Mu Tiyan’um ko Naun rok Jehovah!

“Rogon ni gu be tiyan’ug ko naun rom, i gur Got e be yik’ u fithik’ag ni bod ba nifiy.”​—JOHN 2:17.

1, 2. (a) Mang e rin’ Jesus u tempel ko duw ni 33? (b) Mang fan ni rin’ Jesus e re n’em?

MU LEMNAG e re n’ey ni buch kakrom. Ngiyal’ nem e nap’an e Paluk’af ko duw ni 33. Ma nga nel’ e pul u m’on riy ni ke tabab Jesus ko machib. Ma chiney e be yan i yan nga Jerusalem. Ma nap’an ni taw nga tempel, me pirieg boch e pumoon “ni yad be chuway’ ko garbaw, nge saf, nge bulogol, ma ku er rogon e piin ni yad ma thilyeg e salpiy ni yad bay u tebel rorad.” Ma aram me ngongliy e dimow u yu yil’ i gaf nge tuluf urngin fapi gamanman ngar chuwgad u lan e tempel. Me thikiy e tebel rok e piin ni yad ma thilyeg e salpiy nge wer e salpiy rorad ni wasey u but’. Me yog ngak fapi cha’ ni yad ma fol chuway’ ko bulogol ni ngar chuwgad u rom.​—John 2:13-16.

² N’en ni rin’ Jesus e be dag nrib ga’ fan e tempel rok Got u wan’. I gaar: “Dab mu ted tafen e Chitamag nib market!” Nap’an ni guy pi gachalpen e pi n’ey ni ke buch, meb ngan’rad fapi thin ni yoloy David ni gaar: “Rogon ni gu be tiyan’ug ko naun rom, i gur Got e be yik’ u fithik’ag ni bod ba nifiy.”​—John 2:16, 17; Ps. 69:9.

3. (a) Mang fan fare bugithin ni tiyan’? (b) Mang deer e ngad fithed gadad riy?

³ Fan ni rin’ Jesus e pi n’em e bochan nri ma tiyan’ ko naun rok Got. Fan fare bugithin ni tiyan’ e “ga be rin’ ban’en nri gab pasig ngay ma ga baadag.” Ngiyal’ ney e ba pag medlip e milyon e Kristiano nri yad ma tedan’rad ko naun rok Got. Ere, ra bagadad ma nge fith ir ni nge gaar, ‘Uw rogon ni ngar gu tiyan’ug ko naun rok Jehovah?’ Ra ngad nanged e fulweg ko re deer ney, ma som’on e gad ra weliy e n’en ni be yip’ fan e naun rok Got e ngiyal’ ney. Ngemu’ ma gad weliy murung’agen boch e tapigpig rok Got kakrom ni yad ba yul’yul’ ni ur tedan’rad ko naun rok Got. Kan tay murung’agrad nga Bible ni bochan e “nge fonownagdad” miki ayuwegdad nge yog ni ngaud tedan’dad ko naun rok Got.​—Rom. 15:4.

Naun rok Got Kakrom nge Chiney

4. Mang fan fare tempel ni kan toy u nap’an Solomon?

⁴ Kakrom u Israel, ma fare tempel u Jerusalem e aram e naun rok Got. Machane, gathi aram e gin ni ma par Jehovah riy. Ya ke yog ni gaar: “Tharmiy e tagil’ig, ma fayleng e gu ma gifeg e rifrif u eg ngay. Ere be mang e mit i naun e ngam toyed ni nggu par ngay?” (Isa. 66:1) Ere, fare tempel ni kan toy u nap’an e gagiyeg rok Solomon e aram tagil’ e liyor ni yima tay ngak Jehovah, maku aram e gin ni yima meybil riy ngak.​—1 Ki. 8:27-30.

5. Pigpig ni un tay u tempel rok Solomon kakrom e be dag rogon e mang?

⁵ Ngiyal’ ney e naun rok Jehovah e gathi riyul’ nib naun ni bod e bin baaram ni immoy u Jerusalem kakrom. Ya aram e pigpig ni gad ma tay ngak u daken fare biyul ni maligach ni pi’ Kristus. Gubin e tapigpig rok Got u fayleng ni yad ma pigpig ngak Jehovah u taabang u lan e tempel rok nib fanathin.​—Isa. 60:4, 8, 13; Acts 17:24; Heb. 8:5; 9:24.

6. Tin ngan e pilung ni ur gagiyegniged fare nam nu Judah e ur tedan’rad ko bin riyul’ e liyor?

⁶ Tomren ni ki’ fare nam nu Israel nge par ni l’agruw e ganong riy, ma 4 u fithik’ fa 19 i pilung ni ur gagiyeggad ko ley ni yimuch e nam nu Judah, e ur tedan’rad ko bin riyul’ e liyor. Pi pilung nem e Asa nge Jehoshafat nge Hezekiah nge Josiah. Mang e gad ra fil rorad?

Yira Tow’athnagey ko Pigpig u Polo’ i Gum’irchaey

7, 8. (a) Ba miti mang pigpig e ra tow’athnagey Jehovah riy? (b) Mang e gad ra fil ko n’en ni buch ku Asa ni Pilung?

⁷ Nap’an e gagiyeg rok Asa ni Pilung, me l’og Jehovah boch e profet rok ni ngar pow’iyed fare nam ni be gagiyegnag nge yog ni ranod u kanawo’ nib mat’aw. Be yog e Bible ni motoyil Asa ngak Azariah ni profet ni fak Oded. (Mu beeg e 2 Kronicles 15:1-8.) Bochan ni fol Asa ma aram me yog ni gak lungun e girdi’ ko fare nam nu Judah ni kub muun ngay boor e girdi’ ko fare ganong nu Israel nra bad nga Jerusalem ngar uned ngab muulung nib ga’ ntay u rom. Me yog nra pigpiggad ngak Jehovah u taabang ni yad ba yul’yul’. Be gaar e Bible: “Mi yad micheg u fithingan Somol nib ga’ lamrad ni yad ra fol ko re m’ag nem, mi yad tolul mi yad thoy e rappa. Gubin e girdi’ nu Judah nra felfelan’gad ni bochan e ka ra ngongliyed e re m’ag ney u polo’ i gum’ircharad. Ma rib fel’ u wan’rad ni yad ma liyor ngak Somol, mi yad fel’ u wan’ Somol me pi’ e gapas ngorad u gubin yang.” (2 Kron. 15:9-15, BT) Ere, faan gad ra pigpig ngak Jehovah u polo’ i gum’irchadad ma ra tow’athnagdad.​—Mark 12:30.

⁸ Machane, rib kireb, ya nap’an ni fonownag Hanani ni profet Asa, me damumuw. (2 Kron. 16:7-10) Nap’an nra fonownagdad e piilal u lan e ulung, ma mang e gad ma rin’? Gad ma gur ngad folgad ko fonow rorad ni yib u Bible ndab da damumuwgad, fa?

9. (a) Mang magawon e yib ngak Jehoshafat nge fare nam nu Judah? (b) Mang e kar rin’ed?

⁹ Nap’an ni tabab Jehoshafat ko gagiyeg u Judah, me chagil e pi salthaw nu Ammon, nge Moab nge burey nu Seir ngar chamgad ngorad. Mang e rin’ fare pilung ni yugu aram rogon ni ke rus? Ra muulunggad fapi pumoon ni yad nga naun rok Jehovah ngar meybilgad ni ke un pi leengirad nge pi fakrad ngorad. (Mu beeg e 2 Kronicles 20:3-6.) I meybil Jehoshafat ni bod rogon ni meybil Solomon u nap’an ni ognag fare tempel ngak Got, me gaar: “I gur e Got romad! Mu gechignagrad ya dariy gelngimad u puluwon e re raba’ i salthaw ney nib ga’ ni yad be cham ngomad. Dagu nanged e n’en ni nggu rin’ed, machane gamad be sap ngom ni ngam ayuwegmad.” (2 Kron. 20:12, 13, BT) Tomren e meybil ni tay Jehoshafat “u fithik’ fare ulung i girdi’,” meb i ying gelngin Got ngak Jahaziel nreb e Levi, nge pi’ e athamgil nga lanin’rad.​—Mu beeg e 2 Kronicles 20:14-17, BT.

10. (a) Uw rogon ni yog Jehovah e n’en ni nge rin’ Jehoshafat nge fare nam nu Judah? (b) Uw rogon ni ngad daged nriyul’ ni gad ba felfelan’ ko pi fonow ni ma pi’ Jehovah ngodad e ngiyal’ ney?

¹⁰ Kakrom e yog Jehovah e n’en ni nge rin’ Jehoshafat u daken Jahaziel. Ma gadad e ngiyal’ ney e daken fare tapigpig nib yul’yul’ ma ba gonop. Ere thingar ud folgad ma gad tayfan e piin piilal u lan e ulung ni ke dugliyrad “fare tapigpig nib yul’yul’ ma ba gonop” ni ngar pow’iyed gadad.​—Matt. 24:45; 1 Thess. 5:12, 13.

11, 12. Mang e gad ra fil ko n’en ni buch rok Jehoshafat nge piyu Judah?

¹¹ Thingar da gayed rogon ndab ud paged e muulung ni gad ma tay e pi walagdad u taabang ni gubin ngiyal’ ni bod rogon ni muulung Jehoshafat nge fapi girdi’ nu Judah nga taabang ni ngar ninged e ayuw ngak Jehovah. Faanra yib e magawon ngodad ma da kud nanged e n’en ni ngad rin’ed, ma ngad folgad ko n’en ni rin’ Jehoshafat nge piyu Judah ni pagan’rad ngak Jehovah mar meybilgad ngak ni nge ayuwegrad. (Prov. 3:5, 6; Fil. 4:6, 7) Mus ni faanra goo gadad u bang, ma meybil ni gad ma tay ngak Jehovah e ra chagiydad ngak e pi walagdad “u fayleng ni polo’ ni Kristus e ke michan’rad ngak.”​—1 Pet. 5:9.

¹² I fol Jehoshafat nge girdi’ rok ko fonow ni pi’ Got ngorad u daken Jahaziel. Ere, mang angin ni keb ngorad? Ra gelgad ko fare mahl ma aram mar sulod nga Jerusalem ni “kar ra felfelan’gad” u “fithik’ i lingan e musik ko harp nge rappa.” (2 Kron. 20:27, 28, NW) Ku arrogodad ni gad ma fol u rogon ni ma pow’iydad Jehovah u daken e ulung rok maku gad ma pining e sorok ngak u taabang.

Ngad Ayuweged Tagil’ e Muulung Rodad

13. Mang maruwel e tababnag Hezekiah u tabolngin e gagiyeg rok?

¹³ Nap’an e bin som’on e pul ko gagiyeg ni tay Hezekiah me bing fare tempel min tabab i ngongliy bayay. Me tay e pi prist nge pi Levite ni ngar klinnaged e naun rok Got, mar rin’ed u lan 16 e rran. (Mu beeg e 2 Kronicles 29:16-18.) N’en ni kar rin’ed e be puguran ngodad e klin ni yima tay u tagil’ e muulung rodad ni ir e be tay tagil’ e liyor rodad ngak Jehovah nib beech. Gathi kam rung’ag fa kam beeg boch e thin ni be dag nriyul’ ni ma ngat e girdi’ nga rogon ni ma tiyan’ e pi walagdad i rin’ e re maruwel ney? Riyul’ ni yad ma n’uf Jehovah nga rogon e athamgil ni yad ma tay.

14, 15. Mang maruwel ni yibe rin’ e ngiyal’ ney e be pining e sorok ngak Jehovah? Mu weliy boch i rogon.

¹⁴ Immoy reb e pumoon u lel’uch u England ni ke damumuw ni bochan e yibe n’en ni ngkun ngongliy bayay ba Kingdom Hall ni bay u tooben e gin ni ma par riy. Machane, de togopuluw fapi walag nu rom ngak. Ya nap’an ra guyed ni ke kireb fare yoror ni bay u thilrad fare moon, ma rogned ngak nrayog ni ngar ngongliyed ndariy puluwon. Ba gel e maruwel nra ted mab ga’ yang ko fare yoror nra ngongliyed. Ngongol nib fel’ ni rin’ e pi walag ney e thilyeg e lem ko fare pumoon. Ma chiney e ir e ma matanagiy e gin ni bay fare Kingdom Hall riy.

¹⁵ Girdi’ rok Jehovah e yad ma un ko maruwel ko dimow naun ni yima tay u fayleng i yan. Boch e walag e kar ognaged yad ni ngar uned ngak e pi walag ni ireray e maruwel rorad ni ngar toyed boch e Kingdom Hall nge naun ko piin ma maruwel u Bethel. Bay reb e walag ni Sam fithingan ni ke yoor e nam u Europe nge Africa ni ka ranow Ruth ni ppin rok ngay ni ngar piew e ayuw ko dimow Kingdom Hall nge ku boch e naun. Ma gubin e pi nam ni yow ma yan riy i yan, ma yow ma un ko pi ulung riy ko machib. Ke weliy Sam e n’en ni ke k’aring ni nge un ko pi maruwel ney ni gaar: “Bochan e athamgil ni ke pi’ boch e walag nga lanin’ug ni ku ur uned ko pigpig u Bethel nge maruwel u boch e nam. Gu ra guy gelngin farad pasig nge gelngin e felfelan’ rorad mug adag ni nggu pigpig ngak Got ni aray rogon.”

Ngan Fol ko Yaram rok Got

16, 17. Mang maruwel e ke rin’ e girdi’ rok Got nri yad ba pasig ngay, ma mang angin?

¹⁶ Gathi kemus ni ngongliy Hezekiah fare tempel rok Jehovah bayay, ya ki yog ni ngan sul ngan madnomnag fare Paluk’af ni ke motochiyelnag Jehovah ni nguun tay u gubin e duw. (Mu beeg e 2 Kronicles 30:1, 4, 5.) I pining Hezekiah nge girdi’ nu Jerusalem gubin e girdi’ ko nam nu Israel nge ku boch e ganong ni bay nga lel’uch u Israel ni ngar uned ko re madnom nem. Ere kan l’og boch e girdi’ ni ngar wereged e babyor u ga’ngin yang fare nam ni yibe pining e girdi’ ni nge yib ko fare madnom.​—2 Kron. 30:6-9.

¹⁷ Ku arrogon e n’en ni kad rin’ed u nap’an e puguran ni un tay u lan fapi duw ni ka fini yan. Un ngongliy boch e babyor ni ngad wereged ko girdi’ ko gin ni gad ma machib riy u nap’an ni gad be pining e girdi’ ni ngar uned ngodad i madnomnag fare Abich ni Blayal’ rok Somol ni tay Jesus chilen ni ngan rin’. (Luke 22:19, 20) Fonow ni yima pi’ ngodad u nap’an e muulung u rogon ni ngad machibniged e girdi’ e gad ma fol riy ni gad ba pasig. Ma athamgil ni gad ma tay e gubin ni ma tow’athnagdad Jehovah riy! Fa binem e duw ni ke yan e sogonap’an medlip e milyon i gadad e ra wereged e babyor ni fan ko re madnom ney ma 17,790,631 e girdi’ ni kar uned ngay!

18. Mang nib ga’ fan ni ngam tiyan’um ko bin riyul’ e liyor?

¹⁸ Ke weliy e Bible murung’agen Hezekiah ni gaar: “Me Hezekiah e pagan’ ngak Somol, ni Got nu Israel; ma daki yog reb e pilung nga Judah ni bod ir, ni tin yad ba m’on rok fa tin i yib nga tomren. Ba yul’yul’ ngak Somol ma dariy ba ngiyal’ nde fol rok, ya ri i ayuweg urngin e tin ke tay Somol chilen ngak Moses.” (2 Ki. 18:5, 6, BT) Ere, manga yugu da folwokgad ko n’en ni rin’ Hezekiah. Faanra ud tedan’dad ko naun rok Got ma ra ayuwegdad ni ngaud pired ni gubin ngiyal’ ma gad be ‘fol rok Jehovah’ u nap’an ni gad be sonnag e athap rodad ko yafas ni manemus.​—Deut. 30:16.

Ngad Folgad ko Fonow ni Yima Pi’ Ngodad

19. Mang e maruwel nib gel ni yima tay u nap’an e Puguran?

¹⁹ Nap’an ni mang Josiah e pilung, miki yog ni ngan sul ngan madnomnag e Paluk’af bayay, miki fal’eg rogon fare nam nu Judah ni fan ko re madnom nem. (2 Ki. 23:21-23; 2 Kron. 35:1-19) Ku arrogodad ni gad ma fal’eg rogodad ko convention nge assembly nge Puguran ni gad ma tay. Pi walag u boch e nam e yad ma yan u thatharen e riya’ ni bochan e ngar uned i madnomnag e puguran ko yam’ ni tay Kristus. Piin piilal ko ulung e yad ma ayuweg e ulung nib fel’ rogon. Ku yima ayuweg e piin pilibthir nge piin nib m’ar ni ngar uned ko muulung.

20. (a) Mang e buch u nap’an ni Pilung Josiah, ma mang e ke rin’? (b) Mang e bfel’ ni ngaud fal’eged i lemnag?

²⁰ Nap’an e maruwel ni yog Josiah ni Pilung ni ngan rin’ me pirieg Hilkiah ni prist nib tolang “fare ke babyoren e Motochiyel rok Somol, fare Motochiyel ni pi’ Got ngak Moses.” Me fek nge pi’ ngak Shafan, ma aram me tabab Shafan i beeg ngak Josiah. (Mu beeg e 2 Kronicles 34:14-18, BT.) Ere, mang e buch? Ri kireban’ fare pilung me guchthuy e mad rok me yog ngak fapi pumoon ni nga ranod ra fithed laniyan’ Jehovah riy. Ere pi’ Got e thin ngeb u daken Huldah nreb e profet nib pin ni murung’agen e liyor ni yibe tay u lan yu Judah nde m’agan’ ngay. I athamgil Josiah ni pilung ni nge chuweg e liyor ni googsur ni yibe tay u lan fare nam ma aram me par nib fel’ u wan’ Got ni yugu aram rogon ni ke yog Got nra fek e gechig nga daken fare nam ni ga’ngin. (2 Kron. 34:19-28) Mang e gad ra fil ko re n’ey? Bfel’ ni ngaud gurgad ngaud folgad ko yaram rok Jehovah ni bod Josiah. Ngad fal’eged i lemnag e n’en nra buch ni faan gad ra pag e machib ni ma tay e piin kar digeyed e bin riyul’ e liyor nge ngongol ndariy e yul’yul’ riy ni nge magawonnag e liyor ni gad be tay ngak Jehovah. Faanra ud tedan’dad ko bin riyul’ e liyor ma gad ra fel’ u wan’ Got ni bod Josiah.

21, 22. (a) Mang fan ni ngaud tedan’dad ko naun rok Jehovah? (b) Mang e gad ra fil ko bin migid e thin?

²¹ Rib fel’ ni ngad folwokgad ko fa aningeg i pilung nu Judah ni ur tedan’rad ko naun rok Got nge liyor ni ur ted ngak. Faanra ud tedan’dad ma ra k’aringdad ni ngad pagedan’dad ngak Jehovah mad athamgilgad nib gel ni fan ko liyor ni gad ma tay ngak. Maku gad ba gonop ni faanra ud folgad ko yaram rok Got ni ma pi’ u daken e ulung nge piin piilal, maku ra yibnag e felfelan’ ngodad.

²² Bin migid e thin e gad ra fil riy rogon ni ngaud tedan’dad ma gad pasig ko machib ni gad ma tay maku ra pi’ e athamgil nga laniyan’ e piin fel’ yangaren ni ngar tedan’rad ko pigpig ni yad be tay ngak Jehovah. Ku gad ra fil rogon ni ngad paloggad ko pi wup ni ma fanay Satan ni nge magawonnagdad. Ere, faan gad ra tedan’dad ngaud folgad ko thin rok Jehovah, ma aram e gad be folwok rok Jesus ni fak ni kan weliy murung’agen ni gaar: “Rogon feni pasigan’ug ni nggu tiyan’ug ko tempel rom e be gak’ u lan ngorongoreg ni bod ba nifiy.”​—Ps. 69:9; 119:111, 129; 1 Pet. 2:21.

Ka Ga Manang?

• Ba miti mang pigpig e ra tow’athnagey Jehovah riy, ma mang fan?

• Uw rogon ni nge pagan’dad ngak Jehovah?

• Uw rogon nra ayuwegdad e tiyan’ ni gad ma tay ni ngaud folgad rok Got?

[Picture on page 15]

Uw rogon ni i tiyan’ Asa, Jehoshafat, Hezekiah nge Josiah ko naun rok Jehovah?