“Kab Gel E Tayan’ Ni Ngada Ted Ngay”

“Aram fan nthingar da chichiiyed pa’dad ko fapi thin nib riyul’ ni kad rung’aged, nge siy da man’gad riy nga orel.”​—HEBREWS 2:1.

1. Mu weliy rogon nrayog ni nge maad’ad be’ ni bochan e de tayan’.

GUBIN e duw ma ma yim’ gonapan 37,000 e girdi’ u Meriken ni bochan e maadad u karro. Piin ni manang morngaagen e ma yog ni rayog ni nge siy e maad’ad u karro ni faan manga yira tayan’ ko yan u kanawo’. Boch e girdi’ ni be kol yap e karro e dar tedan’rad ni bochan e yad be bieg e sign ara yad be telephone. Ma bay boch e girdi’ ni yad be abich ni yad be kol yap e karro. Pi girdi’ ney ni dar tedan’rad e rayog ni ngar m’ad ara maad’adgad ni bochan.

2, 3. Mang e fonow rok Paul ngak e pi Kristiano ni yad e Hebrew, ma mang fan nib puluw e fonow rok?

² Gonapan 2,000 e duw u m’on ni kan ngongliy e karro e ke weliy apostal Paul ngak e pi Kristiano ni yad e Hebrew morngaagen e girdi’ ni dar tedan’rad ma bay e riya’ riy. I weliy Paul ni ke fas Jesus Kristus ko yam’ min pi’ ba liw ngak ni kab tolang ngak fapi engel, ya be par u ba’ ni mat’aw rok Got. Ma aram me yog fare apostal ni gaar: “Aram fan ni kab gel e tayan’ ni ngad ted ko fapi thin nriyul’ ni kad rung’aged, nge siy da man’gad riy nga orel.”​—Hebrews 2:1.

³ Mang fan nthingari tayan’ e pi Kristiano ni yad e Hebrew “ni kab gel e tayan’ ni ngar ted ko fapi thin nriyul’ ni kar rung’aged” u morngaagen Jesus? Arrogon ya ke gaman gonapan 30 e duw ni ke yim’ Jesus. Ma bochan ni de moy e Masta rorad ma ke tabab ni nge man’ boch fapi Kristiano ni yad e Hebrew nga orel ko fare michan’ nriyul’. Ke sor owcherad ko Judaism ni aram e teliw rorad kafram.

Kab Gel E Tayan’ Ni Thingara Ted Ngay

4. Sana mang fan ni nge adag boch e pi Kristiano ni yad e Hebrew ni ngar sulod ko teliw ni Judaism?

⁴ Mang fan ni kan waliy boch e Kristiano ni ngar sulod ko teliw ni Judaism? Reb i fan e rayog ni ngan guy nga owchey fapi n’en ni yima rin’ u tan fare Motochiyel rok Moses. Rayog ni ngan guy fapi prist, maku rayog ni ngan faray bon fapi maligach ni yibe urfeg. Mab thil e liyor ni ma tay e pi Kristiano. Bay e Prist nib Tolang rok e pi Kristiano, ni ir Jesus Kristus, machane gonapan guyey e duw ni dan guy u fayleng. (Hebrews 4:14) Ma bay e tempel rok e pi Kristiano, machane gin thothup riy e bay u tharmiy. (Hebrews 9:24) Kan maad’ad ngak piyu Jew nrogon yalen rorad, machane ba thil e pi Kristiano ya “kan maad’ad nga laniyan’, ni fare kan ni thothup rok Got e ke yodoromnag.” (Roma 2:29) Ere aram fan nrayog ni nge maruwaran’ boch e Kristiano ni yad e Hebrew.

5. Uw rogon ni i dag Paul ni kab fel’ fare teliw ni i tababnag Jesus ko bin u tan e Motochiyel?

⁵ Ere thingari tamilang u wan’ e pi Kristiano ni yad e Hebrew ni kab fel’ fare liyor ni ke tababnag Kristus. Re liyor nem e ma par u daken e michan’, ma gathi ban’en nrayog ni ngan guy nga owchey, machane kab tolang ko fare Motochiyel ni ke yib u daken Moses. I gaar Paul: “Rachaen e kaming nge garbaw ni pumoon nge awat rok pi fak e garbaw ni kan urfiy e un wereg nga daken e piin ni yad ba alit u rogon e motochiyel, min beechnagrad ni aram e kan chuweg e kireb rorad, ni kireb rorad u yalen e motochiyel. Ere faanra ereray rogon nib riyul’ e re bugithin ney, me ere ka ba ga’ e tin ni ngongliy rachaen Kristus! Ya fare kan ni thothup ni bay i par ndariy n’umngin nap’an e ayuweg nge pi’ ir ni maligach nib fel’ ngak Got. Rachaen e ir e ra beechnag lanin’dad ko ngongol dariy fan, nge yog nda pigpiggad ngak fare Got ni be par nib fos.” (Hebrews 9:13, 14) Arrogon, michan’uy ko fare maligach rok Jesus Kristus ni ke pi’ ni biyul e rayog ni nge n’ag fan e denen, ma kab fel’ u boor e kanawo’ ko n’ag fan ni ke yog u daken fapi maligach ni un pi’ nrogon e Motochiyel.​—Hebrews 7:26-28.

6, 7. (a) Uw rarogon yu Jerusalem ko ngiyal’ i n’em ni aram fan ni thingari tayan’ e pi Kristiano ni yad e Hebrew ni “kab gel e tayan’ ni ngar ted ko tin ni kar rung’aged”? (b) Nap’an ni yoloy Paul e babyor rok ngak yu Hebrew, ma uw n’umngin nap’an ni ka bay rok yu Jerusalem? (Mu guy e footnote.)

⁶ Ma ku bay yugu reb i fan nthingari tayan’ e pi Kristiano ni yad e Hebrew ko fapi thin u morngaagen Jesus. I yog Jesus u m’on riy ni bay ni gothey Jerusalem. I gaar: “Ya bayi taw nga boch e rran me yib e toogor rom ngar cholngobiyed gur ko yoror ni but’ nge malang, mu ur bad i yib ngom u gubin yang. Ma bay ra kirebniged gur nge girdi’ ni bay u lan e yoror rom; ma dariy taareb e malang ni yad ra pag u tagil’ ni bochan e de pow rom e ngiyal’ ni yib Got riy ni nge thapegnem ngak!”​—Luke 19:43, 44.

⁷ Wuin e ra riyul’ e re thin ney? De tamilangnag Jesus e rorran ara re awa ni ra yib riy. Machane i yog ni gaar: “Faanra mu guyed yu Jerusalem ni ke longobiy yu raba’ i salthaw, ma aram e kam nanged ndab ki n’uw nap’an min kirebnag. Ma aram e piin ni yad bay u lan yu Judea e thingar ra milgad nga daken e burey; ma piin ni yad bay u lan e binaw e thingar ra chuwgad riy, ma piin ni yad bay u wuru’ e binaw e thingar dab ranod nga lan binaw.” (Luke 21:20, 21) U lan fa 30 e duw u tomren ni yog Jesus e re thin nem, ma de tayan’ boch e pi Kristiano u lan yu Jerusalem ma gathi ri baga’ fan e thin rok Jesus u wan’rad. Gowa ke sor owcherad nga bang ni yad be yan u kanawo’. Ma faan manga dab ra yal’uweged rogon lanin’rad ma bay e riya’ riy. Yugu demutrug ko ke mich u wan’rad fa danga’, machane ke chugur e ngiyal’ ni ngan thang Jerusalem!a Ma sana ra od e pi Kristiano u lan yu Jerusalem ni gowa yad be chuchuw ma nge pugrad e thin rok Paul.

“Nge Gel E Tayan’ Ni Ngan Tay” e Ngiyal’ Ney

8. Mang fan ni nge “gel e tayan’” ni ngada ted ko machib ko Thin Rok Got?

⁸ Gad bod e tin somm’on e Kristiano ni “kab gel e tayan’ ni ngad ted ko fapi thin riyul’” ko Thin Rok Got. Mang fan? Ya dabi n’uw nap’an ma gathi taareb e nam ni bay ni thang ya ga’ngin e re m’ag ney. (Revelation 11:18; 16:14, 16) Dada nanged e re rran ara re awa ni ra thang Jehovah e re m’ag ney. (Matthew 24:36) Machane gad be guy nga owchedad ni be lebug e thin ko fapi profet u Bible ni be micheg ni rib tamilang ni gad be par ko “tin tomren e rran.” (2 Timothy 3:1-5) Ere thingar da ayuwgad ni nge dabi sor owchedad nga bang. Thingar da tedan’dad ko Thin Rok Got ma nge ga’ fan u wan’dad e ngiyal’ ni gad be par riy. Gad ra rin’ ma rayog “nga darod u fithik’ urngin e pi n’ey ni bay m’ug ndabi buch ban’en rodad.”​—Luke 21:36.

9, 10. (a) Uw rogon nrayog ni ngada daged ni ri gad be tayan’ ko tirok Got ban’en? (b) Uw rogon ni Thin Rok Got e bod e “magal” ma bod e “tamilang ko kanawo’” rodad?

⁹ Ri baga’ fan e ngiyal’ ni gad ma par riy, ere uw rogon nrayog ni ngada daged ni “kab gel e tayan’ ni gad be tay” ko tirok Got ban’en? Rayog ni ngada rin’ed ni faan gad ra un ko urngin e muulung ko Kristiano, nge pi assembly nge pi convention. Maku thingar da tedan’dad ko fol Bible ni fan ni ngada chugurgad ngak Jehovah ni ir e yoloy e Bible. (James 4:8) Faanra ke yog ngodad e tamilangan’ u morngaagen Jehovah ni bochan e fol babyor rodad nge muulung ni gad ra un ngay, ma aram e gad ra bod e ani yoloy e psalm ni i yog ngak Got ni gaar: “Thin rom e ba magal ni be pow’iyeg, me ir e tamilang ko kanawo’ ni gu be yan riy.”​—Psalm 119:105.

¹⁰ Fare Bible e bod “ba magal ko kanawo’ rodad” ya be tamilangnag e pi n’en nib m’agan’ Got ngay ni bayi rin’. Maku ir e “magal ni fan ko yan rodad.” Ma ayuwegdad e Bible nge tamilangnag e n’en ni thingar da rin’ed ni gad be pithig e pi magawon rodad. Aram fan ni “kab gel e tayan’ ni thingar da ted” u nap’an ni gad un ko muulung ni ngada rung’aged e machib, ara nap’an ni gad ra bieg e Thin Rok Got u tabinaw. Fapi fonow ni gad ra fil e ra ayuwegdad ni ngada turguyed ban’en nrogon ma nge falan’ Jehovah riy. (Proverbs 27:11; Isaiah 48:17) Uw rogon nrayog ni nge gel e tayan’ ni ngad ted u nap’an e muulung ara nap’an ni gad be fol babyor u tabinaw ya nge fel’ rogodad ko machib ni ke pi’ Got ngodad?

Ngki Fel’ Boch E Tayan’ Ni Ngad Ted U Nap’an e Muulung

11. Mang fan nib mo’maw ni ngada tedan’dad u nap’an e muulung ko Kristiano yu ngiyal’?

¹¹ Yu ngiyal’ mab mo’maw’ ni ngada tedan’dad u nap’an e muulung ni Kristiano. Mom ni nge sor lanin’dad nga bang ni bochan e bitir ni be yor ara be’ ni ke sowath ko muulung ni ke yib nga lan tafen e muulung. Ma sana ke yib e magar ngodad ni bochan e maruwel ko rorran nem. Ma sana faanem ni be welthin e gathi rib salap ko welthin, me sor lanin’dad nga bang ara kada molgad! Ri baga’ fan e pi n’en ni yima weliy u nap’an e muulung, ere ffel’ ni ngki fel’ boch e tayan’ ni ngad ted u nap’an e muulung. Uw rogon ni gad ra rin’?

12. Mang e ra ayuwegdad ni ngada tedan’dad u nap’an e muulung?

¹² Ra mom ni ngada tedan’dad u nap’an e muulung ni faanra kada fl’eged rogodad u m’on ko muulung. Ere ngam tay ba ngiyal’ u m’on ko muulung ni ngam lemnag fapi n’en ni yira weliy u nap’an e muulung. Ke mus ni in e min u gubin e rran ni ngam bieg fapi guruy ko Bible ni ngan bieg ko yu wik ma ngan fl’eg I lemnag e pi n’en ni bay riy. Ma faan gad ra yarmiy e tayim rodad ma rayog ni ngada filed e babyor u m’on riy ni fan ko Congregation Book Study nge Watchtower Study. Yugu demutrug rogon ni gad ra yarmiy, ma bay ban’en ni mudugil: Gad ra fl’eg rogodad u m’on ko muulung ma ra ayuwegdad ni ngada tedan’dad ko pi n’en ni yibe weliy u nap’an e muulung.

13. Mang e ra ayuwegdad ni ngada tedan’dad ko tin ni yi be fil u nap’an e muulung?

¹³ Ngan fl’eg rogon u m’on ko muulung, maku boch girdi’ e ma pirieg ni rayog ni ngar tedan’rad ni faan yad ma par nib chugur ngak e ani be welthin u lan e Kingdom Hall. Yad ma sap nga owchen e ani be welthin, mi yad pithig e Bible rorad u nap’an ni yira bieg e Bible, ma yad ma yoloy nga babyor e pi n’en ni yibe weliy. Pi n’en ney e ma ayuwegrad ni nge dabi sor lanin’rad nga bang. Machane, kab ga’ fan ni ngada fl’eged rogon gumercha’dad. Thingari tamilang u wan’dad fan ni gad be muulung u taabang. Gad ma muulung ni fan ni ngada liyorgad ngak Jehovah. (Psalm 26:12; Luke 2:36, 37) Ke yog ngodad e ggan ni machib u nap’an e muulung. (Matthew 24:45-47) Maku rayog ni “nge bagadad ma ngi i ayuweg bagadad ma be dag ngak nib t’uf rok ma be rin’ e tin nib fel’ ngak.”​—Hebrews 10:24, 25.

14. Mang e ra n’igin ni nge fel’ e muulung?

¹⁴ Boch e girdi’ e ma lemnag ni ba fel’ fare muulung ni faanra ba salap e piin ni be welthin u nap’an e muulung. Faanra ba chag e piin ni be welthin ma yima lemnag ni ba fel’ fare muulung. Machane faan manga de salap e piin ni be welthin ma yira yog ni gathi rib fel’ fare muulung. Riyul’ ni thingari athamgil e piin ni ma welthin ni ngar salapgad ko machib ma ngar guyed rogon ni nge taw e thin rorad nga gumerchaey. (1 Timothy 4:16) Machane, gadad e piin ni gad be motoyil ko welthin e thingari dabi gel e gathibthib rodad. Yugu aram rogon ni baga’ fan ni nge salap e piin ni be welthin, gathi goo salap rorad ra n’igin ni nge fel’ e muulung. Dabi siy ni ra taareban’um ngay ni ban’en ni susun e nge ga’ u wan’dad e gathi salap rok e ani be welthin, ya rogon ni gad be tay teldad, fa? Nap’an ni gad ra un ko muulung ma gad tayan’dad ko machib ni yibe weliy, ma aram e gad be liyor ngak Got nrogon nib m’agan’ ngay. Aram e n’en ni ma n’igin ni nge fel’ e muulung. Faanra ri l’agan’dad ni nge yog e tamilangan’ u morngaagen Got ngodad ma rayog felngin e muulung ngodad, ni yugu demutrug fene salap e ani be welthin. (Proverbs 2:1-5) Ere ngada duguliyed lanin’dad ni “nge gel e tayan’ ni ngada ted” u nap’an e muulung.

Nge Fel’ Rogodad Ko Fol Babyor

15. Uw rogon ni ra fel’ rogodad ko fol babyor ma ngada fl’eged i lemnag e pi n’en ni kada filed?

¹⁵ Ri ra fel’ rogodad riy ni faanra “nge gel e tayan’ ni ngada ted” u nap’an ni gad ra fol babyor ma gad fl’eg i lemnag e pi n’en ni kada filed. Faan gad ra bieg e Bible ara babyor rok e Kristiano ma gad fl’eg i lemnag e pi n’en ni kada bieged riy ma ra ayuwegdad ni ngari rich e machib nriyul’ ko Thin Rok Got nga gumercha’dad. Ma re n’en ney e ra suruy rogon ni gad ra lem ara gad ra ngongol. Ma ra ayuwegdad ni ngada falfalan’gad ni ngada rin’ed e tin nib m’agan’ Jehovah ngay. (Psalm 1:2; 40:8) Ere thingar da salapgad ko tayan’ ni fan e nge ayuwegdad u nap’an ni gad be fol babyor. Rib mom ni nge sor lanin’dad nga bang! Yugu bochi ban’en​—telephone ni be chub ara lingan ban’en u bang ma ke sor lanin’dad nga bang. Ma sana mo’maw rodad ni ngada tedan’dad nga ban’en nib n’uw nap’an. Sana gad ra par nga but’ ni gad ba adag ni ngada filed e machib, machane dabi n’uw nap’an ma ke sor lanin’dad nga yugu bang. Uw rogon nrayog ni nge “gel e tayan’ ni ngada ted” u nap’an ni gad ra fil e Thin Rok Got?

16. (a) Mang fan ni baga’ fan ni ngada yarmiyed e tayim ni fan ko fol babyor? (b) Me gur, uw rogon ni kam yarmiy e tayim rom ya nge yog ni ngam fil e Thin Rok Got?

¹⁶ Ffel’ ni ngad duguliyed e ngiyal’ ni ngad filed e babyor, ma ngada duguliyed bang nib fel’ ni ngan fil e babyor riy. Baga’ ni dariy e tayim rodad ma dariy bang ni rayog ni ngada pared riy ni goo gadad. Ri boor ban’en ni ngan rin’ ko yu rran ma sana gad ra lemnag ni gowa gad bangi chubung ni be yan nib papey ko gireng u reb e lul’. Ere thingar da togopuluwgad ko re gireng nem ngada gayed bang ni bay e gapas riy. Dabiyog ni ngada sonnaged e ngiyal’ ni rayog ni ngada filed e babyor. Ya thingar da gagiyegnag e tayim rodad ma ngada ted ba ngiyal’ ni fan ko fol babyor. (Efesus 5:15, 16) Boch e girdi’ e ma tay ba ngiyal’ ni kadbul u nap’an ni dariy e wagey. Yugu boch e girdi’ e ba adag ni ngar filed e babyor ko balayal’. Bin ni baga’ fan riy e thingar da nanged ni ri baga’ fan ni nge yog ngodad e tamilangan’ u morngaagen Got nge Fak. (John 17:3) Ere ngada yarmiyed e tayim rodad ni fan ko fol babyor, ma ngada rin’ed e n’en ni kada yarmiyed.

17. Mang fan fare thin ni “ngan fl’eg i lemnag” ban’en, ma uw rogon ni ra fel’ rogodad riy?

¹⁷ Ri baga’ fan ni ngada fl’eged i lemnag e pi n’en ni kada filed. Ngada fl’eged i lemnag e pi n’en ni kada filed ya nge af laniyan’ Got ni bay ko babyor nge taw nga gumercha’dad. Gad ra fl’eg i lemnag e pi n’en ni kada filed ma gad ra nang rogon ni ngada folgad ko Bible, ma gathi “ke mus ni ngada motoyilgad ko thin rok ya ngada maruwelgad ngay.” (James 1:22-25) Ma nap’an ni gad ra fl’eg i lemnag e pi n’en ni kada filed ma gad ra chugur ngak Jehovah, ya gad ra lemnag pi felngin Got nge rogon ni ma m’ug rarogon Got ko pi n’en ni kada filed.

18. Mang e ba t’uf ya nge yog ni ngan fl’eg i lemnag ban’en?

¹⁸ Faanra ngari yog felngin e fol babyor ngodad ma thingar da tedan’dad ma nge dabi sor lanin’dad nga bang. Thingar da chuweged u lanin’dad fapi n’en ni yima magafan’uy ngay ko yu rran ni fan ni nge yog ni ngada filed ban’en nib biech u nap’an ni gad ra fl’eg i lemnag ban’en. Ba t’uf e tayim riy maku ba t’uf ni ngada pared ni goo gad u bang, machane ri ra baud lanin’dad riy ni faan rayog ngodad e ggan ni machib nge ran ni be yip’ fan e machib nriyul’ u lan e Thin Rok Got!

19. (a) Mang e ke ayuweg boch e girdi’ ni nge n’uw boch nap’an ni ngar tedan’rad nga ban’en u nap’an ni yad be fol babyor? (b) Susun uw rogon e fol babyor u wan’dad, ma mang boch e taw’ath nrayog ngodad ko fol babyor?

¹⁹ Uw rogon ni faanra dabiyog ni ngada tedan’dad nga ban’en nib n’uw nap’an ma ma milekag lanin’dad u nap’an ni gad ma fol babyor? Ke pirieg boch e girdi’ ni rayog ni nge n’uw boch n’umngin nap’an ni ngar tedan’rad nga ban’en ni faan yad ra fil e babyor nib ngoch nap’an ko somm’on mi yad n’uwnag n’umngin nap’an ni yad ra fil e babyor ni buchuw nge buchuw. Gad ba adag ni nge par lanin’dad ko tin ni gad be fil ma gathi ke mus ni ngan gurgur ko fol babyor ya nge chuw. Thingari ri l’agan’dad ko tin ni gad be fil. Ma rayog ni ngada bieged yugu boch e babyor ni ke fl’eg fare tapigpig nib yul’yul’ mab gonop. Baga’ e flaab ni bay ni faan gad ra fil e “tin ni ke tay Got nib mith.” (1 Korinth 2:10) Gad ra fil ma ra yoor boch e tamilangan’ rodad u morngaagen Got maku gad ra nang rogon I gonopiy ban’en. (Hebrews 5:14) Ma faan gad ra fil e machib ko Thin Rok Got ma “ku rayog ni ngada machibnaged yugu boch e girdi’.”​—2 Timothy 2:2.

20. Mang e ra ayuwegdad ni nge fel’ e thin u thildad Jehovah Got ma ngi I par ni aram rogon?

²⁰ Gad ra un ko muulung rok e pi Kristiano ma ngada uned ko fol babyor ma rayog ni nge fel’ e thin u thildad Jehovah. Aram rogon e ani yoloy e psalm ni ke gaar ngak Got: “Rib t’uf rog e motochiyel rom! Gu ma par ni gu ma lemnag ni polo’ e rran.” (Psalm 119:97) Ere ngada uned ko urngin e muulung, nge assembly nge convention. Ma ngada yarmiyed e tayim rodad ya nge yog ni ngada filed e Bible ma ngada fl’eged i lemnag e pi n’en ni kada filed. Ma ri gad ra taw’ath ni bochan e “kab gel e tayan’ ni gad ma tay” ko Thin Rok Got.

[Footnotes]

Ka Ga Manang?

• Mang fan ni man’ boch e Kristiano ni yad e Hebrew ko michan’ nib riyul’?

• Uw rogon nrayog ni ngada tedan’dad u nap’an e muulung ko Kristiano?

• Mang e ra ayuwegdad ni nge fel’ rogodad ko fol Bible ma ngada fl’eged i lemnag e pi n’en ni kada filed?

[Picture on page 9]

Thingari tayan’ e pi Kristiano ni yad e Hebrew ni bochan e ke chugur ni ngan thang yu Jerusalem

[Picture on page 11]

Rayog ni nge ayuweg e pi gallabthir pi fakrad ni nge fel’ rogorad ko muulung rok e Kristiano