Ọmọdé Kan Tí Ìgbàgbọ́ Ẹ̀ Lágbára

ỌMỌKÙNRIN kan tó ń jẹ́ Dustin máa ń jókòó ti màmá ẹ̀ lẹ́ẹ̀kọ̀ọ̀kan nígbà tí obìnrin Ẹlẹ́rìí Jèhófà kan bá ń kọ́ màmá ẹ̀ lẹ́kọ̀ọ́ Bíbélì. Bó tilẹ̀ jẹ́ pé ọmọ ọdún mọ́kànlá péré ni, ó láròjinlẹ̀, ọ̀pọ̀ ìbéèrè tó fọgbọ́n yọ ló sì máa ń béèrè. Kò pẹ́ tó fi ní kí arábìnrin tó jẹ́ míṣọ́nnárì tẹ́lẹ̀ rí tó kọ́ ìyá ẹ̀ lẹ́kọ̀ọ́ wá máa kọ́ òun náà lẹ́kọ̀ọ́ Bíbélì. Bákan náà, ó bẹ̀rẹ̀ sí í kọ́ àwọn ẹgbẹ́ ẹ̀ níléèwé lẹ́kọ̀ọ́ tó ń kọ́.

Dustin bẹ̀rẹ̀ sí í lọ sípàdé ní Gbọ̀ngàn Ìjọba tó wà nítòsí wọn, kódà ó ti ń dáhùn nípàdé nígbà tí apá ibi tí àwùjọ ti máa ń lóhun sí ìpàdé bá ń lọ lọ́wọ́. Nígbà tóun àtàwọn àbúrò ẹ̀ lọ rí bàbá tó bí wọn lọ́mọ, bàbá wọn fi dandan lé e pé kí wọ́n tẹ̀ lé òun lọ sí ṣọ́ọ̀ṣì. Dustin ṣàlàyé ìdí tó fi jẹ́ pé Gbọ̀ngàn Ìjọba ló wu òun láti lọ. Bàbá ẹ̀ gbà fún un, ó lóun á jẹ́ kí Dustin lọ síbẹ̀.

Nírọ̀lẹ́ ọjọ́ kan, lẹ́yìn tí ìpàdé parí ní Gbọ̀ngàn Ìjọba, ìyá Dustin wá a kò rí i. Dustin ò sọ fún màmá ẹ̀ tó fi lọ bá alábòójútó Ilé Ẹ̀kọ́ Ìjọba Ọlọ́run láti bi í léèrè nípa bóun ṣe lè forúkọ sílẹ̀ ní ilé ẹ̀kọ́ náà. Ìyá ẹ̀ fara mọ́ ọn. Ṣe ló ń ṣe é bíi pé kí ọjọ́ tí wọ́n kọ́kọ́ fún un níṣẹ́ ọ̀rọ̀ sísọ ti pé. Àmọ́, àkókò yẹn gan-an ni ìgbáròkó bẹ̀rẹ̀ sí í ro ó goorogo, bó ṣe di pé wọ́n ń gbé e láti ọ̀dọ́ dókítà kan dé òmíràn fún àyẹ̀wò nìyẹn. Ní kẹ̀rẹ̀kẹ̀rẹ̀, ọjọ́ tí Dustin máa kọ́kọ́ sọ̀rọ̀ lórí pèpéle ní Gbọ̀ngàn Ìjọba pé. Nígbà tó fi máa dọjọ́ yẹn, igi ló fi ń rìn. Kò fi igi rìn lọ sórí pèpéle lọ́jọ́ yìí, bó tilẹ̀ jẹ́ pé ó hàn gbangba pé inú ìrora ló wà.

Kò pẹ́ sígbà yẹn ni àyẹ̀wò fi hàn pé Dustin ní irú àrùn jẹjẹrẹ inú eegun kan tí wọ́n ń pè ní Ewing, èyí tí kì í sábà mú èèyàn. Èyí tó pọ̀ jù lọ nínú àwọn ọdún tó tẹ̀ lé e ni Dustin lò nílé ìwòsàn àwọn ọmọdé ní ìlú San Diego, ní ìpínlẹ̀ California. Wọ́n kọ́kọ́ ń fún un ní irú ìtọ́jú oníkẹ́míkà kan, lẹ́yìn náà wọ́n bẹ̀rẹ̀ sí í fi ìtànṣán to iṣan ara rẹ̀. Níkẹyìn, wọ́n gé ẹsẹ̀ ọ̀tún àti eegun ìgbáròkó ẹ̀, síbẹ̀ gbogbo èyí ò mú kí ìgbàgbọ́ tó ní nínú Jèhófà àti ìfẹ́ tó ní sí i jó rẹ̀yìn. Nígbà tó di pé okun tó wà lára ẹ̀ ò pọ̀ mọ́ débi tí kò fi lè kàwé, ìyá ẹ̀ tí kì í sábàá kúrò lọ́dọ̀ rẹ̀ ń kàwé fún un.

Bó tilẹ̀ jẹ́ pé àìsàn Dustin ń le sí i, síbẹ̀ kò ráhùn. Ṣe ló ń ti àga onítáyà ẹ̀ káàkiri ọ̀dọ̀ àwọn aláìsàn mìíràn àtàwọn òbí wọn, tó fi mọ́ Ẹlẹ́rìí kan tó ń gbàtọ́jú nílé ìwòsàn náà, láti lè gba gbogbo wọn níyànjú. Àwọn òṣìṣẹ́ ilé ìwòsàn náà rí i pé ti Dustin àti ọmọ Ẹlẹ́rìí yẹn yàtọ̀, ìgbàgbọ́ wọn ń fún wọn lókun.

Dustin lóun fẹ́ ṣèrìbọmi. Torí náà, níwọ̀n bí kò ti lè dá jókòó mọ́, orí àga ìnàyìn ló wà nígbà táwọn alàgbà ìjọ wá bá a jíròrò àwọn ìbéèrè tó wà fáwọn tó bá fẹ́ ṣèrìbọmi kí wọ́n lè di Ẹlẹ́rìí Jèhófà. Ní ọjọ́ kẹrìndínlógún oṣù kẹwàá ọdún 2004, Dustin ṣèrìbọmi ní ìpàdé àyíká kan lọ́mọ ọdún méjìlá ààbọ̀.

Bó ṣe kù díẹ̀ kí wọ́n bẹ̀rẹ̀ àsọyé ìrìbọmi, Dustin wa àga onítáyà rẹ̀ gba àárín èrò kọjá lọ síwájú níbi táwọn tí wọ́n jọ fẹ́ ṣèrìbọmi wà. Nígbà tí wọ́n ní káwọn tó fẹ́ ṣèrìbọmi dìde dúró, Ẹsẹ̀ kan ṣoṣo ni Dustin fi dúró, ó wọ kóòtù ẹ̀ tó dára jù lọ, ó di àga mú kó fi lè dúró dáadáa. Ó fi ohùn tó já tòò dáhùn àwọn ìbéèrè tí wọ́n máa ń bi àwọn tó fẹ́ ṣèrìbọmi. Gbogbo àwọn ará ilé Dustin, tó fi mọ́ bàbá ẹ̀ gan-an àti ìyàwó bàbá ẹ̀ ló wà níbẹ̀. Àwọn òṣìṣẹ́ ilé ìwòsàn tó ti ń gbàtọ́jú àtàwọn òbí míì tọ́mọ wọn ní àrùn jẹjẹrẹ wá láti ilé ìwòsàn náà.

Ọjọ́ kejì tí Dustin ṣèrìbọmi ni wọ́n tún dá a padà sílé ìwòsàn. Àrùn jẹjẹrẹ yẹn ti ba gbogbo eegun ara ẹ̀ jẹ́. Nígbà tí ẹ̀mí ń tán lọ nínú ẹ̀ tó sì wòye pé òun ń kú lọ, ó béèrè lọ́wọ́ ìyá ẹ̀ pé ṣé kì í ṣe pé òun ti fẹ́ kú. Ìyá ẹ̀ fèsì pé: “Kí ló dé tó ò ń béèrè, ṣé ẹ̀rù ikú ń bà ẹ́ ni?”

Ó ní: “Ẹ̀rù ikú ò bà mí. Ṣebí ẹnu kí n pajú dé lásán kí n sì tún là á nígbà tí mo bá jíǹde ni, ṣe ló máa dà bíi pé ìṣẹ́jú àáyá kan ṣoṣo ni mo fi pajú dé. Mi ò ní mọ ìrora mọ́.” Lẹ́yìn náà ló wá ṣàlàyé pé: “Ẹ̀yin èèyàn mi nìkan ló ń dùn mí fún.”

Oṣù tó tẹ̀ lé e ni Dustin kú. Lára àwọn tó wá síbi ìsìnkú ẹ̀ ni àwọn dókítà, àwọn nọ́ọ̀sì, ẹbí àwọn òṣìṣẹ́ ilé ìwòsàn, àwọn olùkọ́, àwọn ará àdúgbò àtàwọn ará ilé Dustin, tó jẹ́ Ẹlẹ́rìí àtàwọn tí kì í ṣe Ẹlẹ́rìí. Dustin ti sọ tẹ́lẹ̀ pé tóun bá kú, gbogbo àwọn tó bá wá síbi ìsìnkú òun ni kí wọ́n wàásù fún dáadáa nípa ohun tí òun gbà gbọ́. Ẹni tó sọ àwíyé ìsìnkú tó fún ìgbàgbọ́ lókun níbi ìsìnkú ẹ̀ ni alábòójútó Ilé Ẹ̀kọ́ Ìjọba Ọlọ́run tó fún Dustin ní iṣẹ́ kan ṣoṣo tó láǹfààní láti ṣe nílé ẹ̀kọ́ náà. Àsọyé náà wọ àwọn èrò tó wà lórí ìdúró náà lọ́kàn, ó sì gbé ìgbàgbọ́ wọn ró.

Wọ́n tẹ ẹsẹ Bíbélì méjì tí Dustin fẹ́ràn gan-an, ìyẹn Mátíù 24:14 àti 2 Tímótì 4:7, sínú ìwé, wọ́n sì pín in fún gbogbo àwọn tó wá síbẹ̀. Gbogbo àwọn tó mọ̀ ọ́n ni ìgbàgbọ́ ẹ̀ tó lágbára àti ìṣòtítọ́ rẹ̀ wú lórí. À ń fojú sọ́nà fún ọjọ́ tá a máa kí Dustin káàbọ̀ nígbà tó bá jíǹde.—Gẹ́gẹ́ bí obìnrin Ẹlẹ́rìí Jèhófà tó kọ́ Dustin lẹ́kọ̀ọ́ Bíbélì ṣe sọ ọ́.

[Ìsọfúnni tá a pàfiyèsí sí ní ojú ìwé 15]

“Mo ti ja ìjà àtàtà náà, mo ti sáré ní ipa ọ̀nà eré ìje náà dé ìparí, mo ti pa ìgbàgbọ́ mọ́.”—2 Tímótì 4:7

[Àwòrán tó wà ní ojú ìwé 14]

Lókè: Dustin rèé nígbà tára ẹ̀ ṣì le

[Àwòrán tó wà ní ojú ìwé 14]

Nísàlẹ̀: Dustin ló ń ṣèrìbọmi yìí, lọ́mọ ọdún méjìlá ààbọ̀ nígbà tó ku ọ̀sẹ̀ márùn-ún tó máa kú