Mu Ayuwegem Rok e Pi Kan nib Kireb

JAMES e be’ nchuguliy u bang nib palog ko mach u Malaita, u Solomon. Nap’an ni kab bitir nge mada’ ko ngiyal’ ni ke ilal min nog ngak ni nga i tay fan e pi kan. I yog ni gaar: “Dagur yan ni ngguy e pi kan ni ngar gafgowniged e girdi’, machane gu ma lemnag ni dabiyog ni ngan felfelan’ ni faanra dab ni yan ni guy e pi kan ni ngar ayuweged e girdi’ ko gafgow.”

Ku aram rogon boch e girdi’ u yu yang u fayleng ni yad ma lem ni bod rogon yu Solomon ni yad ma lemnag ni pi kan e rayog ni nge ayuwegey ma ku ra gafgownigey. Boor e girdi’ u Malenesia e yad ma yog ni bay e kan nib fel’ ma dabni rus ngorad.

Boor e kanawo’ ni ma lemnag e girdi’ rogon ni ma maruwel e pi kan riy. Bod rogon James u nap’an ni kab bitir, ma guy ni boor e pin ni yad ma milnag e bitir rorad nga lan e naun u nap’an ni yad ra rung’ag laman e arche’ ni korokoro. Mang fan? Yad ma lemnag ni laman e pi arche’ n’ey e be yip’ fan ni bay yib e gafgow ngak be’.

Ma boch e girdi’ u lan binaw e yad ma tay mit e malang nib wechwech nga langan e mab ko naun rorad. Ke rin’ James e re n’ey ya i lemnag ni ra ayuweg e pi kan nge dabi yib e gafgow ngak. Maku nap’an ni ra mu’ James ko abich u tabon e maruwel ma ra kunuy urngin e ggan rok ni ke aw nge n’ag nga bang ni dabi guy e girdi’. Be lemnag ni ra guy be’ e ggan rok ni ke aw u but’ ma rayog ni ngan pig ngay nge yib e m’ar ngak.

Sana de taareb rogon e pi n’ey ni ke rin’ James ko gin ni ga ma par riy, machane sana kam lemnag nib fel’ nib t’uf ni ngam fol ko pi yalen ya nge yog ni nge ayuwegem rok e pi kan nib kireb. Sana ke mich u wan’um ni ra fel’ rogom ni faan ga ra fol ko pi yalen ney.

Faan ga ra tayfan e Bible ma dariy e maruwar riy ni ga ra adag ni ngam nang e fulweg ko pi deer ni baaray: (1) Uw rogon ni ra gafgownigem e pi kan nib kireb? (2) Rayog ni nge yib e gafgow ngom ni bochan boch e yalen ni bay rogon ko pi kan nib kireb, fa? (3) Uw rogon ni ga ra ayuwegem rok e pi kan nib kireb ma ga felfelan’?

Rogon ni Ma Gafgownigey e Pi Kan nib Kireb

Be tamilangnag e Bible ni de yib e pi kan nib kireb ko girdi’ ni ke yim’. Be gaar: “Piin nib fos e yad manang ni bay ra m’ad, machane piin nib yam’ e dariy ban’en ni yad manang.” (Eklesiastes 9:5) Fapi kan nib kireb e riyul’ ni yad e engel ni ra togopuluwgad mi yad un ngak Satan ma yad be guy rogon ni ngar bannaged e girdi’.​—Revelation 12:9.

Be tamilangnag e thin nu Bible nib t’uf ni ngad ayuweged gadad rok e pi kan nib kireb. Ke yog Paul ko Kristiano nu Efesus ni gaar: “Gathi gadad be cham ngak e girdi’, ya gadad be cham ngak gelngin e kan nib kireb.” Miki yog Peter ni Satan e pilungen e pi kan nib kireb, ma “bod ba layon ni be tolul, ni be gayiy be’ ni nge longuy.”​—Efesus 6:12; 1 Peter 5:8.

Rogon ni ma gafgownag Satan e girdi’ ko som’on e ma bannagrad me athukuy lanin’rad me waliyrad ni ngar rin’ed ban’en ni nge k’aring e damumuw ngak Got. Be yog e Bible ni Satan e ma “piliyeg ir nge bod yaan ba engel ko tamilang.” (2 Korinth 11:14) Ma dake ir e kan nib manigil ni ra ayuwegey machane n’en ni be lemnag e ba kireb. Ma ta’ Satan laniyan’ e girdi’ u fithik’ e lumor ya nge dabiyog ni ngan nang e sasalap rok nge tin riyul’ u murung’agen Got. (2 Korinth 4:4) Mang e be nameg Satan ni nge rin’ e girdi’?

Baadag Satan ni nge liyor e girdi’ ngak, ndemtrug ko kar nanged ko ir Satan fa dangay machane yad be liyor ngak. Nap’an ni immoy Jesus u fayleng ma baadag Satan ni nge ‘ragbug Jesus nga but’ nge ta’ fan’. Machane me gaar Jesus: “Satan, mman ngam chuw! Ya babyor nib thothup e be gaar, Mu ta’ fan Somol [“Jehovah,” NW] ni Got rom ma yigo ir e ngam pigpig ngak!” (Matthew 4:9, 10) Dabun Jesus ni nge rin’ ban’en ni nge liyor fa nge tay fan Satan.

Ba gel Jehovah ngak urngin e kan ma dabi pag ni nge buch ban’en ko girdi’ ni yad ma fol rok. (Psalm 83:18; Roma 16:20) Ere faanra gadad baadag ni ngad felan’naged Jehovah ni bod ni rin’ Jesus mab t’uf ni ngad paged gubin mit e liyor nge boch e yalen ni fan ngak Satan nge pi moonyan’ rok. Ba t’uf ni ngad nanged ko mang boch e yalen nib sor fan ko liyor ngak e pi kan nib kireb. Uw rogon ni gara nang?

Boch e Yalen ni Dabun Got

Ke yog Jehovah ko girdi’ nu Israel kakrom ni dab ra uned nga boch e yalen ko pi nam u toobrad. Ke gaar: “Dab mu paged e girdi romed ngar uned ko bey ara chib; ara ur motokangad; ara ra fanayed falayin e flegyan fa adag; ara pong thagith.” Ma be yog e Bible ngak e girdi’ ni ma rin’ e pi yalen ney ni gaar: “Somol ni Got romed e ba fanenikan e girdi nma ngongliy e mitney e ngongol nib sonogor.”​—Deuteronomy 18:10-12.

Ere faanra bay boch e yalen ni yima rin’ u lan e binaw rom ma ngam fithem: Re yalen ney e bay rogon ko moonyan’ fa? Re yalen ney e bay rogon ko pig, fa? Bay mit e falay ni bay rogon ko ngongol ko moonyan’, fa? Re yalen ney e be dag ni gu be tay fan reb e kan fa gu be ta’ fan Jehovah nge Jesus?​—Roma 14:11; Filippi 2:9, 10.

Ri ba ga’ fan ni ngad paged e pi yalen ney nib sor fan ko moonyan’. Mang fan? Be gaar Paul: “Dabiyog ni ngam abichgad u tebel rok Somol mi ki gimed abich u tebel rok e pi moonyan’.” Ma ki yog ni dabiyog ni ngan felan’nag Got ma ka yibe felan’nag e pi moonyan’ ya yira k’aring e “damumuw ngak Somol [“Jehovah,” NW].” (1 Korinth 10:20-22) Baadag Jehovah ni kemus ni go’ ir e ngad liyorgad ngak.​—Exodus 20:4, 5.

Mu fithem: Re yalen ney e be yog ni de milfan ngog e n’en ni nggu rin’? Susun, bod rogon ni ngam pirew be’ ni dawor mabgolgow e dabun e girdi’ u lan e binaw rom maku be yog e Bible ni ba kireb ni ngan rin’. (1 Korinth 6:9, 10) Machane, boor e yalen u lan e Pacific ni yima fanay “falayin e adag.” Yima tay e falay nga ban’en ni ngan kay. Ere be’ ni ke un ko ngongol ni darngal e ra yog ni ke rin’ ni bochan e falayin e adag ni kan pi’ ngak ma de kireb u wan’ e girdi’.

Be yog e Bible ni ba mil fan e ngongol rodad ngodad. (Roma 14:12; Galatia 6:7) Ke lemnag Efa ni Satan e ke wawliy nge denen nib togopuluw ngak Got me yog ni gaar: “Fare porchoyog e bannigeg nggu way.” Machane, ke yog Jehovah ni n’en ni ke rin’ Efa e ir e kireb rok. (Genesis 3:13, 16, 19) Maku arrogodad ni gad ra weliy e pi n’en ni ud rin’ed ngak.​—Hebrews 4:13.

Mang e Thingar Mu Rin’

Faanra ga baadag ni ngam felan’nag Got ma ga fol ko motochiyel rok, ma aram e ba t’uf ni ngam ayuwegem rok Satan nge pi moonyan’ rok. Girdi’ nu Efesus kakrom nib yul’yul’ e ur rin’ed ni aram rogon. Kar kunuyed urngin e babyor rorad ni bay rogon ko pig kar “urfiyed u p’eowchen urngin e girdi’” ni nge dabki kirebnagrad e pi kan nib kireb.​—Acts 19:19.

U m’on ni kar urfiyed e pi babyor rorad ma pi girdi’ ney e ra “bad nga rogned u fithik’ e girdi’ ni yoor e tin nib kireb ni ur rin’ed.” (Acts 19:18) N’en ni ke fil Paul ngorad u murung’agen Kristus e ke bit nga gum’ircharad. Ma aram e gathi kemus ni kar urfiyed e pi babyor rorad ya ku kar dabuyed e pi yalen rorad.

Riyul’ nib mo’maw’ ni ngan pag boch e yalen. James ni kad weliyed kafram boch e aram e magawon ni yib ngak. I tabab e Pi Mich Rok Jehovah ni ngar filed e Bible ngak me felfelan’ ko pi n’en ni ke fil. Machane, ka be ulul i ning e ayuw ko pi kan. Ke mich u wan’ e tin ke micheg Jehovah ni ra pi’ ngodad boch nga m’on, machane ka be lemnag ni kab t’uf ni nge fol ko re yalen nem ni nge dabi buch ban’en rok.

Mang e ke ayuweg James ni nge dabki lem ni aram rogon? I gaar: “Kug meybil ngak Jehovah ni nge yororiyeg ko kireb ma ra ayuwegeg ni ngari pagan’ug ngak. Ma kug pag e pi yalen ni ug un ngay kafram.” Gur, bay ban’en ni buch rok? I yog James ni “dariy” ban’en ni buch rok. Miki yog ni, “N’en ni ke buch e kug fil rogon ni nggu pagan’ug ngak Jehovah. Ma kug guy ni rayog ni ngad chuchugurgad ngak me mang fager rodad.” Bin riyul’ riy, e ke gaman medlip e duw ni ke un James ko machib ni gubin ngiyal’ ma be fil e Bible ngak e girdi’.

Mang fan ni dab mu fol ko n’en ni ke rin’ James? Mu fal’eg i yaliy e pi yalen ni bay u lan e binaw rom ma “ga fal’eg i lemnag” ko ba puluw ko “tin nib m’agan’ Got ngay” fa danga’. (Roma 12:1, 2) Faanra mu athamgil, ma rayog ni nge pagan’um ni ga ra ‘fel’ u wan’’ Jehovah ma ra ayuwegem. (2 Korinth 6:16-18) Bod rogon e n’en ni ke rin’ James rayog ni ngam nang ni riyul’ e tin ke micheg e Bible ni gaar: “I Somol [“Jehovah,” NW] e bod ba wulyang ni tafen e damit nib gel; ni gin rayog ni nge yan e piin nib mat’aw ngay ma dabi buch ban’en rorad.”​—Proverbs 18:10.

[Credit Line]

Courtesy of Dr. Bakshi Jehangir

[Picture on page 10]

“Korokoro”

[Picture on page 10]

Be kunuy ba rugod chubungen e ggan ni ke mul nga but’ ya nge dabi fanay e kan nib kireb nge magawonnagrad