Bin 1

Nge T’uf e Girdi’ Rom, Ma Gathi Salpiy nge Chugum

MANG E BE FIL E BIBLE? “Chogowen e salpiy e ir lik’ngin urngin mit e kireb.”​—1 Timothy 6:10.

MANG E MAGAWON RIY? Piin ni yad ma dag fel’ngin e chugum e yad ma k’aringdad ni nge dab ki fel’ u wan’dad e tin bay rodad. Yad baadag ni ngad maruwelgad ni gubin ngiyal’, ya nge yog e salpiy ni fan e ngad chuw’iyed e tin kab beech e chugum, mab fel’, mab ga’. Salpiy e ma bannagey, mab mom ni nge yib chogowen ngodad. Machane, be yog e Bible ni en ni baadag ni nge yoor ban’en rok e dabi fel’ u wan’ e tin bay rok. I yoloy Solomon ni Pilung ni gaar: “Faanra ba t’uf rom e salpiy, ma dariy ba ngiyal’ nra gaman oren u wun’um; ma faanra mum’ ni bochan ni nge fel’ rogom, ma dariy ba ngiyal’ ni ga ra gaman ko tin ga baadag.”​—Eklesiastes 5:10, BT.

MANG E RAYOG NI NGAM RIN’? Ngam folwok rok Jesus, ma nge t’uf e girdi’ rom ko chugum. Rib m’agan’ Jesus ngay ni nge pi’ urngin ban’en ni bay rok nib muun e yafas rok ngay ni bochan e rib t’uf e girdi’ rok. (John 15:13) I gaar: “Ba gel e felfelan’ ni ma yib ko pi’ ban’en ngak be’ ko bin ni be’ e nge pi’ ban’en ngom.” (Acts 20:35) Faan gad ra mechameg ngodad ni ngaud pied e tayim rodad ni fan ko girdi’ mu ud golgad ngorad, maku yad ra rin’ ni aram rogon. I gaar Jesus: “Mu golgad ngak e girdi’ me gol e girdi’ ngomed.” (Luke 6:38, NW) Piin ni yad be lek e salpiy nge chugum e yad be k’aring e gafgow ngorad. (1 Timothy 6:9, 10) Machane, faan ga ra t’ufeg e girdi’ maku yibe t’ufegem, ma aram e ra fel’ u wan’um e tin bay rom.

Mang ndab mu fal’eg i lemnag rogon ni ngam lichnag e maruwel u puluwom? Rayog ni ngam lichnag e chugum rom ara pi n’en ni ngam chuw’iy, fa? Faan ga ra rin’ ni aram rogon, ma rayog ni yoor e tayim rom ni fan ko tin nib ga’ fan ni aram e ngam ayuweg e girdi’, ma ga pigpig ngak Got ni ir e ke pi’ urngin ban’en ngom.​—Matthew 6:24; Acts 17:28.

[Picture on page 4]

‘Mu gol ngak e girdi’ me gol e girdi’ ngom’