Wọ́n Ti Ná Ẹgbẹ̀lẹ́gbẹ̀ Owó Sórí Ogun​—Kí Ni Àbárèbábọ̀ Ẹ̀?

Ohun tí ogun ń ná ni kúrò ní kékeré.

• “Lọ́dún tó kọjá ó lé ní tírílíọ̀nù méjì dọ́là táwọn ìjọba ná sórí ogun tó ń jà kárí ayé, iye yìí ló sì tíì pọ̀ jù láti àwọn ọdún yìí wa.”​—The Washington Post, February 13, 2024.

Ẹ jẹ́ ká wo àpẹẹrẹ ogún tó jà ní Ukraine, èyí máa jẹ́ ká rí i pé kì í ṣe owó nìkan ni ogun máa ń ná ni.

• Àwọn Sójà. Àwọn ọ̀jọ̀gbọ́n kan fojú bù ú pé á ti fẹ́rẹ̀ẹ́ tó ẹgbẹ̀rún lọ́nà ọgọ́rùn-ún márùn-ún (500,000) sójà tó ti kú tàbí fara pa láti nǹkan bí ọdún méjì tí ogun náà ti bẹ̀rẹ̀.

• Àwọn Aráàlú. Àjọ Ìṣọ̀kan Àgbáyé sọ pé àwọn tó ju ẹgbẹ̀rún méjìdínlọ́gbọ̀n (28,000) ló ti kú tàbí fara pa. Ọ̀gá àgbà kan nínú àjọ yìí tiẹ̀ sọ pé: “A ò lè ka iye àwọn tí ogun yìí ti ba ayé wọn jẹ́.”a

Ká sòótọ́, rògbòdìyàn àti ogun tó ń jà karí ayé ń fojú àwọn èèyàn rí màbo.

• Nígbà tó fi máa di September 2023, àwọn tó tó mílíọ̀nù mẹ́rìnléláàádọ́fà (114) ló ti sá kúrò nílé kárí ayé nítorí ogún.

•   Iye àwọn tí ebi àpafẹ́ẹ̀kú ń pa kárí ayé tó mílíọ̀nù lọ́nà ọgọ́rùn-ún méje àti mẹ́tàlélọ́gọ́rin (783). “Ogun tó ń jà kárí ayé ló gbawájú nínú ohun tó ń fa ìṣòro yìí. Kódà ìdá méje nínú mẹ́wàá àwọn tí ebi ń pa ló ń gbé láwọn ibi tí ogun àti rògbòdìyàn ti ń ṣẹlẹ̀.”​—Àjọ Tó Ń Rí Sọ́rọ̀ Oúnjẹ Kárí Ayé.

Ṣé ìgbà kan ń bọ̀ tí àwọn èèyàn ò ní jagun mọ́? Ìgbà wo la máa ní àlàáfíà láyé yìí? Ṣé ìgbà kan ń bọ̀ tí àwon ohun tó wà láyé yìí máa tó wa jẹ ní àjẹyó àti àjẹṣẹ́kù, tí ò sì ní sẹ́ni tó máa tòṣì mọ́? Kí ni Bíbélì sọ?

Àkókò tí ogun á máa jà

Bíbélì fi ẹlẹ́ṣin kan ṣàpẹẹrẹ ogun, ó sì sọ tẹ́lẹ̀ pé ogun á máa jà kárí ayé lákòókò wa yìí.

• “Ẹṣin míì jáde wá, ó jẹ́ aláwọ̀ iná, a sì gba ẹni tó jókòó sórí rẹ̀ láyè láti mú àlàáfíà kúrò ní ayé kí wọ́n lè máa pa ara wọn, a sì fún un ní idà ńlá kan.”​—Ìfihàn 6:4.

Yàtọ̀ sí ẹlẹ́ṣin yìí, Bíbélì tún sọ pé àwọn ẹlẹ́ṣin méjì míì ń tẹ̀ lé e, ọ̀kan ṣàpẹẹrẹ ìyàn tó máa karí ayé, ìkejì sì ṣàpẹẹrẹ ikú tí àìsàn àtàwọn nǹkan míì ń fà. (Ìfihàn 6:5-8) Tó o bá fẹ́ mọ̀ sí i nípa àsọtẹ́lẹ̀ Bíbélì yìí àti ìdí tó fi dá wa lójú pé ó ti ń ṣẹ lákòókò wa yìí, ka àpilẹ̀kọ “Ta Ni Àwọn Ẹlẹ́ṣin Mẹ́rin Náà?”

Àlàáfíà máa wà kárí ayé

Láìpẹ́, àwọn èèyàn ò ní máa fi àwọn ohun àmúṣọrọ̀ ayé yìí ja ogun mọ́. Àmọ́ àwọn èèyàn kọ́ ló máa mú kí èyí ṣeé ṣe o. Bíbélì sọ pé:

• Ọlọ́run máa “fòpin sí ogun kárí ayé.”​—Sáàmù 46:9.

• Ọlọ́run máa ṣàtúnṣe sí gbogbo àjálù tí ogun ti fà. “Ó máa nu gbogbo omijé kúrò ní ojú wọn, ikú ò ní sí mọ́, kò ní sí ọ̀fọ̀ tàbí ẹkún tàbí ìrora mọ́. Àwọn nǹkan àtijọ́ ti kọjá lọ.”​—Ìfihàn 21:4.

• Ọlọ́run máa mú kí gbogbo èèyàn wà lálàáfíà. “Ibi tí àlàáfíà ti jọba làwọn èèyàn mi á máa gbé, nínú àwọn ibi tó ní ààbò àtàwọn ibi ìsinmi tó pa rọ́rọ́.”​—Àìsáyà 32:18.

Àwọn àsọtẹ́lẹ̀ Bíbélì jẹ́ ká mọ̀ pé, àwọn ogun àtàwọn ìṣẹ̀lẹ̀ burúkú míì tá à ń rí lónìí fi hàn pé àkókò tí àlàáfíà máa jọba ti sún mọ́lé.

Kí ni Ọlọ́run máa ṣe kí àlàáfíà lè jọba kárí ayé? Ó máa lo ìjọba rẹ̀ tó ń ṣàkóso látọ̀rùn. (Mátíù 6:10) Tó o bá fẹ́ mọ̀ nípa ìjọba yìí, àtohun tó máa ṣe fún ẹ, wo fídíò náà Kí Ni Ìjọba Ọlọ́run?