Ke Bung Rogom ni Ngam Un i “Tafanay e Fayleng,” Fa?

NGE BUNG ROGOM NI NGAM NGONGLIY E RE FAYLENG NEY NGE MANG PARADIS

Nap’an ni yog Jehovah ngak e girdi’ ni ‘nge wer e piin ni owcherad nga gubin yang u fayleng ngar pired riy mi yad suwey,’ ma aram me m’ug riy nra munmun me paradis e fayleng ni ga’ngin. (Gen. 1:28) Piin yad ra par ndariy n’umngin nap’an e kub t’uf ni ngar folgad ko re n’ey. Ra som’on ma dawori paradis e fayleng ni bochan e dakuriy fare milay’ nu Eden. Ere boor e maruwel nib t’uf ni ngan rin’ ni ngan klinnag e yungi n’en ni bay u fayleng ni ke kirebnag e girdi’ e ngiyal’ ney. Ba gel e maruwel ni yira tay ko re n’ey!

Re n’ey e be puguran ngodad e maruwel nib t’uf ni nge rin’ piyu Israel u nap’an nra sulod u Babylon. Kan digey e re nam nem u lan 70 e duw ndariy be’ ni be par riy. Machane i yiiynag Isaiah nra ayuwegrad Jehovah ni ngar ngongliyed e re nam nem ngki fel’ bayay. I gaar: “Yugu aram rogon ni kan n’ag e re but’ rok nem, ma bay gu mangnag bangi milay’, ni bod fare milay’ ni gu yung u lan yu Eden.” (Isa. 51:3, BT) I yag ni nge rin’ piyu Israel e re n’ey. Ere ku arrogon nra ayuweg Jehovah e piin yad ra tafanay e fayleng ni ngar ngongliyed nge mang paradis. Mus ko chiney nrayog ni ngam dag ni ga baadag ni ngam un i rin’ e re maruwel ney.

Reb e kanawo’ nrayog ni ngam rin’ e re n’ey riy e aram e ngaum tay e naun rom nge toobem nib beech mab yaram. Rayog ni ngam rin’ e re n’ey ni yugu aram rogon ni gathi aram e n’en ma rin’ e piin buguli yoror rom. Ku rayog ni ngam pi’ e ayuw ni ngan klinnag min ngongliy e yungi n’en ke kireb ko Tagil’ e Liyor nge naun ni yima tay e Assembly riy. Maku reb e rayog ni ngam fal’eg e babyor rom ni ngam pi’ e ayuw ngak e piin kar gafgowgad ni bochan e yoko’, ara durru’, ara boch ban’en ni ma yib ni yima gafgow riy ni faanra rayog rom. Re n’ey e ra m’ug riy ni ga baadag ni ngam ayuweg pi walagem ni faanra ke t’uf e ayuw rorad. Ere mu fithem ni nge lungum, ‘Rayog ni nggu fil boch e salap nrayog ni nggu maruwel ngay ni faanra ke pageg Jehovah ni nggu par u fayleng ndariy n’umngin nap’an, fa?’

NGE BUNG ROGOM NI NGAM AYUWEG E PIIN KAN FASEGRAD KO YAM’

De n’uw nap’an nga tomuren ni faseg Jesus fachi pin ni fak Jairus, me yog ni ngan pi’ ban’en nge kay. (Mark 5:42, 43) Sana de mo’maw’ ni ngan pi’ ban’en nge kay e chi pin nem ni 12 e duw rok. Machane am lemnag urngin e maruwel nib t’uf ni ngad rin’ed u nap’an nra lebguy Jesus e n’en ni micheg ni aram e “gubin e yam’ ni bay u lan e low ni bayi rung’ag laman, mi yad yib u lan e low rorad nga wuru’.” (John 5:28, 29) Yugu aram rogon nde yoor ban’en ni be weliy e Bible u murung’agen e re n’ey, machane gad manang ni piin yira fasegrad e ra t’uf ni ngan ayuwegrad ni nge yag e ggan ngorad, nge bang ni ngar pared riy, nge mad ni ngar chuwgad ngay. Ere gur, rayog ni ngam dag e chiney ni ga baadag ni ngam pi’ e ayuw, fa? Baaray boch e deer nrayog ni ngam fithem riy.

Nap’an ni yira yog ni bayi yib e en ma lekag e ulung, ma ga ma yog ni ngam pining nga tabinaw rom ko abich, fa? Nap’an nra tal boch e walag ko pigpig u Bethel ara nap’an nra mus e maruwel rok reb e walag ni ma lekag e ulung, ma gur, rayog ni ngam ayuwegrad ni ngar pirieged bang ni ngar pared riy, fa? Faanra yira tay reb e regional ara special convention ko gin ga ma par riy, ma gur, rayog ni ngam ognagem ni ngam pi’ e ayuw u m’on ngu tomuren e re convention nem ara ngam mada’nag e piin kar bad ni ngar uned ko convention, fa?

NGE BUNG ROGOM NI NGAM SKULNAG E PIIN YIRA FASEGRAD KO YAM’

Gad manang ni bokum bilyon e girdi’ ni yira fasegrad ko yam’ nrogon nib puluw ko Acts 24:15. Boor ko pi girdi’ ney e de yag ni ngar nanged Jehovah u m’on ni ngar m’ad. Machane ra mab e kanawo’ ngorad ni ngar nanged Jehovah u tomuren ni kan fasegrad.a Pi tapigpig rok Got ni yad ba yul’yul’ e yad ra skulnag e pi girdi’ ney. (Isa. 11:9) Ireray e n’en be athapeg Charlotte ni ka i machib u Europe, nge South America, nge Africa. I gaar: “Gu be athapeg ni nggu skulnag e piin kan fasegrad ko yam’. Nap’an nug ra beeg murung’agen be’ ni immoy kakrom, mab ga’ ni ma lungug u wan’ug: ‘Faan gomanga manang e cha’ney Jehovah, ma ra thil rogon e par rok.’ Gu be athapeg ni nggu weliy murung’agen Jehovah ngak e piin yira fasegrad nge rogon nra fel’ e par rorad ni faan yad ra pigpig ngak.”

Mus ko pi tapigpig rok Jehovah ni yad ba yul’yul’ ni ur moyed u m’on ni nge yib Jesus nga fayleng ni ku boor ban’en nib t’uf ni ngar filed. Mu lemnag gelngin e felfelan’ ni gad ra tay ni ngad weliyed ngak Daniel rogon ni lebug e pi yiiy ni i yoloy nga but’ nda i nang fan. (Dan. 12:8) Fa reb e mu lemnag rogon ni gad ra ayuweg Ruth nge Naomi ni ngar nangew rogon ni yib fare Messiah ko tabinaw rorow. Ri gad ra felfelan’ ni ngad skulnaged e girdi’ u ga’ngin yang e fayleng ndakuriy ban’en ko re fayleng nib kireb ney ni be magawonnagdad!

Uw rogon nrayog ni ngam dag e chiney ni ga baadag ni nge bung rogom ni ngam un ko re maruwel ney? Reb e kanawo’ e aram e ngam athamgil u rogon nrayog rom ni ngam salap u rogon ni ngam fil ban’en ku be’ ma ga be machib ni gubin ngiyal’. (Matt. 24:14) Mus ni faanra dabiyog ni ngam machib u rogon ni ga baadag e chiney ni bochan yangarem ara yugu boch ban’en, ma rogon e athamgil ni ga be tay e rayog ni nge m’ug riy ni ga baadag ni ngam skulnag e piin kan fasegrad.

Baaray l’agruw e deer nib ga’ fan ni aram e, Ga be athapeg ni ngam un i tafanay e fayleng, fa? Ga be athapeg ni ngam un i ngongliy e re fayleng ney nge mang paradis, mag ayuweg e piin kan fasegrad ko yam’ ko tin nib t’uf rorad, mag skulnagrad, fa? Rayog ni ngam dag ni ke bung rogom ni ngam par u fayleng ndariy n’umngin nap’an ni faan ga ra un i rin’ boch e maruwel e chiney ni taareb rogon ko tin ga ra rin’ u nap’an ni ga ra un i tafanay e fayleng!