Yira Tow’athnagdad u Daken fare Pilung ni Gelngin Got nib Thothup e Be Pow’iy!

“Fare [“gelngin Jehovah nib thothup,” NW] e ba’ rok.”​—ISA. 11:2.

1. Mang e ke yog boch e girdi’ u murung’agen e fayleng?

“KE GEL e wagey ko am, nge girdi’, nge tin nu toobey ban’en, ere uw rogon ni ngki mun 100 e duw ko yafas u fayleng?” Ireray e n’en ni fith Stephen Hawking ni ir be’ ni ma fil murung’agen e t’uf nge ku boch ban’en u lan e lang ko duw ni 2006. “Dawori yog ni ngan taleg e gafgow maku dawori yog ni nge yib e gapas nga fayleng. Machane, ba thil e n’en ni be buch. Kan gay rogon e am ni ma gagiyegnag e salpiy ko nam nge am ni dariy ban’en ni ma rin’ ko salpiy ko nam. Maku kan sunmiy reb e ulung ni nge taleg e mahl, ma kun ngongliy boor e talin e cham kan tay ni bay e nuclear riy ni fan e nge taleg e mahl. Gad be mahl ya gad be lemnag ni kemus rogon me aw e gapas.”​—New Statesman.

2. Mang e bayi rin’ Jehovah ni dabki n’uw nap’an ni fan ko fayleng?

² Pi tapigpig rok Jehovah e yad manang e pi thin ney. Be yog e Bible ni gathi kan sunmiy e girdi’ ni ngar gagiyegniged yad. (Jer. 10:23) Kemus ni goo Jehovah e bay mat’awun ni nge Gagiyegnagdad. Ere ir e bay mat’awun ni nge tay e motochiyel ni ngad folgad riy me dugliy e n’en ni ngad rin’ed ko yafas rodad nge rogon ni ngad rin’ed. Maku reb e dabki n’uw nap’an ma ra maruwel nga mat’awun ni nge chuweg e pi am ko girdi’ ni der yog ni nge gagiyeg nib fel’ rogon. Ngemu’ miki thang e piin ni yad be togopuluw nga mat’awun ko gagiyeg ni bochan e kar ted e girdi’ ni yad e sib ko denen, nge rarogoy ni dawor ni flont, ma kar manged sib rok “Faanem nib Kireb” ni aram Satan ni Moonyan’ ni ir e be gagiyegnag e re fayleng ney.​—1 John 5:19.

3. Mang e yiiynag Isaiah u murung’agen fare Messiah?

³ U lan e bin beech e fayleng ni ke Paradis, ma ra gagiyel e gagiyeg rok Jehovah ni th’abi tolang ni bochan Gil’ilungun ni Jesus Kristus e ra gagiyegnag. (Dan. 7:13, 14) I weliy Isaiah ni profet murung’agen fare Pilung ko re Gil’ilungun nem ni gaar: “Piin ni owchen David ni uranod nga luwan nguur pilunggad e yad bod ba ke gek’iy ni kan toy; machane rogon ba nuf ni thay ko ley ni ke magey u fithik’ e but’, e aram rogon ba pilung ni bay yib u fithik’ e piin ni owchen David. Fare [“gelngin Got nib thothup,” NW] e ba’ rok ni bay i pi’ e gonop ngak, nge llowan’ nge salap ni nge maruwel ngay ngi i gagiyegnag e tirok e girdi’ ngay. Bayi nang e tin nib m’agan’ Somol ngay mi i par ni bay madgun u wan’.” (Isa. 11:1, 2) Mang boch e kanawo’ ni ke pi’ gelngin Got nib thothup gelngin e en “owchen David” ni aram Jesus Kristus ni nge gagiyegnag e girdi’? Mang boch e tow’ath nra yog ngak e piin ni yad ra par u tan e gagiyeg rok? Mang e thingar da rin’ed me yog e pi tow’ath nem ngodad?

Got e Ir e Ke Pi’ Mat’awun Jesus ni Nge Gagiyeg

4-6. Bochan e mang ma aram fan ni rayog ni nge mang Jesus e Pilung, nge Prist nib Tolang, nge Ta Pufthin nib gonop ma ma runguyey?

⁴ Baadag Jehovah ni nge flont e girdi’ u tan e gagiyeg rok reb e Pilung, nge Prist nib Tolang, nge Ta Pufthin nib gonop ma ma runguyey. Aram fan ni mel’eg Jesus Kristus me pi’ mat’awun u daken gelngin nib thothup ya nge yog ni rin’ e pi maruwel nem nib ga’ fan. Am lemnag boch i fan nrayog ni nge rin’ Jesus e maruwel rok ni ke pi’ Got nrib fel’ rogon.

⁵ Kemus ni goo Jesus e manang murung’agen Got nib fel’ rogon. Dariy be’ ni manang e en Chitamangiy nib fel’ rogon ni bod rogon e en fak, ya bokum milyon e duw ni ur pirew u taabang. Nap’an ni ur moyew e Chitamangin u taabang ma boor ban’en ni fil Jesus u murung’agen, ere aram fan nrayog ni nga nog ni “taareb rogon yaan ngak Got.” (Kol. 1:15) I yog ni gaar: “Cha’ ni ke guyeg e ke guy e en ni Chitamangiy.”​—John 14:9.

⁶ Jesus e ir e ba migid ngak Jehovah u rogon feni tamilangan’ ko pi n’en ni ke sunmiy Got nib muun e girdi’ ngay. Kolose 1:16, 17 e be gaar: “Pa’ Kristus e sunumeg Got urngin ban’en ngay ni bay u tharmiy ngu but’, ntin ni yibe guy nge tin ndanir guy . . . I Kristus e immoy u m’on ko ngiyal’ ndawori sum urngin ban’en riy, me ir e be tay urngin ban’en nra reb ma be par u tagil’.” Aygum lemnag e re n’em. Jesus e ir e en nib “salap i maruweliy ban’en,” ma ke un ngak Got kar sunmiyew urngin ban’en. Ere gubin ban’en u lan e palpalth’ib nib manang fan. Arrogon, Kristus e gonop.​—Prov. 8:12, 22, 30, 31.

7, 8. Uw rogon ni i maruwel Got nga gelngin nib thothup ni nge ayuweg Jesus u nap’an ni i machib?

⁷ Jesus e kan dugliy nga gelngin Got nib thothup. I yog ni gaar: “Fare [“gelngin Got nib thothup,” NW] e ke yib nga dakenag. Ke liyfeg ni nggu machibnag e Thin Nib Fel’ ni yib rok Got ngak e piin ni gafgow, ke l’ugeg ni nggog ngak e piin ni kan kolrad kan tayrad ni bay ni pagrad, mu gog ngak e piin ni malmit ni bay ra guyed ban’en, ma nggu chuweg ko gafgow e piin ni yibe gafgownagrad, mu gog ngorad e re duw ni ir e bayi runguy Somol e girdi’ rok riy me thapegrad ngak!” (Luke 4:18, 19) Nap’an ni kan taufenag Jesus, ma gelngin Got nib thothup e ir e ke ayuweg ni nge yib ngan’ e pi n’en ni i fil u m’on ni nge yib nga fayleng nib muun ngay e n’en ni baadag Got ni nge rin’ u fayleng ni ir fare Messiah.​—Mu beeg e Isaiah 42:1a; Luke 3:21, 22b; John 12:50.

⁸ Bochan ni ke pi’ Got mat’awun Jesus u daken gelngin nib thothup maku ir be’ nib flont, ma aram fan ni gathi kemus ni ir e th’abi gilbuguwan u fayleng ya ku ir e bin th’abi fel’ e Sensey. Bin riyul’ riy, e piin ni ur motoyilgad ngak e kar gingad “nga rogon e machib” ni i tay. (Matt. 7:28) Jesus e yog rok ni nge chuweg e pi magawon ko girdi’ ni bod rogon e denen, nge rarogoy ni dan flont, ma ki yog rok ni nge fil ngorad murung’agen Got. Ku rayog rok ni nge guy e n’en ni bay u gum’irchaen e girdi’ me ngongol nib puluw ngay.​—Matt. 9:4; John 1:47.

9. Uw rogon nra gel e pagan’ rom ko gagiyeg nra tay Jesus ni faan ga ra fal’eg i lemnag e n’en ni i rin’ u nap’an ni immoy u fayleng?

⁹ Jesus e mang girdi’. N’en ni i rin’ u nap’an ni immoy nib girdi’ nge chag ni ur ted e girdi’ ni dawor ra flontgad e ku aram reb i fan ni rayog ni nge mang Pilung. I yoloy apostal Paul ni gaar: “Yib i ngal’ [Jesus] ni bod pi walagen u urngin rarogorad, ni fan e nge yog ni mang e prist rorad nib th’abi tolang ni ma runguyrad ma ba yul’yul’ ko pigpig rok ngak Got ni fan e nge yog ni n’ag Got fan e denen rok e girdi’. Ere chiney e rayog ni nge ayuweg e piin ni ke yib ngorad e n’en ni ma waliy e girdi’ nge denen, yi ir ma ki yib ngak e n’en ni ma waliy e girdi’ nge denen, ma ki un ko gafgow.” (Heb. 2:17, 18) Bochan ni “ki yib ngak e n’en ni ma waliy e girdi’ nge denen” ma aram fan ni manang e gafgow ni ma tay e piin ni ke yib e skeng ngorad. Piin ni yad ba m’ar, nge piin ni un gafgownagrad nib muun e piin bitir ngay e da ur magawongad ni nga ranod ngak. (Mark 5:22-24, 38-42; 10:14-16) Mus ngak e piin nib sobut’an’rad nge piin nri yad baadag ni ngar filed murung’agen Got ni ku ranod ngak ni nge ayuwegrad. Machane piin nib tolangan’rad, nge piin ‘nde t’uf Got u lanin’rad’ e ur fanenikayed ma yad be togopuluw ngak.​—John 5:40-42; 11:47-53.

10. Uw rogon ni ke dag Jesus gelngin fedad t’uf rok?

¹⁰ I pi’ Jesus e yafas rok ni fan ngodad. Dabisiy ni bin th’abi fel’ e kanawo’ ni ke micheg Jesus riy ni ir e rayog ni nge gagiyegnagdad nib fel’ rogon e bochan ni ke m’agan’ ngay ni nge yim’ ni fan ngodad. (Mu beeg e Psalm 40:6-10.) I yog ni gaar: “Rogon nib th’abi t’uf rok be’ e pi tafager rok e nge pi’ e pogofan rok ni fan ngorad.” (John 15:13) Arrogon, Jesus e de taareb rogon ko piin ni yad be gagiyeg e chiney nib ga’ ni be fel’ rogorad ni bochan e pi n’en ni yad be fek ko girdi’, ya Jesus e ke pi’ e yafas rok ni fan ko girdi’.​—Matt. 20:28.

Kan Pi’ Gelngin ni Nge Yibnag Angin fare Biyul

11. Mang fan ni rayog ni nge pagan’dad ngak Jesus ni ir e ke Biyuliydad?

¹¹ Jesus e ir fare Prist ni Th’abi Tolang. Ma ir e ke yibnag fel’ngin fare biyul ngodad. Bin riyul’ riy, e nap’an ni immoy u fayleng me dag e n’en nra rin’ u nap’an e Gagiyeg nra Tay u lan fare Biyu’ i Duw ni ir e en ni ke biyuliydad. Ma faan gad ra par ni gad ba yul’yul’ ma ra fel’ rogodad ko gagiyeg nra tay. I golnag e m’ar, ma be faseg e yam’, ma be duruw’iy e girdi’, ma be taleg e nifeng nge n’uw. (Matt. 8:26; 14:14-21; Luke 7:14, 15) Machane da i rin’ e pi n’ey ni fan e nge guy e girdi’, ya i rin’ ni bochan e ba t’uf e girdi’ rok ma be runguyrad. Aram fan ni nap’an ni yib be’ nib daraw ngak ni nge golnag me gaar: “Mm’agan’ug ngay.” (Mark 1:40, 41) Ku aram e n’en nra rin’ Jesus u nap’an e gagiyeg nra tay u lan fare Biyu’ i Duw, machane angin e ra yib ngak urngin e girdi’ u fayleng.

12. Uw rogon nra lebug e Isaiah 11:9?

¹² Ku ra ulul Jesus nge piin ni yad ra un ngak ko gagiyeg ngar filed murung’agen Got ngak e girdi’ ni bod ni i rin’ Jesus sogonap’an 2000 e duw ni ke yan. Aram e ngiyal’ nra lebug e thin ko Isaiah 11:9 ni be gaar: “Girdi’ ko nam e ri bayi tamilangan’rad u murung’agen Somol ni bod rogon lan e yungi day nib sug ko day.” Re n’ey e kub muun ngay rogon ni ngan ayuweg e fayleng nge pi n’en ni bay riy ni bod rogon ni ka nog ngak Adam ni nge rin’. Ra yan i taw nga tungun e re biyu’ i duw nem, ma ke lebug e n’en nib m’agan’ Got ngay ni bay ko Genesis 1:28, ma fare biyul e ke yib angin ngak urngin e girdi’.

Kan Pi’ Gelngin ni Nge Pufthin

13. Uw rogon ni ke dag Jesus nib t’uf e tin nib mat’aw rok?

¹³ Kristus e ir e “ke turguy Got ni nge pufthinnag e piin ni kab fos nge piin ni kar m’ad.” (Acts 10:42) Ere ri gad ba felfelan’ ni kad nanged ni Jesus e dabi yim’, ma tin nib mat’aw nge yul’yul’ e bod bangi leed ni ke m’ag nga lukngun. (Isa. 11:5) I m’ug ko ngongol rok ni be fanenikay e chogow, nge ngan dake modingnagey, nge ku boch e ngongol nib kireb, ma i yog nib kireb e piin ni dariy fan u wan’rad e gafgow ni be tay e girdi’. (Matt. 23:1-8, 25-28; Mark 3:5) Maku reb e de pag Jesus e girdi’ ni ngar bannaged ko ngongol ni yad be dag, ya manang e “n’en ni be lemnag e girdi’.”​—John 2:25.

14. (a) Uw rogon ni be dag Jesus e chiney nib t’uf rok e tin nib mat’aw mab yal’uw? (b) Mang deer e ngad fithed gadad riy?

¹⁴ Ka be dag Jesus nib t’uf rok e tin nib mat’aw nge tin nib yal’uw ya be pow’iy rogon fare maruwel ni machib ni yibe tay u fayleng. Dariy be’, ara reb e am ko girdi’, ara pi kan nib kireb nrayog ni nge taleg ni nge dab kun rin’ e re maruwel ney nge yan i aw nga rogon nib m’agan’ Got ngay. Ere rayog ni nge pagan’dad ni nap’an nra m’ay e Armageddon, ma gubin ban’en ni ke yal’uw. (Mu beeg e Isaiah 11:4; Matthew 16:27.) Am fithem ni nge lungum: ‘Ngongol ni gu ma dag ko girdi’ u nap’an e machib e aram rogon e ngongol rok Jesus, fa? Gu be pigpig ngak Jehovah nge mus rogog riy ni yugu aram rogon ni dabiyog ni nggu rin’ boor ban’en ni bochan boch e magawon ni bod e m’ar nge ku boch ban’en, fa?’

15. Mang e ra ud lemnaged ma aram e rayog ni ngad pigpiggad ngak Got nge mus rogodad riy?

¹⁵ Faanra ud lemnaged nre maruwel ni machib ney ni gad be rin’ e maruwel rok Got ma ra ayuwegdad ni ngad pigpiggad ngak u polo’ i gelngidad. Ir e ke tay chilen ni ngan rin’; ma be pow’iy u daken Fak; ma be pi’ gelngin e piin ni yad be rin’ e re maruwel nem u daken gelngin nib thothup. Gab felfelan’ ni gimew be maruwel Fak Got u taabang ni gimew girdien e maruwel rok, fa? Kari mus ni goo Jehovah e rayog ni nge k’aring boor ko medlip e milyon e girdi’ ni yooren i yad e ‘dariy e skul rorad’ ni ngar weliyed fare thin nib fel’ u murung’agen Gil’ilungun ngak e girdi’ u 236 e nam.​—Acts 4:13.

Nge Yog e Tow’ath Ngom u Daken Kristus

16. Mang e be yog e Genesis 22:18 u murung’agen e tow’ath ni ma yib rok Got?

¹⁶ I yog Jehovah ngak Abraham ni gaar: “Urngin e nam nu fayleng ni bay ra weniggad ngog ni nggu fal’eg waathrad ni bod rogon ni kug fal’eg waathan e piin ni owchem, ni bochan e kam fol ko tin ni ku gog ngom ni ngam rin’.” (Gen. 22:18) Be dag e re n’ey ni piin ni yad ba felfelan’ ko pigpig ni yad be tay ngak Got nge Fak e rayog ni ngar athapeged e tow’ath nra yog ko girdi’ u tan e gagiyeg nra tay fare Messiah.

17, 18. Mang e ke micheg Jehovah ko Deuteronomy 28:2, ma mang fan e re n’ey ngodad?

¹⁷ I yog Got ngak piyu Israel ni yad owchen Abraham ni gaar: “Mu folgad rok Somol ni Got romed ma rayog ngomed urngin e pi fel’ waathan ney [ni bay u lan fare motochiyel].” (Deut. 28:2) Ere ku arrogon e pi tapigpig rok Got e ngiyal’ ney. Faanra ga baadag ni nge tow’athnagem Jehovah ma thingar mu ‘fol rok.’ Ma faan ga ra fol ma aram e ‘rayog ngom urngin’ e tow’ath rok. Machane, mang e ba muun ko re n’ey?

¹⁸ Faanra gad be fol ma aram e gad be rin’ e n’en ni bay u Bible nge pi babyor ni yima ngongliy nib puluw e thin riy ko Bible. (Matt. 24:45) Ba t’uf ni ngan fol rok Got nge Fak. I gaar Jesus: “Gathi gubin e girdi’ ni ma piningeg ni ma lungurad Somol, Somol, e yad ra yan nga suwon Got u tharmiy, ya kemus ni piin ni yad ma rin’ e n’en ni baadag e Chitamag nu tharmiy ni ngar rin’ed e yad ra yan ngay.” (Matt. 7:21) Ngan fol rok Got e be yip’ fan ni ngan fol ko yaram ni be pi’ u daken e piin piilal ko ulung ni Kristiano ara “pi pumoon ni yad e tow’ath.”​—Efe. 4:8.

19. Uw rogon min tow’athnagdad?

¹⁹ Piin ni yad ba muun ko ‘pi pumoon ney ni yad e tow’ath’ e aram girdien fare Governing Body ara fare Ulung ni Ma Pow’iyey, ni yad owchen e ulung ni Kristiano. (Acts 15:2, 6) Bin riyul’ riy e, rib ga’ fan e ngongol rodad ngak pi walagen Kristus, ya ku aram ban’en ni bay rogon ko pufthin ni yira tay ngodad u nap’an fare gafgow nib ga’. (Matt. 25:34-40) Reb e kanawo’ nra yog e tow’ath ngodad riy e aram e ngaud folgad rok e piin ni ke dugliyrad Got.

20. (a) Mang reb e maruwel nib ga’ fan ni ma rin’ e “pi pumoon ni yad e tow’ath”? (b) Uw rogon ni nge m’ug nib ga’ farad u wan’dad?

²⁰ ‘Pi pumoon ney ni yad e tow’ath’ e kub muun ngay e Branch Committee ara pi walag ni yad ma yarmiy rogon e maruwel ni yima tay ko pi branch office i yan, nge pi walag ni yad ma lekag e ulung, nge piin piilal u lan e ulung. Gubin e pi walag ney e kan dugliyrad ni ngar rin’ed e pi maruwel ney u daken gelngin Got nib thothup. (Acts 20:28) Maruwel ko pi walag ney e ngar pied e athamgil nga laniyan’ e girdi’ rok Got nge mada’ ko ngiyal’ ni “bay da bad nga taabang ngad taab girdi’gad u daken e michan’ rodad ngak Fak Got nge murung’agen ni kad nanged; ma aram ma gadad ilal i yan nge mus rogodad ngad boded mam’ungun Kristus.” (Efe. 4:13) Riyul’ ni pi walag ney e dawor ra flontgad. Machane, faan gad ra fol rorad ma aram e yira tow’athnagdad.​—Heb. 13:7, 17.

21. Mang nrib ga’ fan ni ngad folgad rok Jesus?

²¹ Dab ki n’uw nap’an ma ra thang Kristus e re m’ag rok Satan nib kireb ney. Nap’an nra buch e re n’em ma ke mil fadad ngak Jesus, ya ir e ke pi’ Got mat’awun ni nge pow’iy fare ulung nib ga’ ko “fapi alublub ni bay e ran ko yafos riy.” (Rev. 7:9, 16, 17) Ere ngad athamgilgad e chiney ngaud folgad ko fare Pilung ni gelngin Jehovah nib thothup e be pow’iy.

[Footnotes]

Mang e Kam Fil ko . . .

• Isaiah 11:1-5?

• Mark 1:40, 41?

• Acts 10:42?

• Genesis 22:18?

[Picture on page 25]

Ke m’ug ni ma runguy Jesus e girdi’ u nap’an ni faseg bochi pin ni fak Jairus

[Picture on page 26]

Jesus Kristus e ir e be pow’iy fare maruwel ni machib ni yibe tay