KIKHUKU KI 8

Bo ti Kivuka Kibe Monika

‘Beno muḿbanga beni mayangi, nketi nkumbu ziǹkaka muḿbanga kyunda mu zintotolo ziwombo zimukwizilanga.’—1 Petolo 1:6, NW

Ngye wulenda vanga mangolo mwingi dikanda dyaku diba mayangi, vayi valenda bwa mambu malenda botula mayangi minu. (Mpovi 9:11) Angi Nzambi wutusadisanga mu ntangu zimpasi. Kusadila malongi ma Kibibila malenda sadisa ngyeveka na dikanda dyaku kukindama mu mambu ma mpasi.

1 BA LUFYATU MU YAVE

MBI KIBIBILA KIǸTUBA: ‘Yekudilanu bizitu binu byoso kwidi naveka Nzambi, kibila nandi wukulubanzilanga.’ (1 Petolo 5:7, NW) Tebuka moyo ti Nzambi ka twadisanga ko mambu mambi mammonikanga. (Yakobi 1:13) Ngye kutatamana kufikama Yave, nandi wulenda kusadisa mu dyoso kwa dyambu. (Yesaya 41:10) ‘Zibudila Nzambi ǹtim’aku mu lusambulu.’—Minkunga 62:8.

Ngye wulenda baka mbombolo mu kutanga ayi kulonguka Kibibila lumbu ka lumbu. Mawu mala kusadisa wumona bwidi Yave ‘katubombilanga mu mambu moso.’ (2 Kolinto 1:3, 4; Loma 15:4) Nzambi wutukanikisa ‘ndembam’andi yivyokidi dyela dyoso.’—Filipi 4:6, 7, 13.

Mfumu dikanda wuǹsambila na dikanda dyandi va kika ku nzo m̀buku

MBI WULENDA VANGA:

Dinda Yave ka kusadisa wuba malembe mwingi wuyindula mboti
Bo mayindula mambu moso, sola malutidi mboti mu ngyewu

2 WU YIKYEBA AYI DIKANDA DYAKU

MBI KIBIBILA KIǸTUBA: ‘Ǹtima wu muntu widi nzayilu wuḿbakanga ndwenga; matu ma muntu wu ndwenga maǹtombanga nzayilu.’ (Zingana 18:15, NW) Tomba zaba mboti mambu moso ayi bakula kadika muntu va dikanda mbi kaǹtomba. Yoluka yawu ayi yuwa ma baǹtuba. —Zingana 20:5.

Bo ti muntu wuǹtyanga fwidi? Bika mona nsoni mu kudila, kibila “Yesu wudila” mvandi bo ǹkundi’andi kafwa. (Yoane 11:35; Mpovi 3:4) Kuvunda ayi kulala beni dyambu di ḿfunu. (Mpovi 4:6) Diawu dilenda kusadisa kuvumbika ǹtima.

MBI WULENDA VANGA:

Bika kutedimina nteti kivuka kimonika bosi wuyoluka na dikanda dyaku. Tona kuvanga mawu ntangu ayiyi ayi badi va dikanda bala mona mayangi mu koluka yaku bo ti mambu mabe monika
Yoluka na bantu baǹkaka bamonokono mambu beni

3 TOMBA LUSALUSU LUFWENI

MBI KIBIBILA KIǸTUBA: ‘Ǹkundi wukyedika wunzolanga ntangu zyoso, nkomba wukubama mwingi ka kusadisa mu ntangu zimpasi.’ (Zingana 17:17, NW) Bakundi baku baǹtomba kusadisa, vayi basinzaba ko ma balenda kusadisila. Diawu wubakamba lusalusu wuǹtomba. (Zingana 12:25) Tomba lusalusu lu kimpevi kwidi bantu bayunduka mu kimpevi. Bawu balenda kumonisina ntwadusulu yi Nzambi yala kusadisa.—Yakobi 5:14.

Kukalanga na bantu badi kiminu ayi lufyatu mu Nzambi malenda kusadisa mu dyosokwa dyambu wuǹtomba. Kusadisa baǹkaka baǹtomba lusalusu yilenda kubomba ngyeveka. Wuba kamba kiminu kyaku mu Yave ayi zinkanu zyandi katuvana. Wu kivana mu kusadisa baǹtomba lusalusu ayi bika kutatuka bantu ba kutidi ayi ba kuvwilanga ǹkinza.—Zingana 18:1; 1 Kolinto15:58.

MBI WULENDA VANGA:

Solula na ǹkudi’aku wu lufyatu ayi bika ka kusadisa
Zabikisa mboti lusalusu wuǹtomba