• “Gbogbo Ojúṣe Ènìyàn”
    Ilé Ìṣọ́—1997 | February 15

    • 13. (a) Báwo ni Oníwàásù 9:4, 5 ṣe ràn wá lọ́wọ́ láti ní ojú ìwòye títọ́ nípa lílépa òkìkí tàbí agbára? (b) Òkodoro òtítọ́ wo ni ó yẹ kí a dojú kọ bí ìgbésí ayé kò bá jù báyìí náà lọ? (Wo àkíyèsí ẹsẹ̀ ìwé.)

      13 Kí ni irú òkìkí tàbí agbára bẹ́ẹ̀ ń yọrí sí nígbẹ̀yìngbẹ́yín? Bí ìran kan ti ń lọ, tí òmíràn sì ń bọ̀, àwọn olókìkí tàbí alágbára ènìyàn ń kú, a sì ń gbàgbé wọn. Bẹ́ẹ̀ náà ni ọ̀ràn rí ní ti àwọn kọ́lékọ́lé, òṣèré àti àwọn oníṣẹ́ ọnà míràn, àwọn atáwùjọtò, àti bẹ́ẹ̀ bẹ́ẹ̀ lọ, gan-an gẹ́gẹ́ bí ọ̀ràn ti rí ní ti ọ̀pọ̀ jù lọ àwọn òṣèlú àti àwọn ọ̀gá ológun. Nínú gbogbo ẹ̀ka iṣẹ́ wọ̀nyẹn, ẹni mélòó ní pàtó ni o mọ̀, tí ó gbáyé láàárín àwọn ọdún 1700 sí 1800? Sólómọ́nì, ní ọ̀nà tí ó tọ́, sọ ọ̀rọ̀ sí ibi tí ọ̀rọ̀ wà, ní sísọ pé: “Ààyè ajá sàn ju òkú kìnnìún lọ. Nítorí pé alààyè mọ̀ pé àwọn óò kú; ṣùgbọ́n àwọn òkú kò mọ ohun kan, . . . ìrántí wọn ti di ìgbàgbé.” (Oníwàásù 9:4, 5) Bí ìgbésí ayé kò bá sì ju báyìí náà lọ, nígbà náà, lílépa òkìkí tàbí agbára jẹ́ asán ní tòótọ́.a

  • “Gbogbo Ojúṣe Ènìyàn”
    Ilé Ìṣọ́—1997 | February 15

    • a Nígbà kan, Ilé Ìṣọ́ ṣe àlàyé yìí tí ó fi ìjìnlẹ̀ òye hàn pé: “Kò yẹ kí a fi ìgbésí ayé yìí ṣòfò sórí àwọn ohun asán . . . Bí ìgbésí ayé kò bá ju báyìí náà lọ, a jẹ́ wí pé kò ṣe pàtàkì. Ìgbésí ayé yìí dà bíi bọ́ọ̀lù tí a jù sókè, tí kò pẹ́ tí ó fi tún bọ́ sílẹ̀. Ó dà bí òjìji tí ń sáré kọjá lọ, bí òdòdó tí ń rọ, bíi gaga ewé tí a óò gé kúrò, tí yóò sì gbẹ láìpẹ́. . . . Lórí ìwọ̀n ayérayé, gígùn ọjọ́ ayé wa jẹ́ eruku bíńtín. Bí a bá fi àkókò wé odò tí ń ṣàn, ìgbésí ayé wa kò tilẹ̀ tó èékán kan. Dájúdájú, [Sólómọ́nì] tọ̀nà nígbà tí ó ṣàyẹ̀wò ọ̀pọ̀ ìdàníyàn àti ìgbòkègbodò ènìyàn nínú ìgbésí ayé, tí ó sì sọ pé asán ni wọ́n. A kì í pẹ́ kú, ì bá tilẹ̀ dára kání a kò wá rárá, ọ̀kan nínú ọ̀pọ̀ bílíọ̀nù tí ń wá tí ń lọ, tí ọ̀pọ̀ kò tilẹ̀ mọ̀ pé a wá rárá. Ojú ìwòye yìí kì í ṣe ti aṣòfìn-íntótó tàbí ti amúnibanújẹ́ tàbí ti amúnisoríkọ́ tàbí ti amúnigbọ̀n-jìnnìjìnnì. Bí ìgbésí ayé kò bá ju báyìí náà lọ, a jẹ́ pé ojú ìwòyé yìí jẹ́ òtítọ́, òkodoro òtítọ́ pọ́nńbélé, tí ó sì gbéṣẹ́.”—August 1, 1957, ojú ìwé 472 (Gẹ̀ẹ́sì).