Ṣé Àwọn Àsọtẹ́lẹ̀ Nípa Mèsáyà Fẹ̀rí Hàn Pé Jésù Ni Mèsáyà Náà?

Ohun tí Bíbélì sọ

Bẹ́ẹ̀ ni. Nígbà tí Jésù wà láyé, ó mú ọ̀pọ̀lọpọ̀ àsọtẹ́lẹ̀ ṣẹ nípa “Mèsáyà Aṣáájú,” ẹni tó máa jẹ́ “Olùgbàlà ayé.” (Dáníẹ́lì 9:25; 1 Jòhánù 4:14) Kódà lẹ́yìn tí Jésù kú, àwọn àsọtẹ́lẹ̀ nípa Mèsáyà ṣì ń ṣẹ sí i lára.​—Sáàmù 110:1; Ìṣe 2:34-​36.

• Kí ni ìtumọ̀ “Mèsáyà”?

• Ṣé àwọn àsọtẹ́lẹ̀ nípa Mèsáyà lè ṣẹ sára ẹni méjì tàbí jù bẹ́ẹ̀ lọ?

• Ǹjẹ́ Mèsáyà lè fara hàn lọ́jọ́ iwájú?

• Àsọtẹ́lẹ̀ mélòó nípa Mèsáyà ló wà nínú Bíbélì?

• Àwọn àsọtẹ́lẹ̀ kan nípa Mèsáyà tó ṣẹ sí Jésù lára

Kí ni ìtumọ̀ “Mèsáyà”?

Ọ̀rọ̀ Hébérù náà Ma·shiʹach (ìyẹn Mèsáyà) àti ọ̀rọ̀ Gíríìkì náà Khri·stos (ìyẹn Kristi) túmọ̀ sí “Ẹni Àmì Òróró.” Torí náà, ohun tí orúkọ náà “Jésù Kristi” túmọ̀ sí ni “Jésù, Ẹni Àmì Òróró,” tàbí “Jésù, Mèsáyà Náà.”

Láyé ìgbà tí wọ́n ń kọ Bíbélì, tí wọ́n bá fẹ́ yan ẹnì kan sípò àṣẹ, ṣe ni wọ́n sábà máa ń da òróró sí i lórí. (Léfítíkù 8:12; 1 Sámúẹ́lì 16:13) Ọlọ́run ló yan Jésù ṣe Mèsáyá, ipò àṣẹ ńlá ló sì jẹ́. (Ìṣe 2:36) Àmọ́ dípò kí Ọlọ́run fi òróró yan Jésù, ẹ̀mí mímọ́ ló fi yàn án.​—Mátíù 3:16.

Ṣé àwọn àsọtẹ́lẹ̀ nípa Mèsáyà lè ṣẹ sára ẹni méjì tàbí jù bẹ́ẹ̀ lọ?

Rárá. Tí ẹnì kan bá tẹ̀ka, kò lè jọ ti ẹlòmíì láé. Bẹ́ẹ̀ náà ló rí nípa àwọn àsọtẹ́lẹ̀ tí Bíbélì sọ nípa Mèsáyà tàbí Kristi, ẹnì kan ṣoṣo ló ń tọ́ka sí. Àmọ́ Bíbélì kìlọ̀ pé “àwọn èké Kristi àti àwọn èké wòlíì yóò dìde, wọn yóò sì fúnni ní àwọn àmì ńláǹlà àti àwọn iṣẹ́ àgbàyanu láti ṣi àwọn àyànfẹ́ pàápàá lọ́nà, bí ó bá ṣeé ṣe.”​—Mátíù 24:24.

Ǹjẹ́ Mèsáyà lè fara hàn lọ́jọ́ iwájú?

Rárá. Bíbélì sọ tẹ́lẹ̀ pé Mèsáyà máa jẹ́ àtọmọdọ́mọ Ọba Dáfídì ti Ísírẹ́lì. (Sáàmù 89:3, 4) Àmọ́ àwọn àkọsílẹ̀ ìlà ìdílé àwọn Júù tá a lè tọpasẹ̀ rẹ̀ dórí Dáfídì ti sọ nù, ó ṣeé ṣe kó jẹ́ ìgbà táwọn ará Róòmù ṣẹ́gun Jerúsálẹ́mù lọ́dún 70 S.K ni wọ́n pa á run.a Àtìgbà yẹn ni kò ti ṣeé ṣe kí ẹnikẹ́ni tó bá ń sọ pé ìdílé Ọba Dáfídì lòun ti wá rí ẹ̀rí fi tì í lẹ́yìn. Àmọ́ àwọn àkọsílẹ̀ yẹn ṣì wà nígbà tí Jésù wà láyé, àwọn ọ̀tá rẹ̀ pàápàá ò lè sọ pé irọ́ ló ń pa nígbà tó pe ara rẹ̀ ní àtọmọdọ́mọ Dáfídì.​—Mátíù 22:41-​46.

Àsọtẹ́lẹ̀ mélòó nípa Mèsáyà ló wà nínú Bíbélì?

Kò ṣeé ṣe láti sọ pé iye báyìí ni àsọtẹ́lẹ̀ tó wà nípa Mèsáyà. Bí àpẹẹrẹ, nínú àwọn ẹsẹ Bíbélì tó ṣe kedere pé ọ̀rọ̀ Mèsáyà ni wọ́n ń sọ níbẹ̀ pàápàá, bí àwọn èèyàn ṣe máa ka iye àsọtẹ́lẹ̀ tó wà níbẹ̀ lè yàtọ̀ síra. Àkọsílẹ̀ Aísáyà 53:2-7 mẹ́nu ba ohun mélòó kan tó máa ṣẹlẹ̀ sí Mèsáyà. Àwọn kan lè ka gbogbo ohun tó wà nínú àwọn ẹsẹ yẹn sí àsọtẹ́lẹ̀ kan ṣoṣo, àwọn míì sì lè ka ìṣẹ̀lẹ̀ kọ̀ọ̀kan sí àsọtẹ́lẹ̀ ọ̀tọ̀ọ̀tọ̀.

Àwọn àsọtẹ́lẹ̀ kan nípa Mèsáyà tó ṣẹ sí Jésù lára