Ngad Paged Gelngin Got nge Gagiyegnagdad Ma Ra Yog e Yafas nge Gapas Ngodad

“Gelngin Got nib thothup e be gagiyegnag pangidad, ma gathi rogon nib m’agan’ e dowef rodad ngay.”​—ROM. 8:4, NW.

1, 2. (a) Mang e rayog ni nge buch u nap’an ni ga be yan u karrow ma be magawon lanin’um? (b) Mang e rayog ni nge buch rom u nap’an ni ga be pigpig ngak Jehovah ma be magawon lanin’um?

REB i girdien e am nu Meriken e ke yog ni gubin e duw ma be gel i yan e magawon ko girdi’ u nap’an ni yad be yan u karrow rorad ni ke magawon lanin’rad, ni bod nrayog ni nge magawon lanin’rad ya yad be fanay e cell phone. Ka nog ni boor e girdi’ ni ke chafin e karrow rorad ara ke chugur ni nge chafin ya bochan ni en ni be yan u reb e karrow e be non ko cell phone rok. Boch e girdi’ e yad be lemnag ni yad ra fanay e cell phone rorad e ngiyal’ ney ma rayog ni ngar fanayed e tayim rorad nib fel’ rogon, machane re n’ey e rayog ni nge sum e magawon riy nib gel.

² Be’ ni be yan u karrow ni ke magawon laniyan’ e sana ba mo’maw’ ni nge guy e n’en nra buch rok. N’en ni aram rogon e ku rayog ni nge buch ko tha’ u thildad Got. Faanra ngad paged ban’en ni nge magawonnag lanin’dad ma rayog ni ngad gafgowgad ko tirok Got ban’en. Ke yog Paul nrayog ni ngad kirebnaged rogon nib mich Kristus u wan’dad. (1 Tim. 1:18, 19) Ke fonownag apostal Paul e pi walag nu Roma ni gaar: “Ra par lanin’med ni tin ni ba adag e dowef romed e ir e be gagiyegnag, ma wenegan nra yib e yam’; ma ra par lanin’med ni tin ni baadag gelngin Got nib thothup e ir e be gagiyegnag, ma ra yib wenegan ni yafos nge gapas.” (Rom. 8:6, NW) Mang e be yip’ fan e n’en ni be yog Paul? Uw rogon ni ngad siyeged ni nge dabi par ‘lanin’dad ni tin ni baadag e dowef rodad e ir e be gagiyegnag’ ya nge par ‘ni tin ni baadag gelngin Got nib thothup e ir e be gagiyegnag’?

“Dab Kun Turguy e Gechig” Rorad

3, 4. (a) Mang e magawon rok Paul ni ke yoloy murung’agen? (b) Mang fan ni gad baadag ni ngad weliyed murung’agen e magawon rok Paul?

³ Ki yol Paul ngak piyu Roma u murung’agen e magawon ni ke yib ngak, ya ke thamiy ni lem rok nge dowef rok e be togopluw reb nga reb. (Mu beeg e Roma 7:21-23.) Ke yoloy Paul e re n’em ni gathi bochan e nge mang tawey rok ara bochan e be kireban’ ngak, ma thin ni ke yog e gathi be yip’ fan ndabiyog ni nge rin’ e tin nib mat’aw. Ya ir e Kristiano ni kan dugliy ma ke ilal ko tirok Got ban’en, ma kan mel’eg ni nge mang “apostal” ko pi nam. (Rom. 1:1; 11:13) Ere mang fan ni ke yoloy Paul murung’agen e magawon rok?

⁴ Ke weliy Paul ni dabiyog ni nge rin’ e tin nib m’agan’ Got ngay nrogon nri baadag. Mang fan? I yog ni gaar: “Ya ke denen urngin e girdi’, kar pired ni yad mmal’af rok Got ke mul e flaab rok u pa’rad.” (Rom. 3:23) Paul e taareb rogon ngak urngin pi fak Adam ndawori flont, ere gad manang fan e n’en ni ke yog ya gubin e rran ni gad ma togopluw ko lem rodad nib kireb. Boor ban’en nrayog ni nge magawonnag e pigpig rodad ngak Got, ma rayog ni nge palognagdad ko fare ‘kanawo’ nib wen’in ni yan ko yafos.’ (Matt. 7:14) Machane re n’ey e gathi be yip’ fan ndakuriy e athap rok Paul, maku er rogodad.

5. Uw e pirieg Paul e ayuw riy ni nge fel’ laniyan’?

⁵ Ke fith Paul ko mini’ e rayog ni nge ayuweg, ngemu’ me gaar: “Ke magar Got u daken e Somol rodad i Jesus Kristus.” (Rom. 7:24, 25) Tomur riy me weliy Paul murung’agen e pi Kristiano ni kan dugliyrad ni yad e piin ni kar taab girdi’gad Kristus Jesus. (Mu beeg e Roma 8:1, 2.a) Ke pofrad Jehovah u daken gelngin nib thothup kar manged pi fak ma ‘yad ra un ngak Kristus.’ (Rom. 8:14-17) Gelngin Got nib thothup nge fare michan’ ko maligach ni ke pi’ Jesus e be ayuwegrad ni ngar gelgad ko fare magawon ni ke weliy Paul murung’agen. Ma aram e kar fel’gad u wan’ Got ni yugu aram rogon ni dawor ra flontgad ma kan chuwegrad u “tan fare motochiyel ko denen nge yam’.”

6. Mang fan ni thingari adag urngin e pi tapigpig rok Got ni ngar nanged fan e thin rok Paul?

⁶ Yugu aram rogon ni ke non Paul ngak e pi Kristiano ni kan dugliyrad, machane n’en ni ke yog u murung’agen gelngin Got nib thothup nge maligach ni pi’ Jesus e ra yib angin ngak urngin e pi tapigpig rok Jehovah, ndemtrug ko bay e athap rorad ko yan nga tharmiy ara ngar pared u fayleng. Ke thagthagnag Got e fonow ni pi’ Paul ngorad, ere ba ga’ fan ni nge tamilang u wan’ urngin e tapigpig rok Jehovah e n’en ni ke yog ma ngar folgad riy.

Rogon ni Ma ‘Pufthinnag Got e Denen’

7, 8. (a) Uw rogon ni fare Motochiyel e “ba meewar ndabiyog ni nge chuwegey ko denen”? (b) Mang e ke yog ni nge rin’ Got u daken gelngin nib thothup ngu daken fare maligach?

⁷ U Roma guruy ni 7 e ke yog Paul ni girdi’ ndawori flont e be par u tan gelngin e denen. Mu lan e guruy ni 8 e ke weliy riy murung’agen gelngin Got nib thothup nrayog ni nge ayuweg e piin Kristiano ndab kur pared u tan gelngin e denen. Ma ra ayuwegrad ni ngar rin’ed e tin nib m’agan’ Jehovah ngay me fel’ thilrad. I dag Paul ni i fanay Got gelngin nib thothup nge fare maligach ni pi’ Jesus nge yog ni nge rin’ ban’en ndabiyog ni nge rin’ fare Motochiyel nni pi’ ngak Moses.

⁸ Bochan fare Motochiyel ni kan pi’ ngak Moses ma ke tamilang ni girdi’ e ka yad e tadenen, ya dabiyog rok e girdi’ ni ngar folgad ko urngin e motochiyel ni bay riy. Pi prist nib tolang u Israel ni yad be pigpig u tan e re Motochiyel nem e dar flontgad ma dabiyog ni ngar pied reb e maligach nrayog ni nge upunguy e denen rok urngin e girdi’, ere fare Motochiyel e “ba meewar ndabiyog ni nge chuwegey ko denen.” Ke l’og Jehovah Fak ngeb i ngal’ nib “girdi’” ma maligach ni pi’ e bod ni ke ‘pufthinnag e denen,’ ya ireray e n’en ni ke ayuweg e girdi’ ndab kur pared u tan gelngin e denen. Bochan ni piin Kristiano ni kan dugliyrad e ke mich fare maligach u wan’rad, ma aram e kar fel’gad u wan’ Jehovah. Fonow ni pi’ Paul ngak e piin Kristiano ni kan dugliyrad e ke ayuwegrad ni nge dab kur ngongolgad u rogon nib ‘m’agan’ e dowef rorad ngay,’ machane ngar folgad u rogon ni be gagiyegnagrad “gelngin Got nib thothup.” (Mu beeg e Roma 8:3, 4.b) Thingar ra ngongolgad ni aray rogon u n’umngin nap’an e yafas rorad u fayleng. Faan yad ra par ni yad ba yul’yul’ ma ra yog fare “teeliyaw ko yafos” ngorad.​—Rev. 2:10.

9. Mang e be yip’ fan fare bugithin ni “motochiyel” nrogon ni bay ko Roma 8:2?

⁹ I weliy Paul murung’agen “fare Motochiyel” ma ki weliy murung’agen fare “motochiyel ko fare gelngin Got nib thothup” nge “fare motochiyel ko denen nge yam’.” (Rom. 8:2) Ere mang e pi motochiyel nem? Fare bugithin ni “motochiyel” u roy e gathi taareb rogon ko tin ni kan pi’ ngak Moses. Reb e babyor e be yog ni fare bugithin ni “motochiyel” ni thin ni Greek ko re verse ney e be yip’ fan e tin nib fel’ ara tin nib kireb ni ma rin’ e girdi’ ma be gagiyegnagrad ni bod e motochiyel. Maku rayog ni nge yip’ fan kenggin e motochiyel ni kar mel’eged ni ngar folgad riy.

10. Uw rogon ni be gagiyegnagdad fare motochiyel ko denen nge yam’?

¹⁰ I yoloy apostal Paul ni gaar: “Denen e yib nga fayleng u daken taabe’, ma denen ni ngongliy e fek e yam’ i yib. Wenegan ni yib e af e yam’ ngak urngin e girdi’ nu fayleng, ni bochan e urngin e girdi’ ni ngongliy e denen.” (Rom. 5:12) Bochan ni gadad pi fak Adam, ma fare motochiyel ko denen nge yam’ e be gagiyegnagdad. Gad baadag ni ngad rin’ed e pi n’en ndabun Got, ni ireray e pi n’en nra fekdad i yan ko yam’. U lan e babyor rok Paul ni pi’ ngak piyu Galatia e yog ni pi ngongol ney nib kireb e “yima ar’arnag” miki yog ni gaar: “Pi aromed ni be rin’ e pi n’ey e dabiyog ni ngar manged girdien e gin nsuwon Got.” (Gal. 5:19-21) Girdi’ ni ma rin’ e pi n’ey e yad ma rin’ e n’en nib “m’agan’ e dowef rorad ngay” ara yad ma fol ko pi ar’ar rorad nib kireb. (Rom. 8:4) Machane girdi’ ni yad ma un ko ngongol ni darngal, ara yad ma meybil ko liyos, ara yad ma un ko pig, ara yad ma un i rin’ yugu boch e denen nib ubchiya’ e kemus ni yad e yad ma yan nga ar’aren lanin’rad, fa? Danga’. Ya “tin nib kireb ni yima ar’arnag” ni be weliy e Galatia e kub muun ngay e pi n’en ni yib meewar riy, ni bod e taliyeg, nge damumuw nib pag rogon, nge maluagthin, nge awan’. Ere thingar dab da lemnaged ni dariy e magawon rodad ni aray rogon.

11, 12. (a) Mang e ke rin’ Jehovah ya nge yog ni nge pithigdad ko fare motochiyel ko denen nge yam’? (b) Mang e thingar da rin’ed me yog ni ngad fel’gad u wan’ Got?

¹¹ Gad ba felfelan’ ni ke ayuwegdad Jehovah ya ke pithigdad ko fare motochiyel ko denen nge yam’. Ke yog Jesus ni gaar: “Yi Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.” Ra ngad ngongolgad ni gad be dag nib t’uf Got rodad ma ke mich u wan’dad fare maligach ni pi’ Jesus, ma rayog ni ngad chuwgad ko gechig ni wenegan e denen. (John 3:16-18) Gad ra lem ni bod rogon Paul u nap’an ni gaar: “Ke magar Got u daken e Somol rodad i Jesus Kristus!”

¹² Magawon rodad e taareb rogon nga ba m’ar nib ubchiya’ ni keb ngodad ma kan tafalaynag ke chuw. Gad ra gol nib fel’ rogon ni faan gad ra rin’ e n’en ni ke yog e togta ngodad. Michan’ rodad ko fare biyul e rayog ni nge pithigdad ko fare motochiyel ko denen nge yam’, machane ku dawor da flontgad ma ka gad bogi tadenen. Ra ngad ululgad nge gel e tha’ u thildad Jehovah ma gad fel’ u wan’ ma bay ban’en nib t’uf ni ngad rin’ed. Faanra gad baadag ni nge fel’ thildad Got ni yugu aram rogon ndawor da flontgad, miki yog Paul ni ngad folgad u rogon ni be gagiyegnagdad gelngin Got nib thothup.

Uw Rogon ni Ngad Folgad u Rogon ni Be Gagiyegnagdad Gelngin Got nib Thothup?

13. Mang e be yip’ fan ni ngad paged gelngin Got nib thothup nge gagiyegnagdad?

¹³ Rayog ni ngad folgad u rogon ni be gagiyegnagdad gelngin Got nib thothup ni faanra kad mon’oggad ko tin riyul’. (1 Tim. 4:15) Yugu aram rogon ni dabiyog ni ngad rin’ed e re n’ey nib fel’ rogon, machane gubin e rran ni ngad rin’ed e tin th’abi fel’ ya nge yog ni ngad folgad u rogon ni be gagiyegnagdad gelngin Got nib thothup. Faanra gad be fol u rogon ni be ‘gagiyegnagdad’ gelngin Got nib thothup ma ra felfelan’ Got.​—Gal. 5:16.

14. Uw rogon e lem nge ngongol rok e piin ni “gelngin Got nib thothup e be gagiyegnag lanin’rad”?

¹⁴ U lan e babyor rok Paul ni pi’ ngak piyu Roma e weliy riy murung’agen e girdi’ ni l’agruw e lem ni bay rorad nib togopluw reb nga reb. (Mu beeg e Roma 8:5.c) Fare bugithin ni “dowef” ni be weliy u roy e gathi kemus ni be yip’ fan downgin e girdi’. Yu ngiyal’ e be weliy e Bible murung’agen e “dowef” ni be yip’ fan rogon ndawor da flontgad. I yog Paul ni bochan ndawor da flontgad ma rayog ni nge adag dowdad ban’en ni dabun lanin’dad. Ke togopluw Paul ko n’en ni baadag downgin. Machane boor e girdi’ e ngiyal’ ney ni darur togopuluwgad ko pi n’en nib kireb ni yad ma ar’arnag, ere yad ma “ngongol nrogon ni be yog e dowef rorad ngorad.” Darur lemnaged murung’agen e tin ni baadag Got ni ngar rin’ed ma darur ninged e ayuw ngak nge yog ni ngar togopuluwgad ko pi ngongol ney nib kireb “nrogon ni be yog e dowef rorad ngorad” ma yad be pag e ar’ar rorad nib kireb nge gagiyegnagrad. Ere girdi’ ni “gelngin Got nib thothup e be gagiyegnag lanin’rad” e yad be pag Jehovah ni nge pow’iyrad.

15, 16. (a) Mang e ra buch ni faanra ngad paged boch ban’en nge gagiyegnag lanin’dad? (b) Mang e baadag yooren e girdi’ e ngiyal’ ney ni ngar rin’ed?

¹⁵ Mu beeg e Roma 8:6.d U m’on ni nge rin’ e girdi’ ban’en nib fel’ ara ban’en nib kireb, ma yad be pag boch ban’en nge gagiyegnagrad. Faanra pag e girdi’ nge gagiyegnag lanin’rad e ar’ar nib kireb ma yad ra adag ni ngar rin’ed e tin nib kireb. Ba ga’ ni yad ma tedan’rad ko pi n’ey.

¹⁶ Mang e baadag yooren e girdi’ ni ngar rin’ed e ngiyal’ ney? I yoloy apostal John ni gaar: “Gubin ban’en nib mil fan ngaray nga fayleng ni aram e tin nib tagan ban’en ni yima ar’arnag, ni tin nra guy e girdi’ ma yad ba adag ni nge yog ngorad, nge urngin ban’en ni bay u roy u fayleng nri ma uf e girdi’ ngay dariy reb e pi n’ey ni yib rok e en ni Chitamangiy; ya urngin me yib rok e fayleng.” (1 John 2:16) Pi n’ey ni yima ar’arnag ni ke yoloy John murung’agen e aram e ngongol ni darngal nge piin ni yad baadag ni nge gilbugurad nge piin ni yad ba chogow. Boch e babyor, nge kachido, nge Internet e ra k’aring e girdi’ ni ngar ar’arnaged e pi ngongol ney nib kireb ni gubin ngiyal’. Ireray e pi n’en ni ma pag e girdi’ nge gagiyegnag lanin’rad ya bochan ni ireray e pi n’en ni yad baadag. Ke yog Paul ni ‘ra par lanin’dad ni tin ni ba adag e dowef rodad e ir e be gagiyegnag, ma wenegan nra yib e yam’.’ Re n’ey e rayog ni nge kirebnag e tha’ u thildad Got e ngiyal’ ney ma wenegan nra yib ngodad e gad ra yim’. Mang fan? Ya “be’ e ra mang toogor rok Got ni faanra par laniyan’ ni tin nib kireb ni be yim’ ni bochan e ir e be gagiyegnag laniyan’ faanem; ya aram e der fol ko motochiyel rok Got, ma bin riyul’ riy e dabiyog rok ni nge fol riy. Ya piin ni yad be fol ko tin nib kireb ni yad be yim’ ni bochan e dabiyog ni ngar ngongliyed e tin nib m’agan’ Got ngay.”​—Rom. 8:7, 8.

17, 18. (a) Uw rogon ni ngad paged gelngin Got nib thothup nge pow’iydad? (b) Mang angin nra yog ngodad ni faan gad ra rin’ ni aram rogon?

¹⁷ ‘Ra par lanin’dad ni tin ni ba adag gelngin Got nib thothup e ir e be gagiyegnag, ma ra yib wenegan ni yafos nge gapas.’ Re n’ey e be yip’ fan nrayog ngodad e yafos ni manemus boch nga m’on, ma ra gapas lanin’dad ma rra fel’ thildad Got. Uw rogon ni ngad daged ni be par lanin’dad ni tin ni baadag gelngin Got nib thothup e be gagiyegnag? Faanra gubin ngiyal’ ni gad be fol u rogon ni be pow’iydad Got nge gelngin nib thothup, ma rayog ni ngad mon’oggad u rogon ni ngad puluwniged e lem rodad ko lem rok Got. Gad baadag ni nge puluw e lem rodad ko “motochiyel rok Got.” Ere nap’an ni bay ban’en ni be waliydad ko kireb ma gad manang ko mang e thingar da rin’ed, ma gad ra dugliy ban’en nra m’ug riy ni gad be fol u rogon ni be pow’iydad gelngin Got nib thothup.

¹⁸ Susun e ngad adaged ni nge gagiyegnag e tirok Got ban’en lanin’dad. Gad baadag ni boch e maruwel ni bay rogon ko tirok Got e nge mang ir e th’abi ga’ fan ko yafos rodad. Pi n’ey e ba muun ngay e meybil ni gubin ngiyal’, nge beeg ara fol Bible, nge muulung, nge machib. (1 Pet. 1:13) Dab da paged e ar’ar nib kireb nge gagiyegnagdad, ya susun e ngad folgad u rogon ni ma lem Got ma ngad paged gelngin nib thothup nge pow’iydad. Gad ra rin’ ni aram rogon ma yira tow’athnagdad ma ra yog e yafos ni manemus nge gapas ngodad.​—Gal. 6:7, 8.

[Footnotes]

Rayog ni Ngam Weliy?

• Mang e de yog ni rin’ fare motochiyel nni pi’ ngak Moses, ma mang e ke rin’ Got ni bay rogon ko re n’ey?

• Mang “fare motochiyel ko denen nge yam’,” ma uw rogon ni ngad pithiged gadad riy?

• Mang e thingar da rin’ed me yog ni nge ‘gagiyegnagdad’ gelngin Got nib thothup?

[Picture on pages 16, 17]

Gur, fare gelngin Got nib thothup e be gagiyegnag pangidad, ma gathi rogon nib m’agan’ e dowef rodad ngay?