Biney e Maruwel e Dariy e Ngiyal’ ni Gad Ma Tal Riy
1. Uw rogon ni kad nanged ni pi tamachib ko bin som’on e chibog e dariy e ngiyal’ ni ur talgad ko machib?
1 Pi tamachib ko bin som’on e chibog ni yad ba pasig e ‘ur machibnaged’ fare thin nib fel’ ko yungi n’en ni ur pirieged e girdi’ riy. (Acts 5:42) Ere dabiyog ni nga dogned nnap’an ni ur machibgad u mit e tabinaw i yan, mu ur digeyed e girdi’ ni ur mada’naged u kanawo’. Mus ko ngiyal’ ni yad be chuway’ ko market u tomuren e machib, maku yad ma machib u fithik’ e sabethin u nap’an nra mab e kanawo’ ngorad. Yad bod Jesus ndariy ba ngiyal’ ni ur lemnaged ndab ra machibgad.—Mark 6:31-34.
2. Mang e ba muun ngay ni ngad ngongolgad nib puluw ko fare ngachal ni kan pi’ ngodad?
2 Gubin Ngiyal’ ni Ngad Fal’eged Rogodad: Fare ngachal ni kan pi’ ngodad ni, Pi Mich Rok Jehovah, e gathi kemus ni be tamilangnag e n’en ni gad ma rin’; ya ku be tamilangnag ko gad mini’. (Isa. 43:10-12) Ere gubin ngiyal’ ni kad fal’eged rogodad ni ngad weliyed murung’agen e athap rodad, ni ki mada’ ko ngiyal’ ndarud machibgad u mit e tabinaw. (1 Pet. 3:15) Ga ma lemnag u m’on riy boch e kanawo’ nrayog ni ngam machib riy u fithik’ e sabethin nge n’en ni nga mog, fa? Ga ma fek boch e babyor ni ngam pi’ ngak e piin ni yad baadag, fa? (Prov. 21:5) Kemus ni goo machib u mit e tabinaw e ga ma un ngay, fa ka ga ma weliy fare thin nib fel’ ko girdi’ u yugu boch e kanawo’?
3. Mang e re bugithin nib fel’ ni ngan fanay u nap’an ni yibe weliy murung’agen e machib u kanawo’, ngu parking lot, ngu tagil’ e maruwel, nge ku yu yang?
3 Machib u Fithik’ e Girdi’ ni Yoor: I yog apostal Paul ni i machibnag e “girdi’ ni yoor,” ngu mit e tabinaw i yan. (Acts 20:20) Ere ba puluw ni ngan fanay fare bugithin ni ngan machibnag e “girdi’ ni yoor” u nap’an ni yibe weliy murung’agen e machib u kanawo’, ngu parking lot, ngu park, ngu tagil’ e maruwel, nge ku yu yang. Riyul’ ni machib u mit e tabinaw e aram rogon e machib nib ga’ ni gad ma tay, maku aram reb e kanawo’ nib fel’ ni gad ma mada’nag e girdi’ riy. Machane, pi tamachib ko bin som’on e chibog e ur gayed e girdi’ ma gathi tabinaw. Nap’an nra mab e kanawo’ ngorad ma yad ma guy rogon ni ngar weliyed e tin riyul’ ko girdi’ riy ndemtrug ko fithik’ e girdi’ ni yoor, ara fithik’ e sabethin, ara u mit e tabinaw i yan. Manga yugu da athamgilgad ni ngkud lemgad ni aray rogon ya nge yog nda ngongliyed urngin e maruwel ni kan pi’ ngodad nrogon e tapigpig rok Got.—2 Tim. 4:5.