Manang Jehovah Rogon ni Nge Ayuweg e Girdi’ Rok

“Somol e manang rogon ni nge ayuweg e piin ni yad ma fol rok ko gafgow ni ma yib ngorad.”​—2 PET. 2:9.

MANG FAN NRAYOG NI NGE PAGAN’DAD:

Ni manang Jehovah ngal’an nra buch boch ban’en ni fan e nge lebug e tin nib m’agan’ ngay?

Nib m’agan’ Jehovah ngay ni nge fanay gelngin ni nge ayuweg e girdi’ rok?

Ni ri manang Jehovah e pi n’en nra buch u nap’an fare gafgow nib ga’?

1. Uw rogon e fayleng u nap’an nra yib fare “gafgow” nib ga’?

YIRA tabab i gothey e fayleng rok Satan nrib tomgin. (1 Thess. 5:2, 3) Nap’an nra yib fare “gafgow” nib ga’ ma ra gel e wagey u fayleng. (Zef. 1:14-17) Ra gel e magawon nge mochuch ma aram fan ni be yog e Bible nri “kab mal’af ni kab gel e gafgow riy nga reb e gafgow ni kaa yib, ni ka nap’an ni sum e fayleng nge mada’ ko bin daba’ e rran.”​—Mu beeg e Matthew 24:21, 22.

2, 3. (a) Mang e ra mada’nag e girdi’ rok Got u nap’an nra yib fare “gafgow” nib ga’? (b) Mang e ra ayuwegdad ni nge gel e pagan’ rodad ngak Jehovah?

² I yiiynag Ezekiel e yay ni tomur ni yira cham ngak e girdi’ rok Got u nap’an ni ke chugur ni nge m’ay fare gafgow nib ga’. Ireray e cham nra tay ‘Gog nu Magog.’ Ngiyal’ nem ma “barba’ i salthaw ni ba gel gelngin” e ra yib ngar chamgad ngorad ni “bod bang i nifeng nib gel ni be th’ab daken fare nam.” (Ezek. 38:2, 14-16) Dariy ba ulung i girdi’ nra yib ni nge ayuweg e girdi’ rok Jehovah. Kemus ni Got e rayog ni nge ayuwegrad. Mang e yad ra rin’ u nap’an nra yib e toogor rorad ni ngar thanged e pogofan rorad?

³ Faanra gur reb e tapigpig rok Jehovah, mab mich u wan’um ni rayog rok Jehovah, mab m’agan’ ngay ni nge ayuweg e girdi’ rok ngar mageygad nib fas u nap’an fare gafgow nib ga’? I yol apostal Peter ni gaar: “Somol e manang rogon ni nge ayuweg e piin ni yad ma fol rok ko gafgow ni ma yib ngorad, nge rogon ni nge tay e piin nib kireb u tan e gechig rok nge yan i mada’ ko Chirofen ni bayi pufthinnagrad Got.” (2 Pet. 2:9) Faanra ngad fal’eged i lemnag rogon ni ayuweg Jehovah e girdi’ rok kakrom ma rayog ni ngari mich u wan’dad ni ku ra ayuwegdad boch nga m’on. Gad ra weliy dalip ban’en nra gelnag e pagan’ rodad ngak Jehovah ni bay gelngin ni nge ayuweg e girdi’ rok.

KE MAGEY NIB FAS U NAP’AN NNI THAREY E FAYLENG KO RAN

4. Mang e thingar ni rin’ u m’on ni nge yib fare Ran ni nge tharey e fayleng?

⁴ Som’on, ngam lemnag murung’agen e n’en ni buch u nap’an Noah. Immoy boch ban’en nib t’uf ni ngan rin’ u m’on ni nge yib fare Ran i tharey e fayleng. Ba t’uf ni ngan fal’eg ba arke nib ga’ ni ngan tay e pi gamanman nga langgin. Thin ni bay ko Genesis e de yog ni ke sonnag Jehovah fare arke ni nge m’ay, fini dugliy ko wuin e ra yib fare Ran nge tharey e fayleng. Rayog rok Jehovah ni nge mel’eg reb e rran ni nge yib fare Ran nge tharey e fayleng ndabi magafan’ ko rayog ni ngan mu’nag fare arke e ngiyal’ nem fa danga’. Bin riyul’ riy e ke n’uw nap’an ni ke dugliy Got e ngiyal’ nra yib fare Ran nge tharey e fayleng u m’on ni nge yog ngak Noah ni nge toy fare arke. Uw rogon ni ngad nanged ni riyul’ ni aram rogon?

5. Mang e ke yog Jehovah nrogon ni bay ko Genesis 6:3, ma mingiyal’ e yog e re thin nem?

⁵ Be yog e Bible ni turguy Jehovah e n’en ni ngan rin’, me weliy ngan nang u tharmiy. Rogon ni bay ko Genesis 6:3 e gaar: “Dab gu tay e girdi’ ngar pired ni yad ba fos ndariy n’umngin nap’an, ya dowrad e ra yim’. Chiney i yan nga m’on e dab kur pired ni yad ba fos nge pag 120 e duw yangarrad.” De weliy Jehovah murung’agen n’umngin nap’an e yafas rok yooren e girdi’. Ke weliy Jehovah murung’agen ba ngiyal’ ni ra m’ay e tin nib kireb u fayleng.a (Mu guy e footnote) Fare Ran ni ba ga’ e tabab ni nge tharey e fayleng ko duw ni 2370 u m’on ni yib Kristus, ere rayog ni nga dogned ni ke yog Got e re n’em ko duw ni 2490 u m’on ni yib Kristus. Ngiyal’ nem ma ke gaman 480 e duw rok Noah. (Gen. 7:6) Sogonap’an 20 e duw nga tomuren ni ke yog Got e re n’em ko duw ni 2470 me fakay Noah e bitir nib pagal. (Gen. 5:32) Sogonap’an 100 e duw ni ka bay mfini yib fare Ran ni ba ga’ machane dawori yog Jehovah ngak Noah e n’en ni nge rin’ nib ga’ fan ni aram e nge ayuweg e yafas ko girdi’. Uw n’umngin nap’an mfini yog Got ngak Noah e n’en nra rin’?

6. Mingiyal’ e yog Jehovah ngak Noah ni nge toy fare arke?

⁶ Ba tamilang ni bokum e duw ni i son Jehovah, mfini yog ngak Noah e n’en ni nge rin’. Mang fan ni rayog ni nga dogned ni aram rogon? Thin nu Bible e be weliy ni ngiyal’ nem ni ke yog Jehovah ngak Noah ni nge toy fare arke ma goo ke un pifak ko mabgol. Me yog Jehovah ngak ni gaar: “Bay gu ngongliy reb e m’ag u thildow. Ngam man nga lan e re barkow nem ni gimew leengim, nge pi fakmew ni pumoon, nge pi leengirad.” (Gen. 6:9-18) Ere dabisiy ni ka nog ngak Noah ni nge toy fare arke ni kemus ni 40 ara 50 e duw u m’on ni nge yib fare Ran i tharey e fayleng.

7. (a) Uw rogon ni dag Noah nge chon e tabinaw rok e michan’ rorad? (b) Mingiyal’ mfini yog Jehovah ngak Noah nra yib e Ran i tharey e fayleng?

⁷ Nap’an ni toy Noah nge chon e tabinaw rok fare arke ma sana kar lemnaged rogon nra yibnag Got fare Ran ni nge tharey e fayleng nge ngiyal’ nra yib. Machane yugu aram rogon ni dar nanged e pi n’ey, ma kar ululgad i rin’ e maruwel rorad ya kari mich e thin ni ke yog Got ngorad. Be gaar e Bible: “Me rin’ Noah urngin e tin ni yog Got ngak ni nge rin’.” (Gen. 6:22) Ma aram e ke yog Jehovah ngak Noah nra yib fare Ran nge tharey e fayleng u tomuren 7 e rran. Ere ka bay e tayim rok Noah nge chon e tabinaw rok ni ngar kunuyed e pi gamanman nga taabang nga ranod nga lan fare arke. Ere nap’an ni tabab ni nge aw e n’uw ma ke “gaman 600 e duw yangaren Noah, ko chirofen ni ragag nge medlip fen e pul ko bin l’agruw e pul” ma kan mu’ i fal’eg urngin ban’en.​—Gen. 7:1-5, 11.

8. Uw rogon ma fare thin nu Bible ni be weliy murung’agen fare Ran ni tharey e fayleng e ra gelnag e pagan’ rodad ngak Jehovah ni manang rogon ni nge ayuweg e girdi’ rok?

⁸ Thin nu Bible ni be weliy murung’agen fare Ran ni tharey e fayleng e be micheg ni gubin ngiyal’ ni manang Jehovah ngal’an nge kanawoen nib fel’ ni nge ayuweg e girdi’ rok. Nap’an ni gad be chugur nga tomuren e re m’ag ney ma rayog ni ngad guyed ni urngin e tin nib m’agan’ Jehovah ngay e ra riyul’ ko “re rran nem nge re awa nem” ni ke dugliy.​—Matt. 24:36; mu beeg e Habakkuk 2:3.

KAN AYUWEGRAD U NAP’AN NI YAD BAY KO RED SEA

9, 10. Uw rogon ni fanay Jehovah e girdi’ ni ngar manged wup ngak e pi salthaw nu Eygpt?

⁹ N’en ni buch u nap’an fare Ran ni tharey e fayleng e be fil ngodad ni manang Jehovah ni nge gagiyegnag nge buch boch ban’en u ngal’an nib puluw ya nge yog ni nge lebguy e tin nib m’agan’ ngay. Bin migid ni gad ra weliy e be dag nrayog ni nge pagan’dad ngak Jehovah ni nga fanay gelngin nib gel ni nge ayuweg e girdi’ rok ma ra guy rogon ni nge lebguy e tin nib m’agan’ ngay. Rib mudugil nrayog ni nge ayuweg Jehovah e girdi’ rok, aram fan ni yu ngiyal’ e ma fanayrad ngar manged wal ko pi toogor rok. Aram rogon e n’en ni rin’ u nap’an ni ke chuweg piyu Israel u Egypt.

¹⁰ Piyu Israel ni kar chuwgad u Egypt e sogonap’an 3 e milyon urngirad. Ke fanay Jehovah Moses ni nge pow’iyrad nga ranod u reb e kanawo’ ni nge lemnag Farao ni kar maloggad. (Mu beeg e Exodus 14:1-4.) Ere ke pow’iy Farao e pi salthaw rok ni ngan lol’ograd, ma fare Red sea e ra mang wup ngorad. Ma gowa dabkiyog ni ngar milgad rok e pi salthaw nem. (Ex. 14:5-10) Machane dariy ban’en nra buch rok piyu Israel u rom. Mang fan? Ya ra ayuwegrad Jehovah.

11, 12. (a) Uw rogon ni ke ayuweg Jehovah e girdi’ rok? Mang angin ni ke yib ngorad? (b) Mang e be fil e re n’ey ngodad u murung’agen Jehovah?

¹¹ “Fare gi manileng nib k’iy” ni i pow’iy piyu Israel e ke yan i par nge tomur rorad ya nge dabiyog ni nge chugur e pi salthaw nu Egypt ngorad. Bochan e re n’em me par e pi salthaw nu Egypt u fithik’ e lumor, machane ki pi’ e tamilang ngak piyu Israel ngki mada’ ko ngiyal’ ni ke nep’. (Mu beeg e Exodus 14:19, 20.) Ke fanay Jehovah e nifeng ni nge ruraba’nag fare day me m’ug e but’ ni ke milik. Gad manang nib n’uw nap’an e re n’em ni buch, ya be yog e Bible ni gaar: “Me yan piyu Israel u lan fa gi day nib n’uw nap’an ni yad be yan u daken e but’ ni ke melik’.” Ke yan piyu Israel nib sagaal, machane dabiyog rok e pi salthaw rok Farao ni ngar tawgad ko gin ni yad bay riy ya immoy Jehovah rorad ni be ayuwegrad. “Me gagiyegnagrad ngar rusgad ndaki taareb lungurad. I taleg e tayapyap ko karrow rorad nguu ranod nrib mo’maw’.”​—Ex. 14:21-25, NW.

¹² Nap’an ni ke taw piyu Israel nga barba’ fare day me yog Jehovah ngak Moses ni gaar: “Mk’iyag paam nga daken e day, me sul e day nga taabang nge tharey e girdi’ nu Egypt nge pi karrow rorad nge piin ni yad be yannag.” Nap’an ni ke guy fapi salthaw rogon ni ngar milgad ko fare ran ni be yib ngorad “mi yad chuw nga fithik’, yi pag Somol e day nge thareyrad.” Ere “dariy taa bagayad ni magey.” (Ex. 14:26-28) Ere ke dag Jehovah ni bay gelngin ni nge ayuweg e girdi’ rok ni demtrug e gafgow ni ke yib ngorad.

KAR THAYGAD U NAP’AN NI KAN GOTHEY YU JERUSALEM

13. Mang e ke yog Jesus ngak pi gachalpen, ma susun mang e ke yib ngan’rad?

¹³ Ri manang Jehovah e n’en nra buch ya nge yog ni lebug e n’en nib m’agan’ ngay. Ke tamilang nib ga’ fan e re n’ey ko bin dalip ban’en ni gad ra weliy u murung’agen e ngiyal’ ni yib e pi salthaw nu Roma ni ngar chamgad ngak yu Jerusalem. Ke fanay Jehovah Jesus ni nge weliy ngak e pi Kristiano ni yad ma par u Jerusalem nge Judea ni yira gothey yu Jerusalem ko duw ni 70 u tomuren Jesus. I yog ni gaar: “Bay mu guyed e N’en ni Th’abi Dabuy ni ke sak’iy u lan fa gin’en nib thothup, ni ir e faani weliy Daniel ni profet murung’agen. . . . Ma piin ni yad bay u Judea e thingar ra milgad nga daken e burey.” (Matt. 24:15, 16) Machane uw rogon ni ke nang pi gachalpen Jesus e ngiyal’ nra lebug e re yiiy ney?

14. Mang e pi n’en ni buch ni ke ayuweg ni nge tamilang fan e n’en ni yog Jesus?

¹⁴ Ke tamilang fan e n’en ni yog Jesus u tomuren ni ke yan boor e duw. U lan fare duw ni 66 u tomuren Kristus, ma pi salthaw nu Roma ni Cestius Gallus e ga’ rorad e kar bad nga Jerusalem ni ngar taleged ba ulung i girdi’ ni Jew ni ka nog e Zealots ngorad ko togopuluw ni yad be tay ngorad. Ma nap’an ni kar mithgad u lan fare tempel, me tabab e pi salthaw nu Roma ni ngar kirebnaged fare yoror ko re tempel nem. Ma piin Kristiano ni ke yib ngan’rad e n’en ni ke yog Jesus Kristus ngorad, e kar nanged fan ni buch e pi n’em. Kar nanged ni nap’an ni yib e pi salthaw nu Roma ni yad be fek e flak rorad ni ngar ted nga lan fare tempel nu Jerusalem ma aram e ke lebug e yiiy rok Jesus u murung’agen e “N’en ni Th’abi Dabuy” ni ke taw ko fare yoror ko tempel (“gin’en nib thothup”). Ma aram e ngiyal’ ni mil pi gachalpen Jesus “nga daken e burey.” Machane uw rogon ni ngar chuwgad u rom, u nap’an ni ke longobiy e pi toogor rorad e re mach nem? Bayi buch boch ban’en ndan lemnag.

15, 16. (a) Mang e ke tamilangnag Jesus ngak pi gachalpen? Ma mang fan ni rib ga’ fan ni ngar folgad riy? (b) Mang e thingar da rin’ed nge yog ni ngad mageygad ni gad ba fas?

¹⁵ Cestius Gallus nge pi salthaw rok e kar chuwgad u Jerusalem mar sulod ko binaw rorad. Fare ulung ni ka nog e Zealots ngorad e kar lol’oged yad. Ma ngiyal’ nem ni ke chuw e pi salthaw nu Roma nge piyu Jew ni ur togopuluwgad ngorad ma re n’ey e ke bing e kanawo’ ngak pi gachalpen Jesus ni ngar milgad. Ba tamilang e n’en ni yog Jesus ngorad ni ngar chuwgad ko re mach nem nib papey, ma dariy ban’en ni ngar feked. (Mu beeg e Matthew 24:17, 18.) Rib ga’ fan ni ngar folgad ko fare thin ni yog Jesus ni ngar chuwgad nib papey. Mang fan? Ya bochan nde n’uw nap’an ma fare ulung ni ka nog e Zealots ngorad e kar sulod nga Jerusalem, ma kar towasariyed e girdi’ u rom nge girdi’ nu Judea ni ngar uned ngorad ko togopuluw. Ma aram me sum boch e ulung ko girdi’ ni Jew ni kar chamgad ngorad ma ke gel e magawon u lan e re mach nem ma ke mo’maw’ ni ngan chuw u rom. Ma nap’an ni ke sul e pi salthaw nu Roma ko duw ni 70 ma aram e dabkiyog ni nge chuw e girdi’ u rom ya bod ni kar awgad ko wup. (Luke 19:43) Machane piin Kristiano ni kar folgad ko thin ni ke yog Jesus, e ka ranod nga daken e burey kar ayuweged e yafas rorad. Ma kar guyed ni manang Jehovah rogon ni nge ayuweg e girdi’ rok. Ere mang e gad ra fil ko re n’ey?

¹⁶ Nap’an nra yib fare gafgow nib ga’, mab t’uf ni nge fol e pi Kristiano ko thin rok Got nge ulung rok. Ni bod ni ke yog Jesus ngak pi gachalpen ni ngar “milgad nga daken e burey.” Ma ku arrogodad ni nga nog ngodad ni ngad “milgad” u nap’an nra yib fare gafgow nib ga’. Machane uw rogon ni ngad rin’ed e re n’ey? Dawor da nanged e chiney.b (Mu guy e footnote) Machane gad manang nra yog Jehovah fan e re thin ney u ngal’an nib puluw. Rayog ni ngad mageygad nib fas ni kemus ni faanra ngad folgad ko thin nra yog ngodad e ngiyal’ nem. Ere nge bagadad ma thingari fith ir, ni nge gaar: Gu ma fol ko thin ni be yog Jehovah ngak e girdi’ rok e ngiyal’ ney? Gu ma gur ni nggu fol riy, fa danga’?

KAN GELNAG E MICHAN’ RODAD NI FAN KO PI N’EN NI BAY NGA M’ON

17. Mang e gad ra fil ko pi yiiy rok Habakkuk u murung’agen e cham nra tay Gog ngak e girdi’ rok Got?

¹⁷ Chiney e gad ra weliy murung’agen e cham nra tay Gog, ni faan kad weliyed ko som’on. Bod rogon Ezekiel, ma Habakkuk ni profet e weliy murung’agen e n’en nra buch e ngiyal’ n’ey ni gaar: “Gu rung’ag e pi n’ey ni gubin, mu gu t’on; me da’da’ dap’i l’ugunag ko marus. Me m’ay gelngin dowag, me tun ayig. Bay gu sonnag u fithik’ e gum’an’ e ngiyal’ ni bay taw ngay me gechignag Got e piin ni kar mahlgad ngomad.” (Hab. 3:16) Nap’an ni ke rung’ag Habakkuk murung’agen e pi toogor ni yad be yib ni ngar chamgad ngak e girdi’ rok, me t’on ko marus, me da’da’ dap’i l’ugun, me m’ay gelngin downgin. Machane ba m’agan’ ngay ni nge sonnag fare rran rok Jehovah u “fithik’ e gum’an’.” Nap’an nra yib Gog nge piin ni yad muun ngak ma ku rayog ni ngad rusgad, machane rayog ni ngad boded Habakkuk ni ke pagan’ ngak Jehovah nra ayuweg e girdi’ rok.​—Hab. 3:18, 19.

18. (a) Mang fan ni thingar dab da rusgad u nap’an nra yib e pi toogor rodad ni ngar chamgad ngodad? (b) Mang e gad ra weliy ko bin migid e article?

¹⁸ Fa dalip i ban’en ni kaad weliyed e be micheg nri manang Jehovah rogon ni nge ayuweg e girdi’ rok. Ra lebug e tin nib m’agan’ ngay, ma ra gel ngak e pi toogor rok. Faanra gad baadag ni ngad uned ko gel nra tay Jehovah ma thingar da pared ni gadad ba yul’yul’ ngak nge yan i mada’ ko tomur. Uw rogon ni nge ayuwegdad Jehovah nge yog ni ngad pared nib yul’yul’ ngak e ngiyal’ n’ey? Gad ra weliy e re n’ey ko bin migid e article.

[Footnotes]