Ngonda Yisambuadi

Yesu wulandakana Tat’andi mu phila yivedila mu mambu katuba ayi kavanga—kubunda mvandi mangitukulu—kavanga. (Yoa. 14:9) Mbi tulenda longuka mu mangitukulu Yesu kavanga? Yesu ayi Tat’andi, ba tuzolanga beni. Bo kaba va ntoto, Yesu wumonisa ti waba zolanga beni batu, mu kuvanga mangitukulu muingi kudekula ziphasi ziawu. Khumbu yimueka, babakala buadi baba ziphofo bandinda lusalusu. (Mat. 20:​30-34) Yesu “wu bamona kiadi” ayi wu babelusa. Kikuma basadila mu Kingeleko “wu bamona kiadi” kinsundula kumona kiadi kingolo kuidi wadi yaku. Kiadi akiokio, kintuadusuluanga mu luzolo, kiawu mvandi kivanga Yesu kudikila batu baba mu nzala ayi kubelusa dibakala diba buazi. (Mat. 15:32; Mala. 1:41) Tulenda ba lufiatu ti Nzambi “wedi kiadi” ayi Muan’andi, ba tuzolanga beni ayi bammonanga kiadi bo tuntovuka. (Luk. 1:78; 1 Pet. 5:7) Bukiedika, bawu badi phuila muingi kumanisa ziphasi zioso zi batu! w23.04 3 ¶4-5

Tufueti vanga mangolo muingi tubika tanga ayi kukuwa mambu makhambu fuana, batu mu nza ayiyi bantubanga ti madi mamboti. Tulenda wesa kilunzi kitu mu mambu mamboti, mu kutanga ayi kulonguka Kibibila. Kulandakananga zikhutukunu ayi kuvanganga kisalu ki kusamuna, kunkuiza tusadisa muingi tuba mayindu mamboti. Ayi Yave wu tukanikisa ti kalendi bika ko tuviokila mu zithotolo zio tulendi nunga ko. (1 Ko. 10:12) Kadika mutu mu befu, kafueti tatamana kuvanga nsambu muingi tuba bakuikama mu Yave mu bilumbu abibi bitsuka. Botulanga thangu muingi kuvanga nsambu mu ntima woso. Yave kantomba ‘tunzimbudila ntima’ mu nzila nsambu. (Minku. 62:8) Zitisa Yave ayi ntonda mu mambu moso nandi ka kuvangilanga. Ndinda muingi ka kusadisa kuba kibakala mu kisalu ki kusamuna. Dinda kuidi Yave muingi ka kusadisa kununga mambu maphasi ayi ka kusadisa kununga zioso kua zithotolo zilenda kubuisa mu kiphevi. Kawubika kioso kua kiuma voti mutu ka kutula nkaku muingi kusambilanga kuidi Yave. w23.05 7 ¶17-18

Kibila mbi tunlandikininanga zikhutukunu? Kibila kitheti, muingi kuzitisa Yave. (Minku. 26:12; 111:1) Ayi mvandi tumvangilanga mawu, muingi tukikindasana mu bilumbu abibi biphasi tuidi mu kuzingila. (1 Te. 5:11) Befu kunanguna koku muingi tuvana mvutu, tunzitisanga Yave ayi tukikindasananga. Tala bikaku tulenda dengana bo tumvana mimvutu. Tulenda kuazuka bo tumvana mimvutu voti tulenda ba phuila yi kuvana mimvutu vayi khumbu zinkaka khomba wuntuadisa kasinkuiza tuvana ko luaku alolo. Vayi mbi bilenda ku tusadisa mu mambu amomo? Mvuala Polo wutubila nkinza wu “kukindasananga befu na befu.” Tunkuangalalanga beni kuzaba ti, kheti mimvutu mitu midi mikhufi, vayi minsadisanga bankaka. Ayi kheti basa tusola ko, tunkuangalalanga kuzaba ti tumvananga luaku kuidi bankaka muingi bavana mimvutu.—1 Pet. 3:8. w23.04 20 ¶1-3

Ntinu Babiloni wuvana ndubu kuidi basi Yuda baba ku buvika ku Babiloni mu 70 di mimvu, muingi bavutuka ku ntoto’awu ku Isaeli. (Esala 1:​2-4) Yave to wununga kuvanga mawu. Kibila mintinu mi basi Babiloni babasa bikanga ko mimvika bavutuka mu ntoto’awu. (Yesa. 14:​4, 17) Batulula Babiloni, diawu ntinu wuvingana mu luyalu kakambila basi Yuda bavutuka ku ntoto’awu. Mu kibila akiokio, vaba tombulu basi Yuda bulutidi zimfumu zi makanda babaka makani mankinza ma kubika Babiloni voti kutatamana kuna. Disa ba ko diambu diluelu kubaka makani amomo. Bawombo mu bawu baba biboba ayi khanu batula luzingu luawu va kingela mu kuvanga viage. Ayi bankaka babutukila ku Babiloni diawu basa zaba ko kuma kunkaka. Ayi bawu babasa tadilanga ko Isaeli banga ntoto’awu vayi ntoto wu matata mawu. Ayi bawombo mu basi Yuda, baba luzingu lumboti ku Babiloni diawu bamona phasi kubika nzo’awu, lungoso luawu muingi kukuenda ku ntoto bakhambu zaba. w23.05 14 ¶1-2

Diambu di Nzambi di tukindisanga kukuna zikhadulu dedi, kukindama, kiadi ayi luzolo. Buku yi Luka 21:19 yintuba: “Mu kibila ki kukindama kuinu, benu munkuiza vukisa luzingu luinu.” Buku yi Kolosai 3:12 yintuba: “Banu bankua . . . kiadi.” Ayi 1 Tesalonika 4:​9, 10 yintuba: “Nzambi wu tulongisanga tuzolasana befu na befu. . . . Diawu tu mulubula zikhomba, mutatamana kuvanga mawu.” Matangu moso amomo, basonikina mawu kuidi Baklistu baba monisanga zikhadulu dedi kukindama, kiadi ayi luzolo. Vayi kheti bobo, vaba tombulu batatamana kukuna zikhadulu aziozio. Befu mvitu tufueti vanga mawu. Diawu mona buidi Baklistu mu sekulu yitheti bamonisina zikhadulu aziozio. Bosi mona buidi wulenda landikinina kifuani ki Baklistu abobo. Ayi buidi tulenda bakila bivisa ti tuidi bakubama mu ziphasi zingolo. Diawu, bo ziphasi zingolo ziala tona, ngie wala kindama ayi wala baka makani ma kutatamana kukindama. w23.07 3 ¶4, 8

Boso kua bubela, kheti tuidi Baklistu basolo voti “mamemi mankaka,” befu boso tufueti tatamana “mu nzila yi busonga.” Kibila mawu mala tunata ku paladizu yi kiphevi muingi tutambula lusakumunu mu nzila Kintinu ki Nzambi. (Yoa. 10:16) Tona mu mvu 1919 T.K., bivevi na bivevi bi babakala, bakietu ayi bana balezi bambotukanga ku Babiloni yinneni ayi bandiatilanga mu nzila yi busonga. Yave wubotula bikaku bioso mu nzila yi basi Yuda babasika ku Babiloni. (Yesa. 57:14) Vayi mbi tulenda tuba matedi nzila “Yi Busonga bubu”? Kuvioka 100 di mimvu kumbusa ava 1919, Yave wusadila babakala bakuikama muingi kusadisa kubotula batu ku Babiloni Yinneni. (Dedikisa na Yesaya 40:3.) Babakala abobo bakuikama, bavanga mamoso banunga muingi kukubika nzila yi kiphevi, kusadisa batu baba mintima mikubama muingi babotuka ku Babiloni Yinneni ayi bakota ku paladizu yi kiphevi ko bavutula mbuongimini yikiedika. w23.05 15-16 ¶8-9

Yave wuntomba tunsadila mu mayangi ayi mu ntima woso. (2 Ko. 9:7) Vayi bukiedika ti tufueti vanga mangolo muingi kudukisa makani tutsikika? Tala kifuani ki mvuala Polo. Nandi wutuba: “Yinyalanga nyitu’ama banga mvika.” (1 Ko. 9:​25-27, nota.)Mvuala Polo wuvanga mangolo ma kuvanga mambu mamboti kheti disa ba ko diambu diluelu kuvanga mawu. Bukiedika ti Yave wuyangalala mu mambu Polo kavanga? Ngete. Kibila Yave wusakumuna mangolo kavanga. (2 Ti. 4:​7, 8) Yave wunkuangalalanga beni kumona mangolo tuidi mu kuvanga muingi kudukisa makani mitu kheti tuisi ko phuila yi kuvanga mawu. Kheti nandi zebi ti tuzolanga ko kuvanga mawu vayi nandi wunkuangalalanga kibila zebi ti tuidi mu kuvangila mawu mu kibila ki luzolo tuidi mu nandi. Ayi dedi bo kasakumunina mvuala Polo, Yave mvandi wunkuiza tusakumuna mu mangolo tuidi mu kuvanga. (Minku. 126:5) Bo tummona lusakumunu lu Yave, mawu mankuiza buela phuil’itu. w23.05 29 ¶9-10

Mvuala Polo, wudedikisa baboso balasa vuka ko dedi batu badi mu kulala. Kibila basa zaba ko mambu madi mu kuvioka ayi thangu tuidi mu kuzingila. Diawu balendi mona ko mambu madi mu kuvioka ayi mbi bafueti vanga. Diawu, tulenda tuba ti bawombo badi mu kulala mu kiphevi. (Lom. 11:8) Bawu bakikininanga ko ti tuidi mu kuzingila mu “bilumbu bitsuka” ayi ti ziphasi zingolo ziambelama kukuiza. (2 Pet. 3:​3, 4) Vayi befu tunkikininanga ti dilongi di kutatamana bakotuka mu kiphevi didi beni nkinza bubu, kibila tsukulu yi nza yidi mu kuefikamanga. (1 Te. 5:6) Diawu tufueti ba bavumbama ayi bakuikama. Kibila mbi? Muingi tubika vukumuka mu mambu ma pulitika ayi mu mambu mankaka ma nza ayiyi. Zithotolo muingi kubuela mioko mambu amomo, zinluta buelamanga bo tuidi mu kuefikamanga mu kilumbu ki Yave. Vayi kheti bobo, tulendi kuazuka ko beni mu matedi mbi tunkuiza vanga, kibila phevi yi Yave yinkuiza tusadisa kuba bavumbama, mu nsika ayi kubaka makani mamboti.—Luk. 12:​11, 12. w23.06 10 ¶6-7

Mbi wunyindulanga bo wunkuwa dizina Samisoni? Boti ngie wunyindulanga ti wuba dibakala diba beni mangolo, buna make makiedika. Vayi Samisoni wubaka makani mambi mantuadisa ziphasi. Vayi kheti bobo, Yave wusikika thalu mu lukuikumunu lu Samisoni mu kutuadisa batu basonika mambu kavanga mu Kibibila, muingi tubaka ndandu. Yave wusadila Samisoni kuvanga mangitukulu muingi kukula basi Isaeli. Buviokila thangu mu nzila phevi yinlongo, Yave wutuadisa mvuala Polo muingi kasonika dizina di Samisoni mu nkangu wu batu ba kiminu. (Ebe. 11:​32-34) Kifuani ki Samisoni khindusulu kidi kuidi befu. Nandi waba fiatilanga mu Yave kheti bo kaba viokilanga mu mambu maphasi. Tulenda baka khindusulu mu kifuana ki Samisoni. w23.09 2 ¶1-2

Befu tulenda kindisa kukindama kuitu mu kusambilanga kuidi Yave ayi kunzabikisa mayindu mitu. (1 Te. 5:17) Ḿba ngie bubu wisimviokila ko mu mambu mawombu maphasi. Vayi, bukiedika ti wuntombanga thuadusulu yi Yave boti wisa zaba ko ma kuvanga bo widi mu nganzi ayi divuda? Ngie kuba kifu ki kuzabikisanga mabanza maku kuidi Yave mu mambu wumviokila, wisinkuiza mona ko phasi kuvanga mawu bo wala viokila mu mambu maphasi mu bilumbu binkuiza. Kibila wala ba lufiatu ti nandi zebi thangu mbi ayi mbi kankuiza vanga muingi ku kusadisa. (Minku. 27:​1, 3) Befu kukindama bubu, tuala luta ba bakubama muingi tukindama bo ziphasi zingolo ziala tona. (Lom. 5:3) Kibila mbi tulenda tubila mawu? Kibila zikhomba ziwombu batuba ti bo bakindama mu zithotolo baviokila, mawu maba sadisa kukindama mu zithotolo baviokila kuntuala. Bawu bakindama mu lusalusu lu Yave ayi maba vana lufiatu ti Yave widi wukubama muingi kuba sadisa. Lufiatu alolo luba sadisa kuluta kindama mu ziphasi zinkaka baviokila kuntuala.—Tia. 1:​2-4. w23.07 3 ¶7-8

Yave wukikululanga ayi wummonanga kiadi. Zikhadulu aziozio, zikumvanganga kuba mayindu mafuana. Dedi, Yave wumonisa ti wukikululanga, bo kabaka makani ma kutulula divula di Sodoma. Mu nzila zimbasi ziandi, Yave wukamba Loti muingi katina ku miongo. Vayi Loti wumona boma bu kukuenda kuna. Diawu Loti kadindila Yave nsua muingi nandi ayi dikanda diandi batina ku divula baba tedilanga Zoali. Divula beni diba diluelu ayi diba mu khati divula Yave kabaka makani ma kutulula. Diawu Yave khanu wukuika Loti muingi kalandakana mambu moso kankamba. Vayi masi ko mawu kavanga. Kibila Yave wumvana luaku muingi kenda ku divula beni di Zoali, kheti maba sundula kubika kubue tulula divula beni. (Ngene. 19:​18-22) Mimvu miwombo kuntuala, Yave wumonisa kiadi kuidi basi Ninive. Nandi wufila mbikudi Yona muingi ke zabikisa tsangu ti divula beni, dinkuiza tuluka. Vayi, bo basi Ninive manhongina masumu mawu, Yave wuba mona kiadi ayi kasa be tulula ko divula beni.—Yona 3:​1, 10; 4:​10, 11. w23.07 21 ¶5

Mbi tulenda longuka mu kifuani ki Yoasi? Tulenda dedikisa Yoasi na nti wuluelu wukhambu ba zinganzi zikinda, wabe tombulu lusalusu lu nti wunkaka muingi kukonzuka. Bo mutu waba kumvananga malongi kafua, Yoasi wutona kukuwa malongi mambi, diawu kasa tatamana ko wukuikama mu Yave. Kifuani akiokio kitulonga ti tulendi tumukina ko to Yave kibila basi dikanda ditu voti zikhomba mu kimvuka bamvanganga mawu. Diawu muingi tutatamana bakindama mu kiphevi, tufueti vanganga ndogukulu’itu, kuyindula mambu tunlonguka ayi kuvanganga minsambu. (Yele. 17:​7, 8; Kolo. 2:6) Yave kalendi ku tudinda ko tuvanga mambu mo tulendi nunga ko. Nandi wuntomba tuvanga mambu madi mu Mpovi 12:​13, yintuba: “Vumina Nzambi yikiedika ayi tumukina zithumu ziandi. Kibila mawu batu boso bafueti vanga.” Befu kuvumina Nzambi, tuala ba bakuikama mu moso kua mambu malenda ku tumonikina ayi vasi ko kiuma kilenda tulula kikundi kitu na Yave. w23.06 19 ¶17-19

Lufiatu Nzambi katuvana, luntona kutubila abubu: ‘No wuba wukala va kikundu kimfumu wutuba.’ (Nzai. 21:5a) Mambu amomo nkinza madi kibila naveka Yave mu zikhumbu zitatu wuyoluka mawu mu buku yi Nzaikusu. Diawu tulenda bela lufiatu ti bakana ko mbasi voti Yesu wutuba mambu amomo, vayi naveka Yave! Mambu amomo mamvana bivisa ti tulenda fiatila mu mambu katuba kuntuala. Kibila mbi? Kibila Yave “kavunanga ko.” (Titu 1:2) Diawu tulenda ba lufiatu mu mambu madi mu lutangu lu Nzaikusu 21:​5, 6. Mona diambu dinkaka Yave katuba, ‘Tala!’ Kikuma ki Kingelego basekula ‘tala!’ ba kisadila khumbu ziwombu mu buku yi Nzaikusu. Buabu mbi Nzambi katuba kuntuala? Nandi wutuba: ‘Yimvanga biuma bioso bimona.’ Bukiedika, Yave wutubila matedi mambu mala monika kuntuala, vayi kuidi nandi lukanu alolo luidi lukiedika. Diawu katubila mambu mala monika kuntuala, buka ti masalama.—Yesa. 46:10. w23.11 3-4 ¶7-8

Mvuala Petelo wunuana nzingu mu zinzimbala ziandi. Mona bifuani. Bo Yesu kasudikisa buidi kankuiza tovukila ayi kankuiza fuila muingi kudukisa zimbikudulu zi Kibibila, Petelo wunkamba: Mawu masinkuiza kumonikina ko. (Mala 8:​31-33) Khumbu ziwombu Petelo ayi bapostolo bankaka, baba kuambilanga matedi nani lutidi mu bawu. (Mala 9:​33, 34) Mu builu butsuka ava Yesu kafua, Petelo wuzenga dikutu di dibakala dimueka. (Yoa. 18:10) Mu builu beni, mu kibila ki boma Petelo wumanga khumbu zitatu ti wuzaba Yesu. (Mala 14:​66-72) Mambu amomo, mavanga Petelo kudila. Yesu kasa vongila ko mvuala Petelo. Mu lufiatu, nandi wumvana luaku muingi kummonisa luzolo. Diawu Yesu kantumisina muingi kukieba mamemi mandi. (Yoa. 21:​15-17) Petelo wutambula kiyeku akiokio mu phila yimboti. Ayi mu kilumbu ki Pentekote ku Yelusalemi, nandi wuba wumueka mu batu batheti batambula phevi yinlongu. w23.09 22 ¶6-7

Mvuala Petelo wukindisa bakulutu yandi ba kimvuka ‘bakengidila mamemi ma Nzambi’. (1 Pet. 5:​1-4) Boti ngie widi nkulutu wu kimvuka, tuzebi ti wunzolanga zikhomba ziaku ayi widi wukubama muingi kuba sadisa. Vayi thangu zinkaka wulenda mona ti widi mawombu ma kuvanga ayi wumbanga wuvonga muingi kudukisa kiyeku akiokio. Mbi wulenda vanga? Yekula bizitu bioso kuidi Yave. Mvuala Petelo wusonika: ‘Boti mutu wutambula kiyeku, buna kakisadila mu mangolo Nzambi kakumvana.’ (1 Pet. 4:11) Bukiedika zikhomba ziaku mu kimvuka, bamviokilanga mu mambu maphasi mala mana to ku nza yimona. Vayi tebukanga moyo ti Yesu Klistu “nsungi wulutidi,” wala kuvana mangolo mantombulu muingi wuvanga kiyeku kiaku. Nandi kalenda kuvana mangolo mu bilumbu abibi ayi mu nza yimona. Diawu Nzambi wuntomba ti bakulutu ba kimvuka, bazola zikhombo ziawu, baba kindisa ayi baba “bifuani bimboti kuidi mamemi.” w23.09 29-30 ¶13-14

Tufueti bika kuyindula dedi batu bakhambu tumukinanga minsiku mi Yave. Kibila befu kutadila mambu mu mbuenu yi batu, mawu malenda tuvanga kubayisa minsiku mi Yave. (1 Ko. 3:19) ‘Nduenga yi nza’ yimvanganga batu kukhambu tumukina Nzambi. Baklistu bankaka ku divula di Pelegamu ayi Tiatila balandakana zikhadulu zimbi zi batu baba vanganga kitsuza ayi baba buongiminanga zinzambi zi luvunu. Yesu wuba semba mu kubika bifu abiobio kukota mu kimvuka. (Nzai. 2:​14, 20) Bubu, batu bawombu ba tuvukumunanga muingi tuba mayindu makhambu fuana. Basi dikanda ayi batu tuzebi balenda tukamba ti vasintombulu ko kulandakana minsiku mioso mi Yave. Dedi, balenda kutukamba ti kudukisa zitsatu zitu zi kinsuni diawu diambu diluti nkinza ayi zithuadusulu zi Kibibila zisiala ko luvalu. Khumbu zinkaka tulenda yindula ti zithuadusulu zi Yave zisi ko zifuana. Ayi ḿba tulenda tomba kusabuka ndilu mu ‘mambu masonama.’—1 Ko. 4:6. w23.07 16 ¶10-11

Malia, ngudi Yesu waba tomba khindusulu. Nandi kasa ba ko wukuela, vayi wunkuiza ba buemba. Kheti nandi kabutidi’abu ko ayi kayonzudi’abu ko muana, vayi vankuiza tombulu nandi kukieba muana wunkuiza ba Mesia. Ayi bo nandi kabundiniabu ko nyitu, buidi Malia kankuiza sudikisila mambu amomo kuidi Yosefi? (Luka 1:​26-33) Buidi Malia kabakila khindusulu? Nandi wutomba lusadusu kuidi bankaka. Dedi, nandi wudinda kuidi mbasi Ngabilieli muingi kunsudikisa matedi kiyeku beni. (Luk. 1:34) Buviokila thangu, nandi wuvanga viagi ku “kizunga kiba mongo” ku divula dimueka ku Yuda muingi kuetala musi dikanda diandi, Elizabeti. Elizabeti wunyunga Malia ayi mu thuadusulu yi phevi yinlongo nandi wubikula mbikudulu yikhindusulu yitedi muana Malia kankuiza buta. (Luk. 1:​39-45) Malia wutuba ti Yave, “wuvengi mambu ma kukuitukila mu mioko miandi.” (Luk. 1:​46-51) Yave wusadila mbasi Ngabilieli ayi Elizabeti muingi kukindisa Malia. w23.10 14-15 ¶10-12

Mua batu to basolo mu minlandikini mi Yesu, mu phevi yinlongo ayi badi lunungu va mesu ma Yave. Thalu yi batu abobo, yidi 144.000 badi luaku lu kuba zinganga Nzambi ku diyilu na Yesu. (Nzai. 14:1) Nzo Yinlongo yidi mbonosono ti bawu basolo, banga bana ba Nzambi ba kiphevi bo bakhidi va ntoto. (Lom. 8:​15-17) Kibuangu Kilutidi Kinlongo kidi mbonosono yi kibuangu Yave kankalanga ku diyilu. “Nledi” waba kaba kibuangu Kinlongo ayi Kilutidi Kinlongo wummonisa nyitu yi kinsuni yi Yesu ava kukota ku diyilu banga Mfumu yi Zinganga Nzambi ku tempelo yi kiphevi. Bo kavana nyitu’andi banga khudulu mu kibila ki batu, Yesu wuzibula nzila kuidi baklistu basolo muingi kuzingila ku diyilu. Bawu mvawu bafueti bika nyitu’awu yi kinsuni muingi batambula nsendo wu kukuenda ku diyilu.—Ebe. 10:​19, 20; 1 Koli. 15:50. w23.10 28 ¶13

Bo basi Efalamita bantumbudila Ngidioni, nandi wuba tambudila mu phila yimboti. (Minkongu 8:​1-3) Mawu masadisa baba mu ndembama. Bakulutu ba kimvuka badi nduenga, banlandakananga kifuani ki Ngidioni mu kukuwa mu mvibudulu ayi kutambudila mu luzolo bo ba kuba fundisa. (Tia. 3:13) Kuvanga mawu mantuadisanga ndembama mu kimvuka. Ngidioni banzitisa beni bo kanunga basi Midiani. Vayi nandi wuvana nzitusu yoso kuidi Yave. (Minkongu 8:​22, 23) Buidi zikhomba badi biyeku balenda landikinina kifuani ki Ngidioni? Balenda vangila mawu mu kuvana nzitusu yoso kuidi Yave mu mamoso bamvanganga. (1 Ko. 4:​6, 7) Dedi, boti nkulutu wu kimvuka widi wupisuka mu kulonga ayi ba kuntonda mu mawu, nandi kalenda vana nzitusu yoso kuidi tho yi malongi beni, Kibibila ayi mvandi mu khubumunu tuntambulanga mu kimvuka ki Yave. Mvandi balenda kuyikuvusa: Yidi mu kulongila mu phila yinzitisa Yave voti yintomba to nzitusu yi batu? w23.06 4 ¶7-8

Boti tutambudi’abu ko mimvuntu mi minsambu mitu, buna tufueti kuyikuvula, ‘Yidi mu kudinda diambu difuana?’ Khumbu zinkaka, befu tummuenanga ti tuzebi mambu mafueni mu befu. Vayi mambu tundinda mu minsambu, ḿba malendi ku tutuadisa ko ndandu mu mimvu miwombo. Boti tuidi mu kudinda diambu dimueka mu nsambu, ḿba valenda ba diambu dimueka dilutidi na dio tuidi mu kudinda. Kibila mambu mankaka tundindanga, masi ko kithuadi na luzolo lu Yave. (1 Yoa. 5:14) Dedi, tala kifuani ki matata. Bawu balenda dinda kuidi Yave, muingi kasadisa muan’awu katatamana mu kiedika. Adiodio didi diambu dimboti. Vayi Yave kakuikanga ko ni mutu mu befu muingi kunsadila. Nandi wuntomba muingi befu boso, kubunda mvandi bana bitu, tusola kunsadila. (Deute. 10:​12, 13; 30:​19, 20) Diawu, khanu matata badinda kuidi Yave muingi kaba sadisa kunyikuna ntima wu muan’awu muingi nandi kazola Yave ayi kaba nkundi’andi.—Zinga. 22:6; Efe. 6:4. w23.11 21 ¶5; 23 ¶12

Kibila mbi kubombasana befu na befu yidi phila yinkinza yi kumonisina luzolo? Dedi buntubila buku yimueka, kikuma Polo kasadila muingi kutubila “kubombasana,” kinsundula “kuba va khonzu mutu widi mu kuviokila mu mambu ma phasi muingi kunkindisa.” Mu phila ayoyo, kubomba kunsadisanga khomba widi wulebakana kukindama ayi kutatamana kudiatila mu nzila yi luzingu. Ayi kadika khumbu tumbomba khomb’itu, tumonisanga ti tukunzolanga. (2 Ko. 7:​6, 7, 13) Kumona kiadi ayi kubomba kuidi nguizani. Kibila mutu wummonanga kiadi wadi yandi, nandi wu kumbombanga ayi wu kunsadisanga mu mambu kadi mu kuviokila. Theti tummonanga kiadi bosi tumbombanga. Mona buidi Polo kamonisina nguizani yidi kiadi ki Yave na mbombolo ka tuvananga. Polo wusonika ti Yave widi ‘Tata nkua kiadi ayi Nzambi yinkua mbombolo.’—2 Ko. 1:3. w23.11 9-10 ¶8-10

Minlandikini mioso mi Yesu, bala viokila mu zikhuamusu. Mona kifuani ki mvuala Polo. Nandi, wukamba kuidi basi Tesalonika: “Bo befu tuba yinu va kimueka, tu lulubula ti tuala viokila mu zikhuamusu ayi mawu madi mu kumonika.” (1 Te. 3:4) Ayi kuidi Baklistu ku Kolintu nandi wutuba: “Befu tuntomba muingi benu muzaba ziphasi tuviokila. . .Diawu tuyiza bela beni boma ayi luzingu luitu mvandi luba va kingiela.” (2 Ko. 1:8; 11:​23-27) Bubu mvandi, Baklistu bala viokila mu mintindu mioso mi zikhuamusu. (2 Ti. 3:12) Ayi ḿba bo ngie wuyiza ba kimunu mu Yesu ayi kuba nlandikini’andi, bakundi ayi basi dikanda ba kuvueza. Ngie widi wukubama muingi kuviokila mu zikhuamusu ku kisalu mu kutubanga kiedika mu mambu moso? (Ebe. 13:18) Ngie wumviokilanga mu zikhuamusu kuidi ntinu mu kibila ki kusamuna zitsangu zimboti kuidi batu? Zioso kua ziphasi tumviokila, mvuala Polo wutuba ti tufueti kuangalala. w23.12 10-11 ¶9-10

Yakobi wuviokila mu mambu maphasi. Bana buadi ba Yakobi, Simoni ayi Levi, batuadisa ziphasi va dikanda diawu ayi basa kinzika ko dizina di Yave. Mvandi nkazi’andi Lakeli kaba luta zolanga, wufua bo kaba buta muan’andi wumuadi. Ayi kheti wuba kinunu, mu kibila ki nzala, Yakobi wuyenda kue zingila ku Ngipiti. (Ngene. 35:​16-19; 37:28; 45:​9-11, 28) Kheti mu mambu mosu amomo kaviokila, Yakobi wutatamana kuba kiminu mu Yave ayi mu zikhanu ziandi. Mu kibila akiokio, nandi wubaka lunungu va mesu ma Yave. Dedi, Yave wusakumuna Yakobi muingi kaba busina. Ayi yindula buidi Yakobi kavutudila Yave matondo bo kabue mona muan’andi Yosefi—wo nandi kaba yindulanga ti wufua! Yakobi wutatamana kuba kikundi kifikama na Yave, kheti mu mambu moso maphasi kaviokila. (Ngene. 30:43; 32:​9, 10; 46:​28-30) Befu kutatamana kufikama Yave, mvitu tulenda nunga mambu maphasi malenda ku tumonikina mu kinzimbukulu. w23.04 15 ¶6-7

Minkunga 23 widi nkunga wummonisa lufiatu lu luzolo ayi lukiebu lu Yave. Davidi, nsoniki wu nkunga awowo, wutubila luzolo lungolo kaba na nsungi’andi Yave. Davidi wumona nsika mu kubika Yave kantuadisa ayi nandi waba fiatilanga mamoso mu Yave. Davidi wuzaba ti Yave wala kummonisa luzolo luandi mu bilumbu biandi bioso bi luzingu. Mbi bimvana lufiatu alolo? Davidi wumona ti Yave waba kunkiebanga kadika thangu. Davidi mvandi wubaka ndandu mu kikundi ayi mu nlemvu wu Yave. Diawu kabela lufiatu ti dioso kua diambu dilenda kummonikina ku ntuala, Yave wala kunkieba mu mamoso. Lufiatu Davidi kaba mu luzolo lungolo lu Yave, luluta ba lungolo kena dioso kua diambu dilenda kunkuazula ayi maba kumvananga mayangi mawombo.—Minku. 16:11. w24.01 29 ¶12-13

Tona Mvita Wummuadi wulutidi mu nza, dikabu di Yave mu zitsi ziwombu badi mua ndembama ayi luaku lu kubuongimina Yave. Ayi bawu bansadilanga luaku alolo, muingi kukivana mu kisalu ki kusamuna. Bukiedika, kisalu kitembakana beni. Bubu, zikhomba badi mu Dingumba Dintuadisi bantatamananga kulandakana thuadusulu yi Klistu. Diawu bamvangilanga mangolo ma kuvana zithuadusulu zibongulu mu Kibibila kuidi zikhomba. Mvandi minkengididi mi bimvuka ayi bakulutu ba kimvuka banzabikisanga zithuadusulu aziozio, kuidi bimvuka. Zikhomba aziozio, badi va “koko kulubakala ku Yesu.” (Nzai. 2:1) Bukiedika, bakulutu ba kimvuka badi batu basumuka ayi bamvanganga zinzimbala. Mose, Yosua ayi bapostolo mvawu bavanga zinzimbala. (Zinta. 20:12; Yosua 9:​14, 15; Lom. 3:23) Vayi kheti bobo, Klistu widi mu kutatamana kutuadisa kisadi ki kuikama ayi bakulutu bantatamananga kuvanga mawu. Diawu tuidi bibila biwombu muingi kukikinina thuadusulu Yave katuvananga mu nzila batu kansadilanga muingi batuama ntuala. w24.02 23-24 ¶13-14

Bubu, tulenda yangidika Yave mu kutubila matedi nandi mu phila yimboti, mu kuntonda ayi mu kunzola. Bo tuidi mu kisalu ki kusamuna, tunsikikanga thalu mu kusadisa batu kufikama Yave ayi batadila Tat’itu yi luzolo mu phila tukuntadilanga. (Tia. 4:8) Befu tuidi luaku lu kumonisa kuidi batu buidi Kibibila kintubila matedi Yave mu kumonisa luzolo luandi, busonga, nduenga, lulendo ayi zikhadulu zinkaka. Mvandi tunzitisanga Yave ayi tukunkuangidikanga mu kuvanga mangolo muingi kulandakana kifuani kiandi. Bo tumvanga mawu, tummonisanga ti tuidi disuasana na batu bankaka. (Mat. 5:​14-16) Ayi bo tumviokisanga thangu ayi batu abobo, tulenda kuba sudikisa kibila mbi tuididi disuasana na bawu. Ayi mawu mamvanganga batu badi mintima mikubama muingi batomba kufikama Nzambi’tu. Bo tunzitisa Yave, befu tukunkuangidikanga.—1 Ti. 2:​3, 4. w24.02 10 ¶7

Muingi wuba wuyonzuka mu kiphevi, vantombulu ngie kusikika makani ma kiphevi. Mawu, mala kusadisa kukikinina biyeku mu kimvuka, kubaka kisalu kilenda kuzingisa voti kuzingisa dikanda diaku ayi kuzinga buboti na bankaka. Dedi, longuka kutanga ayi kusonika buboti. Kibibila kintuba ti mayangi ayi ndandu kuidi mutu wumbotulanga thangu kadika kilumbu muingi kutanga Diambu di Nzambi ayi kuyindula mu diawu. (Minku. 1:​1-3) Mu kutanganga Kibibila kadika kilumbu, kuala kusadisa kuzaba phila Yave kanyindudilanga ayi ku kusadisa kuyindula buboti. (Zinga. 1:​3, 4) Zikhomba zi babakala ayi zi bakietu, bantomba lusalusu lu zikhomba ziyonzuka mu kiphevi muingi kulonga ayi kuvana malongi mabongulu mu Kibibila. Ngie kuzaba kutanga ayi kusonika buboti, kuala kukindisa kiminu kiaku, kusadisa kuvanga buboti malongi, kuvana mimvutu minkindisa bankaka ayi kukindisa kiminu kiawu. w23.12 26-27 ¶9-11

Ngie kuba mu boma, yindula mbi Yave kala vanga mu bilumbu binkuiza, bo Satana kala bungua. Thuadusulu yi Lukutukunu lu Mavula lu mvu 2014, yimmonisa tata mueka waba yindula na dikanda diandi buidi mambu madi mu 2 Timoti 3:​1-5 mala bela disuasana ku paladizu. Ku nza yimona kuala ba beni mayangi ayi mambu mala bela abubu: “Batu bela luta zola bankaka, bala zola kiedika, bala zaba zindilu ziawu, bala kikululanga, bala zitisa Nzambi, bala zitisa matata, bala tondanga, bala ba bakuikama, bala monisa luzolo kuidi basi dikanda diawu, bala ba bakubama muingi kudedikisa mambu, bala kolukanga buboti na bankaka, bala zaba kukiyala, bala ba bavumbama, bala zola mamboti, bala ba batu ba lufiatu, bala ba mayindu mamboti, bala ba bakuikama, bala luta zola Nzambi kena minyengu, bala sadila Nzambi ayi batu abobo bala ba va kimueka.” Ngie wunsolulanga na dikanda diaku voti na bakundi baku matedi buidi luzingu luela bela ku nza yimona? w24.01 6 ¶13-14

Mayangi beni kuzaba ti dikabu di Nzambi didi lunungu luandi! Kibibila kintuba: ‘Yave wunkuangalalanga mu dikabu diandi.’ (Minku. 149:4) Khumbu zinkaka tulenda ba mu kiunda ayi kuyikuvusa: ‘Bukiedika ti minu yidi lunungu va mesu ma Yave?’ Bisadi biwombu bi Yave mu thangu yikhulu, baba kuyikuvusanga mambu amomo. (1 Samu. 1:​6-10; Yobi 29:​2, 4; Minku. 51:11) Kibibila kimmonisa ti batu ba masumu, balenda baka lunungu lu Yave. Buidi? Mu kulekila kiminu mu Yesu ayi kubotama. (Yoa. 3:16) Mu phila ayoyo, tulenda monisa kuidi batu boso ti befu tuma nyongina masumu mitu ayi tunkanikisa kuvanga luzolo lu Nzambi. (Mav. 2:38; 3:19) Yave wunkuangalalanga beni bo tumvanga mambu amomo, muingi kuba yandi kikundi kifikama. Bo tumvanga mangolo muingi kuzingila mu mambu tukanikisa kuidi Yave, nandi wu tumonisanga ti tuidi lunungu luandi ayi wu tutadilanga bakundi bandi.—Minku. 25:14. w24.03 26 ¶1-2

Tulenda landakana kifuani ki minlandikini mi Yesu, mu kutatamana kusamuna kheti zimfumu zi luyalu ba tukandimina kuvanga mawu. Tulenda ba lufiatu ti Yave wala tusadisa kununga kuvanga kisalu kitu ki kusamuna. Tulenda sambila muingi kudinda kibakala ayi nduenga. Zabikisa kuidi Yave mambu widi mu kuviokila mu nsambu dedi bo wumvangilanga bo wunkoluka na nkundi’aku wufikama. Ba lufiatu ti Yave wunkuiza kusadisa.” (Minku. 37:​3, 5) Kutatamana kuvanga nsambu wunkuiza kusadisa bo “wumviokila mu zithotolo.” (Lom. 12:12) Yave wummonanga mambu moso maphasi bisadi biandi bikuikama bamviokilanga ayi—“nandi wunkuwanga bo bakundinda lusalusu.”—Minku. 145:​18, 19. w23.05 5-6 ¶12-15

Bo tumbaka makani mankinza tufueti yindula buidi buididi “luzolo lu Yave” ayi kudukisa makani mu kulandakana luzolo beni. (Efe. 5: 17) Bo tumbakula minsua mi Kibibila midedakana na mambu tumviokila, mawu mansundula ti tuidi mu kutomba lusalusu lu Yave. Ayi befu kusadila minsua beni tunkuiza baka makani mamboti. Mben’itu Satana ‘nkua mambi,’ wuntomba befu tukivana beni mu mambu ma nza ayiyi muingi tubika baka thangu yi kukivana mu mambu ma kintinu. (1 Yoa. 5:19) Dilenda ba diambu diluelu Baklistu kutsikika mayindu mu kubaka zimbongo dedi kuvanga kikola kinangama voti kutomba kubaka biuma bi nza ayiyi kubika kuandi kusadila luaku badi muingi kusadila Yave. Makumonika mansundula ti tuidi mu kuyindudila phila batu mu nza ayiyi banyindudilanga. Kubaka biuma abiobio disi ko diambu dimbi, vayi dilenda ba diambu dimbi befu kutula biawu va theti mu luzingu luitu. w24.03 24 ¶16-17