Rogon ni Nge Par nib Gel e T’ufeg u Thildad

1-2. (a) Mang fan nrayog ni nge yog apostal Paul ni t’ufeg e aram e “bin th’abi ga’” e fel’ngin? (b) Mang deer e gad ra weliy e fulweg riy?

NAP’AN ni weliy apostal Paul murung’agen e michan’, nge athap, nge t’ufeg me yog ni ‘bin th’abi ga’ ko pi [fel’ngin] ney e rogon ni gadad ba t’uf rok Got nge rogon nib t’uf Got rodad nge girdi’.’ (1 Kor. 13:13) Mang fan nrayog ni nge yog Paul e re n’ey? Ra boch nga m’on ma daki t’uf ni nge mich u wan’dad e pi n’en ke micheg Got u murung’agen e bin nib beech e fayleng rok, ara da athapeged ni nge lebug e pi n’ey ni bochan e goo ke buch. Machane gubin ngiyal’ nra t’uf ni ngad t’ufeged Jehovah nge girdi’. Bin riyul’ riy e ra i gel e t’ufeg rodad ngak Jehovah nge girdi’ ndariy n’umngin nap’an.

² Ere bochan ni gubin ngiyal’ nra t’uf ni ngad daged e t’ufeg, ma aram fan ni gad ra weliy e fulweg u dalip e deer. Bin som’on e mang fan nsusun e nge bagadad me t’ufeg bagadad? Ma bin l’agruw e uw rogon ni nge bagadad me t’ufeg bagadad? Ma bin dalip e uw rogon ni nge par nib gel e t’ufeg u thildad?

MANG FAN NSUSUN E NGE BAGADAD ME T’UFEG BAGADAD?

3. Mang boch i fan ni nge bagadad me t’ufeg bagadad?

³ Mang nib ga’ fan ni nge bagadad me t’ufeg bagadad? Reb i fan e bochan ni t’ufeg e be micheg ni gadad e tin riyul’ e Kristiano. I gaar Jesus ngak e pi apostal rok: “Faanra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.” (John 13:35) Maku reb e faanra ud t’ufeged gadad, ma aram e ra ud pared nib taareban’dad. I yog Paul ni t’ufeg e “ir e ma chugumiy urngin ban’en nga taabang nge par ni ke fel’ rogon.” (Kol. 3:14) Machane ku bay reb i fan nib ga’ fan ni nge bagadad me t’ufeg bagadad. I yog apostal John ngak e piin taareb e michan’ rorad ni gaar: “En nib t’uf Got rok e ku er rogon nthingari t’uf rok walagen ni girdien Kristus.” (1 John 4:21) Ere faanra bagadad me t’ufeg bagadad, ma aram e gad be t’ufeg Got.

4-5. Mu susunnag rogon nib peth e t’ufeg rodad ngak Got nga rogon ni gad ma t’ufeged gadad.

⁴ Uw rogon nib peth e t’ufeg rodad ngak Got ko t’ufeg rodad ngak pi walagdad? Ra ngan susunnag ma ngam lemnag rogon nib peth gum’ircha’dad nga yu yang u dowdad. Bay ba nguchey u pa’dad ni ma mithmith ni ma math e togta ngay ni nge guy ko be mithmith nib gel ara ke war, ma re n’ey e rayog ni nge ayuweg ni nge nang ko kab fel’ rogon ni be maruwel gum’ircha’dad fa danga’. Ere mang e rayog ni ngad filed ko re n’ey?

⁵ Nap’an nra math e togta ko re nguchey ney ni bay u pa’dad, ma rayog ni nge nang rogon feni fel’ rogon ni be maruwel gum’ircha’dad. Ere ku arrogon ni faan gad ra lemnag gelngin e t’ufeg rodad ngak yugu boch e girdi’, ma aram e rayog ni ngkud nanged gelngin feni t’uf Got rodad. Faanra gad be guy ni ke war e t’ufeg rodad ngak e pi walag, ma aram e rayog ni be m’ug riy ni ku arrogon e t’ufeg rodad ngak Got ni kki war. Machane faanra gubin ngiyal’ ni gad ma t’ufeg e pi walag, ma aram e be m’ug riy nib gel e t’ufeg rodad ngak Got.

6. Mang fan nsusun e nge magafan’dad ni faanra be war e t’ufeg rodad ngak e pi walag? (1 John 4:​7-9, 11)

⁶ Faanra be war e t’ufeg rodad ngak e pi walag, ma aram e susun ni nge magafan’dad ko re n’ey. Mang fan? Ya aram e be yip’ fan ni ke war e tha’ u thildad Jehovah. I tamilangnag apostal John e re n’ey u nap’an ni puguran ngodad ni gaar: “Dabiyog ni nge t’uf Got rok [be’], ni be’ nder guy ni faanra de t’uf rok walagen ni girdien Kristus ni be’ ni be guy.” (1 John 4:20) Ere mang e gad be fil ko re n’ey? Faanra “bagadad me t’uf rok bagadad,” ma aram e gad ra fel’ u wan’ Jehovah.​—Mu beeg e 1 John 4:​7-9, 11.

UW ROGON NI NGE BAGADAD ME T’UFEG BAGADAD?

7-8. Mang boch e kanawo’ nrayog ni ngad daged riy nib t’uf bagadad rok bagadad?

⁷ Boor yay ni gad ra pirieg fare thin ni be gaar “nge bigimed me t’uf bigimed rok” u lan e Thin rok Got. (John 15:​12, 17; Rom. 13:8; 1 Thess. 4:9; 1 Pet. 1:22; 1 John 4:11) Machane t’ufeg e ban’en ni bay u gum’ircha’dad ndariy be’ nrayog ni nge guy. Ere uw rogon ni ngad daged ngak pi walagdad ni yad ba t’uf rodad? Ngad daged u daken e thin nge ngongol rodad.

⁸ Boor e kanawo’ nrayog ni ngad daged riy ngak pi walagdad ni yad ba t’uf rodad. Baaray boch ni be yog e Bible ni be gaar: “Nguum weliyed e tin riyul’ ngomed.” (Zek. 8:​16, BT) “Um pired nib fel’ thilmed.” (Mark 9:50) “Nge pasigan’med ngay ni nge bigimed mi i ta’ fan bigimed.” (Rom. 12:10) “Um pired nra bigimed ma ba t’uf rok bigimed.” (Rom. 15:7) “Um n’iged fan u wun’med e n’en ni manga ke kirebnag bigimed u laniyan’ bigimed.” (Kol. 3:13) “Nge bigimed me ayuweg bigimed nge un i fek gilban.” (Gal. 6:2) “Nge bigimed mi i fal’eg laniyan’ bigimed.” (1 Thess. 4:​18, NW) “Nge bigimed mi i pi’ e athamgil nga laniyan’ bigimed.” (1 Thess. 5:11) “[Nge] bigimed me pi’ e meybil rok bigimed ngak Got.”​—Jas. 5:16.

9. Mang fan nrogon ni gad ma fal’eg laniyan’ yugu boch e girdi’ e aram reb e kanawo’ nib ga’ fan nrayog ni ngad daged riy ngorad ni yad ba t’uf rodad? (Kum guy e sasing.)

⁹ Ere ngad weliyed reb e kanawo’ nrayog ni ngad daged riy nib t’uf yugu boch e girdi’ rodad. Gad ra weliy e n’en ni yog Paul ni gaar: “Nge bigimed mi i fal’eg laniyan’ bigimed.” Mang fan nrogon ni gad ma fal’eg laniyan’ yugu boch e girdi’ e aram reb e kanawo’ nib ga’ fan nrayog ni ngad daged riy ngorad ni yad ba t’uf rodad? I yog ba ken e babyor ni be weliy murung’agen e Bible ni fare bugithin ni fanay Paul ni fan ko fare thin ni “fal’eg laniyan’” e be yip’ fan ni “nge sak’iy be’ nga tooben be’ ni be mada’nag reb e magawon nib mo’maw’ ni nge pi’ e athamgil nga laniyan’.” Ere nap’an ni gad ra fal’eg laniyan’ reb e walag ni be gafgow, ma aram e gad be ayuweg ni nge ulul ko pigpig ni be tay ngak Jehovah u fithik’ e yul’yul’. Ma gubin yay ni gad ra fal’eg laniyan’ reb e walag, ma aram e gad be dag ngak nib t’uf rodad.​—2 Kor. 7:​6, 7, 13.

10. Uw rogon nib peth rogon ni ma kireban’dad ko girdi’ nga rogon ni gad ma fal’eg lanin’rad?

¹⁰ Rogon ni ma kireban’dad ko girdi’ e ba peth nga rogon ni gad ma fal’eg lanin’rad. Ni uw rogon? Be’ ni ma kireban’ ko girdi’ e baadag ni nge fal’eg lanin’rad me ayuwegrad. Ere som’on e ra kireban’um ngak be’ mfini yag ni ngam fal’eg laniyan’. Mu tay fanam i yan riy ni yog Paul nrogon ni ma kireban’ Jehovah ko girdi’ e ba peth nga rogon ni ma fal’eg lanin’rad. I yog ni Jehovah e ir e en “Chitamangiy nrib tarunguy e girdi’ ni ir fare Got ni ma fal’eg lanin’uy.” (2 Kor. 1:​3, NW) Be yog reb e study note ko re verse ney ni fanay Paul fare thin “nrib tarunguy” ni nge tamilangnag rogon e kireban’ ni be tay be’ ko girdi’. Ere aram fan ni yima yog ni “Got e ir e en Chitamangiy ara En Ke Yib e runguy rok ni bochan e ma kireban’ ko girdi’.” Ma bochan ni ma kireban’ ngodad, ma aram e n’en ma k’aring ni nge fal’eg lanin’dad u “urngin e gafgow nge kireban’ ni ma yib ngodad.” (2 Kor. 1:4) Jehovah e ma baudeg ma ma fal’eg laniyan’ e piin kari kireban’rad, ni bod e ran nib beech ni ma yib ko alublub ni ma chuweg e belel rok e piin ke yib e belel ngorad. Ere uw rogon nrayog ni ngad folwokgad rok Jehovah u rogon ni ma kireban’ ko girdi’ ma be fal’eg lanin’rad? Reb e kanawo’ nrayog ni ngad rin’ed e re n’ey riy e aram e ngad maruweliyed boch e fel’ngin nra ayuwegdad ni nge kireban’dad ko girdi’ mad fal’eged lanin’rad. Ere mang boch e pi fel’ngin ney?

11. Ku mang boch e fel’ngin nthingar da maruweliyed ya nge yag ni ngaud daged fare t’ufeg nra k’aringdad ni ngad fal’eged laniyan’ yugu boch e girdi’ nrogon ni be yog e Kolose 3:12 nge 1 Peter 3:8?

¹¹ Mang e ra ayuwegdad ni ngaud daged fare t’ufeg nib t’uf ni ngad daged ya nge yag ni ‘nge bagadad mi i fal’eg laniyan’ bagadad’ ni gubin e rran? Ba t’uf ni nge taareb rogon e lem rodad ngodad, mu ud daged e t’ufeg nge sumunguy ngodad. (Mu beeg e Kolose 3:12; 1 Peter 3:8.) Uw rogon nra ayuwegdad e pi fel’ngin ney? Faanra be kireban’dad ko pi walagdad ma riyul’ ni gad be lemnagrad, ma aram e ri gad ra adag ni ngad fal’eged lanin’rad u nap’an ni yad be gafgow. I yog Jesus ni “l’uguney e ma weliy e n’en ni ke sugnag lanin’uy. Ya be’ nib fel’ e ma fek e tin nib fel’ ban’en ko tin nib fel’ ni ke kunuy.” (Matt. 12:​34, 35) Ra ud fal’eged laniyan’ pi walagdad, ma riyul’ ni aram reb e kanawo’ nib ga’ fan ni gad be dag riy ni yad ba t’uf rodad.

UW ROGON NI NGE PAR NIB GEL E T’UFEG U THILDAD?

12. (a) Mang fan nib t’uf ni ngad kol ayuwgad? (b) Mang deer e gad ra weliy e fulweg riy e chiney?

¹² Gad gubin ni gad baadag ni ngad ululgad ni “nge bagadad me t’uf rok bagadad.” (1 John 4:7) Machane ba ga’ fan ndab da paged talin ni yog Jesus u m’on riy ni “rogon nib t’uf be’ rok be’ e bayi meewar.” (Matt. 24:12) Gathi be yog Jesus u roy ni yooren i gachalpen e ra buch e re n’ey rorad. Yugu aram rogon, ma susun e ngad kol ayuwgad ya nge dabi af rarogon e girdi’ ko re fayleng ney ngodad ndariy e t’ufeg rorad. Ere chiney e ngad weliyed e fulweg ko re deer ni baaray nib ga’ fan ni be gaar: Ka bay reb e kanawo’ nrayog ni ngad nanged riy ko kab gel e t’ufeg rodad ngak pi walagdad fa dariy?

13. Mang e rayog ni nge skengnag rogon e t’ufeg rodad ngak pi walagdad?

¹³ Reb e kanawo’ ni ngad nanged riy gelngin e t’ufeg ni bay rodad e aram e ngad lemnaged rogon e n’en gad ma rin’ u nap’an ni gad ra mada’nag boch ban’en u lan e yafos rodad. (2 Kor. 8:8) Bay reb ko pi n’ey ni weliy apostal Peter murung’agen u nap’an ni gaar: “Re n’en ni ir e th’abi ga’ fan u fithik’ urngin ban’en e ngari bigimed me t’uf rok bigimed, ya rogon nib t’uf be’ rok be’ e ra upunguy boor e denen.” (1 Pet. 4:8) Ere pi meewar rok boch e girdi’ nge rarogorad ndawor ra flontgad e rayog ni nge skengnag rogon e t’ufeg rodad ngorad.

14. Ba miti mang t’ufeg e ba t’uf ni nge yag ngodad nrogon ni be yog e 1 Peter 4:8? Mu susunnag.

¹⁴ Chiney e ngad fal’eged i yaliy fapi thin ni yog Peter. Gin som’on ko verse 8 e be weliy rarogon e re miti t’ufeg nib t’uf ni nge yag ngodad ni aram e ‘ngari bagadad me t’uf rok bagadad.’ Fare bugithin ni fanay Peter ni fan ko fare bugithin ni “ngari” e be yip’ fan ban’en ni “ngan ngereg.” Gin migid ko re verse ney e be weliy angin nrayog ni nge yib ngodad ni faanra bagadad mi ri t’uf rok bagadad. Re t’ufeg ney e rayog ni nge upunguy e denen rok pi walagdad. Mu susunnag reb e tebel ni boor yang riy ni ke magur. Rayog ni ngan fek bangi mad nga non’ nga daken fare tebel ni nge upunguy boor yang ni ke kireb riy. Ere ku arrogodad ni faanra rib t’uf pi walagdad rodad, ma aram e gathi kemus ni taareb ara l’agruw e kireb rorad e gad ra n’ag fan, ya t’ufeg rodad e ra upunguy “boor e denen” rorad.

15. Mang e rayog ni ngad rin’ed ni faanra rib t’uf pi walagdad rodad? (Kolose 3:13)

¹⁵ Susun e ngari gel e t’ufeg rodad nge yan i taw nga reb e dodow nrayog ni nge mithmithegdad ni ngad n’aged fan e kireb rok pi walagdad ni yugu aram rogon nrib mo’maw’ ngodad. (Mu beeg e Kolose 3:13.) Faan gad ra n’ag fan e kireb rok pi walagdad, ma aram e gad be dag nib gel e t’ufeg rodad ma gad baadag ni ngad felfelan’naged Jehovah. Mang e ku rayog ni nge ayuwegdad ni nge dab kud lemnaged boch ban’en u rarogon yugu boch e girdi’ ndubdad nge oloboch rorad?

16-17. Mang e ku ra ayuwegdad ni nge dab kud lemnaged nochi oloboch nib achig ni ke rin’ pi walagdad? Mu susunnag. (Kum guy e sasing.)

¹⁶ Um sap nga fel’ngin pi walagem ma gathi thibngirad. Am lemnag e re n’ey. Susun e gimed bay boch e walag u reb e abich. Gimed be felfelan’ ma nga tomuren fare abich mi gimed muulung nga taabang ni ngam sasinggad. Bin riyul’ riy e dalip yang e sasing nim fek ya ri chey ma bay bang riy ndabum. Machane nap’an nni mu’ ko sasing mag guy ni bay bang riy ni bay reb e walag ni pumoon riy nder siminmin. Ere mang e ga ra rin’ ko fagi sasing? Ga ra chuweg ya ka bay l’agruw yang ni gubin e girdi’ riy ni yad be siminmin nib muun fare walag ngay.

¹⁷ Ere ngad taareb rogonnaged fa gal yang i sasing ni kad chaariyed ko pi n’en gad ma tay u lanin’dad. Ba ga’ ni gad ma tay u lanin’dad e pi n’en nib fel’ ni gad ma rin’ pi walagdad u taabang. Machane susun e yan i ba ngiyal’ me yog ara rin’ reb e walag ban’en ndubdad. Ere mang e susun ni ngad rin’ed ko re n’em ni ke par u lanin’dad? Susun e ngad guyed rogon ni ngad chuweged ni bod rogon fagi sasing ndubdad. (Prov. 19:11; Efe. 4:32) Rayog ni ngad chuweged u lanin’dad nochi oloboch nib achig ni ke rin’ pi walagdad ni bochan e boor ban’en nib manigil ni kad rin’ed u taabang ni ka bay u lanin’dad. Ireray e pi n’en gad baadag ni ngad ted u lanin’dad mu ud lemnaged.

FENI GA’ FAN NI NGAD DAGED NIB T’UF BAGADAD ROK BAGADAD E NGIYAL’ NEY

18. Mang boch ban’en u murung’agen e t’ufeg ni kad filed ko re article ney?

¹⁸ Mang fan ni gad baadag ni ngaud pared nib gel e t’ufeg u thildad? Kad filed ni faanra ud t’ufeged pi walagdad, ma aram e gad be t’ufeg Jehovah. Uw rogon ni ngad daged nib t’uf pi walagdad rodad? Reb e kanawo’ ni gad ma rin’ e re n’ey riy e aram e gad ma fal’eg lanin’rad. Faanra ma kireban’dad ko girdi’, ma aram e rayog ni ‘nge bagadad mi i fal’eg laniyan’ bagadad.’ Uw rogon ni nge par nib gel e t’ufeg u thildad? Aram e ngad athamgilgad u rogon nrayog rodad ni ngaud n’aged fan e kireb rok pi walagdad.

19. Mang nrib ga’ fan ni ngad daged nib t’uf bagadad rok bagadad e ngiyal’ ney?

¹⁹ Mang nrib ga’ fan ni ngad daged nib t’uf bagadad rok bagadad e ngiyal’ ney? Baaray fan ni yog Peter ni gaar: “Ke chugur nga tungun urngin ban’en. . . . [Ere] ngari bigimed me t’uf rok bigimed.” (1 Pet. 4:​7, 8) Mang e gad manang nra buch u nap’an nra chugur nga tungun e re fayleng nib kireb ney? Nap’an ni weliy Jesus murung’agen pi gachalpen, me yiiynag ni gaar: “Urngin e girdi’ ni bay ra fanenikayed gimed ni bochag.” (Matt. 24:9) Ra ngad athamgilgad u fithik’ e fanenikan ni yibe tay ngodad, ma aram e ba t’uf ni ngad pared nib taareban’dad. Faan gad ra rin’ e re n’ey, ma aram e dabiyog rok Satan ni nge ruw raba’nagdad ni bochan e be chugurnagdad e t’ufeg nga taabang ni aram e n’en “ma chugumiy urngin ban’en nga taabang nge par ni ke fel’ rogon.”​—Kol. 3:14; Fil. 2:​1, 2.