KENGGIN E RE KE BABYOR NEY | BA GA’ FAM U WAN’ GOT, FA?
Ma Lemnagem Got, Fa?
“I gag e gub meewar ndabiyog ni gu ayuwegneg, machane gur SOMOL e ga be lemnigeg.”—Psalm 40:17; DAVID NI BE’ NU ISRAEL, KO BIN 11 E CHIBOG B.C.E.
“Pi nam e yad bod ba waangachal u lan ba pakit.”—ISAIAH 40:15
Gur, ba puluw ni nge lemnag David ni ma lemnag Got? Ma gur, ma lemnagem Got, fa? Boor e girdi’ e ba mo’maw’ ni nge mich u wan’rad ni ma lemnagrad Got ni gubin ma rayog rok. Mang fan?
Reb i fan e bochan ni Got e ir be’ nib tolang ko girdi’. Bochan e re n’ey, ma pi nam e yad bod e “waangachal u lan ba pakit u p’eowchen; ma yad bod ba ab u daken e thabthabel.” (Isaiah 40:15) Reb e tayol nde mudugil laniyan’ e yog ni ba “tolang e lem ku be’ ni faanra lemnag ni bay ba Got ni ma lemnag e pi n’en ni ma rin’.”
Ku bay boch e girdi’ ni yad ma lemnag ni bochan e ngongol ni ur rin’ed ma aram fan ndabun Got ni nge lemnag rarogorad. Bod ni yog reb e pumoon ni Jim fithingan ni gaar: “Gubin ngiyal’ ni gu ma meybil ni nge gapas lanin’ug miki yag ni nggu t’ar lanin’ug, machane ku ma yib e damumuw ngog. Ere, kug lemnag ni gag be’ nrib gel e kireb rog, ma dabiyog ni nge ayuwegneg Got.”
Gur, Got e be’ nib mal’af ko girdi’ nga orel, ma aram fan nder yag ni nge tiyan’ ngodad? Uw rogon e girdi’ nde flont u wan’? Faanra dabi tamilangnag Got murung’agen ko girdi’, ma dabiyog ni ngan nang e pi n’en ni bay u laniyan’, maku dabiyog ni ngan nang e fulweg ko gal deer ney. Machane, thin rok ni bay u Bible e be tamilangnag ni Got e de mal’af ko girdi’, ma ma lemnag e tin nib t’uf rorad. “Bin riyul’ riy,” e be yog e Bible ni “dariy bagadad nib mal’af Got rok nga orel.” (Acts 17:27) U lan e tin migid e article e gad ra weliy riy feni ga’ fan e girdi’ u wan’ Got nge rogon ni ke dag nib ga’ fam u wan’.