OHUN TÍ BÍBÉLÌ SỌ

Kí nìdí tí Jésù fi ń pa dà bọ̀?

Kí Jésù tó lọ sí ọ̀run ní ọdún 33 sànmánì Kristẹni, ó ṣèlérí pé òun ń pa dà bọ̀. Ó fi ara rẹ̀ wé ọkùnrin kan tí a bí ní ilé ọlá, ọkùnrin náà rìnrìn àjò lọ sí ọ̀nà tó jìn, ó sì pẹ́ gan-an níbẹ̀, àmọ́ nígbà tó pa dà, ó dé pẹ̀lú agbára láti ṣàkóso bí ọba. Torí náà, ìdí tí Jésù fi ń pa dà bọ̀ ni pé, ó fẹ́ mú ìjọba tó dára wá sórí ilẹ̀ ayé.—Ka Lúùkù 19:11, 12.

Ṣé gbogbo ojú ló máa rí Jésù nígbà tó bá pa dà wá? Rántí pé, nígbà tí Ọlọ́run jí Jésù dìde, Jésù di ẹ̀dá ẹ̀mí tí a kò lè fojú rí. (1 Pétérù 3:18) Lẹ́yìn náà, ó lọ sí ọ̀run, ó sì jókòó ní ọwọ́ ọ̀tún Ọlọ́run. (Sáàmù 110:1) Nígbà tó yá, ó wọlé wá sọ́dọ̀ “Ẹni Ọjọ́ Àtayébáyé” ìyẹn Jèhófà Ọlọ́run, tó fún un ní agbára láti ṣàkóso aráyé. Torí náà, Jésù ò ní pa dà wá bí ẹ̀dá èèyàn mọ́, kàkà bẹ́ẹ̀, ó máa wá bí Ọba tí a kò lè fojú rí.—Ka Dáníẹ́lì 7:13, 14.

Kí ni Jésù máa ṣe tó bá dé??

Tí Jésù àtàwọn áńgẹ́lì rẹ̀ tí a kò lè fojú rí bá dé, ó máa ṣèdájọ́ aráyé. Ó máa pa àwọn ẹni ibi run, á sì fún àwọn tó bá gbà á bí Ọba ní ìyè àìnípẹ̀kun.—Ka Mátíù 25:31-33, 46.

Ìṣàkóso Jésù máa sọ ayé di Párádísè. Jésù máa jí àwọn òkú dìde kí wọ́n lè gbádùn ìgbésí ayé nínú párádísè lórí ilẹ̀ ayé.—Ka Lúùkù 23:42, 43.