Uw Rarogon Got?

Ba Ga’ ni Ma Yog e Girdi’ ni:

◼ “Bay u gubin yang, ma bod e nifeng.”

◼ “Ba gel gelngin.”

Mang e Yog Jesus?

◼ “Pire’ e singgil ni bay u lan e naun rok e Chitamag.” (John 14:2) I yog Jesus ni bay e naun rok Got nib fanathin.

◼ “Ku gub rok e en ni Chitamangiy ngaray nga fayleng; me ere chiney e bay gu chuw u roy u fayleng nggu sul ngak e en ni Chitamangiy.” (John 16:28) Ba mich u wan’ Jesus ni Got e gathi gubin yang ni bay riy ya bay bang ni ba mudugil ni ma par riy.

DARIY ba ngiyal’ ni yog Jesus ni Got e bay u gubin yang. Ya ma non ma ma meybil ngak Got. Ma ba ga’ ni ma pining Jehovah ni Chitamangin ni bay u tharmiy. Re n’ey e be dag nrib fel’ e tha’ u thilrow Got.​—John 8:19, 38, 54.

Riyul’ ni “dariy be’ ni kaa guy owchen Got” ma “Got e Kan.” (John 1:18; 4:24) Machane, re n’ey e gathi be yip’ fan ni dariy downgin Got. Ya be yog e Bible ni: “Ba’ e dowef ni downgin e girdi’, ere ku er rogon ni ba’ reb e dowef nib thil nga downgin e girdi’.” (1 Korinth 15:44) Ere gur, bay downgin Jehovah nib thil nga downgin e girdi’?

Arrogon. Nap’an nni faseg Jesus ko yam’ me “yan nga lan e tharmiy, ni ereram e gin ni ke yan ngay ni ke yan nga p’eowchen Got ni fan ngodad.” (Hebrews 9:24) Re n’ey e be dag ngodad l’agruw ban’en ni ba riyul’ ma ba ga’ fan u murung’agen Got. Bin som’on e bay bang ni ba mudugil ni ma par riy. Ma bin migid e gathi gubin yang ma bay riy.

Ere, uw rogon ni rayog rok Got ni nge gagiyegnag gubin ban’en? Bay gelngin ni ba thothup ni ma maruwel ngay ni demtrug bang ni rayog ni nge pi’ nge yang ngay. Bod reb e matam ni be k’iyag pa’ ni nge ayuweg fak ere ku arrogon Got ni ma pi’ gelngin nib thothup ni nge lebguy e tin nib m’agan’ ngay.​—Psalm 104:30; 139:7.

Bay rarogon Got nge tafinay rok ma bay e tin ni baadag nge tin ni dabun. Be yog e Bible ni ma t’ufeg e girdi’ rok ma ba felfelan’ ko tin ni ke sunmiy, ma ba fanenikan e meybil ko liyos, ma ma kireban’ ko tin nib kireb ni ma buch. (Genesis 6:6; Deuteronomy 16:22; 1 Kings 10:9; Psalm 104:31) Ku be yog e Bible ni bin riyul’ e Got e ba felfelan’. Arfan ni yog Jesus ni rayog ni nge t’uf e biney e Got rodad u polo’ i gum’irchadad!​—Mark 12:30.

[Blurb on page 5]

Bod reb e matam ni be k’iyag pa’ ni nge ayuweg fak ere ku arrogon Got ni ma pi’ gelngin nib thothup ni nge lebguy e tin nib m’agan’ ngay