L’agruw Chi Kobre’ Nrow nib Achig

Ngan pi’ e salpiy e aram reb e kanawo’ nib ga’ fan nrayog ni ngad pied e ayuw ko fare maruwel ni ngan wereg e machib u murung’agen Gil’ilungun Got u ga’ngin yang e fayleng. Machane faanra dariy e salpiy rodad ni boor, ma uw rogon?

Ba’ bayay ni ke guy Jesus be’ ni ppin nib gafgow ya ke yim’ figirngin ni yin’ l’agruw chi kobre’ nrow nib achig. T’ufeg rok ngak Jehovah e ke k’aring ni nge “pi’ urngin e chi salpiy ni ba’ rok, ni ir e nge abich riy.” (Mark 12:41-44) Ke weliy Jesus u murung’agen e re n’em ya ayuw ni ke pi’ fare pin e ba ga’ fan u wan’ Got. Ere, pi Kristiano ko bin som’on e chibog e dar ma lemnag ni kemus ni pi walag nib fel’rogorad e rayog ni ngar pied e ayuw ni fan ko machib. Ke weliy apostal Paul e n’en ni rin’ e pi walag u Macedonia ni yugu aram rogon nri yad ba gafgow me wenig ngorad ni “ngan pagrad ngar uned i ayuweg e girdi’ rok Got.”​—2 Kor. 8:1-4.

Ere, faanra kemus ni ‘l’agruw chi kobre’ nrow nib achig’ e rayog ni ngad pied, ma thingar dab da paged talin nra ngan kunuy e pi ayuw nib achig nem ma ra yoor. Gad ra pi’ e ayuw ni ke yib u gum’ircha’dad ma ra felfelan’ e Chitamangidad nu tharmiy ni be’ nib gol, ya “ba t’uf rok e en ni ma pi’ ban’en u fithik’ e felfelan’.”​—2 Kor. 9:7.