Rogon ni Ke Micheg Jehovah Nra Paradis e Fayleng

1. Mang e yog Isaiah ni profet ngak piyu Israel?

I YOG Isaiah ni profet ni Jehovah e ir e “Got ko tin riyul’.” Fare bugithin ni kan pilyeg ni “tin riyul’” e be yip’ fan e “amen.” (Isa. 65:​16, NW, ftn.) “Amen” e be yip’ fan ni “nge par riy ni errogon” ara “arrogon.” Nap’an ni yira fanay fare bugithin ni “amen” u Bible ni fan ngak Jehovah ara Jesus, ma aram e be micheg nib riyul’ e n’en yibe weliy u murung’agrow. Ere ba tamilang e n’en ni yog Isaiah ngak piyu Israel, ni aram e: Gubin ngiyal’ nrayog ni nge pagan’uy ko n’en ke yiiynag Jehovah. Ke micheg nib riyul’ e re n’ey ni bochan e ke lebguy urngin ban’en ni ke micheg.

2. Mang fan nrayog ni nge pagan’dad ko tin ke micheg Jehovah ni fan ngodad boch nga m’on, ma mang deer e gad ra weliy e fulweg riy?

² Ere gur, rayog ni nge pagan’dad ko tin ke micheg Jehovah ni fan ngodad boch nga m’on, fa? Ba chugur i gaman 800 e duw nga tomuren e ngiyal’ ni immoy Isaiah riy, me weliy apostal Paul fan ni gubin ngiyal’ nrayog ni nge pagan’uy ko pi n’en ke micheg Got. I gaar: “Dabiyog ni nge lifith Got l’ugun.” (Heb. 6:18) Am lemnag e re n’ey. Ba alublub ni yigoo ran e ma yib riy e dabiyog ni nge yib e day riy. Ere ku arrogon Jehovah ndabiyog ni nge ban ni bochan e Ir e Ke Yib e tin riyul’ rok. Aram fan nrayog ni ngari pagan’dad nga urngin ban’en ni ke yog ni kub muun ngay urngin e tin ke micheg ni fan ngodad boch nga m’on. U lan e re article ney e gad ra weliy riy e fulweg ko gal deer ni baaray ni be gaar: Mang e ke micheg Jehovah nra pi’ ngodad boch nga m’on? Ma uw rogon ni ke micheg ngodad nra riyul’ e re n’ey?

MANG E KE MICHEG JEHOVAH?

3. (a) Mang reb e ban’en ni kan micheg nrib ga’ fan u wan’ e pi tapigpig rok Got? (Revelation 21:​3, 4) (b) Mang e ma yog boch e girdi’ u nap’an ni gad ra beeg e re thin ney ngorad?

³ N’en ke micheg Jehovah ni gad ra weliy murung’agen e ban’en nrib ga’ fan u wan’ e pi tapigpig rok u ga’ngin yang e fayleng. (Mu beeg e Revelation 21:​3, 4.) Ke micheg nra taw nga ba ngiyal’ ma “dab ku unim’, ma dab ki i kireban’uy, ma dab ku un yor, ma dab ku un amith.” Boor i gadad e ma fanay e re thin nu Bible ney ni be weliy murung’agen e par u Paradis u nap’an ni be machibnag e girdi’. Machane mang e ma yog boch e girdi’ u nap’an ni gad ra beeg e re thin ney ngorad? Rayog ni nge lungurad, “Rib manigil e pi n’ey, machane da gur lemnag nra riyul’.”

4. (a) Mang e manang Jehovah? (b) Nap’an ni micheg Jehovah e pi thin ney, ma mang e ki rin’?

⁴ Riyul’ nnap’an ni thagthagnag Jehovah nga laniyan’ apostal John ni nge yoloy e pi thin ney ni murung’agen e par u Paradis, ma manang ni gad ra weliy murung’agen e re n’ey ko girdi’ u nap’an ni gad be machibnag fare thin ni murung’agen Gil’ilungun e ngiyal’ ney. Ku manang ni boor e girdi’ nra mo’maw’ ngorad ni nge mich u wan’rad murung’agen “boch ban’en nib beech” nra yib. (Isa. 42:9; 60:2; 2 Kor. 4:​3, 4) Ere uw rogon ni ngad micheged nga laniyan’ e girdi’ ni ku gad ba muun ngay nra riyul’ fapi tow’ath ni kan weliy murung’agen ko Revelation 21:​3, 4? Gathi kemus ni micheg Jehovah e re n’ey, ya ki weliy boch i fan nrayog ni nge pagan’dad ngay. Mang e pi n’em?

KE MICHEG JEHOVAH NRA RIYUL’ E N’EN KE YOG

5. Mang thin nu Bible e be weliy boch i fan ni nge pagan’dad ko n’en ke micheg Got, ma mang e be yog?

⁵ Bay boch i fan ni nge pagan’dad ko n’en ke micheg Jehovah u murung’agen e Paradis ko pi verse ni baaray. Be gaar: “Faanem ni ke par nga tagil’ e gaar, ‘Chiney e [“Am sap,” NW] nggu thiliyeg urngin ban’en nge beech!’ Mi ki gaar ngog, ‘Mu yoloy e re n’ey, ya pi thin ney e ba riyul’ ma rayog ni ngan pagan’uy ngay.’ Me yog ni gaar, ‘Ke m’ay! I gag fare Alfa nge fare Omega, ni aram e tabolngin nge tungun.’”​—Rev. 21:​5, 6a.

6. Mang fan ni be gelnag fapi thin ko Revelation 21:​5, 6 e pagan’ rodad ko n’en ke micheg Got?

⁶ Mang fan ni be gelnag e pi thin ney e pagan’ rodad ko n’en ke micheg Got? Be weliy fare ke babyor ni Revelation Climax murung’agen e gal verse ney ni be gaar: “Gowa bod ni be sayinnag Jehovah bangi babyor ni be micheg ngak e girdi’ ni yad ba yul’yul’ nra yag e pi tow’ath ney ngorad boch nga m’on.”b N’en ke micheg e bay ko Revelation 21:​3, 4. Machane verse 5 nge 6 e bay e sayin rok riy ni be micheg nra riyul’ e n’en ke yog. Ere ngad guyed rogon ni ke micheg Jehovah nrayog ni nge pagan’dad ngak.

7. Mang e yugu ba thil u rarogon e n’en nnog u tabolngin e n’en ni micheg Got, ma mang nib ga’ fan e re n’ey?

⁷ Tabolngin e verse 5 e be gaar: “Faanem ni ke par nga tagil’ e gaar.” (Rev. 21:5a) Kemus ni dalip yay ni be weliy fare babyor ni Revelation murung’agen boch e thin ni Jehovah e be yog, ma ireray bayay riy. Ere gathi reb e engel nib gel gelngin, ara Jesus ni kan faseg ko yam’ e ir e be yog e pi thin ney, ya Jehovah! Re n’ey e be micheg nrayog ni ngari pagan’dad ko tin migid e thin ni yog. Mang fan? Ya bochan ni Jehovah e ‘der ma ban.’ (Titus 1:2) Re n’ey e be micheg nrayog ni ngari pagan’dad ko fapi thin ni bay ko Revelation 21:​5, 6.

“AM SAP NGGU THILIYEG URNGIN BAN’EN NGE BEECH”

8. Mang e yog Jehovah ni nge tamilangnag nra riyul’ e n’en ke micheg? (Isaiah 46:10)

⁸ Bin migid e ngad weliyed murung’agen fare thin ni be gaar, “Am sap”! (Rev. 21:5) Boor yay ni kan fanay fare thin ni Greek ni kan pilyeg ni “am sap” u lan fare babyor ni Revelation. I yog ba ken e babyor ni fan nnog e re thin ney e “bochan ni nge k’aring e en be beeg ni nge tiyan’ ko tin migid e thin.” Mang e tin migid e thin? Aram e thin rok Got ni be gaar: “Nggu thiliyeg urngin ban’en nge beech!” Riyul’ ni be weliy Jehovah murung’agen boch ban’en nra buch boch nga m’on, machane rogon u wan’ e riyul’ nra buch. Ere aram fan ni be non u reb e kanawo’ nra m’ug riy ni gowa ke buch e pi n’ey.​—Mu beeg e Isaiah 46:10.

9. (a) Mang l’agruw ban’en ni be weliy fare thin ni “nggu thiliyeg urngin ban’en nge beech” murung’agen? (b) Mang e ra buch ko fare “tharmiy” nge “fayleng” ni bay e chiney?

⁹ Chiney e ngad weliyed e tin migid e thin ni bay ko Revelation 21:5 ni be gaar: “Nggu thiliyeg urngin ban’en nge beech!” Re thin ney ni kan fanay u lan e re guruy ney e be weliy murung’agen l’agruw ban’en nra rin’ Jehovah, ni aram e reb e nge yon’ lon ban’en ma reb e nge beechnag. Som’on e mang e nge yon’ Jehovah lon? Be gaar e Revelation 21:1: “Fa bin som’on e tharmiy nge bin som’on e fayleng e yan nga bang.” “Fa bin som’on e tharmiy” e be yip’ fan e pi am ni bay u tan pa’ Satan nge pi moonyan’ rok. (Matt. 4:​8, 9; 1 John 5:19) “Fayleng” nrogon ni kan fanay u Bible e rayog ni nge yip’ fan e girdi’ ni be par riy. (Gen. 11:1; Ps. 96:1) Ere “bin som’on e fayleng” e be yip’ fan e girdi’ nib kireb e ngiyal’ ney. Gathi ra fal’eg Jehovah fare “tharmiy” nge “fayleng” ni bay e chiney ni nge fel’ boch, ya n’en nra rin’ e ra yon’ lon. Ra tay “reb e tharmiy nge reb e fayleng nib beech” nga lon e bin bay e chiney ni aram e be yip’ fan reb e am nib beech ni be gagiyegnag ba ulung i girdi’ ni yad ba mat’aw.

10. Mang e ra beechnag Jehovah?

¹⁰ Be yog e Revelation 21:5 e n’en be yog Jehovah u murung’agen e pi n’en nra beechnag. Mu tay fanam i yan riy nde gaar Jehovah: “Nggu ngongliy boch ban’en nib beech.” Ya gaar: “Nggu thiliyeg urngin ban’en nge beech!” Ere ra beechnag Jehovah e fayleng nge girdi’ ni aram e nge ngongliy e fayleng nge manigil me ayuweg e girdi’ ngar flontgad. I yiiynag Isaiah ni yira ngongliy e fayleng ni ga’ngin nge manigil ni bod fare milay’ nu Eden. Ku yira beechnagdad ni be’ nge be’. Yira golnag e piin nib mugutgut, nge piin nib malmit, nge piin nib biling, mu kun faseg e piin kar m’ad.​—Isa. 25:8; 35:​1-7.

“PI THIN NEY E BA RIYUL’ MA RAYOG NI NGAN PAGAN’UY NGAY. . . . KE M’AY!”

11. Mang e yog Jehovah ngak John ni nge rin’, ma mang fan?

¹¹ Mang e ki yog Got ni be micheg nrayog ni nge pagan’dad ngak? I gaar Jehovah ngak John: “Mu yoloy e re n’ey, ya pi thin ney e ba riyul’ ma rayog ni ngan pagan’uy ngay.” (Rev. 21:5) Gathi kemus ni gaar Jehovah ngak “mu yoloy e re n’ey,” ya ki weliy fan ngak. I gaar: “Ya pi thin ney e ba riyul’ ma rayog ni ngan pagan’uy ngay.” Re n’ey e be yip’ fan ni thin rok Got e ba puluw ma rayog ni ngan pagan’uy ngay. Gad ba felfelan’ ni fol John ko fapi thin nnog ngak ni be gaar, “mu yoloy e re n’ey.” Bochan e re n’ey, ma aram fan nrayog ni ngad beeged murung’agen e Paradis ni ke micheg Got ma gad fal’eg i lemnag e pi tow’ath nra yag ngodad boch nga m’on.

12. Mang fan nrayog ni nge gaar Jehovah: “Ke m’ay!”

¹² Mang e yog Got ni migid? I gaar: “Ke m’ay!” (Rev. 21:6) Chiney e be non Jehovah u reb e kanawo’ ni be m’ug riy ni gowa ke buch urngin ban’en ni ke micheg u murung’agen e Paradis. Ma rayog ni nge non ni aray rogon ni bochan e dariy ban’en nrayog ni nge taleg ndabi lebguy e n’en nib m’agan’ ngay. Tomuren miki yog ban’en ni be micheg ngodad nib mudugil nra riyul’ e tin ke micheg. Mang e re n’em?

“I GAG FARE ALFA NGE FARE OMEGA”

13. Mang fan ni gaar Jehovah: “I gag fare Alfa nge fare Omega”?

¹³ Kad weliyed faram ni dalip yay ni non Jehovah ngak John u nap’an nni pilyeg e changar rok. (Rev. 1:8; 21:​5, 6; 22:13) Ma gubin yay ni non ngak me yog ni gaar: “I gag fare Alfa nge fare Omega.” Alfa e bin som’on e yol ni bay u fithik’ e pi yol ni Greek, ma omega e bin tomur. Ere nap’an ni yog Jehovah ni ir “fare Alfa nge fare Omega,” ma be yip’ fan nnap’an nra tababnag ban’en mab mudugil nra mu’nag.

14. (a) Mu weliy murung’agen ba ngiyal’ ni gowa ke yog Jehovah fare bugithin ni “Alfa” nge ba ngiyal’ ni gowa ra yog fare bugithin ni “Omega.” (b) Mang e be micheg e Genesis 2:​1-3 ngodad?

¹⁴ Tomuren ni sunmiy Jehovah Adam nge Efa, me yog e n’en nib m’agan’ ngay ni fan ko girdi’ nge fayleng. Be gaar e Bible: “Me tow’athnagrow ko re bugithin ni baaray ni yog ni gaar, ‘Mu diyengow nge yoor pi fakmew, nge wer e piin ni owchemew nga gubin yang u fayleng ngar pired riy mi yad suwey.’” (Gen. 1:28) Ere nap’an ni yog Jehovah e pi thin ney, ma gowa be gaar “Alfa.” I weliy e n’en nib m’agan’ ngay ni aram e: Ra taw nga ba ngiyal’ ma ra wer e piin owchen Adam nge Efa ni yad ma fol ma yad ba flont u gubin yang u fayleng, mar ngongliyed nge mang paradis. Ma nap’an nra lebug e n’en nib m’agan’ ngay, ma gowa ke gaar “Omega.” Nap’an ni mu’ i ngongliy e “fayleng, nge lan e lang, nge urngin ban’en ni bay u daken e but’ ngu lan e lang,” ma aram me yog ban’en ni nge dag nib mudugil nra lebguy e n’en nib m’agan’ ngay. Bay e re thin ney ko Genesis 2:​1-3. (Mu beeg.) I yog Jehovah ni bin medlip e rran e ba thothup. Mang e be yip’ fan e re n’ey? I micheg Jehovah nra lebug e n’en nib m’agan’ ngay ni fan ko girdi’ nge fayleng u tungun e bin medlip e rran.

15. Mang fan nrayog ni ngan lemnag ni ke taleg Satan ndabi lebug e n’en nib m’agan’ Got ngay ni fan ko girdi’?

¹⁵ Tomuren ni togopuluw Adam nge Efa, ma aram mar mangew l’agruw e tadenen me af e denen nge yam’ ngak pi fakrow. (Rom. 5:12) Bochan e re n’ey ma rayog ni ngan lemnag ni ke taleg Satan ndabi lebug e n’en nib m’agan’ Got ngay, ni aram e nge wer e girdi’ u fayleng ni yad ba flont ma yad ma fol. Ere gowa bod ni ke n’igin Satan ndabiyog ni nge gaar Jehovah “Omega.” Sana rayog ni lemnag ndabkiyog ni nge lebguy Jehovah e n’en nib m’agan’ ngay. Rayog ni lemnag nra thang Got Adam nge Efa, miki sunmiy l’agruw ni’ ni yow ba flont ni ngar lebguyew e n’en nib m’agan’ ngay ni fan ko girdi’. Machane faan gomanga rin’ Got e re n’ey, ma ra yog Moonyan’ nib malulfith l’igin. Mang fan? Ya be yog e Genesis 1:28 ni ke yog Jehovah ngak Adam nge Efa nra wer e piin owcherow nga gubin yang u fayleng.

16. Mang fan ni lemnag Satan nrayog ni nge yog nde yag rok Jehovah ni nge lebguy e n’en nib m’agan’ ngay?

¹⁶ Ku mang reb e ban’en ni lemnag Satan nra dugliy Got ni nge rin’? Sana rayog ni lemnag nra pag Jehovah Adam nge Efa ni ngar fakayew boch e bitir ndariy ba ngiyal’ ni yad ra flont. (Ekl. 7:20; Rom. 3:23) Faanra aram rogon ma aram e rayog rok Moonyan’ ni nge yog nde yag rok Jehovah ni nge lebguy e n’en nib m’agan’ ngay. Mang fan? Ya dabi wer e girdi’ ni yad ba flont u fayleng.

17. Mang e rin’ Jehovah ya nge yag ni puf e magawon ni ke sum ni bochan e togopuluw ni tay Satan nge gal nsom’on e girdi’? Mang angin nra yib riy? (Kum guy e sasing.)

¹⁷ I rin’ Jehovah ban’en ni nge pithig e magawon ni ke sum ni bochan e togopuluw ni tay Satan nge gal nsom’on e girdi’ u reb e kanawo’ nrayog nde lemnag Satan nra rin’ riy. (Ps. 92:5) I micheg Jehovah ni gathi ir be’ nib malulfith l’igin, ya pag Adam nge Efa ni ngar fakayew e bitir. Ngemu’ miki dag ni faanra ke yog nra rin’ ban’en, ma dariy ban’en nrayog ni nge taleg ndabi rin’ e n’en ke lemnag. I guy rogon ni nge lebug e n’en nib m’agan’ ngay ni aram e pi’ be’ ni “fak” ara owchen ni ir e ra chuweg pi fak Adam nge Efa ni yad ra fol u tan gelngin e denen nge yam’. (Gen. 3:15; 22:18) Ba mudugil nde lemnag Satan nra pi’ Jehovah fare biyul! Mang fan? Ya fare biyul e ni pi’ ni bochan e t’ufeg. (Matt. 20:28; John 3:16) Biney e fel’ngin e dariy rok Satan ya yigoo ir e ma lemnag ir. Ere mang e ra buch ni bochan fare biyul ni kan pi’? Ra taw nga tungun fare Biyu’ i Duw ma urngin i pi fak Adam nge Efa ni kar flontgad ma yad ma fol e yad ra tafanay e fayleng ni ke paradis ni bod ni lemnag Jehovah aram ko som’on. Aram e ngiyal’ ni gowa ra gaar Jehovah “Omega.”

ROGON NI NGARI PAGAN’DAD KO N’EN KE MICHEG JEHOVAH U MURUNG’AGEN E PARADIS

18. Mang dalip ban’en ni ke micheg Got ngodad? (Kum guy fare kahol ni kenggin e “Dalip i Fan ni Nge Pagan’dad ko N’en Ke Micheg Jehovah.”)

¹⁸ Kad weliyed ko re article ney boch i fan nrayog ni nge pagan’dad nra Paradis e fayleng. Ere mang e rayog ni nga dogned ko girdi’ ni nge micheg nga lanin’rad nriyul’ nra buch e re n’ey? Som’on e Jehovah e ir e ke micheg e re n’ey. Be gaar fare babyor ni Revelation: “Faanem ni ke par nga tagil’ e gaar, ‘Chiney e [“Am sap,” NW] nggu thiliyeg urngin ban’en nge beech!’” Bay e gonop rok, nge gelngin, maku baadag ni nge lebguy e n’en ke micheg. Bin l’agruw e rib mudugil nra riyul’ e n’en ke micheg Jehovah. Ere rogon u wan’ e gowa ke buch e pi n’ey. Aram fan ni yog ni gaar: “Pi thin ney e ba riyul’ ma rayog ni ngan pagan’uy ngay. . . . Ke m’ay!” Bin dalip e nap’an nra tababnag Jehovah ban’en mab mudugil nra mu’nag. Aram fan ni gaar: “I gag fare Alfa nge fare Omega.” Ra micheg Jehovah nib malulfith l’igin Satan ma dabiyog ni nge taleg ndabi lebguy e n’en nib m’agan’ ngay.

19. Mang e rayog ni ngam rin’ ni faanra der riyul’ u wan’ e girdi’ e n’en ke micheg Got u murung’agen e Paradis?

¹⁹ Dab mu pagtalin ni gubin yay ni ga ra weliy ko girdi’ u nap’an e machib nra riyul’ e n’en ke micheg Jehovah, ma aram e ka ga be micheg e pi n’em nga lanin’um. Ere yay ni migid ni ga ra beeg ngak be’ e n’en kan micheg ko Revelation 21:4 ni murung’agen e Paradis ni bay yib me gaar, “Rib manigil e pi n’ey, machane da gur lemnag nra riyul’,” ma mang e rayog ni ngam rin’? Rayog ni ngam beeg e verse 5 nge 6 ngak mag tamilangnag fan. Mu tamilangnag rogon ni ke micheg Jehovah nra riyul’ e tin ke yog ni gowa bod ni ke tay e sayin rok ngay.​—Isa. 65:16.