Nge Ga’ Fan u Wan’um e Maruwel ni Gimew Be Tay Jehovah u Taabang!

1. Uw rogon e maruwel u wan’ Jehovah, ma mang e ma k’aring e re n’ey ni nge rin’?

JEHOVAH e ir reb e Got ni ma felfelan’ ko maruwel ni ma rin’. (Ps. 135:6; John 5:17) Bochan ni baadag ni nga i felfelan’ e pi engel nge girdi’ ko maruwel ni yad ma rin’, ma aram fan ni ke pi’ boch e maruwel ni ngar rin’ed ni yad ra felfelan’ ngay. Bod nu nap’an ni Nge sunmiy urngin ban’en, me fek Fak nge un ngak ngar maruwelgow u taabang. (Mu beeg e Kolose 1:15, 16.) Be yog e Bible nu m’on ni yib Jesus nga fayleng, ma immoy rok Got u tharmiy ni ir “be’ nib salap i maruweliy ban’en.”​—Prov. 8:30.

2. Mang e be dag ni kab kakrom i yib ni bay e maruwel ni ma rin’ e pi engel?

² Ga ra yaliy e Bible u tabolngin nge yan i mada’ nga tungun, ma boor ban’en ni be weliy ni be dag ni kab kakrom i yib ni ma pi’ Jehovah e maruwel ko pi engel rok ni ngar rin’ed. Tomuren ni denen Adam nge Efa, me chuwegrow Got ko fagi milay’ ni pi’ ni ngar tafenayew, me “fek e kerubim nge bangi sayden ni be daramram ni urngin yang ni be chel ngay, nge ta’ ko ngek ko gi woldug nem nu Eden. Gali n’ey e nge ta’ e girdi’ u urel nge dabi chugur be’ ko fare ke gek’iy ni ma pi’ e yafos.” (Gen. 3:24) Ma Revelation 22:6 e be tamilangnag ni “l’og [Jehovah] e engel rok ni nge dag ngak e pi tapigpig rok e n’en nthingari m’ug ndab ki n’uw nap’an.”

MA UW ROGON E GIRDI’?

3. Nap’an ni immoy Jesus u fayleng, ma uw rogon ni i folwok ko n’en ni i rin’ e Chitamangin?

³ Nap’an ni immoy Jesus u fayleng, ma i rin’ e maruwel rok ni ke pi’ Jehovah u fithik’ e felfelan’. Ma ki folwok ko Chitamangin ni aram e pi’ reb e maruwel nib ga’ fan ngak pi gachalpen ni ngar rin’ed. Ki k’aringrad ni ngar felfelan’gad ko maruwel ni ke pi’ ngorad ni ngar rin’ed ni aram e gaar ngorad: “Nggog e tin riyul’ ngomed: en nra gu mich u wan’ e ra rin’ e pi n’en ni gu be rin’ ni erera’ rogon, ka ba ga’ e tin nra rin’ ni bochan e bay gu wan ngak e en ni Chitamangiy.” (John 14:12) I weliy Jesus feni ga’ fan e re maruwel nem ni gaar: “Thingar da pired ni gadad be ngongliy e pi maruwel rok e en ni ir e ke l’ugeg ku gub u n’umngin i nap’an ni kab rran; ya bay nep’, ma dakuriy be’ nrayog ni nge maruwel.”​—John 9:4.

4-6. (a) Mang fan ni gad ba felfelan’ ngay ni lebguy Noah nge Moses e maruwel ni pi’ Jehovah ngorow ni ngar rin’ew? (b) Mang e taareb rogon ko pi maruwel ni ma pi’ Got ko girdi’ ni ngar rin’ed?

⁴ Ki mada’ nga m’on ni yib Jesus nga fayleng, ma ki pi’ Jehovah boch e maruwel ko girdi’ ni ngar rin’ed ni ur felfelan’gad ngay. Yugu aram rogon nde rin’ Adam nge Efa e maruwel ni pi’ Got ngorow ni ngar rin’ew, machane, immoy boch e girdi’ nra bad nga tomurrow ni ur rin’ed e n’en ni i yog Got ni ngar rin’ed. (Gen. 1:28) I weliy Jehovah ngak Noah rogon ni nge toy fare arke ya nge yag ni ayuwegrad chon e tabinaw rok ni ngar mageygad ni yad ba fas u nap’an fare Ran ni Tharey e Fayleng. I rin’ Noah e n’en ni yog Jehovah ngak nri bod rogon ni yog ngak ni nge rin’. Ma bochan ni fol ma aram fan ni gad bay e chiney!​—Gen. 6:14-16, 22; 2 Pet. 2:5.

⁵ Ri kub tamilang rogon ni yog Jehovah ngak Moses ni nge ngongliy fare tabernacle nge rogon ni nge yarmiy e piin ni ngar manged prist, me rin’ ni bod rogon nnog ngak. (Ex. 39:32; 40:12-16) Ki mada’ ko ngiyal’ ney ni ka be yib angin ngodad e fol ni tay. Ni uw rogon? I weliy apostal Paul ni fare tabernacle nge fapi prist e be yip’ fan boch ban’en “nib fel’” ni ka bay boch nga m’on.​—Heb. 9:1-5, 9; 10:1.

⁶ Ma thilthil e maruwel ni ma pi’ Got ko pi tapigpig rok ni ngar rin’ed, ya ma yan u rogon ni be lebug e tin nib m’agan’ ngay. Yugu aram rogon, ma gubin e maruwel ni ma pi’ Jehovah ngorad e ma pining e sorok ngak, ma ma yib angin ko girdi’. Re n’ey e ba muun ngay e pi n’en ni i rin’ Jesus u m’on ni nge yib nga fayleng ngu nap’an ni immoy u fayleng. (John 4:34; 17:4) Ku arrogon e maruwel ni kan pi’ ngodad ni ngad rin’ed e ngiyal’ ney ni ku ma pining e sorok ngak Jehovah. (Matt. 5:16; mu beeg e 1 Korinth 15:58.) Mang fan nrayog ni nga dogned e re n’ey?

NGAUM LEMNAG E MARUWEL ROM NIB FEL’ ROGON

7, 8. (a) Mu weliy rogon e maruwel ni be rin’ e pi Kristiano e ngiyal’ ney. (b) Susun ni nge uw rogon u wan’dad e yaram rok Jehovah?

⁷ Rib manigil ni ke pining Jehovah e girdi’ ndawor ra flontgad ni ngar maruwelgad u taabang. (1 Kor. 3:9) Piin ni yad ma un i toy e pi naun ni yima tay e Assembly riy, nge Kingdom Hall, nge pi branch ofis e yad be un i rin’ reb e maruwel ni bod rogon e maruwel ni i rin’ Noah nge Moses kakrom. Demtrug ko ga be un i ngongliy yu yang u reb e Kingdom Hall ni ke kireb, ara ga be un i toy e tochuch rodad ni bay u Warwick, New York, ma thingari ga’ fan u wan’um e biney e tow’ath ni kan pi’ ngom. (Mu guy e sasing ni bay u tabolngin e re article ney.) Pi maruwel ney ni ga be rin’ e fan ngak Got. Yugu aram rogon ni kemus nri in e Kristiano ni yad be un i rin’ e biney e maruwel, machane ka bay reb e maruwel ni be un e piin Kristiano i rin’ ni bod e gal maruwel nem ni un rin’ kakrom. Yibe rin’ e re maruwel ney ni nge pining e sorok ngak Jehovah me yib angin ko girdi’. (Acts 13:47-49) Yima yog ngodad rogon ni ngad rin’ed e re maruwel ney u daken e ulung rok Got. Ma bay yu ngiyal’ ni ku yima pi’ boch e maruwel nib beech ni ngad rin’ed ni fan e nge yag nda lebguyed e re maruwel ney.

⁸ Pi tapigpig rok Jehovah ni yad ba yul’yul’ e gubin ngiyal’ ni yad baadag ni ngaur folgad ko pi yaram rok. (Mu beeg e Hebrews 13:7, 17.) Machane, bay yu ngiyal’ ni bayi n’en mi nog ngodad ni ngad rin’ed e pi maruwel ney u reb e kanawo’ nib thil nga rogon ni gad be lemnag. Machane, yugu aram rogon ma gad ma fol ni bochan e gad manang ni Jehovah e ir e be yog ni ngad rin’ed e pi n’ey ma ra yib angin ngodad.

9. Mang boch ban’en ni ma rin’ e piin piilal nib fel’ ni nge folwok e ulung riy?

⁹ Ku ma dag e piin piilal ni yad baadag ni ngar folgad ko tin nib m’agan’ Jehovah ngay u rogon ni yad ma pow’iy e ulung. (2 Kor. 1:24; 1 Thess. 5:12, 13) Ba gel e maruwel ni yad ma tay ma yad ma fol ko pi yaram ni yima pi’. Nap’an ni ku yira thilyeg boch ban’en u rarogon e machib ni gad ma tay, maku yad ma gur ni ngar folgad riy. Yad ma guy angin e machib ni yad ma yarmiy rogon ni ngaun tay u telefon, ngu gampek, nge yungi n’en ni ma muulung e girdi’ ni yoor ngay, ni yugu aram rogon ni bay boch i yad ni i lemnag ko uw rogon nra yib angin e biney e maruwel ko som’on. Bay aningeg e pioneer u Chiyamen nra dugliyed ni nga ranod ko machib ko yungi n’en ni yima siyobay riy ni kan pag ndakunir machib riy. Bagayad ni Michael fithingan e yog ni gaar: “Ke yan in e duw nda ku gur machibgad ni aray rogon, ere kar gu rusgad. Machane, sana ke nang Jehovah ni kug rusgad ya ke ayuwegmad ni nggu machibgad nib fel’ rogon e re kadbul nem. Kar gu felfelan’gad ni kug folgad ko fonow ni kan pi’ ko fare Machib ko Gil’ilungun ma kug taga’gad ngak Jehovah ni nge ayuwegmad!” Gab pasig ngay ni ngaum gay rogon boch i kanawoen e machib ni kan tababnag ko gin ni ga ma un riy ko machib, fa?

10. Mang boch ban’en ni kan thilyeg ko ulung rodad ndawori n’uw nap’an?

¹⁰ Bay yu ngiyal’ nib t’uf ni ngan thilyeg boch ban’en ko ulung rodad. Bod nnap’an fapi duw ni ka fini yan ma bay boch e branch ofis rodad nib achig ni kan puthuy nga boch nib ga’ ni bochan e nge taareb. Ma re n’ey e ke thilyeg boch ban’en u rogon e maruwel ko piin ni yad ma pigpig ko pi branch ney. Yugu aram rogon ni kar thilyeged boch ban’en u rarogon e maruwel ni yad ma tay, machane munmun ma kar guyed angin ni ke yib ngorad. (Ekl. 7:8) Rib tow’ath e pi walag ney ni ngar uned i rin’ e pi maruwel ni be rin’ e girdi’ rok Jehovah e ngiyal’ ney!

11-13. Mang boch e magawon ni ke mada’nag boch e walag ni bochan boch ban’en nni thilyeg ko ulung rodad?

¹¹ Boor ban’en nrayog ni ngad filed rok e piin ni yad ma maruwel ko pi branch ofis ney ni kan puthuy nga taabang. Bay boch i yad ni ke yoor e duw ni kar pigpiggad ko pi branch ni bay ko nam rorad. Bay ba wu’ e mabgol ni ur moyew u reb e Bethel u Central America nib achig, nnog ngorow ni ngar chuwgow nga ranow nga yugu reb e Bethel ni bay u Mexico nib ga’ ko bin ni ur moyew riy ndabi chugur. I yog Rogelio ni gaar: “Rib mo’maw’ ngomow ni nggu warow nggu digeyew e tabinaw romow nge pi fager romow.” Me Juan ni ku ir reb e walag ni pumoon nnog ngak ni nge yan nga Mexico e yog ni gaar: “Bod ni kug sul bayay aram ko som’on, ya thingar gu gay boch e fager nib beech, mug guy rogon ni nggu mecham nga boch e yalen nge rarogon e lem nib thil.”

¹² Ku bay boch e walag ni ur pigpiggad u boch e Bethel ni immoy u boch e nam u Europe ni ku nog ngorad ni ngar chuwgad ko gin ni ur moyed riy nga ranod ra maruwelgad ko branch ofis u Chiyamen. Ku bay boch e magawon ni ki mada’nag e pi walag ney, ya gad manang nde mom ni nge digey be’ tafen nge yan i par nga yugu reb e nam. Boch i yad ni yib u Switzerland e som’on e bayi n’en mu ur fineyed ni manga yad bay u taferad ni yad be guy e pi burey riy nrib fel’ yaan. Ma piin nra bad u Austria e som’on e ur fineyed ni manga ra sulod ko bin baaram e par ni ur moyed riy ni buchuuw e girdi’ ni yad be maruwel u taabang.

¹³ Pi walag ni yad ma chuw nga ranod nga reb e branch ofis ni bay u yugu reb e nam nib thil e ku thingar ra thilyeged boor ban’en u rarogon e par rorad. Thingar ra guyed rogon ni ngar mechamgad ko par u reb e naun nib beech, maku thingar ra filed rogon ni ngar maruwelgad boch e walag nib beech u taabang, maku dabisiy ni ku thingar ra filed rogon ni ngar rin’ed boch e maruwel nib beech. Dabisiy ni kub t’uf ni ngar guyed rogon ni ngar mechamgad nga reb e ulung nib beech, nge rarogon e machib ni yima tay, maku rayog ni sana ba t’uf ni ngar filed reb e thin nib thil. Rayog ni nge mo’maw’ ni nge rin’ be’ e pi n’ey. Machane, boor e walag ni yad ma maruwel u Bethel ni ke m’agan’rad ngay ni ngar rin’ed e pi maruwel ney. Ni mang fan?

14, 15. (a) Uw rogon ni ke dag boch e walag nib ga’ fan u wan’rad e tow’ath ni bay rorad ni ngar maruwelgad Jehovah u taabang? (b) Mang fan nib fel’ ni ngad folwokgad rorad?

¹⁴ I yog Grethel ni gaar: “Nap’an nnog ngog ni nggu wan, mug wan ni bochan e aram rogon ni kug lemnag ni nggu dag ngak Jehovah ni t’ufeg rog nga reb e nam, ara naun, ara reb e tow’ath e de taareb rogon nga gelngin e t’ufeg rog ngak.” Ki yog Dayska ni gaar: “Nap’an ni yib ngan’ug ni Jehovah e ir e be piningeg ni nggu wan ngaram, ma aram me m’agan’ug ngay.” Ki yog André nge Gabriela ni gaar: “Re n’ey e ki ayuwegmow ni ngkug piriegew reb e kanawo’ nrayog ni nggu pigpiggow ngak Jehovah riy, ma gamow pag fan e pi n’en ni gamow baadag.” Ba mich u wan’row ni faanra ke thilyeg e ulung rok Jehovah boch ban’en, ma kab fel’ ni ngan fol riy ko bin ni ngan siyeg.

¹⁵ Bochan ni bay boch e branch ofis ni yibe puthuy nga boch, ma aram fan ni bay boch e walag ni yad ma pigpig u Bethel ni yima tayrad ni ngar manged pioneer. Aram e n’en ni buch rok boch e walag ni yad ma pigpig u Bethel u Denmark, ngu Norway, ngu Sweden u nap’an nni puthuy e branch ofis rorad ko bin nu Scandinavia e branch ofis. L’agruw i yad e Florian nge Anja. Rognew ni lungurow: “Gu tew e re maruwel nem ni kan pi’ ngomow nib maruwel nrib gel e felfelan’ ni yira tay riy. Gamow ba felfelan’ ngay ni nggu pagew Jehovah ni nge maruwel ngomow ndemtrug e gin ni gamow bay riy. Riyul’ nrayog ni nggognew nri gamow ba tow’ath!” Yugu aram rogon ni yooren i gadad e sana dabi t’uf ni nge rin’ boch ban’en ni aray rogon, machane, rayog ni ngad folwokgad ko pi walag ney nib m’agan’rad ngay ni ngar m’oneged e tirok Got ban’en u wan’rad. (Isa. 6:8) Gubin ngiyal’ ni ma tow’athnag Jehovah e piin nib ga’ fan u wan’rad e maruwel ni yad ma rin’ ni fan ngak, ndemtrug e gin’en ni yad bay riy.

NGAUM FELFELAN’ KO TOW’ATH ROM NI NGAM MARUWELGOW JEHOVAH U TAABANG!

16. (a) Mang e be yog e Galatia 6:4 ni ngad rin’ed? (b) Mang e bin th’abi fel’ e tow’ath nra yag ngak be’?

¹⁶ Bochan ndawor da flontgad, mab ga’ ni gad ma taareb rogonnaged gadad ngak boch e girdi’. Machane, be yog e Thin rok Got ni ngad tedan’dad ko tin nrayog rodad. (Mu beeg e Galatia 6:4.) Yooren i gadad e der ma un i yog e thin u lan e ulung rok Got. Maku reb e gathi gad gubin nrayog ni ngad uned ko pioneer, ara da manged missionary, ara da uned ko pigpig u Bethel. Ireray boch e tow’ath nrib fel’! Machane, thingar dab da paged talin ni bin th’abi fel’ e tow’ath nra yag ngak be’ e gad gubin ni bay rodad. Re tow’ath nem e aram e ngad maruwelgad Jehovah u taabang ni gad be wereg fare thin nib fel’ ko girdi’. Ireray reb e tow’ath ni ngari ga’ fan u wan’dad!

17. Mang e gad manang nra i buch u n’umngin nap’an ni ka bay e re m’ag rok Satan ney? Mang fan nsusun e dabi mulan’dad ni bochan e re n’ey?

¹⁷ N’umngin nap’an ni ka bay e re m’ag rok Satan ney, ma gad manang ndabiyog ni ngad pigpiggad ngak Jehovah u rogon ni gad baadag. Sana rayog ni nge buch boch ban’en ndabiyog ni ngad taleged ni bod rogon boch e magawon u tabinaw, ara da m’argad, ara ki yib boch e magawon ngodad. Machane, susun ndabi mulan’dad. Ya demtrug e re miti magawon nra yib ngodad ma ka rayog ni ngad machibnaged murung’agen fithingan Jehovah nge Gil’ilungun. N’en th’abi ga’ fan e gimew be maruwel Got u taabang u rogon nrayog rom, ma ga be meybil ni nge ayuweg e piin ni boor ban’en nrayog ni ngar rin’ed ko tin nrayog ni ngam rin’. Dab mu pagtalin ni gubin e piin ni yad ma pining e sorok nga fithingan Jehovah e rib ga’ farad u wan’!

18. Mang e susun ni nge m’agan’dad ngay ni ngad paged fan, ma mang fan?

¹⁸ Yugu aram rogon ndawor da flontgad, machane ba felfelan’ Jehovah ngay ni nge pagdad ni ngad maruwelgad u taabang. Ere, ngari ga’ fan u wan’dad e biney e tow’ath ni bay rodad ni ngad maruwelgad Got u taabang e chiney ko tin tomuren e rran! Ere, susun ni nge m’agan’dad ngay ni ngad paged fan boch ban’en ni gad baadag ni ngad rin’ed, ya gad manang nnap’an ni gad ra yan ko bin nib beech e m’ag, ma ra pagdad Jehovah ni ngad felfelan’gad ko “bin riyul’ e yafos,” ni aram e yafas ndariy n’umngin nap’an u fithik’ e gapas nge felfelan’.​—1 Tim. 6:18, 19.

19. Mang e ke micheg Jehovah ni fan ngodad boch nga m’on?

¹⁹ Chiney ni gad be chugur i yan ko bin nib beech e fayleng, e ngam lemnag e n’en ni yog Moses ngak piyu Israel u m’on ni nga ranod nga lan fare Nam ni Kan Micheg ni gaar: “I Somol e bay i gagiyegnagmed ngi i fel’ urngin e pi n’en ni gimed ra muruwliy.” (Deut. 30:9) Nap’an nra m’ay e Armageddon, ma urngin e piin ni ur maruwelgad Got u taabang e yad ra tafanay e fayleng ni bod rogon ni ke micheg Got ngorad. Ma aram e ngiyal’ ni gad ra tabab i rin’ e bin nib beech e maruwel ni yira pi’ ngodad ni aram e ngad fal’eged e re fayleng ney ni ga’ngin nge mang paradis!