Ibeere Lati Ọwọ Awọn Onkawe
Ó ha yẹ ki a pari-ero lati inu Matiu 11:11 pe Jesu mọ ṣaaju pe Johanu Arinibọmi yoo ku ṣaaju bi?
Bẹẹni, Jesu lọna ti o han gbangba mọ pe Johanu ki yoo laaja lati di Kristẹni ẹni ami ororo kan, nitori Jesu sọ pe: “Loootọ ni mo wi fun yin, ninu awọn ti a bi ninu obinrin, kò si ẹni ti o ti i dide ju Johanu Bamtisi lọ; ṣugbọn ẹni ti o kere julọ ni ijọba ọrun o pọ̀ ju u lọ.”—Matiu 11:11.
Nigba ti angẹli Geburẹli kede bíbọ̀ ìbí Johanu, ó sọtẹlẹ pe Johanu yoo, fi “ẹmi ati agbara Elija, . . . mura silẹ fun Jehofa awọn eniyan ti a ti pese silẹ.” Johanu ni o nilati jẹ́ ẹni ti a rán ṣaaju kan, ni mimura awọn eniyan silẹ fun Mesaya Jehofa. Ṣugbọn kò si ohunkohun ninu ikede atọrunwa yẹn ti o fihan pe Johanu funraarẹ yoo di ọmọ-ẹhin Mesaya naa ti ń bọ̀, bẹẹ ni kò si idamọran eyikeyii si iyẹn ninu gbolohun ọrọ alasọtẹlẹ ti baba Johanu, Sekaraya sọ.—Luuku 1:17, 67-79, NW.
Nipa bayii, lẹhin ti o bamtisi Jesu, Johanu ń baa lọ lati waasu ati lati bamtisi, ni rírọ̀ mọ́ iṣẹ ayanfunni rẹ̀ lati mura awọn eniyan kan silẹ. Johanu mọ lọna iyanu pe Jesu yoo pese bamtisimu pẹlu ẹmi mímọ́, ṣugbọn Johanu kò sọ pe oun funra oun yoo gba ẹmi mímọ́, ni didi Kristẹni ẹni ami ororo kan. (Matiu 3:11) Johanu tun mọ pe oun yoo maa lọsilẹ, nigba ti Jesu yoo maa pọ sii.—Johanu 3:22-30.
Nigba ti Jesu sọ ohun ti a kà ni Matiu 11:11, Johanu ni a ti fi sinu ẹwọn ṣaaju akoko yẹn. Jesu sọ ọ di mímọ̀ ṣaaju pe wolii ti a fi sẹwọn yii kere ju ẹni kekere julọ ti yoo ṣiṣẹsin gẹgẹ bi ọba ati alufaa ninu awọn ọrun ni ọjọ-ọla. Sibẹ Jesu tun jọ bii pe ó mọ pe Johanu ni yoo kú laipẹ, ni kikọja lọ kuro ninu iran ayé ṣaaju ki ọna “titun” naa si iwalaaye ti ọrun tó ṣí silẹ. (Heberu 10:19, 20) Iyẹn tumọ si pe Johanu ki yoo laaja titi Pẹntikọsi 33 C.E., nigba ti ìfàmì ororo yan awọn ọmọ-ẹhin Jesu pẹlu ẹmi bẹrẹ. Fun idi yii, àlàyé ọrọ Jesu ni Matiu 11:11 ni a lè gbà daradara lati jẹ́ itọka kan pe oun mọ pe Johanu ki yoo lọ si ọrun.