Ngam Maruweliy e T’ufeg ni Dabi M’ay
‘T’ufeg e ma k’adan’ u urngin ban’en. T’ufeg e ra par ni manemus.’—1 KOR. 13:7, 8, NW.
1. (a) Uw rogon ni yima weliy murung’agen e t’ufeg? (b) Mini’ e yad be t’ufeg ma mang e yad be t’ufeg?
BOOR e kanawo’ ni yima weliy murung’agen e t’ufeg riy. Yima lingagilnag ko tang. T’ufeg e aram ban’en nib t’uf ko girdi’. Machane boch e babyor nge kachido e yima dag e t’ufeg riy ni kemus ni yat u murung’agen e adag u thilin e fager nge mabgol, ma pi babyor ney e goo ke sug u kantin i yan. Ma bin riyul’ e t’ufeg ngak Got nge girdi’ e ke war. Gad be guy ni pi n’en ni be buch e be dag ko mang e ke yog e Bible murung’agen e tin tomuren e rran. Girdi’ e “kemus ni yad e yad be lemnagrad, ma kari gel e chogow rorad . . . ma bayi t’uf e fafel rorad me tomur Got u wan’rad.”—2 Tim. 3:1-5.
2. Mang e be ginangdad e Bible riy ni nge dabi t’uf rodad?
2 Rayog ko girdi’ ni nge dag e t’ufeg, machane be ginangdad e thin rok Got ni dabi t’uf e tin nu fayleng rodad. Ma be tamilangnag e Bible ko mang e ra buch u nap’an nra t’ufeg be’ e tin nu fayleng ban’en. (1 Tim. 6:9, 10) Ka ga manang ko mang e yog Paul u murung’agen Demas? Yugu aram rogon ni i un ngak Paul, machane ke thil ke t’ufeg e pi n’en nu fayleng. (2 Tim. 4:10) Ke ginang apostal John e pi Kristiano ko pi n’en u roy u fayleng nra kirebnagey. (Mu beeg e 1 John 2:15, 16.) Ra ngad t’ufeged e fayleng nge pi n’en ni bay riy ma dabiyog ni nge t’uf Got rodad nge tirok ban’en.
3. Mang e magawon ni gad ma mada’nag, ma mang boch e deer ni bay?
3 Gathi gadad bang ko re fayleng ney, machane gad be par riy. Ere mo’maw’ ni ngad paloggad ko pi n’en ni ma guy e girdi’ u fayleng nib t’uf rorad. Rib ga’ fan ni nge dabi t’uf e pi n’en nu fayleng rodad. Ere mini’ e ngad daged e t’ufeg ngak? Mang e pi n’en nra ayuwegdad ni ngad maruweliyed e t’ufeg nra par ni manemus? Uw rogon nra yib angin ngodad e chiney i yan nga m’on? Ba t’uf ni ngad nanged e tin nib puluw u wan’ Got ya nge yog ni nge pow’iydad ma gad fol rok.
Ngan Maruweliy ni Nge T’uf Jehovah
4. Uw rogon ni ngan maruweliy nge gel e t’ufeg rodad ngak Got?
4 Ra ngan maruweliy ban’en ma aram e ngan fal’eg rogon min ayuweg nge gel. Amu lemnag reb e tamilay’ ni ma maruwel nib gel ya nge fal’eg rogon e but’ me yung e awoch ngay. Be athapeg ni nge tugul fapi awoch. (Heb. 6:7) Ku arrogon ni thingari gel e t’ufeg rodad ngak Jehovah. Mang e ba t’uf ni ngad rin’ed? Thingar da fal’eged gum’ircha’dad ya ireram e gin kan yung e thin riyul’ u murung’agen Gil’ilungun Got ngay. Rayog ni ngad rin’ed e re n’ey ni faanra ngad fal’eged i fil e Thin rok Got me yoor ban’en ni ngad nanged. (Kol. 1:10) Faan gad ra un ko muulung ma da tayan’dad ko pi n’en ni yibe fil riy ni gubin ngiyal’ ma ra ayuwegdad ni nge tamilangan’dad. Ga be athamgil ni ngam fil nge yoor e thin rok Got ni ngam nang?—Prov. 2:1-7.
5. (a) Uw rogon ni rayog ni ngad filed murung’agen pi fel’ngin Jehovah? (b) Mang e rayog ni nga mog u murung’agen Jehovah nib mat’aw, mab gonop, mab gel gelngin?
5 Ma tamilangnag Jehovah fel’ngin u Bible. Faan gad ra fil e thin nu Bible me tamilangan’dad u murung’agen Jehovah, ma ra yoor ban’en ni gad ra nang ko pi fel’ngin ni aram e ir ba Got nib mat’aw, ma ba gel gelngin, mab gonop, ma bin th’abi ga’ riy e ma t’ufegey. Ke dag Jehovah rogon ni ba mat’aw ko gubin ban’en ni ma rin’ nge motochiyel rok nib fel’. (Deut. 32:4; Ps. 19:7) Rayog ni ngad guyed feni gonop Jehovah ko pi n’en ni ke sunumiy. (Ps. 104:24) Pi n’en u lan e lang e ma micheg ni ir e ma pi’ gelngin urngin ban’en ma dabi m’ay gelngin.—Isa. 40:26.
6. Uw rogon ni ke dag Got e t’ufeg rok ngodad, ma mang angin ni ke yib ngom?
6 Mang e rayog ni nga nog u murung’agen e t’ufeg rok Got? Ba ga’ fan e re t’ufeg rok ney ya ke yib angin ngodad. Ke dag e t’ufeg rok ya ke biyuliy e girdi’ nu fayleng. (Mu beeg e Roma 5:8.) Re n’ey ni ke rin’ e fan ngak gubin e girdi’ nu fayleng, machane kemus nra yib angin ko girdi’ nra fol rok Got ma yad be maruweliy e michan’ rorad ni fan ngak Fak. (John 3:16, 36) Ke pi’ Got Jesus ni maligach ya nge chuweg e denen rodad me n’igindad ni nge t’uf Got rodad.
7, 8. (a) Mang e ba t’uf ni ngad rin’ed ni faanra ngad daged e t’ufeg ngak Got? (b) Mang e magawon ni ma yib ko girdi’ rok Got machane dar talgad ko pigpig ngak?
7 Uw rogon nrayog ni ngad daged e t’ufeg ngak Got ni bochan urngin e pi n’en ni ke rin’ ni fan ngodad? Ba tamilang ni ke yog e Bible ni gaar: “Ya baaray fan ni nge t’uf Got rodad: fan e ngad folgad ko tin ni ke yog ni ngad rin’ed. Ma tin ni ke yog ni ngad rin’ed e gathi rib mo’maw’.” (1 John 5:3) Bochan nib t’uf Jehovah Got rodad ma aram e ra k’aringdad ni ngad folgad ko pi motochiyel rok. Ireray reb i fan ni gad ma machibnag murung’agen fithingan nge Gil’ilungun ya nge yib angin ngak boch e girdi’. Faan gad ra rin’ e pi n’em u gum’ircha’dad ma ireram e mich riy ni gad be fol ko motochiyel rok Got u polo’ i lanin’dad.—Matt. 12:34.
8 Pi walagdad u ga’ngin e fayleng e yad ma athamgil ni ngar folgad ko pi motochiyel rok Got ni yugu aram rogon ni dabun e girdi’ ni nge motoyil ko fare thin u murung’agen Gil’ilungun. Yad ma athamgil ni ngar machibnaged fare thin nib fel’. (2 Tim. 4:5) Ku arrogodad ni ku gad ma weliy murung’agen Got ngak boch e girdi’, ma ku gad be fol ko tin ka bay e motochiyel rok.
Fan ni Ngad T’ufeged Jesus Kristus
9. Mang e ke k’adan’ Kristus riy, ma mang e k’aring ni nge k’adan’?
9 Boor fan ni ngad maruweliyed ni nge t’uf Jesus rodad. Yugu aram rogon ni dad guyed Jesus, ra gel e t’ufeg rodad ni faan gad ra fil boch ban’en u murung’agen. (1 Pet. 1:8) Mang boch ban’en ni i k’adan’ Jesus riy? Nap’an ni i rin’ e tin nib m’agan’ e Chitamangin ngay, ma un gafgownag ndariy tapgin. U ni skengnag, ma u nog e thin ni de riyul’ u murung’agen, ma u nog e thin nib kireb ngak, ma kun dariy fannag. (Mu beeg e John 15:25.) Machane t’ufeg rok Jesus ngak e Chitamangin e k’aring ni nge k’adan’ ko pi magawon nem. Ma t’ufeg rok e k’aring ni nge pi’ e yafas rok ni maligach ni nge biyuliy e girdi’ ni gubin.—Matt. 20:28.
10, 11. Bochan e n’en ni ke rin’ Kristus ngodad, mang e ngad nameged?
10 Pi n’en ni rin’ Jesus e ma pi’ e athamgil nga lanin’dad. Ya faanra ngad lemnaged e pi n’en ni rin’ ni fan ngodad ma ra gel e t’ufeg rodad ngak. Thingar da nameged ni ngad daged e t’ufeg ni bod rogon ni dag Kristus, ma rayog ni ngaud machibnaged murung’agen Gil’ilungun ma ngad pingeged e girdi’ ngar manged pi gachalpen.—Matt. 28:19, 20.
11 Faanra ba t’uf e girdi’ rodad ni bod Jesus, ma ra m’agan’dad ngay ni ngad mu’naged fare maruwel u m’on ni nge yib e tomur. (Mu beeg e 2 Korinth 5:14, 15.) Bochan e t’ufeg rok Kristus ma ke nameg e tin nib m’agan’ Got ngay ni fan ko girdi’. Ma kanawo’ ni ke dag Jesus ngodad ni ngad folwokgad riy e rayog ni nge bagadad me rin’ e tin nib m’agan’ Got ngay. Ere ba ga’ fan ni ngari t’uf Got rodad. (Matt. 22:37) Faan gad ra fol ko machib rok Jesus nge motochiyel rok, ma rayog ni ngad daged nib t’uf rodad ma gad dugliy ni ngad folgad ko gagiyeg rok Got ni demtrug ko mang magawon nra yib ngodad ni bod rogon ni rin’ Jesus.—John 14:23, 24; 15:10.
Ngam Nameg e Bin Th’abi Fel’ Kanawoen e T’ufeg
12. Mang e be yip’ Paul fan ko thin ni yog ni “bin th’abi fel’ e kanawo’ e baaray”?
12 I folwok apostal Paul rok Kristus. Ere ki yog ngak e pi Kristiano ni ngar folwokgad rok Jesus. (1 Kor. 11:1) Yugu aram rogon ni yog ngak e pi Kristiano u Korinth ko bin som’on e chibog ni ngar athamgilgad ni ngar fanayed gelngin Got ni ngar golnaged e m’ar, ma ngar nonad u boch e thin, machane ki yog ngorad ni bay ban’en ni ba ga’ fan ni ngar nameged. U 1 Korinth 12:31 e tamilangnag Paul ni gaar: “Machane bin th’abi fel’ e kanawo’ e baaray.” Bay reb e thin u tomuren e pi verse ney ni be dag ni t’ufeg e ir e bin th’abi fel’ e kanawo’. Mang fan ni t’ufeg e bin th’abi fel’ e kanawo’? Ki ulul Paul ni nge tamilangnag ko mang fan. (Mu beeg e 1 Korinth 13:1-3.) Faanra ba salap i rin’ boor ban’en ma ke rin’ boch ban’en nib fel’ machane dariy e t’ufeg rok, bay angin, fa? Dariy. Gelngin Got e ke tamilangnag feni ga’ fan e t’ufeg. Rib fel’ e re thin ney ni ke yog ni fan ngodad.
13. (a) Mang kenggin e thin u Bible ko duw ni 2010? (b) Uw rogon ni dabi m’ay e t’ufeg?
13 Ke tamilangnag Paul ngodad ko mang e ra rin’ e t’ufeg nge mang e dabi rin’. (Mu beeg e 1 Korinth 13:4-8.) Ere mu fal’eg i fil ko uw rogon feni rib ga’ fan e t’ufeg. Mu fal’eg i yaliy fapi thin u tomuren e verse 7 nge thin ni bay u m’on ko verse 8 ni be gaar: ‘T’ufeg e ma k’adan’ u urngin ban’en. T’ufeg e ra par ni manemus,’ ireray e thin u Bible ni yira fanay ko duw ni 2010. Verse 8 e ke yog Paul ni gelngin Got ni i pi’ kakrom e ayuweg boch e girdi’ nguur yiiynaged boch ban’en mu ur nonad u boch e thin, ma ur rin’ed e pi n’ey ko ngiyal’ ni ka fini tabab e ulung ni Kristiano, ma pi n’ey e ra m’ay ni gubin. Machane t’ufeg e dabi m’ay. Jehovah e tabolngin e t’ufeg, ma par ndariy n’umngin nap’an. Ere ku arrogon e t’ufeg ni dabi m’ay. Ra ulul ni nge par ni manemus ya ireray fel’ngin Got.—1 John 4:8.
T’ufeg e Ma K’adan’ u Urngin Ban’en
14, 15. (a) Uw rogon ni t’ufeg e ra ayuwegdad ni ngad k’adedan’dad ko skeng? (b) Mang fan ni de thilyeg fare walag e lem rok?
14 Mang e ma ayuweg e Kristiano ni ngar k’adedan’rad u nap’an e skeng nge boch e magawon? T’ufeg e ku ma ayuwegrad. Ra bay e t’ufeg rodad ma gathi kemus ni ngad pied e chugum rodad ya ku rayog ni ngad pied e yafas rodad ni fan ngak Kristus. (Luke 9:24, 25) Mu lemnag boch e gafgow ni un tay ngak e pi walag u nap’an nge tomuren e bin l’agruw e mahl ko fayleng. Un gafgownagrad ma u ni kalbusnagrad.
15 Wilhelm ni reb e walag nib fel’ yangaren u Chiyamen e yog boch ban’en ni buch e ngiyal’ nem. Rayog ni nge thilyeg e lem rok machane ke par nib yul’yul’ ngak Got nge mada’ ko ngiyal’ ni kan boyochnag. I yoloy e babyor nge yan ko tabinaw rok ni gaar: “Demtrug e magawon nra yib ma thingar da t’ufeged Got ni bod rogon ni motochiyelnag Jesus Kristus. Faan gad ra par ni gad ba yul’yul’ ngak Got ma ra tow’athnagdad.” Boch nga tomuren ma bay reb e thin u lan Fare Wulyang Ntagil’ E Damit ni yoloy be’ nib pin ko tabinaw rok Wilhelm ni gaar: “U n’umngin nap’an urngin e gafgow ni yib ngomad ma kug guyed rogon ni nggu m’oneged Got u wan’mad.” Aram rogon e lem ni bay rok boor e walag e ngiyal’ ney ni yad be k’adan’rad ko kalbus ni yibe tay ngorad u Armenia, Eritrea, South Korea, nge ku boch e nam. Pi walag ney e yad be par nib mudugil ni bochan e t’ufeg rorad ngak Jehovah.
16. Mang e i k’adan’ e pi walagdad u Malawi riy?
16 Boor yang ni ma yib boor mit e skeng ngak e pi walagdad ya nge skengnag e michan’ nge yul’yul’ rorad. Ke gaman 26 e duw ni ke k’adan’ e Pi Mich Rok Jehovah u Malawi ko togopuluw ni ke tay e am ngorad ya kan taleg e machib ma ri boor mit e gafgow ni kan tay ngorad. Ke yib angin e k’adan’ ni ur ted. Nap’an ni un gafgownagrad, ma bay gonap’an 18,000 e Pi Mich Rok Jehovah u lan e re nam nem. Guyey e duw nga tomuren ma kar yoorgad ke yan i gaman 38,393. Maku ireray angin ni ke yib ngak boch e nam.
17. (a) Mang boch e togopuluw ni ma yib ngak boch e Kristiano u tabinaw rorad? (b) Mang fan ni rayog ni ngar k’adedan’rad ko gafgow?
17 Ba gel e togopuluw nge gafgow ni un tay ko girdi’ rok Got. Machane ri kub gel e togopuluw ni ma yib ngak reb e Kristiano u lan e tabinaw rok. Ra kireban’ ni bochan girdi’ rok e be togopuluw ngak. Gathi ke yog Jesus ni ra buch e pi n’ey? Arrogon , boor e girdi’ e ngiyal’ ney e ke yib e togopuluw ngorad u lan e tabinaw rorad. (Matt. 10:35, 36) Boor e piin nib fel’ yangaren e kar k’adedan’rad ko togopuluw ni be yib ko gallabthir rorad ni de mich Got u wan’rad. Boch i yad e yima chuwegrad u tabinaw, machane ma ayuwegrad e pi walagrad ni Kristiano. Mang e ke ayuweg e pi girdi’ ney ni ngar k’adedan’rad? Gathi kemus ni t’ufeg rorad ngak pi walagrad, machane bochan e t’ufeg rorad ngak Jehovah nge Jesus.—1 Pet. 1:22; 1 John 4:21.
18. Uw rogon ni t’ufeg ni ma k’adan’ u urngin ban’en e ra ayuweg e mabgol ko piin Kristiano?
18 Boor ban’en ni ma buch rodad ma aram fan nib t’uf e t’ufeg ya ngad k’adedan’dad ko urngin ban’en. T’ufeg e ra ayuweg e tha’ u thilin e pi mabgol ngar folgad ko thin ni yog Jesus ni gaar: “Thingari dabi dareg e girdi’ e gali cha’ ni Got e ke chagiyrow.” (Matt. 19:6) Nap’an nra “gafgow” e piin Kristiano ni kar mabgolgad ma thingar nanged ni Jehovah e bang ko mabgol rorad. (1 Kor. 7:28) Thin rok e be gaar, ‘t’ufeg e ma k’adan’ u urngin ban’en,’ ere faanra bay e t’ufeg u thilin e mabgol ma rayog ni nge ayuweg e mabgol nge par nib mudugil.—Kol. 3:14.
19. Mang e ke m’ug ko girdi’ rok Got u tomuren ni ke aw e yoko’ nge durru’?
19 T’ufeg e ma ayuwegdad ni ngad k’adedan’dad ko yoko’ nge durru’ nge ku boch e gafgow. Bod rogon e n’en ni buch u nap’an reb e durru’ ni aw nga Peru nge reb e yoko’ ni Katrina ni aw nga bang u Meriken. Boor e pi walagdad u rom ni kireb e naun rorad nge chugum rorad. T’ufeg ko pi walagdad u ga’ngin yang e fayleng e k’aringrad ni ngar pied boch e chugum nge ayuw, ma ki yan boch pi walagdad ni ngar pied e ayuw ni ngan toy boor e naun nge Kingdom Hall ni ke kireb. Pi n’em ni ke rin’ e pi walagdad e kar daged e t’ufeg maku yad be dag ni yad be lemnaged yad ni gubin ngiyal’ ni demtrug e magawon nra yib ngorad.—John 13:34, 35; 1 Pet. 2:17.
T’ufeg e Ra Par ni Manemus
20, 21. (a) Mang ni t’ufeg e rib ga’ fan? (b) Mang fan ni kam dugliy ni ngam nameg kanawoen e t’ufeg?
20 Ngiyal’ ney, e rayog ni ngad guyed ni girdi’ rok Jehovah e yad ma t’ufeg ngorad, ma ke fel’ rogorad riy. Riyul’ ni rayog ni nge m’ug e t’ufeg u gubin ban’en. Rayog ni ngam nang ko uw rogon ni tamilangnag Paul e t’ufeg. Som’on e ke yog ni tomuren nra ilal fare ulung ni Kristiano ma aram e ra tal fare tow’ath ni dab kun yiiy ma dab kun non ni thin nu bang. Ma aram me ulul ngay ni gaar: “Ere dalip ban’en ni baaray nra par: ni aram e michan’ ngak Kristus, nge l’agan’ ngak, nge rogon ni gadad ba t’uf rok Got nge rogon nib t’uf Got rodad nge girdi’; ma bin th’abi ga’ ko pi n’ey e rogon ni gadad ba t’uf rok Got nge rogon nib t’uf Got rodad nge girdi’.”—1 Korinth 13:13.
21 Gubin ban’en ni ke michan’dad ngay e ra riyul’ ere daki t’uf ni nge ulul e michan’ rodad. Pi n’en ni ke l’agan’dad ngay ni i micheg Got e ra riyul’ ere dakuriy fan ni ngad athapeged ban’en. Machane uw rogon e t’ufeg? T’ufeg e dabi m’ay ya ra par ni manemus. Faan gad ra fal’eg i lemnag e yafas ni manemus ma rayog ni nge tamilangan’dad u murung’agen e t’ufeg rok Got. Faan gad ra rin’ e tin nib m’agan’ Got ngay ma aram gad be yan ko fare kanawo’ ni th’abi fel’ ni aram e t’ufeg nra par ni manemus ma rayog ni ngam magey ni dariy n’umngin nap’an.—1 John 2:17.
Uw Rogon ni Ga Ra Fulweg?
• Mang fan ni ngad kol ayuwgad ni dabi t’uf e pi n’en u fayleng rodad?
• T’ufeg e ra ayuwegdad ni ngad k’adedan’dad ko mang?
• Uw rogon ni t’ufeg e dabi m’ay?
[Blurb on page 31]
Kenggin e thin nu Bible ko 2010 e: ‘T’ufeg e ma k’adan’ u urngin ban’en. T’ufeg e ra par ni manemus.’—1 Kor. 13:7, 8.
[Picture on page 29]
T’ufeg rodad ngak Got e ra k’aringdad ni ngad machibgad
[Picture on page 30]
T’ufeg nib gel e ke ayuweg e pi walagdad u Malawi ni ngar k’adedan’rad ko pi skeng ni ma yib ngorad