Mu Lemnag Fare Kan Ma Ga Ra Fas!
“Ngani lemnag fare kan ma ra yib wenegan ni yafas.”—ROMA 8:6, New World Translation.
1, 2. Mang e ba thil ko thin nu Bible u thilin e “ufin” nge “kan”?
DE mom ni ngani par nib biech ey gafarig u p’owchen Got u fithik’ e girdi’ nib kireb pangirad ma yad be mon’eg e arar ko dowef rorad. Machane, fare Thin u Bible e be dag ni “dowef” nge “kan” e ba math keru’, ma be weliy nib tamilang murung’agen e n’en ni ba thil rok e girdi’ ni ma pag ni downgin nib sug ko denen e ir e ra gagiyegnag nge angin ni ra yib ngak nge en ni kan ni thothup rok Got e be gagiyegnag.
2 Ni bod ni, yog Jesus Kristus ni gaar: “En ni ma pi’ e yafas e aram fare Kan ni Thothup; ma bin kakrom i gimed e dariy ban’en nib fel’ ni yib rok. Fapi thin ni kug weliy ngomed e yib rok fare Kan ni Thothup ma re thin nem e ma pi’ e yafas.” (John 6:63) I yol Paul ngak e piin Kristiano u Galatia ni gaar: “Ya n’en nib kireb ni baadag e dowef e ba togopuluw ko n’en ni baadag fare kan, ma fare kan e ba togopuluw ko dowef; ni aram e yow ba tathil.” (Galatia 5:17) Maku i yog Paul ni gaar: “Faanra yung be’ ban’en nga daken e milay’ rok ni aram e tin nib kireb ni be ar’arnag, ma wom’engin nra yib riy ngak e yam’; ma faanra yung be’ ban’en ni fan ngak fare Kan ni Thothup, ma wom’engin nra yib riy ngak ni Kan ni Thothup e ke yib rok e yafas ndariy n’umngin nap’an.”—Galatia 6:8.
3. Mang e n’en nib t’uf ma aram rogon ma rayog ni nge dabni mang sib ko tin nib kireb ni be yim’ e girdi’ nbochan?
3 Fare kan ni thothup rok Jehovah—ni aram gelngin nib gel—e ri bay rogon ni nge chuweg e “tin ni be ar’arnag e dowef” ni ba kireb nge gelngin nra kirebnagey. (1 Peter 2:11) Ra ngada pithigeg gadad ko lem nib kireb, ma baga’ fan ni nge yog ngodad e ayuw ko kan rok Got, ya i yoloy Paul ni gaar: “Ra ngani lemnag e tin ni baadag dowef ma wenegan nra yib e yam’, machane ra ngan lemnag fare kan ma ra yib wenegan ni yafas nge gapas.” (Roma 8:6, NW) Ngan lemnag fare kan ma be yip fan e mang?
“Ngan Lemnag Fare Kan”
4. Mang e be yip fan fare bugithin ni “ngan lemnag fare kan”?
4 Nap’an ni yoloy Paul u murung’agen ni “ngan lemnag fare kan,” me fanay fare thin ni Greek ni be yip fan “rogon ni ngan lemnag ban’en, nge ban’en ni (-kan tay) lanin’uy nge, . . . tin ni yibe nameg, nge tin ni yi baadag, nge athamgiliy.” Ma ku re thin ney e be yip fan ni “ngan lemnag, yira lemnag u reb e kanawo’.” Arfan, ni ngan lemnag fare kan ma be yip fan e n’en ni yibe gagiyegnag, nge yibe suwey, nge be mithmith nbochan gelngin Jehovah nib gel. Fan e re n’ey e ri gad be pag ni lem rodad, nge tin ni gad baadag ni nge yog ngodad, e ra par ni kan ni thothup rok Got e ra gagiyegnag.
5. Uw rogon ni ngada ted gadad u tan pa’ fare kan ni thothup ni nge gagiyegnagdad?
5 I weliy Paul rogon ni ngada ted gadad u tan pa’ fare kan ni thothup nra gagiyegnagdad ko ngiyal’ ni ke yog ni kan ni thothup e ‘ngan pigpig ngak.’ (Roma 7:6) Bochan e michan’ ni ta’ e piin Kristiano ko maligach ni pi’ Jesus, ma aram e dabkuura pared ni denen e be gagiyegnagrad ma arfan ni bod ni “kar m’ad” ko par rorad kafram ni ur manged sib ko denen. (Roma 6:2, 11) Pi cha’ nem ni kar m’ad ni be yip fan ban’en e ka ba fas e dowef rorad ma ke puf rogorad e chiney ni ngar folgad rok Kristus ni kar manged “sib rok e tin nib mat’aw ban’en”.—Roma 6:18-20.
Ngani Thil Nrogon ni Ma Ngat e Girdi’ Ngay
6. Uw rogon ni ke thil e piin ni kar manged “sib ko tin nib mat’aw ban’en”?
6 Rogon ni ra thil e girdi’ ni immoy ni yad ba “sib ko denen” faram nge ngal’ ni tapigpig rok Got ni yad e “sib rok e tin nib mat’aw” e riyul’ ni ma ngat e girdi’ ngay. I yoloy Paul murung’agen boch e girdi’ ni urumed faram ni aram rogon, me gaar: ‘Machane ke n’ag Got fan e denen romed ke biechnagmed; ma ka ni pi’med ngak Got; ma ka ni mat’awnagmed ngak Got u daken fithingan Somol Jesus Kristus ngu daken Fare Kan ni Thothup rok e Got rodad.’—Roma 6:17, 18; 1 Korinth 6:11.
7. Mang fan ni baga’ fan ni ngada nanged rogon ni ma lemnag Jehovah ban’en?
7 Som’mon, ma thingarda nanged murung’agen e lem rok Jehovah ma fini thil e yafas rodad nrogon ni ma ngat e girdi’ ngay. Kakrom ni boor e chibog ni ke yan, ma David ni psalmist e i wenig ngak Got ni gaar: “O Jehovah, mu ayuwegneg nggu nang e tirom e kanawo’ . . . Mu fil ngog rogon nrayog ni nggu wan ko gin ni bay e thin riyul’ rom riy.” (Psalm 25:4, 5, NW) I motoyil Jehovah ngak David, maku rayog ni Nge rung’ag e meybil ni aram rogon ni ma ta’ e pi tapigpig rok ko ngiyal n’ey. Bochan ni pi kanawo’ nge tin riyul’ rok Got e ba klin mab thothup, ma ra ayuwegdad e pi n’em nfaanra ngada fal’eged i lemnag u nap’an ni kan ni wawliy lanin’dad ni ngada uned ko tin ni baadag dowdad.
Tin ni Ma Rin’ e Thin rok Got
8. Mang fan ni thingarda filed e Bible?
8 Kan yoloy e Thin rok Got, ni aram e Bible, u gelngin. Arfan, ni reb e kanawo’ nib ga’ fan nra maruwel gelngin u dakendad e aram e nga uda bieged ma ngada filed fare Bible—ni gubin e rran nfaanra rayog. (1 Korinth 2:10, 11; Efesus 5:18) Ngan suguy e lem rodad nge gum’ercha’dad ko thin riyul’ u Bible nge pi kenggin e motochiyel riy e ra ayuwegdad ni dabi mulan’dad ko ngiyal’ ni keb e skeng ngodad. Arrogon, nap’an ni yibe wawliy lanin’dad ni ngada uned ko ngongol ni darngal, ma gelngin Got e ra ayuwegdad ni ngeb nga lanin’dad e Thin u Bible nge kenggin e motochiyel riy nra gelnagdad ni ngada rin’ed e tin nib m’agan’ Got ngay. (Psalm 119:1, 2, 99; John 14:26) Arfan, ni dan bannagdad ni ngu uda folgad ko kanawo’ nib kireb.—2 Korinth 11:3.
9. Uw rogon ni fol Bible e ra gelnag e lem rodad ni gad ra ayuweg thildad Jehovah?
9 Ra ngada ululgad i fil e Thin u Bible u daken boch e babyor ni be weliy murung’agen u fithik’ e yul’yul’ ngu fithik’ e pasig, ma gelngin Got e ra gagiyegnag e lem rodad nge gum’ercha’dad, ma aram e ra gel e ta’fan rodad ko motochiyel rok Jehovah. Ma ra par ni thildad Got e ir e th’abi ga’ fan ko yafas rodad. Faani gad ra mada’nag e n’en ni ma wawliy laniyan’ e girdi’, ma ra chuw fare lem ni rib gel e falfalan’ nra yib nfaan yira un ko ngongol nib kireb. Tin ni nge ga’ fan u wan’dad e aram e ngad pared nib yul’yul’ ku Jehovah. T’ufeg rodad nib gel e ir e ra k’aringdad ni ngada togopuluwgad ko urngin ban’en nra kirebnag thildad Got.
“Rib T’uf e Motochiyel Rom Rog!”
10. Mang fan ni baga’ fan ni ngada folgad ko motochiyel rok Jehovah ma aram e rayog ni ngada lemnaged fare kan?
10 Faan gad ra lemnag gelngin, ma tamilangan’ ko Thin rok Got e dawori gaman. Kari tamilang e motochiyel rok Jehovah u wan’ Solomon ni pilung, machane faani pilibthir ma de yog rok ni nge par nib yul’yul’ ngay. (1 Kings 4:29, 30; 11:1-6) Faanra ri gad ra tiyan’dad ko tirok Got ban’en, ma rayog ni ngada guyed ni dawori gaman nfaanra kemus ni kada nanged ko mang e be weliy e Bible ya ku ba t’uf ni ngada folgad riy u polo’ i lanin’dad. Fan e re n’ey e ra fal’eg e nangan’ rodad rogon i yaliy e pi motochiyel rok Jehovah u fithik’ e yul’yul’ ma gad ra athamgil ni ngada folgad riy. Aram rogon e lem rok fare psalmist. Ke yon’ e tang ni gaar: “Rib t’uf e motochiyel rom rog! Ri gu ma par ni gu ma lemnag ni polo’ e rran.” (Psalm 119:97, NW) Faanra riyul’ ni gad baadag ni ngada folgad ko Motochiyel rok Got, ma ra k’aringdad ni ngada daged pi felngin Got. (Efesus 5:1, 2) Dabda daged ni ri dabiyog ni ngada togopuluwgad ko ngongol nib kireb, ya gad ra dag fapi wom’engin fare gelngin, ma bochan ni gad baadag ni ngada falfalan’aged Jehovah ma ra ayuwegdad ni dabda folgad ko “ar’aren dowdad.”—Galatia 5:16, 19-23; Psalm 15:1, 2.
11. Uw rogon ni ngam weliy ni fare motochiyel rok Got ni dabni un ko ngongol ni darngal e ma ayuwegdad?
11 Uw rogon ni ngada maruweliyed ni nge gel e ta’fan nge t’ufeg rodad ko motochiyel rok Jehovah? Reb e kanawo’ e aram e ngan yaliy nib fel’ rogon fel’ngin. Mu lemnag fare motochiyel rok Got ni be yog ni par ko pumoon nge ppin e kemus ni fan ko mabgol ma dabiyog ni ngan un ko ngongol ni darngal ara un par ni dawor ni mabgol. (Hebrews 13:4) Faanra ngada folgad ko re motochiyel ney ma bay boch ban’en nib fel’ ni dad rin’ed? Gur Chitamangidad nu tharmiy nib tarunguyey e ra pi’ e motochiyel ngodad ni ra siyeg e tin ra yib angin nib fel’ ngodad? Ri danga’! Am sap mang e ke buch rok boor e girdi’ ni der ma par nib puluw ko motochiyel rok Jehovah. Bochan ni boch e girdi’ e kar diyengad ni dan lemnag ma aram e kar lied e bitir u meyal ara kar uned ko mabgol nib papey ma de yib e falfalan’ riy ngorad. Boor e girdi’ ni be chuguliy e bitir ndariy figirngiyrad ara dariy leengirad. Maku, piin ni ma un ko par ni dawori mabgol e yad be pag ni nge af ngorad boch e m’ar ni ma yib nbochan e re ngongol ney. (1 Korinth 6:18) Ma faanra en ni tapigpig rok Jehovah e ke un ko ngongol ni darngal, ma rib gel e kireban’ nra yib ngak nbochan. Bay boch e nep’ ndabiyog ni nge mol nib fel’ rogon nbochan ni yug be lemnag ni nge chuweg u laniyan’ fare kireb ni ke rin’ ni be magawonnag e nangan’ rok ma kari kireban’. (Psalm 32:3, 4; 51:3) Ere, gathi ba tamilang ni motochiyel rok Jehovah ni be yog ni dabni un ko ngongol ni darngal e ke pi’ ni fan nra ayuwegdad? Arrogon, ra ngan par nib klin ko gafarig ma ri baga’ angin!
Ngan Yibilay e Ayuw rok Jehovah
12, 13. Nap’an ni ke gel e lem ni ngan un ko kireb ma mang fan ni ba puluw ni ngan meybil?
12 Ra ngan lemnag fare gelngin ma ba t’uf e meybil u fithik’ e yul’yul’. Ba puluw ni ngan ning e ayuw ko gelngin Got, ya ke yog Jesus ni gaar: “Faanra gimed . . . manang ni ngam pied e pi taw’ath nib fel’ ngak e pi bitir romed, me re en ni Chitamangiy e ri ra pi’ fare kan ni thothup ngak e piin ni yad ra ning.” (Luke 11:13, NW) Rayog ni ngada daged ni gad ma tor nga daken fare gelngin nra ayuwegdad ko meewar rodad. (Roma 8:26, 27) Faanra kada guyed ni ar’ar ara lem nib kireb e be magawonnagdad, fa reb e walag ni ta runguyey e ir e ke yog ban’en ngodad u murung’agen, mab fel’ ni ngada uneged ko meybil rodad murung’agen fare magawon nib tamilang ma ngada ninged e ayuw ngak Got ni nge ayuwegdad ni ngada gelgad ko re lem rodad ney.
13 Rayog rok Jehovah ni nge ayuwegdad ni ngada tiyan’dad ko tin nib mat’aw, nge tin nib machalbog, nge tin nib fel’, nge tin nib fel’ u wan’ e girdi’. Ma ba puluw ni ngada meybilgad ngak u fithik’ e yul’yul’ ma aram e “gapas rok Got” e ra ayuweg gum’ercha’dad nge gelngin e lem rodad! (Filippi 4:6-8) Ere ngada yibilayed e ayuw rok Jehovah ni ngad “athamgiliyed e tin nib mat’aw, nge tin nib fel’ u p’owchen, nge michan’, nge t’ufeg, nge kadan’, nge sumunguy.” (1 Timothy 6:11-14, NW) U daken e ayuw rok e Chitamangidad nu tharmiy, ma pafi magafan’ nge fapi skeng e dabi gel iyan nge mada’ ko ngiyal’ ni dabkiyog ni ngan gagiyegnag. Ma aram, yafas rodad e ra sug ko gapas ni yib rok Got.
Dabmu Kirebannag Laniyan’ fare Kan
14. Mang fan ni kan rok Got e ir gelngin e tin biech ban’en?
14 Pi tapigpig rok Jehovah ni kar ilalgad ko tirok Got e kar folgad ko fonow ni pi’ Paul ni gaar: “Dab mmagawonniged e maruwel ni be tay fare Kan ni Thothup.” (1 Thessalonika 5:19) Bochan ni kan rok Got e ir “fare kan nib thothup,” ere ir e ba klin, nge ba machalbog, mab thothup. (Roma 1:4) Faani maruwel u dakendad, ma aram e re kan nem e ir fare gelngin e tin nib thothup ban’en, ara tin nib biech ban’en. Ma ra ayuwegdad e re n’ey ni nra par nib biech e yafas rodad ma yafas rodad ni be fol rok Got e ir e ra dag e re n’ey. (1 Peter 1:2) Ngan rin’ e ngongol nib kireb e be dag ni kan dabuy e re kan nem, ma rayog ni ngeb e tin kireb riy. Uw rogon?
15, 16. (a) Uw rogon ni ra kireban’ fare kan rok Got ni bochedad? (b) Uw rogon ni dabda kirebnaged laniyan’ e kan rok Jehovah?
15 Ma aram i yog Paul ni gaar: “Dabmu kirebannag laniyan’ fare kan ni thothup rok Got, ya ir e pow ni ke dugliymed ni ngan pithigmed u gelngin fare maligach.” (Efesus 4:30) Thin nu Bible e be weliy murung’agen e kan rok Jehovah ni ir e be micheg, ara reb e ‘pow ko tin ni bay yib,’ ni fan ko fapi Kristiano ni kan dugliyrad ma yad ba yul’yul’. Ma ereram e yafas u tharmiy ndab nim’ biid. (2 Korinth 1:22; 1 Korinth 15:50-57; Revelation 2:10) Gelngin Got e rayog ni nge ayuweg e piin ni kan dugliyrad nge piin ni bay e athap rorad ni ngar pared u fayleng ni ngar pared nib yul’yul’ ma rayog ni ngara paloggad ko ngongol nib kireb.
16 I ginangey Paul ni bay yib e piin ni ba sasalap, nge piin ni moro’ro’, nge piin ni ma un ko ngongol ni yira tamra’ ngay, nge yugu boch ban’en. Faan gad ra pag nda adaged e pi n’en ni aram rogon, ma aram gad be togopuluw ko fonow ni aram e thin rok Got ni fare kan e ke thagthagnag. (Efesus 4:17-29; 5:1-5) Ra aram rogon, ma ba mudugil ni gad ra kirebannag laniyan’ fare kan rok Got, ma riyul’ ni aram e n’en ni gad baadag ni ngada paloggad riy. Tin nib peth ko re n’ey, faan gad ra tabab i dariyfannag e fonow rok Jehovah ni aram e Thin rok, ma aram e rayog ni ngada tababgad i gelnaged e lem nge ngongol ni nra pow’iydad ko denen ni lem rodad ma ra thay u pa’dad e tin baadag Got. (Hebrews 6:4-6) Yugu aram rogon ni daworda rin’ed e tin nib kireb e chiney, ma rayog ni gad ra sor i yan ngay. Faan gad ra togopuluw i yan ko tin ni baadag fare kan, ma gad be kireban’nag. Maku susun gad be togopuluw ma gad be kireban’nag Jehovah, ni fare tabolngin e kan ni thothup. Bochan gadad e piin ni ba t’uf Got rodad, ma dubdad ni ngada rin’ed e tin ni aram rogon. Tin ni gad ra rin’, e rayog ni ngada meybilgad ni nge ayuwegdad Jehovah ma aram e dabiyog ni ngada kirebnaged laniyan’ e kan rok machane rayog ni ngada pininged e sorok nga fithingan nib thothup nfaan gad ra lemnag fare kan u gubin ngiyal’.
Mu Ulul i Lemnag fare Kan
17. Mang boch e maruwel nib spiritual e ffel’ ni gad ra nameg, ma mang fan ni ngan maruweliy ni nge riyul’ e re n’em e aram e lem nib gonop?
17 Reb e kanawo’ nib fel’ nra ayuwegdad ni nguuda lemnaged fare kan u gubin ngiyal’ e aram e gad ra nameg boch ban’en ma ngada maruweliyed nge yib angin ngodad. Be yan u rogon e tin nib t’uf rodad nge rarogodad, rayog ni ngada nameged ni nge fel’ boch rogon ni gad ra fil ban’en, ngada yoornaged e tayim nib muun ngay ni ngada wereged e machib, ara ngada maruweliyed ni nge yog ngodad reb e maruwel u lan e ulung, ni bod e maruwel ni pioneer, ma ngan un ko maruwel u Bethel, ara fare maruwel ni missionary. Ma ra ayuwegdad e re n’ey ni ngan suguy lanin’uy ko tirok Got ban’en ku ra ayuwegdad ni dabi gel e meewar rodad fa nge aw ni gad be nameg ni nge yoor e chugum rodad nge tin ni ma tafinaynag e girdi’ ko re fayleng ney nib togopuluw ko Thin nu Bible. Ba mudugil ni ireray e kanawo’ ni bay e gonop riy, ya i yog Jesus ni gaar: “Dab mu ulunguyed e flaab u roy u fayleng, ya ra kirebnag e ngal nge t’ay ma ra yib e moro’ro’ nga naun nge iring. Machane ngam ulunguyed e flaab romed u tharmiy, ya dabi kirebnag e ngal nge t’ay, ma dabi yib e moro’ro’ nga naun nge iring. Ya lanin’med e gubin ngiyal’ ni bay i par ko gin ni bay e flaab romed riy.”—Matthew 6:19-21.
18. Mang fan ni ri baga’ fan ni ngan lemnag fare kan ko ngiyal’ ney ni tin tomren e rran?
18 Ra ngan lemnag fare kan nge ngan chuweg e arar ko fayleng ma riyul’ ni ba mudugil ni aram e kanawo’ ni bay e gonop riy ko ngiyal’ ney ni “tin tomren e rran”. (2 Timothy 3:1-5) Ya tomur riy, ma “re fayleng ney nge urngin ban’en ni ba’ riy ni be yim’ e girdi’ nbochan e bayi m’ay; machane en nra rin’ e tin nib m’agan’ Got ngay e ra par nib fos ndariy n’umngin nap’an.” (1 John 2:15-17) Ni bod ni, faanra reb e Kristiano ni kab pagal e ra nge nameg ni nge un ko pioneer, ma ra pow’iy e re n’ey u nap’an e tayim nib mo’maw’ ni aram e tayim ni kab pagal ara kab fel’ yangaren. Ra ngan towasariy ni nge pag e kanawo’ nib mat’aw, ma ba tamilang u wan’ e cha’ nem e n’en nge rin’ ni aram bang ko pigpig rok ngak Jehovah. Cha’ nem ni ke suguy laniyan’ ko tirok Got ban’en e manang ni de gonop, manang ni ba aliliy, ni faanra nge tal i maruweliy e tirok Got ban’en nbochan ni baadag ni nge yoor e chugum ara yugu boch e falfalan’ nra yib ko denen. Mu lemnag Moses nib sug laniyan’ ko tirok Got ban’en e ka ‘baadag ni nge un ngak girdien Got ko gafgow ko bin ni nge falfalan’ nib ngoch nap’an ni be ngongliy e denen.’ (Hebrews 11:24, 25) Demtrug ko be’ ni kab pagal ara ke pillibthir, ma gad ra mel’eg e n’en ni aram rogon nfaanra ri gad ma lemnag fare kan ma gathi tin ni baadag e dowdad.
19. Mang angin ni ra yib ngodad nfaan gad ra lemnag fare kan u gubin ngiyal’?
19 “Ngan lemnag e tin ni baadag e dowef e be yip fan e togopuluw ngak Got,” machane “ngan lemnag fare kan e be yip fan e yafas nge gapas.” (Roma 8:6, 7) Ra nguuda ululgad i lemnag fare kan, ma rayog ni ngari gapas lanin’dad. Ma yira ayuweg gum’ercha’dad nge gelngin e lem rodad ni nge dabi gel e meewar rodad. Ma ra bay rogodad ni ngada togopuluwgad ko tin nra wawliy lanin’dad ni ngada uned ko ngongol nib kireb. Ma ra ayuwegdad Got ni ngada gelgad ko re cham ney u thilin fare dowef nge fare kan ma gathi dowef nib war.
20. Mang fan ni ba mudugil u wan’dad ni gad ra gel ko mahl u thilin fare dowef nge fare kan?
20 Ra nguuda ululgad i lemnag fare kan, ma aram e gad be ayuweg thildad Jehovah ni aram e n’en ni baga’ fan, ya ir e tabolngin e yafas nge kan ni thothup. (Psalm 36:9; 51:11) Satan ni fare Moonyan’ nge piin ni ma ayuweg e yad be rin’ urngin ban’en ni rayog rorad ni ngara kirebnaged thildad Got ni Jehovah. Yad be guy rogon ni ngara gagiyegnaged lanin’dad, ya yad manang ni faan gad ra tal, ma aram e n’en nra pow’iyey ni Got e ra mang toogor rodad ma gad ra yim’. Machane rayog ni ngada gelgad ko cham u thilin fare dowef rodad nge fare kan. Aram e n’en ni buch rok Paul, ya nap’an ni yoloy murung’agen e cham ni ereray e cham ni i un ngay, som’mon i fith ni gaar: “I mini’ e ra chuwegeg u pa’ e re dowef ney ni ir e be fekeg i yan ko yam’?” Ngemu’, i dag ni bayni ayuweg, ma aram i yog ni gaar: “Ke magar Got u daken e Somol rodad i Jesus Kristus!” (Roma 7:21-25) Maku gad ra pining e magar ku Got u daken Kristus ya ke pi’ ngodad e kanawo’ ni ngada gelgad ko meewar ko girdi’ ma gad ra lemnag fare kan nib muun ngay e athap ko yafas ni manemus.—Roma 6:23.
Ka Ga Manang?
• Ngan lemnag fare kan e be yip fan e mang?
• Uw rogon ma rayog ni nge maruwel gelngin Jehovah u fithik’dad?
• Ngam weliy ko mang fan ni, baga’fan ni ngada filed e Bible, ma ngada folgad ko motochiyel rok Jehovah, nge ngada meybilgad ngak ko ngiyal’ ni gad be cham ko denen.
• Uw rogon ni yira nameg e tirok Got ma ra ayuwegdad ni gad ra par ko kanawo’ ko yafas?
[Picture on page 14]
Fol Bible e ra ayuwegdad ni ngada gelgad u nap’an ni yira magawonnag e michan’ rodad
[Picture on page 15]
Ba puluw ni ngan meybil ni nge ayuwegdad Jehovah ni ngada gelgad ko lem nib kireb
[Pictures on page 16]
Ngan nameg e tin ni tirok Got e ra ayuwegdad ni ngada lemnaged fare kan u gubin ngiyal’