Jesus e Got ni Gubin Ma Rayog Rok, Fa?

Ba ga’ ni ma yog e girdi’ ni:

▪ “Jesus e ir Got ni Gubin Ma Rayog Rok.”

▪ “Got e ke yib nga fayleng ke ngal’ nib girdi’ ni aram Jesus.”

Mang e ke yog Jesus?

▪ “Faanra gub t’uf romed, ma gimed ra felfelan’ ngay ni bay gu wan ngak e en ni Chitamangiy, ya ir e ka ba ga’ ngog.” (John 14:28) I yog ni ir nge Chitamangin e yow ba thil.

▪ “Bay gu sul nga tharmiy ngak faanem ni ir e Chitamag me ir e Chitamangimed, ni ir e Got rog me ir e Got romed.” (John 20:17) Ere ba tamilang ni yog Jesus ni gathi ir Got.

▪ “Dawor gu weliy ban’en ni gag e gu lemnag, machane en ni Chitamangiy ni ir e ke l’ugeg ku gub e ir e ke yog ngog e tin nthingar gu weliy.” (John 12:49) Thin ni i machibnag Jesus e gathi lem rok ya lem rok e Chitamangin.

I YOG Jesus ni ir Fak, ma gathi ir Got Gubin Ma Rayog Rok. Faanra Jesus e ir Got, mini’ e i meybil ngak u nap’an ni immoy u fayleng? (Matthew 14:23; 26:26-29) Ere de puluw ni nga nog ni be non Jesus ngak, ya bin riyul’ riy e be non ku Got!

Nap’an ni be ning l’agruw i gachalpen Jesus e liw nib tolang ngak, me yog ni gaar: “Ri bay mu unumew e n’en ni bay ko kap rog, machane dariy mat’awug ni nggu dugliy e en ni nge par nga ba’ ni mat’aw nge en ni nge par nga ba’ ni gilay’ rog. Ya gali yang i n’ey e tagil’ e gali cha’ ni ke ngongliy e Chitamag rogon ni ngar tagil’iyew.” (Matthew 20:23) Gur, be bannagrow Jesus ni be yog ni dariy mat’awun ni nge turguy e n’en ni yow be ning? Danga’! Ya ke yog u fithik’ e sobut’an’ ni kemus ni Got e bay mat’awun ni nge turguy e re n’em. Ma ki yog Jesus ni bay boch ban’en ni de nang maku de nang e pi engel ya kemus ni goo Chitamangin e manang.​—Mark 13:32.

Gur, kemus ni ngiyal’ ni immoy Jesus u fayleng e kab sobut’ ngak Chitamangin? Danga’. Be yog e Bible ni ki mada’ ko ngiyal’ ni kan faseg ko yam’ ke yan nga tharmiy makub sobut’ ku Got. Yog apostal Paul ni “Got e lolugen Kristus.” (1 Korinth 11:3) Be yog e Bible ni boch nga m’on ma “yira tay urngin ban’en riy nga tan pa’ Kristus ni ir e nge gagiyegnag, ma aram e ir, ni ir e Fak Got, e bayi ta’ ir nga tan pa’ Got ni ke ta’ urngin ban’en nga tan pa’ Kristus; ma aram e Got e bay i gagiyegnag urngin ban’en.”​—1 Korinth 15:28.

Ere rib tamilang ni Jesus e gathi ir Got ni Gubin ma Rayog. Arfan ni yog Jesus murung’agen Chitamangin ni “Got rog.”​—Revelation 3:2, 12; 2 Korinth 1:3, 4.

[Blurb on page 7]

Ki yog Jesus ni bay boch ban’en ni de nang maku de nang e pi engel ya kemus ni goo Chitamangin e manang