Babyor Ni Ke Yib Ko Fare Ulung ni Ma Pow’iyey

Ngak e Pi Walag ni Gamad Ma Pigpig ku Jehovah u Taabang:

Ri boor ban’en ni yira felfelan’ ngay e ngiyal’ ney! Ma rib gel e felfelan’ rodad! Ri gamad ba felfelan’ ni gad be “maruwel u taabang”—ma gad be machibnag murung’agen Jehovah ni ir e Chitamangidad nu tharmiy.—Zef. 3:9; John 14:12.

Bochan ni gad be pigpig ngak Jehovah u fithik’ e felfelan’ ma re n’ey e gathi be yip’ fan ni dariy e magawon rodad. Fa binem e duw ni ke yan ma boch i gadad e kar gafgowgad ni bochan e durru’, nge day ni ke tharey e binaw, nge yoko’, nge ku boch e magawon. (Matt. 24:7) Boor e girdi’ e bay e magawon rorad ni bochan e m’ar nge pilibthir. Gad gubin ni ma yib e gafgow ngodad ni bod e “amith ni ma yib ngak be’ ni nge gargel.” (Matt. 24:8) U boch e nam ni bod yu Armenia, Eritrea, nge South Korea, e boor e pi walagdad ni ka nin’rad nga kalbus ni bochan e michan’ rorad.—Matt. 24:9.

Mang e ke ayuwegdad ni ngaud pared nib fel’ lanin’dad u fithik’ e pi magawon ney? Fare kenggin e thin ni fan ko duw ni 2010 e be puguran ngodad ban’en nib ga’ fan ni gaar: ‘T’ufeg e ma k’adan u urngin ban’en. T’ufeg e ra par ni manemus.’ (1 Kor. 13:7, 8) Arrogon, rogon nib t’uf bagadad rok bagadad, nge rogon nib t’uf Jehovah rodad e aram e n’en ni ma gelnagdad ngad gum’an’gad.

Boor e girdi’ ni yad ma yog ni yad e Kristiano ni kar gingad nga rogon feni gad ba pasig ko machib. Yugu aram rogon ni de mich e machib u wan’rad machane ma lungurad: “Gimed be rin’ e maruwel ni susun e gamad e nggu rin’ed!” Mang e n’en ni be ayuweg e Pi Mich Rok Jehovah ni ngar ul’ul’gad ko machib u reb e rran ngu reb? Aram e t’ufeg. Dubdad ni ngad n’aged be’ ni bod rogon e Chitamangidad nu tharmiy ni dabun ni nge n’ag be’. (2 Pet. 3:9) Gad ba adag ni nge urngin e girdi’ mi yad pi’ keru’rad ko kireb ni yad be rin’, ma ke m’ug e mich riy ko fa 7,508,050 i publisher ni kar uned ko machib ko fa binem e duw. Bay barba’ e teliw ni boor e tamachib riy ni kar paged farad u fithik’ e t’ufeg ya nge yog ni ngar ayuweged e girdi’ ko tirok Got ban’en?

Gadad ba felfelan’ ni gad be guy rogon ni be lebug e thin rok Isaiah ni profet ni gaar: “Tin ni bay yib e rran nga m’on e re burey ni bay e tempel riy e bayi par ni ir e ba th’abi tolang. Pire’ e nam ni bay ra bad ngay.” (Isa. 2:2-4) Pire’ e girdi’ ni yad be yib ko burey rok Jehovah nib muun ngay 294,368 e girdi’ ni kar uned ko taufe fa binem e duw. Gamad be pining e magar ko pi girdi’ ney ya kar uned ngodad. Ngad daged e t’ufeg ngorad ma nguud ayuweged yad nge yog ni ngar togopuluwgad ku Satan ni Moonyan’.—1 Pet. 5:8, 9.

Urngin e girdi’ ni ke un ko fare Puguran, ko March 30, 2010 e 18,706,895 u gubin ma re n’ey e be dag ni ku rayog ni nge un bokum milyon e girdi’ ngodad ko liyor ni gad be tay ngak Jehovah. Gad ba falfalan’ ni dawori thang Jehovah e re m’ag nib kireb ney! Ma t’ufeg rodad e ma ayuwegdad ni nguud k’adedan’dad.—2 Thess. 3:5.

Fare District Convention ni “Ngam Par ni Gab Chugur ngak Jehovah!” ni kan tay u ga’ngin yang e fayleng ko duw ni 2010 e ke gelnag e tha’ u thildad Jehovah ni Chitamangidad nu tharmiy. Rriyul’ fapi thin ni bay ko Psalm ni gaar: “Nge felan’ e pi girdi’ ni Got rorad e Jehovah!” (Ps. 144:15, NW) Demtrug ko mang e ra buch boch nga m’on ma faanra bay Jehovah u ba’ rodad ma dariy ban’en ni ngad rusgad ngay. (Ps. 23:4) Dabki n’uw nap’an ma ra fanay Jehovah Jesus ni nge “kirebnag e maruwel rok moonyan’.” (1 John 3:8) Gad be sonnag e re rran nem ni nge yib! Machane u m’on ni nge yib e re rran nem ma ka boor e maruwel ni ba’ ni ngad rin’ed.—1 Kor. 15:58.

Nge mich u wan’med ni “gubin ngiyal’” ma gamad be unegmed ko meybil romad. (Rom. 1:9) Nguum “pired ni gimed ba t’uf rok Got, ma gimed be sonnag e Somol rodad i Jesus Kristus ni nge pi’ e yafos ndariy n’umngin nap’an ngomed ni bochan e be runguymed.”—Jude 21.

Ri gimed ba t’uf romad!

Gamad e pi walagmed,

Ulung ni Ma Pow’iyey ko Pi Mich Rok Jehovah