Mang e Michan’?

UW ROGON fan e michan’ u wan’um? Boch e girdi’ e ma yog ni aram e nge mich u wan’um ban’en ni ke yog be’ ndab mu fith murung’agen ngam nang. Reb e ta yol u Meriken ni H. L. Mencken fithingan e yog ni michan’ “e nge riyul’ ban’en u wan’um ni dabiyog ni nge buch.”

Machane, der yog e Bible ni michan’ e nge mich ban’en u wan’um ndab mu fith murung’agen fa michan’ e de puluw ya be yog ni gaar: “Ra nge michan’dad ma aram e ke pagan’dad ko pi n’en ni ir e ke l’agan’dad ngay, ma ke michan’dad ko pi n’en ndarid guyed nga owchedad.”​—Hebrews 11:1.

Bochan nib thilthil fan e michan’ u wan’ e girdi’, me ere ngad guyed e fulweg ko pi deer ni baaray:

• Uw rogon nib thil fan e michan’ nrogon ni ke weliy e Bible nga rogon ni ma weliy boor e girdi’?

• Mang nib ga’ fan ni nge yog fare michan’ ngodad nrogon ni be yog e Bible?

• Uw rogon ni nge gel e michan’ rom?

Michan’ ni Bay e Mich Riy

Nap’an nni yoloy fare babyor nu Bible ni Hebrews, mab ga’ ni yima fanay fare bugithin ni kan piliyeg u roy ni “ke pagan’dad.” Ba ga’ ni yima tay nga lan babyoren e siyobay ni be micheg ban’en ni nge yog ngak be’ boch nga m’on. I yog reb e babyor nreb i rogon ni yira pilyeg fare thin u Hebrew 11:1 e: “Michan’ e bod rogon bangi babyor ni be micheg ni nge yog boch ban’en ngak be.”

Faanra bay bayay ni kam chuw’iy ban’en u reb e company ni ma pagan’uy ngay mag son ni ngar bad ra pied ngom, ma aram e bay e re miti michan’ nem rom. Babyoren e chugum ni kam chuw’iy ko fare company e ir e ra ayuwegem ni nge pagan’um ngorad maku aram e mich riy ni yira pi’ ngom e n’en ni kam chuw’iy. Faanra mu n’ag e gi babyor nem nga bang ma aram e dakuriy e mich riy ni gur e mu chuw’iy fapi chugum. Ere piin ni ke michan’rad ko pi n’en ni ke micheg Got e ba mudugil nra yog ngorad. Machane, piin dariy e michan’ rorad e dabi yog ngorad e tin ke micheg Got.​—James 1:5-8.

Fa bug ni migid e thin ni kan pilyeg u Hebrews 11:1 ni “ke michan’dad,” e be yip’ fan ni nge mich u wan’um ban’en, ni ban’en nib thil rogon ni ke mich u wan’ e girdi’. Bod e yal’. Gad ra sap ngay ma bod ni be liyeg e fayleng. Ya ma m’ug u ngek’ me yani aw ko ngal. Machane, piin ma fil murung’agen e pi n’en ni bay u lan e lang e ka rogned ni yal’ e bay u lukngun ma fayleng nge boch e pi n’en ni bay u lan e lang e be liyeg e yal’. Ra riyul’ e re n’em u wan’um, ma aram e ra mich u wan’um ni fayleng e ma liyeg e yal’ ni yugu aram rogon nib thil nga rogon ni ga ma guy. Ra aray rogon ma aram e gathi ke mich ban’en u wan’um ndam fith murung’agen ngam nang. Maku michan’ ni aray rogon e ra ayuwegem ni ngari puluw rogon ban’en u lanin’um ma gathi rogon ni ga be guy.

Uw Feni Ga’ Fan e Michan’ nib Gel?

Ireray e re miti michan’ ni be yog e Bible ni ngar da maruweliyed nge yog ngodad ya ba ga’ fan. I yoloy apostal Paul ni gaar: “Dariy be’ nra fel’ u wan’ Got ni faanra de mich Got u wan’. Ya en nra yib ngak Got e thingari mich u wan’ ni ba’ Got ma ra tow’athnag e piin ni yad be gayiy Got.”​—Hebrews 11:6.

Gathi ban’en nib mom ni nge gel e michan’ rok be’. Machane, faan ga ra fol ko fa aningeg i kanawo’ ni kan weliy faram ma rayog ni ayuwegem.