“Dawori Taw nga Nap’an ni Nggum’”

I moy ba wu’ i mabgol nge be’ nib pumoon ni 23 e duw rok ni yad be yan u kanawo’ meb ba karrow ni ba ga’ ni ma fek e dow nge aw ngorad. Rogon ni yog reb e shimbung e fagali mabgol e ka chingiyal’ nem mar m’ow ma fare pumoon e ke aw nga but’ ni ke man e fan rok ni dakuriy ban’en ni manang. Nap’an ni od me nang e n’en ni ke buch ma n’en ni lemnag ko som’on e: “Ri da gu lemnag nra buch ban’en ni aray rogon. Got, wenig ngom ri dab mu pageg ya dawori taw nga nap’an ni nggum’.”

DABISIY ni kam rung’ag boch ban’en ni aray rogon bayay. Nap’an nra buch ban’en ni bay e riya’ riy ma bay be’ nde yim’ riy min gaar, ‘Dawori taw ko wol rok’, ma faanra bay be’ ni ke yim’ ma yima gaar, ‘Ke taw ko wol rok’ fa ‘Aram e n’en nib m’agan’ Got ngay.’ Yugu aram rogon ni bochi yad e ma yog ni wol fa bochan e aram e n’en nib m’agan’ Got ngay, ma taab n’en e ba michan’rad ngay. Boor e girdi’ e yad ma lemnag ni tin ma buch rorad e ke m’ay i dugliy u m’on riy ma dariy ban’en ni rayog ni ngar rin’ed ngay. Biney e lem e gathi goo nap’an ni ke buch ban’en ku be’ e ma sum ya ka ban’en ni ke n’uw nap’an ni ma lemnag e girdi’ nriyul’.

Bod ni piyu Babylon kakrom e ba mich u wun’rad ni pi t’uf nge rogon ni ma mithmith e ma gagiyegnag rogon e yafas ko girdi’. Ere yad ma taga’ ko pi n’en ni yad ma guy u lan e lang ni nge pow’iyrad. Ma Piyu Greece nge piyu Roma e ra paged e tirorad e got nguur liyorgad nga boch e got ni ma fal’eg e wol.

Hindu nge Buddhist nu lan e ngek u Asia e ba mich u wun’rad ni n’en ni ma buch ku be’ e chiney e bochan e n’en ni i rin’ u reb e yafas ni i moy riy kafram. Ma n’en ni be rin’ e chiney e ra turguy e n’en nra buch rok ko bin migid e yafas ni bay fini yan ngay. Ma yugu boch e teliw nib muun e teliw ko Kristiano ni googsur ngay e ku yad ma machibnag nra be’ ma kan dugliy u m’on riy e n’en nra buch rok.

Ere mus ko chiney ni ke yoor ban’en ni kan nang, ma ka boor e girdi’ ni yad ma lemnag ni rarogon e yafas rorad nge tin ra buch rorad boch nga m’on e be yan u rogon e wol rorad ma dariy ban’en ni rayog ni ngar rin’ed ngay. Me gur, aram rogon e n’en ni ga ma lemnag fa? Gubin ban’en ni ma buch u lan e yafas ko girdi’ ma ban’en nib mudugil nra buch fa? Wol e be gagiyegnag e yafas rom fa? Ngad guyed rogon nra ayuwegdad e Bible ngad pirieged e fulweg ko pi deer ney.

[Picture on page 3]

Ken Murray/​New York Daily News