Uw Rogon Yaan e Babyor Rom?

Ireray reb e deer nib fel’ ni ngad fithed u m’on ni ngad pied reb e babyor ngak be’. Babyor ni ke m’ingm’ing tabanggin, ara ke mul raen, ara ke alit, ara ke magochoth e de fel’ ni ngad pied ko girdi’ ya aram e be kirebnag thin e ulung rodad nge fare thin nib fel’ ni gad ma machibnag.

Uw rogon ni nga i par e babyor rodad nib beech? Boor e walag ni kar pirieged nib fel’ ni ngar yarmiyed e kabang rorad. Bod ni bay bang u lan e kabang rorad ni fan nga yu ken e babyor, ma bang e fan ko magazine nge brochure, ma bang e fan ko tract, maku errogon i yan. Nap’an ni yad ra sulweg e Bible nge babyor rorad nga lan e kabang ma yad ma guy rogon ni ngar ted nib fel’ rogon ya nge dabi kireb. Boch e walag e yad ma tay e babyor rorad nga lan e folder ara brif nib tamilang raen. Demtrug rogon ni gad ma yarmiy e babyor rodad, ma de fel’ ni ngad binged e kanawo’ ngak be’ ni nge pirieg thibngin e machib rodad ni bochan yaan e pi babyor ni gad ma wereg.​—2 Kor. 6:3.