Deer Ko Piin Ma Beeg

Nap’an ni yoloy David ko Psalm 61:8 (BT) ni “gubin ngiyal’” nra pining e sorok nga fithingan Got, ma gur, be yip’ fan ni be lemnag ndabi yim’, fa?

Danga’, ya ba puluw e n’en ni yoloy David.

Am lemnag e n’en ni yoloy ko re verse ney nge yugu boch e verse ni taareb rogon ngay. I gaar: “Gubin ngiyal’ ni bay gon’ e tang ni gu be pining e sorok ngom, ko ngiyal’ ni gu be pi’ ngom ni yu rran e n’en ni kug micheg.” “A Somol ni Got rog, bay gu pining e sorok ngom u polo’ i gum’irchaeg; bay gu gilnag fithingam ni dariy n’umngin nap’an.” “Bay ug pining e sorok ngom ndariy n’umngin nap’an.”​—Ps. 61:8, BT; 86:12, BT; 145:1, 2.

Nap’an ni yoloy David e pi thin ney, ma gathi be lemnag ndabi yim’. Manang nra i yim’ e girdi’ ni bochan e ke af e denen ngorad, maku manang ni ir reb e tadenen. (Gen. 3:3, 17-19; Ps. 51:4, 5) Manang ni mus ngak boch e pumoon ni yad ba yul’yul’ ngak Got ni bod rogon Abraham, nge Isak, nge Jakob ni kur m’ad. Maku manang ni mus ngak maku ra yim’. (Ps. 37:25; 39:4) Machane fapi thin ni yog ko Psalm 61:8 e be weliy rogon e n’en ni baadag nge n’en ke dugliy ni nge rin’ ni aram e nge pining e sorok ngak Got ni gubin ngiyal’, ni aram e be yip’ fan ni nge rin’ e re n’ey u n’umngin nap’an e yafos rok.​—2 Sam. 7:12.

Bay yu ngiyal’ ni i yoloy David murung’agen e pi n’en ni i buch u lan e yafos rok, ni bod e n’en ni gad ra guy ko fapi thin ni kenggin e Psalms 18, 51, nge 52. I yog ko Psalm 23 ni Jehovah e taareb rogon ngak be’ ni ma gafaliy e saf ni ma pow’iydad, ma ma pi’ e toffan ngodad, ma ma yororiydad. Aram rogon David u nap’an ni i gafaliy e saf. Ku baadag ni nge pigpig ngak Got u ‘n’umngin nap’an e yafos rok.’​—Ps. 23:6.

Ku dab mu pagtalin ni Jehovah e ir e thagthagnag nga laniyan’ David ni nge yoloy boch ban’en nga but’. Pi n’en ni i yoloy e kub muun ngay boch e yiiy u murung’agen e n’en nra buch boch nga m’on. Bod ni yoloy ko fare thin ni bay ko Psalm 110 murung’agen ba ngiyal’ nra par e Somol rok “nga ba’ ni mat’aw [rok Got]” u tharmiy min pi’ gelngin ni nge rin’ boch ban’en. Mang e nge rin’? Aram e nge gel ko pi toogor rok Got me “gechignag e pi nam” ni bay u fayleng. David e ir reb e ga’ rok fare Messiah ni faen nra par u tharmiy nge gagiyeg, maku ra mang “ba prist ndariy n’umngin nap’an.” (Ps. 110:1-6) I yog Jesus ni fare yiiy ni bay ko Psalm 110 e be weliy murung’agen, maku ra lebug boch nga m’on.​—Matt. 22:41-45.

Arrogon, nni thagthagnag nga laniyan’ David ni nge yoloy murung’agen e ngiyal’ ni immoy riy nge ngiyal’ ni yira faseg ko yam’ me pining e sorok ngak Jehovah ndariy n’umngin nap’an. Re n’ey e be ayuwegdad ni ngad nanged ni fare thin ni bay ko Psalm 37:10, 11, 29 e rayog ni nge sor fan ko pi n’en ni i buch u Israel kakrom, nge pi n’en nra buch u ga’ngin yang e fayleng boch nga m’on u nap’an nra lebguy Got e pi n’en ke micheg.​—Mu guy e paragraph 8 ko fare article ni “Ga Ra Moy Rog u Paradis” ni bay ko re ke babyor ney.

Fare thin ni bay ko Psalm 61:8 nge boch e verse ni taareb rogon ngay e be dag ni baadag David ni nge pining e sorok ngak Jehovah u Israel kakrom nge mada’ ko ngiyal’ nra yim’. Pi thin ney e ku be dag e n’en nra rin’ David boch nga m’on u nap’an nra faseg Jehovah ko yam’.