5 Gubin Mit e Liyor nib Fel’ u Wan’ Got​—Riyul’ e Re N’ey, Fa?

Sana kam rung’ag ni: “Boor e kanawo’ ni yan ngak Got, ni bod bangi ban’en ni boor e kanawo’ ni yan ngay. Ra be’ ma ir e nge gay kanawoen ngak Got.”

N’en ni be fil e Bible: Thingar da yul’yul’gad ko liyor ni gad be tay, ma dab ud dake modingnaged gadad. I yog Jesus ngak e pi tayugang’ ko teliw kakrom fan ndar fel’gad u wan’ Got ni gaar: “Rib sorok Isaiah ni profet ni faani weliy murung’agmed, ni gimed e piin ni gimed ma dake modingniged gimed, ni bod ni yoloy ni gaar: I Got e gaar, ‘Pi girdi’ ney e yad be ta’ fag ko thin ni yad be yog, machane rib mal’af lanin’rad rog.’” (Mark 7:6) Machane yul’yul’ e gathi aram e mich riy nib fel’ e liyor rodad u wan’ Got.

I tamilangnag Jesus e re n’ey u nap’an ni gagiyelnag thibngin e liyor ni i tay e pi tayugang’ ko teliw kakrom nge piin ni ur folgad rorad. I yog e pi thin rok Got ni baaray ni fan ngorad ni gaar: “Mm’ay fan e siro’ nge pigpig ni yad be tay ngog, ya pi motochiyel ni girdi’ e sunumiy e yad be machibnag ngak e girdi’ ni gowa pi motochiyel rok Got!” (Mark 7:7) Ba “m’ay fan” e liyor ni ur ted ni bochan e kar m’oneged e yalen ko teliw rorad ko tin nib m’agan’ Got ngay.

Der yog e Bible ni boor e kanawo’ nrayog ni ngan yan riy ngak Got, ya kemus nri taareb. Matthew 7:13, 14 e be gaar: “Marod ko bin nib wen’in e garog, ya ba ga’ langan e garog ko nifiy, ma kanawo’ ni yan ngay e mmom, ma boor e girdi’ ni be yan u daken. Ma garog ko yafos e ba wen’in, ma kanawo’ ni yan ngay e mmo’maw’, ma ba lich e girdi’ ni be pirieg.”

Rogon nra ayuwegem e tin riyul’: Am lemnag rogon e lem rom nfaanra boor e pul ni um par ni ga be fal’eg rogom ni ngam un ko marasong, ma nap’an nni mu’ ko sagreng ni gur e kam m’on mi nog ngom ndabi yog puluwon ngom ya kam th’ab reb e motochiyel ndam nang. Ra yan i aw nib m’ay fan e athamgil ni kam tay. Gur, rayog ni nge buch ban’en ni aray rogon ko liyor ni gad be tay ngak Got?

I taareb rogonnag apostal Paul e liyor ni gad be tay ko gosgos ni gaar: “Be’ ni ma un ko mil ni ir girdien e sagreng e dabiyog ni nge yog puluwon ngak ni faanra dabi fol ko motochiyel ko fare mil.” (2 Timothy 2:5) Gad ra fel’ u wan’ Got ni faan gad ra liyor ngak u rogon nib puluw ko “motochiyel” rok, ni aram e ngad liyorgad ngak u rogon nib m’agan’ ngay. Dabiyog ni ngad liyorgad ngak Got nrogon ni gad baadag ni bod girdien e mil ndabiyog ni ngar milgad nrogon ni yad baadag ndab ra folgad ko “motochiyel.”

Ra nge fel’ e liyor rodad u wan’ Got, ma thingar dab da uneged boch e machib ni googsur ko liyor rodad ngak. I gaar Jesus: “Piin nriyul’ ni yad be meybil e bay ra meybilgad ngak e en ni Chitamangiy u daken e ayuw ko [“gelngin Got nib thothup,” NW] ngu fithik’ e yul’yul’.” (John 4:23) Bible e ra ayuwegdad ni ngad nanged e bin riyul’ e kanawo’ ni yan ngak Got.​—John 17:17.a

[Footnote]

[Blurb on page 8]

Gubin raba’ e teliw ni ma fil ngak e girdi’ ni ngar liyorgad ngak Got nrogon nib m’agan’ ngay, fa?