N’en Ni Gad Ra Fil Rok Jesus

Murung’agen “e Tomur”

Mang e ra chuw?

Ke fith pi gachalpen Jesus ni lungurad: “Mang e pow ko ngiyal’ ni ga bay nge ngiyal’ ni ke chugur nga tomren e re m’ag ney?” (Matthew 24:3, NW) Nap’an ni fulweg Jesus fare deer ma de yog ni ran kirebnag e fayleng. Ya ke weliy murung’agen e “re m’ag ney” ni aram e pi am nge pi yurba’ i teliw ni ke sunmiy e girdi’ ma be gagiyegnag Satan. (Matthew 13:22, 40, 49) Ere ireram fare m’ag ni weliy Jesus murung’agen ni gaar: “Ma aram mfini taw nga tomren e re m’ag ney.”​—Matthew 24:14, NW.

Uw rogon ni weliy Jesus e tomur?

Tomren e re m’ag ney e ba “thin nib fel’.” Be gaar Jesus: “Ma re Thin rok Got ney Nib Fel’ ni murung’agen e gagiyeg rok Got e bay ni machibnag u gubin yang u fayleng ni nge urngin e girdi’ me nang, ma aram feni yib e tomur.” Ere ki tamilangnag Jesus tomren e re m’ag ney ni gaar: “Ya gafgow ko re ngiyal’ nem e ri kab mal’af ni kab gel e gafgow riy nga reb e gafgow ni kaa yib, ni ka nap’an ni sum e fayleng nge mada’ ko bin daba’ e rran, fa ki yib reb e gafgow ntaareb rogon ngay. Machane ke lichnag Got e pi rran nem; ya faan mang e dabi rin’ ni aram rogon, ma dariy be’ nra fos.”​—Matthew 24:14, 21, 22.

Mini’ e Piin ni Yira Thang?

Kemus ni piin ni de t’uf Jehovah nge Jesus rorad e yira thangrad. Pi girdi’ ney e darur folgad rok Got. Be gaar Jesus: “Ngiyal’ ni bay e en ni Fak e girdi’ e ku bod fa ngiyal’ nem u nap’an Noah. Pi rran u m’on ni yib fare ran . . . ma dar folgad ko thin rok Got nge mada’ ko ngiyal’ ni ke yib e ran ke tharey e fayleng me thangrad ni  yad gubin.” (Matthew 24:36-39) Ke yog Jesus ni boor e girdi’ ni be yan u daken e kanawo’ ko magothgoth. Machane ki micheg ni bay e kanawo’ nib “wen’in” ni yan ko yafas ni manemus.​—Matthew 7:13, 14.

Wuin e ran thang e re m’ag ney?

Nap’an ni fith Jesus ko mang fare pow ko ngiyal’ ni bay nge “tomren e re m’ag ney,” me gaar: “Ya bay reb e nam me cham ngak reb e nam, ma gin nsuwon reb e pilung e bayi mahl ko gin nsuwon reb e pilung. Ma bay i yib e uyungol nge durru’ u gubin yang. . . . Ma aram gelngin ni bayi wer ko girdi’ e tin nib kireb ni aram e rogon nib t’uf be’ rok be’ e bayi meewar.” (Matthew 24:3-12) Pi n’en ni be buch e ngiyal’ ney e be tamilangnag ngodad ni dabki n’uw nap’an ma Gil’ilungun Got e ra pi’ e gapas ngak e girdi’ rok. Be gaar Jesus: “Ngiyal’ ni gimed ra guy e pi n’ey ni be m’ug, ma aram e ngam nanged ni gagiyeg rok Got e ke chugur ni nge taw.”​—Luke 21:31.

Mang e thingar mu rin’?

Ke yog Jesus ni Got e ke “pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.” (John 3:16) Faanra ngad ngongolgad u rogon ni ke michan’dad ngak Got nge Fak mab t’uf ni ngad filed ngad nanged murung’agrow nib fel’ rogon. Ke gaar Jesus: “Baara’ ira’ e yafos ndariy n’umngin nap’an: ni aram e nge nangem e girdi’ ni kari mmus ni gur e bin riyul’ e Got, mi yad nang ko mini’ Jesus Kristus, ni ir e kam l’og ke yib.”​—John 17:3.

Thingar da ayuwgad ni nge dab da paged e pi n’en ni ma magafan’uy ngay ni nge talegdad i fil rogon ni ngad t’ufeged Got. I gaar Jesus: “Mu ayuwgad, ma dab mpaged gimed nguum pired ni ba ga’ ni mur ni ke pag rogon nge muun rrum e gimed be maruweliy, nge pi n’en ni ma magafan’uy ngay ko biney e tamilang, ya richey mi gimed da’da’ ko re Rran nem ni ke taw ngomed. Ya ra taw ngak urngin e girdi’ nu fayleng ni bod rogon ba wup ni pangthal.” Ma faanra mu folgad ko thin rok Jesus ma rayog “ndabi buch ban’en romed.”​—Luke 21:34-36.

Ra ga baadag ni ngkum nang boch, mag guy fare thin ni “Ke Taw Ko ‘Ngiyal’ Ni Tomren E Fayleng!’” ko guruy ni 18 ko paragraph 1-6 ko fare babyor ni Rayog Ni Ngam Par Ni Gab Fas U Paradis U Faylenga

[Footnote]