Somol, ke mus ni gag e rayog rog ni nggu ayuwegmed u pa’ e toogor romed.” (Isaiah 43:11) Nap’an e “Rran rok Got ni Gubin ma Rayog Rok,” ma ra gothey gubin e girdi’ nib kireb nge chuwegrad u fayleng me ayuweg e piin ni yad ba mat’aw. (Revelation 16:14, 16; Proverbs 2:21, 22) Ke micheg Jehovah ngodad ni gaar: “Piin ni yad mmunguy e bay ra pired u daken e nam u fithik’ e gapas, mu ur pired u fithik’ e gapas ni yad ba felfelan’.”​—Psalm 37:11.

Ngan Mang “Pi Fak Got”

Nap’an Malaki ni profet, me yog piyu Israel ni Jehovah e Chitamangirad. Machane, nap’an ni t’uf ni ngar daged e tayfan ngak mi yad pigpig ngak u polo’ i gum’ircharad, ma aram muur ognaged e flowa ngak ni ke kireb nge gamanman nib m’ar m’ar. Aram fan ni fithrad Jehovah ni gaar: “I gag e chitamangimed, ere mang fan ndamur liyorgad ngog?”​—Malaki 1:6.

Dab mu oloboch ni bod piyu Israel ndar yul’yul’gad. Ya gamad be pi’ e athamgil nga lanin’um ni ngam fil murung’agen Jehovah Got mag fal’eg e tha’ u thilmew. I tay James ni gachalpen Jesus chilen ni gaar: “Mu chugurgad ngak Got, me chugur ngomed.”​—James 4:8.

Faanra nge mang Jehovah e Chitamangidad mab t’uf ni ngad rin’ed boch ban’en. Faanra mu athamgil ngam tayfan Got u rogon ni ga be fol ko pi motochiyel rok u fithik’ e yul’yul’ ma ga be fanay nga gubin ban’en u lan e yafas rom, ma dabi pagtalin e athamgil ni ga be tay. Maku reb riy e ra ayuwegem ni ngam man ko fare pa’ i kanawo’ nib k’iy ni yan nga lan fare fayleng ni kan micheg, ma yira par u rom ma “dab ku unim’, ma dab ki i kireban’uy, ma dab ku un yor, ma dab ku un amith.” (Revelation 21:4) Ngiyal’ n’em e gubin e piin nib yul’yul’ e gathi ka “yad e sib rok e wod, mi yad un ko flaab rok pi fak Got.”​—Roma 8:21.

[Blurb on page 5]

Baadag Got ni ngad nanged fithingan, ni aram e Jehovah, ni fan e re ngochol nem e “Ke K’aring ni nge Buch”