Abraham​—e Ir Be’ ni Ma T’ufegey

Kari kireban’ Abraham ya ke yim’ Sarah ni leengin nrib t’uf rok. Boor ban’en u murung’agen Sarah ni yib ngan’ u nap’an ni be k’eyag. Bochan ni kari kireban’, ma aram me yor. (Genesis 23:1, 2) Re n’em ni ke yor e gathi be dag ni ke meewar laniyan’, ya be dag ban’en ni bay rok nrib fel’ ni aram e t’ufeg.

MANG E T’UFEG? T’ufeg e aram ban’en ni gad ma thamiy u nap’an ni kari fel’ thildad be’. Be’ ni ma t’ufeg e girdi’ e ma m’ug ko ngongol rok rogon ni ma lemnag e piin ni yad ba t’uf rok ni mus ni faanra thingari pag fan ni fan ngorad.

UW ROGON NI DAG ABRAHAM E T’UFEG? Ke dag Abraham ni ma t’ufeg e tabinaw rok. Dariy e maruwar riy ni ir be’ ni boor pa’ u puluwon. Machane, gubin ngiyal’ ni ma ayuweg chon e tabinaw rok ko tin nib t’uf rorad nge tirok Got ban’en. Bin riyul’ riy e manang Jehovah ni Abraham e ir be’ ni ma ayuweg chon e tabinaw rok ni ngar liyorgad ngak Got. (Genesis 18:19) Maku reb e ki weliy Jehovah murung’agen e t’ufeg rok Abraham. Ma nap’an ni be non ngak me yog ni Isak e ‘ba t’uf rok’ Abraham.​—Genesis 22:2.

Rayog ni ngad nanged gelngin e t’ufeg rok Abraham ngak Sarah ni leengin, ya yornag u nap’an ni yim’. Yugu aram rogon nib gel, ma ir reb e pumoon, ma de rus ni nge dag ni ke kireban’. Ke dag Abraham ni ir be’ nib gel mab sumunguy.

Ke dag Abraham nib t’uf Got rok. Pi n’en ni i rin’ u nap’an ni kab fas e i m’ug e re t’ufeg ney riy. Ni uw rogon? Sana ra yib ngan’dad e n’en ni be yog e Bible ko 1 John 5:3 ni gaar: “Baaray fan ni nge t’uf Got rodad: fan e ngad folgad ko tin ni ke yog ni ngad rin’ed.” Be m’ug ko pi thin ney ni Abraham e rib fel’ rogon ni ke dag e t’ufeg rok ngak Got.

Boor yay nnap’an nra pi’ Jehovah reb e motochiyel ngak Abraham, ma ma gur nge fol riy. (Genesis 12:4; 17:22, 23; 21:12-14; 22:1-3) Demtrug ko ba mo’maw’ fa danga’, fa de nang ko mang fan ni ka nog ngak ni nge rin’, machane ma fol ya gathi aram e n’en nib ga’ fan u wan’. Faanra bay ban’en ni baadag Got ni nge rin’, ma ra rin’, ya ma sap ngay ni aram boch e kanawo’ nrayog ni nge dag ngak Jehovah nib t’uf rok.

MANG E GAD RA FIL RIY? Rayog ni ngad folwokgad rok Abraham ngaud t’ufeged e girdi’ nib ga’ ni chon e tabinaw rodad. De fel’ ni ngad paged boch ban’en ni nge magawonnagdad ma gad par ndakuriy e tayim rodad ni fan ngak e piin nib t’uf rodad.

Susun ni ngkud maruweliyed e t’ufeg rodad ngak Jehovah. T’ufeg ni aray rogon e rayog ni nge ayuwegdad ngad rin’ed e tin nib fel’. Bod nrayog ni nge k’aringdad ngad thilyeged rogon e lem rodad, nge thin rodad, nge ngongol rodad ya nge yog nda fel’gad u wan’ Got.​—1 Peter 1:14-16.

Gathi gubin ngiyal’ nib mom ni ngad folgad ko pi motochiyel rok Jehovah. Machane, rayog ni nge pagan’dad nra ayuwegdad Faen ni ayuweg Abraham me yog ni ir e ‘fager rok.’ (Isaiah 41:8) Ke micheg e Bible ni gaar: ‘Bayi . . . gelnagmed me ta’med nga daken e def nib mudugil.’ (1 Peter 5:10) Re n’ey e rra pi’ e athamgil nga lanin’dad!

[Kahol ko page 10]

Ra Yor Be’ nib Pumoon ma Aram e Ba Meewar, Fa?

Boor e girdi’ ni yad ma yog ni arrogon. Sana yad ra gin ni faan yad ra nang ni Abraham e ir bagayad fapi pumoon ni be yog e Bible nra yorgad u nap’an ni ke kireban’rad. Boch ko pi pumoon ney e aram Josef, nge David, nge apostal Peter, nge piin piilal ko ulung nu Efesus, nge Jesus. (Genesis 50:1; 2 Samuel 18:33; Luke 22:61, 62; John 11:35; Acts 20:36-38) Ere, ba tamilang nder yog e Bible nra yor be’ nib pumoon ma aram e ba meewar.