Ga Ma Un i Pi’ e Athamgil nga Laniyan’ e Girdi’ u Nap’an e Muulung?

“Gimed ra muulung, . . . ma urngin nthingari mang ba ayuw ngak girdien e galesiya.”​—1 KOR. 14:26.

1. Rogon ni bay ko bin taareb e Korinth ko guruy ni 14 e mang e n’en nib ga’ fan ni yibe nameg ko pi muulung ni ma tay e piin Kristiano?

‘KARI pi’ e re muulung nem e athamgil nga lanin’ug!’ Kaam mog ban’en ni aram rogon u tomuren ni kam un nga reb e muulung u Kingdom Hall, fa? Dabisiy ni kam rin’ ni aram rogon! Riyul’ ni pi muulung ni yima tay e ma pi’ e athamgil nga lanin’dad, machane dabda gingad ko re n’ey. Ya ku aram e n’en ni ma rin’ e piin Kristiano kakrom. Am mu lemnag rogon ni tamilangnag apostal Paul e n’en ni yibe nameg ko pi muulung u lan fa bin nsom’on e babyor ni yoloy ngak piyu Korinth. U lan fare guruy ni 14 e boor yay ni i weliy ni urngin ban’en ni yima rin’ u nap’an e muulung e thingari pi’ e athamgil nga lanin’uy me “mang ba ayuw ngak girdien e galesiya.”​—Mu beeg e 1 Korinth 14:3, 12, 26.a

2. (a) Mang e ma ayuweg e pi muulung rodad me yog ni pi’ e athamgil nga lanin’dad? (b) Mang deer e gad ra weliy?

² Gad manang ni pi muulung rodad e rayog ni nge pi’ e athamgil nga lanin’dad ni bochan e ayuw ni ma pi’ gelngin Got nib thothup ngodad. Aram fan ni urngin e muulung rodad e ma tabab ko meybil ni gad ma ning ngak Jehovah ni nge ayuweg e muulung ni gad ma tay u daken gelngin nib thothup. Machane gad manang ni urngin e girdi’ u lan e ulung e rayog ni ngar pied e ayuw ni nge yog ni yib angin e pi muulung ni yad be tay. Ere mang boch ban’en ni rayog ni ngad rin’ed me yog ni ngad ayuweged e pi muulung ni gad ma tay u Kingdom Hall u gubin e wik ni rayog ni nge pi’ e athamgil nga lanin’dad?

3. Uw feni ga’ fan e pi muulung ko Kristiano?

³ U m’on ni ngad nanged e fulweg ko re deer ney ma gad ra yaliy boch ban’en ko pi muulung rodad ni piin ni yad ma yarmiy e susun dab ra paged talin. Maku gad ra weliy rogon ni nge ayuweg e girdi’ u lan e ulung e muulung ni yad be tay me yib angin ngorad. Rib ga’ fan e re n’ey ngodad, ya pi muulung rodad e ba thothup. Gad ra un ko pi muulung ney ma gad un ko pi n’en ni yima rin’ riy, ma ireray bang ko liyor rodad ngak Jehovah nib ga’ fan.​—Ps. 26:12; 111:1; Isa. 66:22, 23.

Reb e Muulung ni Kan Fal’eg ni Fan ko Fol Bible

4, 5. Mang fan ni yima tay e fol Wulyang Ntagil’ E Damit?

⁴ Gadad gubin ni gad baadag ni ngari fel’ rogodad ko fare fol Wulyang Ntagil’ E Damit ni yima tay ni gubin e wik. Ngad sulod ngad guyed fan ni kan yarmiy fare fol Wulyang Ntagil’ E Damit nge boch ban’en ni kan thilyeg ko article ni bay riy ni yima fil u nap’an e muulung.

⁵ Fan ni yima tay e fol Wulyang Ntagil’ E Damit e bochan ni ngan fil e Bible ni yibe fanay e re ke babyor ney. Arrogon, u nap’an e fol Wulyang Ntagil’ E Damit e yima “afweg” e thin rok Got ko “thin ni manang e girdi’ fan” ni bod u nap’an Nehemiah.​—Neh. 8:8; Isa. 54:13.

6. (a) Mang e n’en ni kan thilyeg ko fare Wulyang Ntagil’ E Damit? (b) Mang e thingar nrin’ u m’on ni ngan “beeg” e pi thin nu Bible?

⁶ Bochan ni fare Bible e ba ga’ ni gad ma fanay, ere kan thilyeg boch ban’en ko article ko fare Wulyang Ntagil’ E Damit riy ni gad ma fil u nap’an e muulung. Boor e thin nu Bible riy ni kan fal’eg rogon ni ngan “beeg.” Gadad gubin ni yibe pi’ e athamgil nga lanin’dad ni ngad beeged e pi thin nu Bible u nap’an e re muulung ney, ni gad be fanay e Bible rodad. (Acts 17:11) Mang fan? Ya nap’an ni gad ra guy e fonow rok Got u lan e Bible rodad, ma ba ga’ angin nra yib ngodad. (Heb. 4:12) Ere, u m’on ni nge beeg be’ e pi thin nu Bible ney, ma en ni be yarmiy fare muulung e susun ni nge pi’ e tayim ko girdi’ ni ngkur uned i yaliy e pi thin nu Bible nem.

Boor e Tayim ni Rayog ni Ngada Weliyed e Michan’ Rodad

7. Mang e rayog ni ngad rin’ed u nap’an e fol Wulyang Ntagil’ E Damit?

⁷ U lan e pi duw ni ke yan ma ku reb e ban’en ni kan thilyeg ko pi article ney e kan ngochnag. Ke lich e pi paragraph ni ngan beeg ko pi article nem ma ke yoor e tayim ni ngan pi’ e fulweg. Boor e girdi’ nrayog ni nga ra pied e fulweg ma ngar weliyed fan e thin nu Bible ara ngar weliyed murung’agen ban’en ni buch rorad ni rayog ni nge yib angin ngak be’ ni be fol ko fonow nu Bible ara kur weliyed boch ban’en. Ma susun e ngan tay boch e tayim ni ngan weliy fan e pi sasing ni bay riy.​—Mu beeg e Psalm 22:22; 35:18; 40:9.

8, 9. Mang e n’en nib milfan ngak faen ni ma yarmiy fare fol Wulyang Ntagil’ E Damit?

⁸ Machane boor e girdi’ nrayog ni nge pi’ e fulweg ni faanra faen ni be yarmiy e muulung nge piin ni yad be pi’ e fulweg e susun e dabi yoor ban’en ni ngar weliyed. Ere mang e rayog ni nge ayuwegrad ni ngar rin’ed ni aram rogon ni nge yib angin e re muulung nem ngorad?

⁹ Gad ra weliy reb e fanathin. Fare fol Wulyang Ntagil’ E Damit e kan yarmiy nib fel’ rogon ni rayog ni ngan taareb rogonnag nga bakiy i nunuw nib fel’ yaan. Ya fare fol Wulyang Ntagil’ E Damit ni boor e girdi’ ni ma pi’ e fulweg riy e bod bakiy i nunuw nib dub’ag, ni boor mit e floras ni bay riy. Ma pi fulweg ni yima pi’ u nap’an e re muulung ney e ba thilthil rogon ni bod fare ke nunuw. Ma uw rogon faen ni be yarmiy e re muulung ney? Boch e thin ni ma yog e rayog ni ngan taareb rogonnag nga matharngen fare kiy i nunuw, gathi ri yima guy nib fel’ rogon machane ku ma fal’eg yaan fare kiy i nunuw. Ere faen ni ma yarmiy e re muulung ney e de t’uf ni nge yoor ban’en ni nge weliy, ya kemus ni nge tamilangnag fan e pi fulweg ni yibe pi’. Arrogon, pi fulweg ni ma pi’ e girdi’ u lan e ulung nge boch e thin ni ma yog faen ni ma yarmiy fare fol Wulyang Ntagil’ E Damit e faanra yira tay nga taabang ma rayog ni nge pi’ e athamgil nga laniyan’ e girdi’ u lan e ulung.

“Nguud Pininged e Magar ngak Got ni Gubin Ngiyal’”

10. Uw rogon e muulung u wan’ e pi Kristiano kakrom?

¹⁰ Thin ni yog Paul u murung’agen e muulung ko Kristiano ni bay ko 1 Korinth14:26-33 e be fil ngodad rogon e pi muulung ko Kristiano ni un tay ko bin som’on e chibog. Ki yoloy reb e Bible scholar murung’agen e pi verse ney ni gaar: “Rib tamilang ni yooren e girdi’ ni ma un ko muulung ni ma tay e pi Kristiano kakrom e yad manang ni nap’an e muulung ma bay e tow’ath rorad ni aram e ngar pied e athamgil nga laniyan’ e pi walag, ma ku yad manang ni aray e n’en nib milfan ngorad ni ngar rin’ed. Girdi’ ni ma yib ko muulung e gathi kemus ni nge motoyil ko welthin ya ke yib ni nge pi’ boch e athamgil nga laniyan’ e girdi’.” Riyul’ ni pi Kristiano kakrom e yad ma tay ni pi muulung e aram e ngiyal’ nrayog ni ngar weliyed e michan’ rorad.​—Rom. 10:10.

11. (a) Mang e yima rin’ u nap’an e muulung ko Kristiano me yog ni pi’ e athamgil nga lanin’dad, ma mang fan? (b) Uw rogon ni ngad mon’oggad u rogon ni gad ma pi’ e fulweg? (Mu guy e footnote.)

¹¹ Gad ra weliy e michan’ rodad u nap’an e muulung ma rayog ni nge “pi’ e athamgil nga laniyan’ e girdi’.” Yugu aram rogon ni ke n’uw nap’an ni gad ma un ko muulung, machane pi fulweg ni ma pi’ e pi walagdad e ka ma pi’ e athamgil nga lanin’dad. Gad ma felfelan’ u nap’an ni bay reb e walag ni ke pilibthir, ara reb e walag nib yul’yul’, ara reb e piilal rodad ni yad be pi’ e fulweg u nap’an e muulung ni gad ma tay. Maku gad ma felfelan’ u nap’an nra pi’ reb e bitir e fulweg ni be dag e t’ufeg rok ngak Jehovah. Ere rib tamilang ni pi fulweg ni gad ma pi’ u nap’an e muulung ko Kristiano e ma pi’ e athamgil nga lanin’uy.b

12. (a) Mang e gad ra fil ko n’en ni rin’ Moses nge Jeremiah? (b) Uw rogon nra ayuwegdad e meybil nge yog ni ngad pied e fulweg?

¹² Machane piin ni yad ba ta tamra’ e ba mo’maw’ ngorad ni ngar pied e fulweg. Faanra aram rogon e magawon rom, ma sana bfel’ ni ngam lemnag ni gathi goo gur e bay e re magawon ney rom. Ya ku bay boch e pi tapigpig rok Got kakrom ni bod Moses nge Jeremiah nib mo’maw’ ni ngar machibnagew e girdi’. (Ex. 4:10; Jer. 1:6) Machane ke ayuwegrow Jehovah, ere ku ra ayuwegem ni ngam rin’ e re maruwel ney. (Mu beeg e Hebrews 13:15.) Uw rogon nra ayuwegem Jehovah ni dab kum rus u nap’an ni ngam pi’ e fulweg? Som’on e ngam fal’eg rogom nib fel’ rogon. U m’on ni ngam man nga Kingdom Hall, ma ngam meybil ngak Jehovah nge pi’ gelngim ni nge dab kum rus u nap’an ni ngam pi’ e fulweg. (Fil. 4:6) Ga be ning “ban’en nib m’agan’ ngay,” ere rayog ni nge pagan’um nra fulweg Jehovah taban e meybil rom. ​—1 John 5:14; Prov. 15:29.

Pi Muulung nra ‘Pi’ e Athamgil nga Lanin’uy, ma Be Fal’eg Lanin’uy’

13. (a) Mang angin e pi muulung rodad nra yib ngak e piin ni yad ma un ko muulung? (b) Mang deer nrib ga’ fan ngak e piin piilal?

¹³ I weliy Paul fan ni kan yarmiy e pi muulung ni gad ma tay e ra ‘ayuwegdad, ma be pi’ e athamgil nga lanin’dad’, ma be fal’eg lanin’dad.c (1 Korinth 14:3) Uw rogon ni nge nang e piin piilal e ngiyal’ ney ni pi welthin ni yad ma pi’ u nap’an e muulung e rayog ni nge pi’ e athamgil nga laniyan’ e pi walagrad, me fal’eg lanin’rad? Ngad weliyed murung’agen fare muulung ni tay Jesus ni dawori n’uw nap’an u tomuren ni kan faseg ko yam’.

14. (a) Mang e n’en ni buch u m’on ko fare muulung ni ke yarmiy Jesus? (b) Mang fan ni ke felfelan’ e pi apostal rok Jesus u nap’an ni ‘chuchugur ngorad me [non] ngorad’?

¹⁴ Som’on e nga mu fal’eg i lemnag e n’en ni buch u m’on ko re muulung nem. Dawori n’uw nap’an u m’on ni yim’ Jesus ma “urngin fa piin gachalpen mi yad pag ngar milgad.” Ere ke lebug fare yiiy ni gaar: “Bay mu wergad, nge bigimed me yan nga tafen.” (Mark 14:50; John 16:32) Ma tomuren ni kan faseg Jesus ko yam’, me pining e pi apostal rok ngar uned nga yugu reb e muulung nib thil.d Ma aram “me yan fa ragag nge taareb i gachalpen Jesus ko fare burey ni bay u lan yu Galile ni ir e ke yog Jesus ngorad ni nga ranod ngay.” Nap’an ni kar tawgad ngaram, “me chuchugur Jesus ngorad me [non] ngorad.” (Matt. 28:10, 16, 18) Rayog ni ngad lemnaged feni rib gel e felfelan’ ni ke yib ngak e pi apostal rok Jesus u nap’an ni ke rin’ e re n’em. Ere mang e ke yog Jesus ngorad?

15. (a) Mang e pi n’en ni ke weliy Jesus ngak e pi apostal rok, ma mang e n’en nde yog ngorad? (b) Mang angin e re muulung nem ngak e pi apostal rok?

¹⁵ I tabab Jesus ko welthin rok ni gaar: “Kan pag fan urngin ban’en ngog.” Nge mu’ me pi’ reb e maruwel ngorad me yog ni gaar: “Mmarod ngak girdien e pi nam u gubin yang ngam pingeged yad ngar manged pi gachalpeg.” Tomur riy me pi’ e pagan’ ngorad ni gaar: “Gu ba’ romed, nge yan i mada’ nga tomren e fayleng.” (Matt. 28:18-20) Machane kam guy e n’en nde rin’ Jesus? De puwan’ ngorad, ma ku de yog ndabki pagan’ ngorad, ya faanra rin’ ni aram rogon ma ra gel boch e kireban’ rorad. N’en ni rin’, e yog ban’en ni be m’ug riy ni ka yad ba t’uf rorow e chitamangin, ma aram e kar piew reb e maruwel ngorad nrib ga’ fan. Ere mang angin e n’en ni rin’ Jesus ngak pi gachalpen? Ke gel e michan’ rorad bayay ma ke fel’ lanin’rad, ma arfan ni tomuren e re muulung nem e “yad be machibnag ngak e girdi’ fare Thin Nib Fel’.”​—Acts 5:42.

16. Uw rogon ni ma folwok e piin ni piilal rok Jesus u nap’an ni yad be pi’ e welthin u nap’an e muulung ko Kristiano?

¹⁶ Piin piilal e ngiyal’ ney, e yad ma folwok rok Jesus ya yad ma tay ni pi muulung ko Kristiano ni yad ma un ngay e aram e ngiyal’ ni rayog ni ngar ayuweged pi walagrad ni ngar nanged ni yad ba t’uf rok Jehovah. (Rom. 8:38, 39) Ere nap’an ni yad ra pi’ e welthin rorad, ma pi fel’ngin pi walagrad e yad ma yog, ma gathi pi meewar rorad. Ma darur rogned e thin ni be m’ug riy ni dakurur pagan’rad ngorad. Thin ni yad ma yog e be dag ni ke mich u wan’rad nib t’uf Jehovah rorad ma yad baadag ni ngar rin’ed e tin nib mat’aw. (1 Thess. 4:1, 9-12) Riyul’ ni yu ngiyal’ e ba t’uf ni nge pi’ e piin piilal e fonow ngak gubin e girdi’ u lan e ulung, machane faanra bay in e girdi’ nib t’uf ni nge non e piin piilal ngorad mab fel’ ni ngan non ngorad ni goo yad. (Gal. 6:1; 2 Tim. 2:24-26) Nap’an nra pi’ e piin piilal e welthin ni fan ko ulung, ma ngar athamgilgad nga rogned e tin nib fel’ ni kar rin’ed. (Isa. 32:2) U nap’an e muulung ma ngar athamgilgad ni ngaur rogned e thin ni rayog ni nge gelnag e michan’ rok e piin ni kar uned ko muulung.​—Matt. 11:28; Acts 15:32.

Ri Ma Fal’eg Lanin’uy

17. (a) Mang nrib ga’ fan ni nge par e pi muulung rodad ni aram e gin nra fel’ lanin’uy riy? (b) Mang e ga ra rin’ me yib angin e muulung ngom nge tin ni ka bay e girdi’? (Mu guy fare kahol ni bay “Fa Ragag i Kanawo’ Nrayog ni Ngeb Angin e Pi Muulung Ngom nge Tin ni Ka Bay e Girdi’.”)

¹⁷ Ngiyal’ ney e ke yoor e magawon ko re fayleng rok Satan ney, ere ba t’uf ni pi muulung ko Kristiano ni gad ma un ngay e rayog ni nge fal’eg laniyan’ urngin e girdi’. (1 Thess. 5:11) Boch e duw ni ke yan ma bay ba wu’ i mabgol ni kar gelgow ko skeng nib gel ni ke yib ngorow, e ka rognew ni gaar: “Nap’an ni gamow bay u Kingdom Hall, ma bod ni gamow bay u lan pa’ Jehovah. N’umngin nap’an ni gamow bay u rom ma bay e pi walagdad u toobmow ma bod ni kug piew e gilab romow ngak Jehovah, ma ke par ni ke gapas lanin’mow.” (Ps. 55:22) Yibe athapeg ni urngin e girdi’ ni yad ra un ko muulung rodad e ra gel e michan’ rorad me fel’ lanin’rad. Ere ngaud athamgilgad ni ngad rin’ed boch ban’en ni nge yog ni nga yan i aw ni pi muulung rodad e ngaun pi’ e athamgil riy nga lanin’uy.

[Footnotes]

Uw Rogon ni Ga Ra Fulweg?

• Uw feni ga’ fan e muulung ko Kristiano?

• Mang fan ni pi fulweg ni yima pi’ u nap’an e muulung e ra “mang ba ayuw ngak girdien e galesiya”?

• Mang e rayog ni ngad filed ko fare muulung ni ke un pi gachalpen Jesus ngay?

[Picture on page 26]

FA RAGAG I KANAWO’ NRAYOG NI NGEB ANGIN E PI MUULUNG NGOM NGE TIN NI KA BAY E GIRDI’

Ngam fal’eg rogom. Faan ga ra fil e pi n’en ni yira weliy u nap’an e muulung u Kingdom Hall u m’on ko muulung mab mom ni ngam tiyan’um ngay ma ra yib angin ngom.

Mu un ko muulung ni gubin ngiyal’. Rib ga’ fan ni ngam un ko muulung ya re n’ey e rayog ni nge pi’ e athamgil nga laniyan’ e girdi’.

Dab mu sagaal. Ra ka mub ni dawori tabab e muulung, ma rayog ni ngam un ko tang nge meybil ni ireray bang ko liyor rodad ngak Jehovah.

Ngam fek e tin nib t’uf. Mu fek e Bible rom nge boch e babyor ni yira fil u nap’an e muulung nge yog ni ngam nang fan e pi n’en ni yira weliy.

Dab mu rin’ ban’en nra magawonnag e girdi’. Dab mu fanay e cell phone rom u nap’an e muulung ya ngam rin’ u ba ngiyal’ nib puluw.

Ngam un ko n’en ni yibe rin’. Faanra boor e girdi’ ni ra pi’ e fulweg ma rayog ni ngan ayuweg e michan’ rok boor e girdi’.

Ngaum pi’ e fulweg nib ngoch. Faan yira rin’ ni aram rogon ma boor e girdi’ ni rayog ni ngar pied e fulweg.

Ngam fal’eg e pi n’en ni kan pi’ ngom. Faanra kan pi’ reb e ban’en ngom ni ngam rin’ u nap’an e Theocratic Ministry School ara Service Meeting, ma ngam fal’eg rogom nib fel’ rogon. Mu athamgil ni dab mu siyeg e n’en ni kan pi’ ngom.

Mu pining e magar. Ngam pining e magar ngak e piin ni kar uned ko pi n’en ni un rin’ u nap’an e muulung.

Ngam un ko sabethin. Ngan un ko sabethin u m’on nge tomuren e muulung e ra ayuweg e piin ni kar uned ko muulung.