Máa Tẹ̀ Lé Àpẹẹrẹ Jésù Tó Jẹ́ Ọ̀gá Nínú Iṣẹ́ Sísọni Dọmọ Ẹ̀yìn

“Ẹ máa fiyè sí bí ẹ ṣe ń fetí sílẹ̀.”—LÚÙKÙ 8:18.

1, 2. Kí nìdí tó fi yẹ kó o fiyè sí bí Jésù ṣe bá àwọn èèyàn lò nígbà tó ń ṣiṣẹ́ ìwàásù?

JÉSÙ KRISTI tó jẹ́ Olùkọ́ Ńlá àti ọ̀gá nínú iṣẹ́ sísọni dọmọ ẹ̀yìn sọ ọ̀rọ̀ kan fáwọn ọmọlẹ́yìn rẹ̀. Ojúṣe rẹ̀ ló sì ń ṣe nígbà tó sọ̀rọ̀ ọ̀hún. Ó ní: “Ẹ máa fiyè sí bí ẹ ṣe ń fetí sílẹ̀.” (Lúùkù 8:16-18) Ó yẹ kó o máa tẹ̀ lé ìlànà yẹn lẹ́nu iṣẹ́ òjíṣẹ́ rẹ gẹ́gẹ́ bíi Kristẹni. Tó o bá ń fiyè sí àwọn ìtọ́ni tá à ń gbá látinú Bíbélì, wàá lè fi sílò wàá sì lè máa wàásù Ìjọba Ọlọ́run lọ́nà tó múná dóko. Ká sòótọ́, o ò lè gbóhùn Jésù lónìí, àmọ́ o lè kà nípa àwọn ohun tó sọ àtàwọn ohun tó ṣe nínú Bíbélì. Kí làwọn nǹkan wọ̀nyẹn jẹ́ ká mọ̀ nípa ọ̀nà tó gbà ń bá àwọn èèyàn lò nígbà tó ń ṣiṣẹ́ ìwàásù?

² Jésù jẹ́ oníwàásù tí kò lẹ́gbẹ́, ọ̀nà tó sì ń gbà kọ́ni lẹ́kọ̀ọ́ Ìwé Mímọ́ ta yọ. (Lúùkù 8:1; Jòhánù 8:28) Nǹkan méjì ló wà nínú iṣẹ́ sísọni dọmọ ẹ̀yìn, ìyẹn ni wíwàásù àti kíkọ́ni. Àmọ́, ó máa ń ṣòro fáwọn ará kan tó mọ̀ bá a ṣe ń wàásù dáadáa láti kọ́ni lẹ́kọ̀ọ́ Bíbélì lọ́nà tó múná dóko. Wíwàásù ò ju pé kéèyàn kéde ìhìn rere, àmọ́ kíkọ́ àwọn èèyàn nípa Jèhófà àtàwọn ohun tó fẹ́ ṣe fáráyé gba pé kí ẹni tó ń kọ́ni náà mú àwọn tó ń kọ́ lọ́rẹ̀ẹ́. (Mátíù 28:19, 20) Bó ṣe lè ṣe èyí ni pé kó máa tẹ̀ lé àpẹẹrẹ Jésù Kristi tó jẹ́ Olùkọ́ Ńlá àti ọ̀gá nínú iṣẹ́ sísọni dọmọ ẹ̀yìn.—Jòhánù 13:13.

3. Tó o bá ń tẹ̀ lé àpẹẹrẹ Jésù, àǹfààní wo ló máa ṣe fún ọ lẹ́nu iṣẹ́ sísọni dọmọ ẹ̀yìn?

³ Tó o bá ń kọ́ni lọ́nà tí Jésù gbà ń kọ́ni, ohun tí àpọ́sítélì Pọ́ọ̀lù gbà wá níyànjú láti ṣe lò ń ṣe yẹn. Ó ní: “Ẹ máa bá a lọ ní rírìn nínú ọgbọ́n sí àwọn tí ń bẹ lóde, kí ẹ máa ra àkókò tí ó rọgbọ padà fún ara yín. Ẹ jẹ́ kí àsọjáde yín máa fìgbà gbogbo jẹ́ pẹ̀lú oore ọ̀fẹ́, tí a fi iyọ̀ dùn, kí ẹ lè mọ bí ó ti yẹ kí ẹ fi ìdáhùn fún ẹnì kọ̀ọ̀kan.” (Kólósè 4:5, 6) Ó gba ìsapá láti tẹ̀ lé àpẹẹrẹ Jésù nínú iṣẹ́ sísọni dọmọ ẹ̀yìn, àmọ́ tó o bá tẹ̀ lé àpẹẹrẹ rẹ̀, wàá lè máa kọ́ni lọ́nà tó múná dóko nítorí pé wàá lè “fi ìdáhùn fún ẹnì kọ̀ọ̀kan” bó ṣe yẹ.

Jésù Máa Ń Gba Àwọn Èèyàn Níyànjú Láti Sọ Èrò Wọn

4. Kí nìdí tá a fi lè sọ pé Jésù jẹ́ni tó máa ń fetí sílẹ̀ dáadáa?

⁴ Àtìgbà tí Jésù ti wà ní kékeré ló ti máa ń fetí sílẹ̀ táwọn èèyàn bá ń sọ̀rọ̀, ó sì máa ń gbà wọ́n níyànjú láti sọ èrò wọn. Bí àpẹẹrẹ, nígbà tó wà lọ́mọ ọdún méjìlá, àwọn òbí rẹ̀ rí i láàárín àwọn olùkọ́ nínú tẹ́ńpìlì, “[tó] ń fetí sí wọn, [tó] sì ń bi wọ́n ní ìbéèrè.” (Lúùkù 2:46) Kì í ṣe pé Jésù lọ sínú tẹ́ńpìlì láti lọ fi ìmọ̀ rẹ̀ dójú ti àwọn olùkọ́ náà o. Ńṣe ló lọ síbẹ̀ láti lọ gbọ́ ohun tí wọ́n ń kọ́ni, bó tilẹ̀ jẹ́ pé ó tún bi wọ́n ní ìbéèrè. Ó ṣeé ṣe kó jẹ́ pé bí Jésù ṣe máa ń fetí sílẹ̀ dáadáa ló mú kó rí ojú rere Ọlọ́run àti èèyàn.—Lúùkù 2:52.

5, 6. Báwo la ṣe mọ̀ pé Jésù máa ń fetí sílẹ̀ nígbà tí àwọn tó ń kọ́ lẹ́kọ̀ọ́ bá ń sọ̀rọ̀?

⁵ Lẹ́yìn tí Jésù ṣèrìbọmi tí Ọlọ́run sì fẹ̀mí yàn án gẹ́gẹ́ bíi Mèsáyà, ó ń bá a lọ láti máa fetí sílẹ̀ táwọn èèyàn bá ń sọ̀rọ̀. Kò jẹ́ kí ọ̀rọ̀ tó ń sọ ká a lára débi tí kò fi ní jẹ́ káwọn olùgbọ́ rẹ̀ sọ sí i. Lọ́pọ̀ ìgbà, á dánu dúró, á ní káwọn èèyàn sọ èrò wọn, á sì fetí sí ohun tí wọ́n bá sọ. (Mátíù 16:13-15) Bí àpẹẹrẹ, lẹ́yìn tí Lásárù arákùnrin Màtá kú, Jésù sọ fún Màtá pé: “Olúkúlùkù ẹni tí ń bẹ láàyè, tí ó sì ń lo ìgbàgbọ́ nínú mi, kì yóò kú láé.” Ó wá bi Màtá pé: “Ìwọ ha gba èyí gbọ́ bí?” Ó sì dájú pé ó fetí sílẹ̀ nígbà tí Màtá fèsì pé: “Bẹ́ẹ̀ ni, Olúwa; mo ti gbà gbọ́ pé ìwọ ni Kristi Ọmọ Ọlọ́run, Ẹni tí ń bọ̀ wá sí ayé.” (Jòhánù 11:26, 27) Ẹ ò rí i pé inú Jésù máa dùn bó ṣe gbọ́ bí Màtá ṣe sọ ohun tó gbà gbọ́ yìí!

⁶ Nígbà tí ọ̀pọ̀ ọmọ ẹ̀yìn padà lẹ́yìn Jésù, Jésù fẹ́ gbọ́ èrò àwọn àpọ́sítélì rẹ̀. Ló bá bi wọ́n pé: “Ẹ̀yin kò fẹ́ lọ pẹ̀lú, àbí?” Símónì Pétérù wá fèsì pé: “Olúwa, ọ̀dọ̀ ta ni àwa yóò lọ? Ìwọ ni ó ní àwọn àsọjáde ìyè àìnípẹ̀kun; àwa sì ti gbà gbọ́, a sì ti wá mọ̀ pé ìwọ ni Ẹni Mímọ́ Ọlọ́run.” (Jòhánù 6:66-69) Kò sí àní-àní pé ọ̀rọ̀ yẹn mú inú Jésù dùn gan-an ni! Ó sì dájú pé inú ìwọ pẹ̀lú á dùn tí ẹni tó ò ń kọ́ lẹ́kọ̀ọ́ Bíbélì bá sọ ohun tó fi hàn pé ó nígbàgbọ́.

Jésù Máa Ń Fetí Sílẹ̀ Tọ̀wọ̀tọ̀wọ̀

7. Kí ló mú kí ọ̀pọ̀ àwọn ará Samáríà nígbàgbọ́ nínú Jésù?

⁷ Ìdí mìíràn tí Jésù fi ṣàṣeyọrí nínú iṣẹ́ sísọni dọmọ ẹ̀yìn ni pé ó ka àwọn èèyàn sí, ó sì máa ń fetí sí wọn tọ̀wọ̀tọ̀wọ̀. Àpẹẹrẹ kan ni ìgbà tó ń wàásù fún obìnrin kan tó jẹ́ ará Samáríà lẹ́bàá kànga Jékọ́bù tó wà ní ìlú Síkárì. Òun nìkan kọ́ ló ń sọ̀rọ̀ nígbà tó ń wàásù fún un, kàkà bẹ́ẹ̀ ó gbọ́ ohun tí obìnrin náà fẹ́ sọ. Nígbà tí Jésù ń tẹ́tí sí obìnrin náà, ó kíyè sí i pé ó nífẹ̀ẹ́ sí ìjọsìn, ó wá sọ fún un pé Ọlọ́run ń wá àwọn tí yóò máa jọ́sìn Rẹ̀ ní ẹ̀mí àti ní òtítọ́. Jésù fọ̀wọ̀ wọ obìnrin náà ó sì kà á sí, débi pé ẹsẹ̀kẹsẹ̀ lobìnrin yìí lọ ròyìn Jésù fáwọn ẹlòmíì, “ọ̀pọ̀ nínú àwọn ará Samáríà láti ìlú ńlá yẹn [sì] ní ìgbàgbọ́ nínú rẹ̀ ní tìtorí ọ̀rọ̀ obìnrin náà.”—Jòhánù 4:5-29, 39-42.

8. Níwọ̀n bí àwọn èèyàn ti máa ń fẹ́ láti sọ èrò wọn, báwo nìyẹn ṣe lè ràn ọ́ lọ́wọ́ láti bẹ̀rẹ̀ ìjíròrò lóde ẹ̀rí?

⁸ Àwọn èèyàn sábà máa ń fẹ́ láti sọ èrò wọn. Bí àpẹẹrẹ, àwọn ará ìlú Áténì ayé ọjọ́un máa ń fẹ́ láti sọ èrò wọn, wọ́n sì máa ń fẹ́ gbọ́ ohun tuntun. Èyí ló mú kí Pọ́ọ̀lù lè wàásù fún wọn lọ́nà tó múná dóko lórí òkè Áréópágù nílùú náà. (Ìṣe 17:18-34) Tó o bá fẹ́ bẹ̀rẹ̀ ìjíròrò pẹ̀lú ẹnì kan lóde ẹ̀rí lónìí, o lè sọ pé, “À ń bá àwọn èèyàn sọ̀rọ̀ nípa [mẹ́nu kan kókó kan], ẹ jọ̀ọ́ kí lèrò yín nípa rẹ̀?” Fetí sílẹ̀ bó bá ṣe ń sọ èrò rẹ̀, kó o wá sọ nǹkan kan nípa èrò náà tàbí kó o bi í ní ìbéèrè nípa rẹ̀. Lẹ́yìn náà kó o fi ohun tí Bíbélì sọ lórí kókó náà hàn án.

Jésù Máa Ń Mọ Ohun Tó Yẹ Kóun Sọ

9. Kí ni Jésù kọ́kọ́ ṣe kó tó ‘ṣí Ìwé Mímọ́ payá lẹ́kùn-ún-rẹrẹ fún’ Kíléópà àti ẹnì kejì rẹ̀?

⁹ Jésù kì í wá ọ̀rọ̀ tó máa sọ tì. Yàtọ̀ sí pé ó máa ń fetí sílẹ̀ dáadáa, ó sábà máa ń mọ ohun táwọn èèyàn ń rò, ó sì máa ń mọ ohun tó yẹ kóun sọ. (Mátíù 9:4; 12:22-30; Lúùkù 9:46, 47) Bí àpẹẹrẹ, láìpẹ́ sígbà tó jíǹde, àwọn ọmọ ẹ̀yìn rẹ̀ méjì kan ń ti Jerúsálẹ́mù lọ sí Ẹ́máọ́sì. Ìwé Lúùkù sọ pé: “Bí wọ́n ti ń sọ̀rọ̀ pọ̀, tí wọ́n sì ń jíròrò, Jésù fúnra rẹ̀ sún mọ́ tòsí, ó sì bẹ̀rẹ̀ sí bá wọn rìn; ṣùgbọ́n a pa ojú wọn mọ́ kúrò nínú dídá a mọ̀. Ó wí fún wọn pé: ‘Kí ni ọ̀ràn wọ̀nyí tí ẹ ń bá ara yín fà bí ẹ ti ń rìn lọ?’ Wọ́n sì dúró jẹ́ẹ́ pẹ̀lú ojú fífàro. Ní ìdáhùn, ẹni tí orúkọ rẹ̀ ń jẹ́ Kíléópà wí fún un pé: ‘Ìwọ ha ń ṣe àtìpó ní Jerúsálẹ́mù nítorí náà tí o kò sì mọ àwọn nǹkan tí ó ṣẹlẹ̀ nínú rẹ̀ ní ọjọ́ wọ̀nyí?’ Ó sì wí fún wọn pé: ‘Àwọn nǹkan wo?’” Olùkọ́ Ńlá náà fetí sílẹ̀ bí wọ́n ṣe ń ṣàlàyé pé Jésù ará Násárétì kọ́ àwọn èèyàn lẹ́kọ̀ọ́, pé ó ṣe iṣẹ́ ìyanu, àti pé àwọn èèyàn pa á. Àmọ́ ní báyìí, àwọn kan ń sọ pé ó ti jíǹde. Jésù jẹ́ kí Kíléópà àti ẹnì kejì rẹ̀ sọ èrò wọn. Lẹ́yìn náà, ó wá ṣàlàyé ohun tó yẹ kí wọ́n mọ̀, ó “ṣí Ìwé Mímọ́ payá fún [wọn] lẹ́kùn-ún-rẹ́rẹ́.”—Lúùkù 24:13-27, 32.

10. Báwo lo ṣe lè mọ ohun tí ẹni tó o fẹ́ wàásù fún ń rò nípa ọ̀rọ̀ ìjọsìn?

¹⁰ O lè má mọ ohun tí ẹni tó o fẹ́ wàásù fún ń rò nípa ọ̀rọ̀ ìjọsìn. Kó o bàa lè mọ̀ ọ́n, o lè sọ fún un pé o máa ń fẹ́ mọ èrò àwọn èèyàn nípa àdúrà. Tó o bá sọ bẹ́ẹ̀ tán, o lè béèrè pé: “Ǹjẹ́ o rò pé ẹnì kan tiẹ̀ wà tó ń gbọ́ àdúrà?” Èsì ẹni náà lè jẹ́ kó o mọ ọ̀pọ̀ nǹkan nípa èrò rẹ̀ àti bóyá ó ní ẹ̀sìn tàbí kò ní. Tó bá nífẹ̀ẹ́ sí ọ̀rọ̀ ẹ̀sìn, o lè mú kó túbọ̀ sọ èrò rẹ̀ tó o bá bi í pé, “Ǹjẹ́ o rò pé gbogbo àdúrà ni Ọlọ́run ń gbọ́, àbí àwọn kan wà tí kì í gbọ́?” Irú àwọn ìbéèrè bẹ́ẹ̀ lè mú kí ìjíròrò tó lárinrin wáyé. Tó bá yẹ kó o fi ohun tí Ìwé Mímọ́ sọ lórí kókó kan hàn án, fọgbọ́n ṣe é, má ta ko ohun tó gbà gbọ́. Tó bá gbádùn ìjíròrò náà, ó lè fẹ́ kó o padà wá. Àmọ́ tó bá béèrè ìbéèrè tó ò lè dáhùn ńkọ́? O lè lọ ṣèwádìí, kó o sì padà lọ láti jẹ́ kó mọ ‘ìdí fún ìrètí tí ń bẹ nínú rẹ, kó o sì fi inú tútù àti ọ̀wọ̀ jíjinlẹ̀ ṣe é.’—1 Pétérù 3:15.

Jésù Kọ́ Àwọn Tó Jẹ́ Ẹni Yíyẹ

11. Kí lo máa ṣe tí wàá fi lè rí àwọn ẹni yíyẹ tó o máa kọ́ lẹ́kọ̀ọ́?

¹¹ Jésù ẹni pípé máa ń lo òye, èyí tó fi máa ń mọ àwọn tó yẹ kóun kọ́ lẹ́kọ̀ọ́. Ó ṣòro gan-an fún àwa láti mọ àwọn “tí wọ́n . . . ní ìtẹ̀sí-ọkàn títọ́ fún ìyè àìnípẹ̀kun.” (Ìṣe 13:48) Bẹ́ẹ̀ náà ló ṣe ṣòro fáwọn àpọ́sítélì tí Jésù sọ fún pé: “Ìlú ńlá tàbí abúlé èyíkéyìí tí ẹ bá wọ̀, ẹ wá ẹni yíyẹ inú rẹ̀ kàn.” (Mátíù 10:11) Ìwọ náà ní láti ṣe bíi tàwọn àpọ́sítélì Jésù, kó o wá àwọn tí wọ́n fẹ́ láti fetí sílẹ̀ tí wọ́n sì fẹ́ kọ́ ẹ̀kọ́ òtítọ́. Bó o ṣe lè rí àwọn ẹni yíyẹ ni pé kó o máa fara balẹ̀ tẹ́tí sáwọn tó o bá ń bá sọ̀rọ̀ kó o sì máa kíyè sí ìṣesí ẹnì kọ̀ọ̀kan wọn.

12. Báwo lo ṣe lè máa bá a lọ láti ran ẹni tó nífẹ̀ẹ́ sí òtítọ́ lọ́wọ́?

¹² Tó o bá kúrò lọ́dọ̀ ẹnì kan tó nífẹ̀ẹ́ sí ọ̀rọ̀ Ìjọba Ọlọ́run tó o bá sọ, á dáa kó o máa ronú nípa ẹ̀kọ́ òtítọ́ tó yẹ kó mọ̀. Tó o bá ń ṣàkọsílẹ̀ ohun tó o kíyè sí lára ẹni tó o wàásù ìhìn rere fún, wàá lè fìyẹn mọ bó o ṣe lè máa kọ́ ẹni náà lẹ́kọ̀ọ́ òtítọ́ nìṣó. Nígbà tó o bá lọ ṣe ìpadàbẹ̀wò onítọ̀hún, o ní láti tẹ́tí sílẹ̀ dáadáa kó o lè túbọ̀ mọ ohun tó gbà gbọ́, èrò rẹ̀ tàbí ipò rẹ̀ nígbèésí ayé.

13. Báwo lo ṣe lè mọ èrò ẹnì kan nípa Bíbélì?

¹³ Báwo lo ṣe lè mú káwọn èèyàn sọ èrò wọn nípa Bíbélì Ọ̀rọ̀ Ọlọ́run? Láwọn ibì kan, àwọn èèyàn máa ń sọ ọ́ téèyàn bá bi wọ́n pé, “Ǹjẹ́ ẹ rò pé ọ̀rọ̀ Bíbélì tiẹ̀ lè yéèyàn?” Ìdáhùn àwọn èèyàn sí ìbéèrè yìí sábà máa ń fi hàn bóyá wọ́n nífẹ̀ẹ́ sí Bíbélì tàbí wọn ò nífẹ̀ẹ́ sí i. Ọ̀nà míì tó o lè gbà mọ èrò ẹnì kan nípa Bíbélì ni pé kó o ka ẹsẹ Ìwé Mímọ́ kan, kó o wá bi í pé, “Kí lo rò nípa ohun tí ẹsẹ Bíbélì yìí sọ?” Tó o bá ń lo ìbéèrè tó yẹ, o lè ṣàṣeyọrí gan-an nínú iṣẹ́ òjíṣẹ́ rẹ bíi ti Jésù. Àmọ́ ṣá o, àwọn nǹkan kan wà tó o ní láti ṣọ́ra fún tó o bá ń béèrè ìbéèrè.

Jésù Máa Ń Lo Ìbéèrè Lọ́nà Tó Múná Dóko

14. Báwo lo ṣe lè wá ọ̀nà láti mọ èrò àwọn èèyàn láìjẹ́ pé o da ìbéèrè bò wọ́n?

¹⁴ Wá ọ̀nà láti mọ èrò táwọn èèyàn ní láìmú kójú tì wọ́n. Àpẹẹrẹ Jésù ni kó o tẹ̀ lé. Jésù kì í da ìbéèrè bo àwọn èèyàn, ńṣe ló kàn máa ń béèrè ìbéèrè tó máa mú kí wọ́n sọ èrò wọn. Yàtọ̀ síyẹn, ó máa ń fara balẹ̀ gbọ́ ohun táwọn èèyàn bá ń sọ, ó máa ń mú kára tu àwọn olóòótọ́ ọkàn, ó sì máa ń mú kí ọkàn wọn balẹ̀. (Mátíù 11:28) Onírúurú èèyàn ló máa ń lọ bá a láti sọ ìṣòro wọn fún un láìtijú. (Máàkù 1:40; 5:35, 36; 10:13, 17, 46, 47) Bíwọ náà bá fẹ́ káwọn èèyàn máa sọ èrò wọn nípa Bíbélì àti ẹ̀kọ́ inú rẹ̀ fún ẹ láìtijú, o ní láti rí i pé o kì í da ìbéèrè bò wọ́n.

15, 16. Kí lo lè ṣe láti mú káwọn èèyàn bá ọ fọ̀rọ̀ wérọ̀ lórí ọ̀rọ̀ ìsìn?

¹⁵ Yàtọ̀ sí pé kó o máa lo ìbéèrè lọ́nà tó múná dóko, o tún lè dá ìjíròrò sílẹ̀ nípa sísọ ohun kan tẹ́ni tó ò ń bá sọ̀rọ̀ máa nífẹ̀ẹ́ sí, kó o wá fetí sí ohun tó bá sọ. Bí àpẹẹrẹ, Jésù sọ fún Nikodémù pé: “Láìjẹ́ pé a tún ẹnikẹ́ni bí, kò lè rí ìjọba Ọlọ́run.” (Jòhánù 3:3) Ọ̀rọ̀ yìí ya Nikodémù lẹ́nu débi pé ó fèsì, ó sì tún tẹ́tí gbọ́ ohun tí Jésù sọ. (Jòhánù 3:4-20) Bí ìwọ náà bá ṣe bíi ti Jésù, o lè mú káwọn èèyàn bẹ̀rẹ̀ sí í bá ọ fọ̀rọ̀ wérọ̀.

¹⁶ Lóde òní, ibi púpọ̀, títí kan ilẹ̀ Áfíríkà, Ìlà Oòrùn Yúróòpù àtàwọn orílẹ̀-èdè tó wà níhà Gúúsù Amẹ́ríkà, làwọn èèyàn ti máa ń sọ̀rọ̀ nípa báwọn ẹ̀sìn ìgbàlódé ṣe ń pọ̀ sí i. Nírú àwọn ibi bẹ́ẹ̀, o lè bẹ̀rẹ̀ ìfọ̀rọ̀wérọ̀ nípa sísọ pé: “Bí ìsìn ṣe pọ̀ gan-an lóde òní ń kọ mí lóminú. Àmọ́ mo nírètí pé láìpẹ́, gbogbo èèyàn ni yóò máa ṣe ìsìn tòótọ́ kan ṣoṣo. Ṣé wàá fẹ́ kírú nǹkan bẹ́ẹ̀ ṣẹlẹ̀?” Tó o bá sọ nǹkan kan tó yani lẹ́nu nípa ìrètí tó o ní, ìyẹn lè mú káwọn èèyàn sọ èrò wọn. Ó sì máa ń túbọ̀ rọrùn fáwọn èèyàn láti dáhùn ìbéèrè tó bá jẹ́ èyí tó ní ìdáhùn méjì téèyàn lè mú ọ̀kan nínú ẹ̀. (Mátíù 17:25) Lẹ́yìn tó o bá ti gbọ́ èsì ẹni tó ò ń bá sọ̀rọ̀, kó o wá fi ẹsẹ Bíbélì kan tàbí méjì dáhùn ìbéèrè náà. (Aísáyà 11:9; Sefanáyà 3:9) Tó o bá tẹ́tí sí ìdáhùn onítọ̀hún dáadáa, wàá mọ ohun tí wàá bá a sọ nígbà tó o bá padà lọ sọ́dọ̀ rẹ̀.

Jésù Tẹ́tí Gbọ́rọ̀ Àwọn Ọmọdé

17. Kí ló fi hàn pé Jésù nífẹ̀ẹ́ àwọn ọmọdé?

¹⁷ Àwọn àgbàlagbà nìkan kọ́ ni Jésù nífẹ̀ẹ́ sí o, ó nífẹ̀ẹ́ sáwọn ọmọdé pẹ̀lú. Ó mọ oríṣiríṣi eré táwọn ọmọdé máa ń ṣe àtàwọn ohun tí wọ́n máa ń sọ. Ó máa ń pe àwọn ọmọdé sọ́dọ̀ nígbà míì. (Lúùkù 7:31, 32; 18:15-17) Ọ̀pọ̀ ọmọdé wà lára àwọn èèyàn tó ń wá gbọ́rọ̀ Jésù. Nígbà táwọn ọmọdékùnrin ń fohùn rara yin Jésù torí pé ó jẹ́ Mèsáyà, kò ṣàì kíyè sí i, ó sì jẹ́ káwọn èèyàn mọ̀ pé Ìwé Mímọ́ ti sọ tẹ́lẹ̀ pé wọ́n á ṣe bẹ́ẹ̀. (Mátíù 14:21; 15:38; 21:15, 16) Lónìí, ọ̀pọ̀ ọmọdé ló ń di ọmọ ẹ̀yìn Jésù. Báwo lo ṣe máa wá ràn wọ́n lọ́wọ́?

18, 19. Báwo lo ṣe lè ran ọmọ rẹ lọ́wọ́ táá fi dọmọ ẹ̀yìn Jésù?

¹⁸ Tó o bá fẹ́ ran ọmọ rẹ lọ́wọ́ kó lè dọmọ ẹ̀yìn, o ní láti máa tẹ́tí gbọ́rọ̀ rẹ̀. Ìyẹn á jẹ́ kó o lè mọ èrò rẹ̀ tó lè máà bá ìfẹ́ Jèhófà mu. Ohun yòówù kí ọmọdé náà sì sọ, ohun tó dáa ni pé kó o kọ́kọ́ yìn ín. Lẹ́yìn náà, kó o wá lo ẹsẹ Ìwé Mímọ́ tó yẹ láti fi jẹ́ kó mọ bí ọ̀rọ̀ náà ṣe rí lójú Jèhófà.

¹⁹ O lè lo ìbéèrè láti fi mọ èrò àwọn ọmọdé, àmọ́ báwọn àgbàlagbà ò ṣe fẹ́ kéèyàn máa da ìbéèrè bo àwọn làwọn ọmọdé náà ò ṣe fẹ́. Dípò tí wàá fi da ìbéèrè bo ọmọ rẹ, o lè kọ́kọ́ sọ ọ̀rọ̀ ṣókí kan fún un nípa ara rẹ. Bí àpẹẹrẹ, o lè sọ irú èrò tó o máa ń ní nígbà kan rí àti ìdí tó o fi nírú èrò bẹ́ẹ̀, ìyẹn tọ́rọ̀ yín bá jẹ mọ́ irú nǹkan bẹ́ẹ̀. Kó o wá bi í pé, “Ǹjẹ́ ìwọ náà máa ń ní irú èrò yẹn?” Ìdáhùn rẹ̀ lè jẹ́ kó ṣeé ṣe fún yín láti jọ sọ̀rọ̀ lórí kókó pàtàkì látinú Bíbélì tó máa ràn án lọ́wọ́.

Máa Bá A Lọ Ní Títẹ̀lé Àpẹẹrẹ Jésù

20, 21. Kí nìdí tó fi yẹ kó o máa fetí sílẹ̀ dáadáa bó o ṣe ń ṣiṣẹ́ sísọni dọmọ ẹ̀yìn?

²⁰ Yálà ọmọ rẹ lò ń bá sọ̀rọ̀ tàbí ẹlòmíì, ó ṣe pàtàkì kó o máa tẹ́tí gbọ́ni dáadáa. Ńṣe nìyẹn máa fi hàn pé o nífẹ̀ẹ́ wọn. Tó o bá ń fetí sílẹ̀ nígbà tí wọ́n bá ń sọ̀rọ̀, ìwà ìrẹ̀lẹ̀ nìyẹn jẹ́, yóò sì tún fi hàn pé o kà wọ́n sí àti pé ò ń gba ti wọ́n rò. Láìsí àní-àní, kó o tó lè sọ pé o tẹ́tí gbọ́rọ̀ ẹnì kan, o ní láti máa fọkàn bá ohun tó ń sọ lọ.

²¹ Bó o ṣe ń ṣe iṣẹ́ ìwàásù gẹ́gẹ́ bíi Kristẹni, máa fara balẹ̀ tẹ́tí sáwọn tó ò ń bá sọ̀rọ̀. Tó o bá ń fiyè sí ohun tí wọ́n ń sọ, wàá lè mọ ẹ̀kọ́ Bíbélì tí wọ́n máa nífẹ̀ẹ́ sí jù. Kó o sì wá lo onírúurú ọ̀nà tí Jésù gbà ń kọ́ àwọn èèyàn lẹ́kọ̀ọ́ láti fi kọ́ wọn lẹ́kọ̀ọ́. Tó o bá ń ṣe bẹ́ẹ̀, wàá ní ayọ̀ àti ìtẹ́lọ́rùn pé ò ń tẹ̀ lé àpẹẹrẹ Jésù tó jẹ́ ọ̀gá nínú iṣẹ́ sísọni dọmọ ẹ̀yìn.

Báwo Lo Ṣe Máa Dáhùn?

• Kí ni Jésù ṣe láti mú káwọn èèyàn sọ èrò wọn?

• Kí nìdí tí Jésù fi máa ń tẹ́tí gbọ́rọ̀ àwọn tó ń kọ́ lẹ́kọ̀ọ́?

• Báwo lo ṣe lè máa lo ìbéèrè lẹ́nu iṣẹ́ ìwàásù?

• Kí lo lè ṣe láti ran àwọn ọmọdé lọ́wọ́ kí wọ́n lè dọmọ ẹ̀yìn?

[Àwòrán tó wà ní ojú ìwé 28]

Rí i dájú pé ò ń tẹ́tí sáwọn èèyàn tó ò ń wàásù fún

[Àwòrán tó wà ní ojú ìwé 30]

Àpẹẹrẹ Jésù là ń tẹ̀ lé nígbà tá a bá ń ran àwọn ọmọdé lọ́wọ́ láti dọmọ ẹ̀yìn