Mang Fan ni Faen ni Ma Rung’ag e Meybil e Ke Pag e Gafgow?

YUGU aram rogon ni ma meybil e girdi’, machane boch i yad e be maruwaran’rad ko bay Got fa dariy. Mang fan? Sana bochan ni yad be guy nri boor e gafgow ko re fayleng ney. Gur, kaam lemnag ko mang fan ni ke pag Got e gafgow?

Gur, ke sunmiy Got e girdi’ ndar flontgad ma ma yib e gafgow ngorad? Mo’maw’ ni ngad ted fan e got ni baadag ni nge gafgownag e girdi’. Machane mu lemnag e re n’ey: Nap’an ni ga be liyeg reb e karrow nib beech ma kam guy ni bay e kireb riy u ba’ nem, ga ra lemnag ni faen ni ke ngongliy fare karrow ni aram rogon ni bay thibngin? Danga’. Ga ra lemnag ni ke fal’eg fare karrow ni “dariy thibngin” machane bay be’ ara ban’en ni ke kirebnag.

Ere nap’an ni ga be guy e re fayleng ney nrib yaram ma rib fel’ rogon ni kan ngongliy, machane kam guy e wagey nge sasalap ni be k’aring e gafgow ngak e girdi’, ma mang e ga ra lemnag? Be yog e Bible ni ke sunmiy Got fa gal som’on e girdi’ ni yow ba flont machane munmun ma kar rin’ew ban’en ni ke k’aring ni nge yib e gafgow ngorow. (Deuteronomy 32:4, 5) Machane ke micheg Got nra chuweg e magawon me ayuweg e girdi’ ngar flontgad bayay. Machane, mang fan ni kaygi n’uw nap’an nde rin’ e n’en ni ke micheg?

Mang Fan ni Kaygi N’uw Nap’an?

Fulweg riy e bay rogon ko mini’ e susun ni nge gagiyegnag e girdi’. De sunmiy Jehovah e girdi’ ni yad e ngar gagiyegniged yad. Susun ni ir e Pilung rorad. Be yog e Bible ni gaar: “Dariy bagamad ni ir e ga’ ko gin nge sor e yafos rok ngay; dariy be’ ni bay gafan e yafos rok u pa’.” (Jeremiah 10:23, BT) Machane, fa gal som’on e girdi’ e kar togopuluwgow ko gagiyeg rok Got. Bochan e n’en kar rin’ew ma kar denengow. (1 John 3:4) Ma wenegan riy, e ke mul u pa’row e yafas rorow nib flont nge pi fakrow.

U lan bokum biyu’ e duw, ma ke pag Jehovah e girdi’ ni ngar gagiyegniged yad, ma be m’ug riy ndabiyog rorad ni ngar gagiyegniged yad. Ba tamilang ni urngin e am ko girdi’ e ke k’aring ni nge yib e gafgow ngak e girdi’. Dariy bagayad ni ke yog rok ni nge chuweg e mahl, nge oloboch, nge ngongol nde mat’aw, ara m’ar.

Uw Rogon ni Nge Chuweg Got e Magawon?

Be micheg e Bible ndab ki n’uw nap’an ma ra sunmiy Got e bin nib beech e fayleng mab mat’aw. (2 Peter 3:13) Ma piin ni kar fanayed e puf rogon ni kan pi’ ngorad ni ngaur t’ufeged yad nge Got e rayog ni ngar pared u lan fa bin nib beech e fayleng.​—Deuteronomy 30:15, 16, 19, 20.

Maku be yog e Bible ni “chirofen ni bay ni pufthinnag e girdi’” ma ra chuweg Got e gafgow, nge piin ni yad be k’aring e gafgow. Ma ke chuchugur ni nge buch e re n’ey. (2 Peter 3:7) Tomur riy, ma Jesus Kristus ni ir e ke dugliy Got ni nge mang Pilung, e ra gagiyegnag e girdi’ ni yad ma fol rok Got. (Daniel 7:13, 14) Mang angin nra yib riy? Be gaar e Bible: “Piin ni yad mmunguy e bay ra pired u daken e nam u fithik’ e gapas, mu ur pired u fithik’ e gapas ni yad ba felfelan’.”​—Psalm 37:11.

Jesus ni Pilung u tharmiy e ra chuweg e magawon ni bod e m’ar, nge pilibthir, nge yam’. Ke sum e pi magawon ney u nap’an ni ke togopuluw e girdi’ ngak Jehovah, ni ir “enggin gubin e yafos.” (Psalm 36:9, BT) Ra golnag Jesus urngin e girdi’ ni kar adaged ni ngar pared u tan e gagiyeg rok. Urngin e pi n’ey ni be micheg e Bible e ra lebug u tan e gagiyeg rok:

◼ “Dariy be’ ni be par u lan e nam rodad ni bay ki yog nib m’ar, ma denen e ke m’ay i n’ag fan ni urngin.”​—Isaiah 33:24.

◼ “Ma bayi n’ag [Got] urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith. Ya tin kakrom ban’en e ke chuw.”​—Revelation 21:4.

Riyul’ nra fal’eg lanin’dad ni kad nanged ndab ki n’uw nap’an ma ra lebguy Got e n’en ni ke micheg ni aram e nge chuweg urngin e gafgow. Chiney e ba t’uf ni nge pagedan’dad nra fulweg Got taban e meybil rodad ni yugu aram rogon ni ke pag ni nge yib e gafgow ngodad e ngiyal’ ney.

Riyul’ ni bay Got. Ma ra rung’ag e meybil rom ma manang e amith nge kireban’ ni ga ma tay. Ma ri baadag ni nge guyem ni ga bay ko ngiyal’ nem ni urngin e magawon rom nge amith e ke chuw.